الموضوع: تجربتي مع الكارينز وشقاوتها

المشاركة الأصلية كتبت بواسطة land_cruiser

هو يا فندم لو حضرتك ركزت في تعليقي السابق هتلاحظ ان اللي حضرتك كاتبه ده هو نفس المعني اللي انا كنت كاتبه في تعليقي و لكن انا لم أضيف اي نوع من السخريه او ربما المبالغه زي اللي حضرتك كاتبها المره دي و التعليق موجود عند حضرتك حتي كمان حكايه فرق السعر قصاد الامكانيات دي انا كمان ذكرتها و اتكلمت عن مزايا العربيه و عيبها بطريقه محايده. جايز تكون هناك بعض الردود اللي تحمل طابع السخريه من المبالغه في الموضوع لكن ردي مكنش منها لأن ده مش أسلوبي ابدا و تقبل احترامي

على فكرة يا ستاذ لاند كروزر مافيش حد في القسم يقدر ينكر حيادية حضرتك في الردود او زوقك في الكلام انت فعلاً انسان محترم وتستحق التقدير ، وفعلاً ممكن تكون كلمة شد دي هي اللي لفتت نظر الناس شوية ، هي جري مع بعض ، مش معني كده انا الكارينز اقوي ، بس هي لما توصل للسرعة دي مع ثبات فده كويس ، ده كل اللي كانت عاوز اوصله من خلال التجربة وكنت عاوز اطمن ناس كتير بتخاف من الكوري ، بيني وبينك نرفزني رد واحد محترم علق فوق بطريقة مستفزة شوية او نقدر نقول بطريقة فلاحي حبتين ، فأثرت في ردي ، لكن انا فعلاُ بكن ليك كل احترام يا باشا ، عشان انت فعلاً تستحق ده ،
وفعلاً موضوع التفويلة ده بجد والله حقيقي ، انا فولت من عند مكتبة اسكندرية ولما وصلت للرماية فعلاُ التنك موصلش لربع التنك الأولاني ، وكان نزل عن الشرطة ألأولي بسنة صغيرة شوية ، يعني تقريباً تمن التنك ، ده مع مراعاة انها مفولة زور يعني بتقرف عن اول تكة مسدس بحوالي 8 لتر ، واسف لو كنت رديت على حضرتك بشكل غير لائق وتقبل تحياتي يا باشا

المشاركة الأصلية كتبت بواسطة م. حاتم السباعي

تحياتي الي الاخ صاحب الموضوع لعدة اسباب

اولا لسعة صدره من النقد اللازع من بعض الاعضاء اللي لم يأخذو الموضوع كفكرة قدر ما اخذوه كمقارنة و الراجل واضح في كلامه و اظن انه لم يتطرق للمقارنة ابدا هو فقط تعبير بسيط خانه

ثانيا لانه واضح انه انسان محترم لم يأخذ الكلام القاسي بمحمل سئ

ثالثا يا راجل يا طيب كارينز ايه اللي تشد مع x 3 ههههههههههه انا بضحك طبعا

تحياتي اليك اخي الكريم

مهندس حاتم السباعي بنفسه بيعلق على موضوعي ، يا مرحب بكبير النيسانوية يا مرحب ، حاجة ساقعة يابني ......
اهو تشريفك لمومضوعي ده يا باشا بالدنيا واللي فيها ، والمره الجاية هاعملوا موضوع عن الكارنز وهي بتشد مع كورقيت او مع فيراراي ، ياله بقى
نورت الدنيا يا باشا وتحياتي ليك

المشاركة الأصلية كتبت بواسطة land_cruiser

شكرًا يا فندم علي الرد و حصل خير بس كلمه "شد" دي اللي حضرتك كتبتها معناها معروف و اعتقد فعلا انها خطفت الأنظار و أثارت تخيلات الناس . انا عايز أقول حاجه هو ان دائما الناس لازم تبحث عن الانسب لها يعني السياره اللي فيها المتطلبات و في نفس الوقت في حدود الميزانيه المتاحه موجوده في اي ماركات و موديلات و بناء عليه تختار لكن مع الاسف كتير مننا عند الاختيار بيبدأ بالعكس يعني يقول انا عايز ماركه و بعد كده يدور في موديلاتها عن ايه اقرب حاجه للي هو عايزه و ممكن يكون متجاهل ماركات تانيه اعتمادا علي الاكليشيهات المحفوظه و يضيع علي نفسه بدائل افضل علشان في الاخر علامه او شكل الريموت . الكارينز مختلفه تماما عن السيراتو في موضوع الثبات لان العربيه وزنها تقبل و انعم في المطبات بفارق ملحوظ كما انها ما شاء الله واسعه و شنطتها كبيره و سعر اعاده بيعها كويس قوي و تكييفها حلو و قطع غيارها منتشره . هي بس صوت موتورها عالي عند الكيك داون و ان كان ده طبيعي لانه كان محتاج يبقي أقوي من كده شويه وهما فعلا الشكل الجديد أخدوا بالهم من الموضوع ده و حطوا فيها الموتور الجديد بتاعهم ال ١٤٠ حصان و اخيرا ربنا يبارك لحضرتك فيها و يديلك خيرها و يكفيك شرها و تقبل مني كل ود و احترام

نورت الموضوع يا باشا وتحياتي ليك ، وفي الأخر يا باشا اهي كلها عربيات على قد الحل ، لحد مار ببك يريد ونركب الوحوش الجامدة بقي ، زي بي أم أكس سيكس ، او كايين او يا سيدي حتى نيسان باثفيندر ، انا موافق
الف شكر ليك يا جميل على ردك الجميل وسعة صدرك تحياتي ليك

المشاركة الأصلية كتبت بواسطة lanos.lover

ربنا يباركلك فيها
حصل خير :f_eyeb1[1]:


أما بالنسبة لاستهلاك البنزين ,
أنا حسبتها بالارقام ,
حوالي 8 لتر + حضرتك قلت المؤشر يدوب نزل حتة صغيرة ، عن اول شرطة
ما هم دول ال 10 لتر اللي قلت عليهم
والمسافة حوالي 200 كيلو

يبقى المتوسط 5 لتر لكل 100 كم
حتى لو قولنا 6 أو 7 لتر مش 5 , برده قليل جدا على السرعة اللي إنت كاتبها

إنت لو مثبت سرعة على 90 هتعمل 5.5-6

فاهمني ؟
يا ريت كلامي مايكونش ضايقك

تحياتي ليك :)

على فكرة يا باشا ، انا سالت واحد صاحبي شغال في توكيل كيا ابو رواش ، الراجل قالي ان الكارنز عداد البنزين بتاعها بينزل ارباع بمعني انه بيثبت شوية على الربع وبينزل بسرعة في المسافة اللي بين الشرط ، وده فعلاً بيحصل معايا ولما بصيت على العداد بعد ما جيت كا قبل الربع الأاولاني ، ولما مشيت بيها مشوار صغير نزت بعد الربع الأولاني بشوية ـ وبعدين ثبتت شوية وبعد ثبتت قبل النص بشوية ودلوقتي بعد مشوار تاني فضلت معلقة قبل النص بحاجة بسيطة ولسه واقفة ، فممكن يكون كلامه صح ان العربية بتثبت على الأرباع والعداد بينزل اسرع في المسافة اللي بين الشرط ، فده ميديش الرقم الحقيقي للاستهلاك إلا لو كان في عداد ديجيتال يحسب الاستهلاك لعدد الكيلومترات _ شاكر مرورك للموضوع وتقبل تحياتيز