الموضوع: السلام عليكم عايز مقارنة بين نيسان صنى 2013 و بيجو 301 ولكم الشكر الجزيل :)

المشاركة الأصلية كتبت بواسطة the_air_devil

اللي يجرح يجرح واللي يخبط يخبط زي ماهو عايز وكل واحد وله وجهة نظر تحترم وفوق راسنا

العربية الصني فعلاً خفيفة لكن فيها مميزات أمان وموتور ممتاز استهلاكه فوق الرائع للبنزين , واسعة جداً من جوة والكلام ده باقوله وانا طولي 190 سنتيمتر !!!

لكن البيجو شكلها جميل جداً من برة تقفيلها أنضف من جوة ثباتها واتزانها أفضل من الصني سعرها أغلى بكتير من الصني لكن سعر إعادة البيع بتاعها بيكون دايماً وحش وبيعها تاني صعب .. السوق المصري له عوامل تانية بتحكمه غير قناعاتك الشخصية رغم انها بتكون صح إلا ان السوق المصري دايماً مش على حق


كل عربية ولها مميزات وكل واحد يحط وزن للمميزات اللي هو عايزها , اللي إجمالي النقط الخاصة بالعربية "س" تزيد عن إجمالي النقط الخاصة بالعربية "ص" يبقى الأحسن له يشتري العربية "س"

يعني هاتلاقي اللي بيدي وزن للشكل أكتر , واللي يدي وزن للصاج التقيل , واللي بيدي وزن للسعر , واللي يدي وزن للتقفيل والخامات , واللي يدي وزن للاتساع الداخلي , واللي يدي وزن للارتفاع عن الأرض علشان المطبات , واللي يهمه أكتر سعر إعادة البيع , واللي يهمه سعر قطع الغيار وسمعة الوكيل ...إلخ ....دي كلها مابيكونش فيها اتفاق في الرأي 100% أبداً


الموضوع مش محتاج جدال اكتر من كدة لأنه جدل بيزنطي سوفسطائي وكل واحد من الناس له رأي ....انت في الآخر اللي هاتشتري ومن حقك تشتري الحاجة اللي على مزاجك ولو كل الناس بتعيب فيها ... اوزن الموضوع بميزانك انت وشوف الأحسن لك وربنا يرزقك الخير ويباركلك فيه ويبعد عنك الشر مهما كان وأينما كان

مظبوط اوي كلامك , كل واحد يحسبها على راحته من غير ما يكون هدفه الاخرين

المشاركة الأصلية كتبت بواسطة mostafa99

والله انا بحسبها مع العيلة ومعاكوا برضة شايفين ان سعر البيجو 301 2014(126 الف) مش فارق كتير عن النيسان صنى 2013 (113 الف) الاسعار دى دلوقتى حالا ان الواحد يزود ويتلافى اشياء كتيرة ممكن يقع فيها فى الصنى 2013 هو بس النيسان لو تطلع معلومات عن الصنى 2014 ويقولوا انهم هيحسنوا العربية مش كشكل انا الشكل الجديد عاجبنى جدا والعربية عالية ودى حاجة حلوة لكن (الصاج والتابلوة وعيب تير الفرامل والصفارات دى) لو كدة الواحد يستنى اقسم بالله خصوصا ان الشكل الجديد تم اطلاقه فى نفس الوقت دة كان فى شهر يونيه برضة السنة اللى فاتت وخدمتهم حلوة انا كان معايا صنى 2011 لكن بعتها لما جالى فيها بيعه كويسه وعايز اجدد بحاجة تعيش معايا بقى واحافظ عليها انا الصراحة ميال لل301 لكن خايف اوى من التوكيل والصيانة وقطع الغيار توافرها واسعارها دى حاجات مهمة برضة ولازمة .الواحد مش بيشترى كوتش برضة دى عربية

باشا انا لا اعتقد ان نيسان هتغير الشكل في 2014 لان نيسان من الشركات اللي بتخلي الشكل يدوم لفترة مثلها مثل معظم العربيات الياباني مش زي العربيات الكوري اللي كل سنتين يغيروا شكل , انا اعتقد ان هما ممكن يحسنوا في بعض الحاجات بس كله على حسابك فمثلا ممكن يغيروا الكاوتش انوع افضل اما بالنسبة للفرامل فخلاص المشكلة دي اتحلت من زمان

طيب ياجماعه انا بقالى فتره مش عايز ارد على حد بس مادام الموضوع فى مقارنه ما بين عربيتين انا بحبهم جدا اسمحولى اقول رايى

المشاركة الأصلية كتبت بواسطة the_air_devil

من جهة السعر , البيجو أغلى بكتير

من جهة جودة التقفيل والخامات , البيجو تكسب وخصوصاً التقفيل الداخلي

من جهة الإمكانيات , متساويين

[gdwl]من جهة الصيانة وقطع الغيار (أسعار وجودة خدمة) النيسان تكسب[/gdwl]

من جهة الشكل الخارجي , البيجو تكسب

من جهة إعادة البيع , النيسان تكسب

من جهة التحكم في العربية والثبات والاتزان , البيجو تكسب

[gdwl]من جهة توافر عوامل الأمان للركاب , النيسان تكسب[/gdwl]

من جهة التعامل مع سلعة معمرة تعيش معاك العمر كله , الاتنين متساويين

مع كل احترامى لرايك يا استاذ احمد
بالنسبه لعوامل الامان فى السوبر صالون لنيسان 2 ايرباج فى التابلوه / البيجو 4 ايرباج 2فى التابلوه و2 فى الابواب
من حيث الصيانه وقطع الغيار اعتقد ان البيجو لسه ماحدش يعرف عنها حاجه فى قطع غيارها ولو حتى اغلى شويه من النيسان فطبعا علشان فرنساوى ده طبيعى
تحياتى لحضرتك

المشاركة الأصلية كتبت بواسطة mohjarr

مش فاهم ؟ قصد حضرتك أن النيسان الصنى الجديدة أكبر من أنه تتقارن بالبيجو ال 301 أم العكس
شكل البيجو يكسب
أمان البيجو يكسب
قوة ماتور البيجو يكسب
جودة تقفيل البيجو يكسب
ثبات البيجو يكسب
الحاجة الوحيدة إللى ممكن أكون مش متأكد منها لإنى لسة ماجربتهاش هى التوكيل بتاع البيجو.

مش فاهم الصراحة إزاى مش ممكن نقارن البيجو ال 301 بالنيسان الصنى

ياباشا هو يقصد العكس انه ماينفعش المقارنه مابين الفرنساوى واليابانى اكيد مقارنه مش عادله
وانا عارف ان حضرتك اول عضو محترم استلم البيجو 301 فى المنتدى
مبروك عليك ويارب يكفيك شرها وانا شوفت التقرير اللى حضرتك عملته ممتاز ربنا يباركلك

المشاركة الأصلية كتبت بواسطة welo77

حضرتك بتتكلم عن عربيتين الفرق ما بينهم فى السعر حوالى 20 الف جنيه الا اذا كنت بتقارن سوبرصالون مع بيجو اول فئة وساعتها هتكون فيه البيجو اغلى حوالى 6 الاف وهيكون فيه فرق الامكانيات فى صالح الصنى. لو هتقارن الفئتين المتساويتين فى الامكانيات و ميهمكش فرق السعر واسعار قطع الغيار وممكن تجرب توكيل جديد يبقى غامر وهات البيجو هى بصراحة شكلها الخارجى وتقفيلها احسن من الصنى بس لسه بدرى علشان تحكم عليها انما لو يهمك فرق السعر والتوكيل المضمون يبقى الصنى تكسب

انا بس مش فاهم حضرتك بتقارن بين السوبر صالون اعلى فئه فى النيسان واول فئه فى البيجو
نيسان سوبر صالون 119500 اوفر برايس 124500 ج
البيجو الهاى لاين 138000ج اوفر برايس 140000ج والكلام ده من ياسين توكيل بيجو

المشاركة الأصلية كتبت بواسطة mhkorayem

يا جماعه انا مقصدش اضايق حد بكلامي عن الصني وبعتذر لو حد زعل من كلامي
بس انا حزين على العربيه دي عشان انا كنت بحب الصني الشكل القديم جداً وكنت شايفها عربيه ممتازه وسعرها اقل من قيمتها على الاقل 20000 جنيه لكن الموديل الجديد لما نزل اصابني بالاحباط والمساله مش مساله شكل عشان دي ازواق
لكن الموضوع موضوع كوالتي وخامات سيئه ورخيصه وتابلوه فقير لاقصى درجه وغير مريح غير ان المساحه الداخليه بقت اصغر من الاول وخاصه بالنسبه للكنبه الخلفيه وياريت بعد كل ده ثبتوا السعر لأ دول كمان زودوا سعرها وده كان قبل زياده الدولار
بس عموماً انا بعتذر لاي حد ممكن يكون كلامي عن الصني ضايقه

ياباشا ربنا مايجبش زعل ابدا احنا عارفين قصدك بس فى حاجه صغيره هو ليه العربيه حققت اعلى مبيعات خلال ال 12 شهر اللى فاتوا
وكمان حجز لمده 3 شهور واوفر برايس بيوصل الى 7000 ج للاستلام الفورى انا مش عارف
وانا متفق معاك ان فى فقر فى الخامات والتابلوه اما بالنسبه لموضوع الكنبه الخلفيه اكيد حضرتك ماشاء الله طويل جدااا علشان كده حاسس ان المساحه الخلفيه مش كفايه

تحياتى..