الموضوع: مشكلتي مع جوزي معقدة ياريت القى حل مناسب

الاستاذ عمر بيطالب مشكوراً انك تعملي لجوزك هليلة! ماشي و رد الفعل المتوقع إيه يعني من الآخر؟ إيه النتيجة؟1 هيعملك مشاكل و هيعند و يعلقك و يسيء معاملتك أو 2 هيطلقك بعد وجع قلب و وش كتير... و في الحالتين دة مش من مصلحة أختنا أو من مصلحة بنتها... و الأوحش انها هتكون في وضعيتها دي: مطلقة ،تعليمها على قدها، مامعهاش صنعة تدر عليها دخل كريم تعيش منه بكرامتها هي و بنتها، معندهاش سكن ملك، و واضح تماماً معندهاش مدخرات (هتجيبهة منين؟!)، و الاسوأ للاسف الشديد لقب مطلقة! مش هي دي الحقيقة! مفيش راجل في مصر عموماً لم يسبق له الزواج و حيفضل ياخد مطلقة و بمستوى التعليم دة و وضعها انها جرة في ايدها عيل كمان! و انسى إن أبوها يقف جمبها في مصاريف أو كدة إذا كان هي بتقول إنو أخد جزء من مهرها إلي هو أساساً بسيط! و مجبتش أي سيرة عن إنو جهزها مثلاً! دة غير إن ربنا يعينو دلوقتي مريض و عاوز إلي يقف جمبو هو أصلا! الرجل المصري أو يا سيدي أغلب الرجالة المصريين مش عاوزين قصة مطلقة دي خالص، أما السعوديين بقى نظرتهم للمطلقة السعودية انها حاجة ذي و أعزوروني في اللفظ الجربة! في كمية مطلقات في السعودية بالعبيط و بتبقى متشوقة يكون ليها زوج و دة حقها الطبيعي و رغم كدة أغلب الظن محدش بيهوب ناحيتها و كأن لسان حالو بيقول: أنا مكلش من طبق كل منو غيري! أنا عارف إن كلامي تقيل... بس كلنا للاسف عارف الحقيقة بس بنحاول ندفن راسنا في الرمال! الخلاصة إن هي دي وضعية أختنا الحالية و أظن الحل إلي أنا اقترحته منطقي و عقلاني لحد بعيد،،، و دي حاجة = مكاسب و راحة، بعد ما تظبتي أحوالك بالتعليم و الشغل و تحسين الاحوال المادية و النفسية، هتقدري تروحي فنادق في المملكة و تسافري تعملي سياحة و تسوق في دبي ... في أوربا... أو أي مكان تحبيه، و هيكون ليكي أملاك إن شاء الله كمان. طب إيه البديل هترجع بيت والدك... و السعودية في الحالة دي بنسبالك هتكون سجن كبير.... طيب هترجع مصر؟! فين و منين و ازاي؟ كلام مش منطقي... إنت دلوقتي عندك أسرة و بنت جميلة الله يحرسهالك و بيت و لو بسيط و بالإيجار، فمن رأيي مطيريش إلي في ايدك و تدوري على السراب إلي يمكن ييجي و غالباً لأ. اعملي إلي في مصلحتك و مصلحة بنتك و متفكريس بعواطفك... و إلا غالباً هتلبسي في الحيط! و سعتها متلوميش إلا نفسك. أحمد سامي

هو صحيح انك اتظلمتى لكن فى النهاية هى ارادة الله اختاه قدر الله وماشاء فعل بلاش نتكلم فى اللى فات خلينا فى اللى جاى بصى لنماذج غيرك اتعرضت للزواج من عرب فى سن جدودهم وتركوهم واولادهم بلا ماوى ولا فلوس يعيشوا منها ولا اى شىء ارضى بما قسم الله لكى وليكن صبرك فى سبيل الله وابتغاء مرضات الله واعلمى ان الله سوف يجعلك لكى بعد العسر يسر قربى لزوجك انا حاسس انه يجى منه وممكن يبقى احسن من كده معاكى واحذرى من التعامل مع من لاتعرفى عن طريق الانترنت او فيس بوك الكلام بحسن النية مع اشخاص لاتعرفيهم قد تسمعى من كلامهم المعسول الكفيل بما يقلب حياتى راس على عقب استعينى بالله وعيشى لزوجك وابنتك بصى لغيرك اكيد هتلاقى ناس لما تشفيهم هتقولى الحمد لله انا احسن منهم بكتير

المشاركة الأصلية كتبت بواسطة mr_green

نصيحة لوجه الله

إوعى تسافرى طالما معندكيش حد - و واضح إن علاقتك بإخواتك مش قوية و متزعليش منى فى الزمن ده كل حد بيقول يلا نفسى ولا أخ و لا أخت - محدش هاينفعك

شوفى:

1- قربى لربنا و إدعيله فإن بعد العسر يسر - إنتى فى السعودية حالوى جاهدة إنك تحجى أو تعتمرى على الأقل و إدعى جامد من قلبك عند الحجر الأسود و بعد شرب ماء زمزم و عند قبر الرسول عليه الصلاة و السلام

2- جوزك فيه ميزة مش موجودة فى رجالة كثير جدا أو أغلبهم ألا و هى الصبر و الكلمة الطيبة
حاولى تستغلى الموضوع ده و تبصى للنص المليان من الكوب
إتكلمى معاه إن وضعك و وضع طفله مش سليم و إنه لم يعدل بينكم و بين أولاده و زوجته الأولى و ده مايرضيش ربنا
مع الوقت هاتكسبى حاجة حاجة و الله المستعان

الصبر و الدعاء الصبر و الدعاء الصبر و الدعاء الصبر و الدعاء

الله يبارك فيك

هو ده النصح الحق

انا بشكركم كلكم بدون استثناء وبتمنى من ربنا يحققلكم امانيكم

يمكن ماوضحتش حاجة مهمة هي ان تعليمي الان جامعي وشهادتي مستواها كويس جدا

يمكن لسه النوع دا من التعليم مش منتشر عشان كدا اعتبرتوها شهادة مستواها منخفض

لكن القاعة افتراضية وبنحضر زي الناس الي بتحضر عادي بس عن طريق الانترنت وبنقدم ابحاث وبنطبق عملي وبنذاكر من مراجع وكتب عالمية وبنمتحن في مقرات الجامعة
والجامعة الي انا منها من ضمن اقوى 500 جامعة عالميا ومتقدمة عن جامعة مصر في نفس القائمة ودي بفلوس مش مجانية
بالإضافة اني درست في معهد كندي ادارة اعمال سنتين مكثف و بدرس لغات برمجة وباخد دورات انجليزي ودا كله طبعا مش تعليم مجاني
مستوايا العلمي ممتاز واشتغلت على نفسي كتير وانا دا الشيء الي قدرت اضغط واخده لان نظام الدراسة مفهوش خروج من البيت كتير الا امتحانات او تطبيق يعني جوزي بيفضل مستني برا لما اخلص واخرج لما بكون مضطرة للحضور
صحيح مش عارفة اتعلم انجليزي خالص ولا افهم الافلام بدون ترجمة ولا انطق جملة صحيحة على بعضها

لكن يمكن دا محتاج ممارسة ودا الشيء المفقود عندي لكن من ناحية مستوايا التعليمي فهو ممتاز وشهاداتي المعهد ادارة اعمال معتمدة من كندا ومن السعودية وشهادتي البكالوريوس اعاقة عقلية نمائية معتدمة من السعودية معترف بيها فمصر واقدر ادرس ماجستير في مصر "بتكلم عن امكانية دا بالشهادة بتعتي في الظروف الطبيعية مش عن امكانية اني اسافر"
وتقديري امتياز في جميع السنوات وفي كل الشهادات الي حصلت عليها
المشكلة اني متفوقة علميا جدا لكن اجتماعيا ميح خالص ومابعرش اتعامل مع الناس واساسا انا بخاف احاول اتعامل مع حد
لما جوزي بينزلني السوبر ماركت وبيقولي هخليكي تشتري بنفسك المرادي مش بعرف احاسب وبفضل واقفه اخر الطابور مش عارفة اخد مكاني لحد ماينزل هو يحاسب

وحتى لما بنزل مكان نسائي برتبك ومش بعرف اتكلم معاهم السعوديات بيعرفو على طول اني اجنبية من اول مايشوفوني بدون ماتكلم فبيكونو عنصريين معايا دا بالاضافة اني مش بعرف اخد وادي معاهم في الكلام
لدرجة اني مرة رحت المستشفى وقالو لجوزي لازم تدخل لوحدها القسم النسائي
فدخلت الاستقبال شافتني قلتلي وريني الفاتورة قلتلها انا معايا كرت
قالتلي سورية ومعاكي كرت ؟! ووشها اتغير وكانت هتكلني قلتلها انا مصرية ولسه حتى ماكملتش كلام واقولها الكرت بتاع جوزي راحت قالتلي طيب يامصرية احنا مانعالجكم ببلاش ومشت الدور
انا حسيت بخنقة ومعرفتش اقولها اي كلمة وخدت بعضي ومشيت وزعلت من نفسي اني ماعرفتش ارد عليها او اردلها اسلوبها وطلعت قلت لجوزي الي حصل قالي امال لسانك طولك فالبيت وبرا مش عارفة تاخدي حقك ومرضيتش ادخل تاني واصريت اني ارجع البيت بس ندمت وصعبت عليا نفسي اني سكتلها وماعرفتش اتكلم ومواقف ودا اتكرر معايا مش مرة ولا مرتين

دي مشكلتي الحقيقية انا جبانة جدا ومش بعرف اتعامل مع الناس لا مصريين ولا سعوديين بالاضافة ان لهجتي لما بتكلم بتكون مصري على سعودي لا بعرف اتكلم مصري كويس ولا سعودي كويس فدا كمان بيخليني انا نفسي مش عايزة اتكلم

اما بخصوص بنتي فهي صغيرة عمرها سنتين وشوية يادوب بتتكلم بس طفشانة على طول انا نفسي اوديها حضانة عشان تبقى اجتماعية وتلعب مع الاطفال
وعلى فكرة انا مش ممكن هقدر اسافر بدون تصريح من زوجي وكمان بنتي جواز سفرها سعودي ولازم تصريح سفر من والدها يعني مستحيل نخرج من المطار حتى وانا طبعا مش هقدر اعمل حاجة كدا حتى لو ممكن

لكن انا حسيت من كلامكم اني ارضى بالواقع واعيش مع الانسان الي انا مش حاسه باي احساس ناحيته , طيب انا عمري ماحسيت بإحساس الام الله يرحمها امي تعبت قبل ماتتوفى بسنتين وطول الفترة دي كانت بين المشتفى والبيت وكانت تعبانة ربنا يرحمها يارب فكل ذكرياتي عنها انها كانت مريضة وكان عمري وقتها 6 سنين لما مرضت وبعدت عن البيت ولا كمان حسيت ان ليا اب فهل كمان هتخلى عن احساس ان يكون عندي زوج ؟
بالمناسبة انا مش عايزة اعرف مراته لان بكل بساطة هي ملهاش ذنب احسسها بشيء زي دا عشان انتقم لنفسي انا اتظلمت من ابويا انا ومن جوزي انا مش منها
وبالمناسبة كمان انا لا يمكن افكر فيوم اني ابص لاي كائن يعتبرني "طبق" بغض النظر عن انه شايف انه إتكال منه أو مش متاكل منه أنا إنسانة مش طبق فول
اعيش وحيدة حياتي كلها ولا افكر مجرد تفكير في تضييع لحظة من وقتي في كائن اخر حدود تفكيره بالشكل دا , ولا يشرفني حتى اني اتعامل مع ناس كدا
دا في حالة لو تطلقت او انفصلت عن جوزي لكن انا لحد دلوقتي بجرب كل الطرق المؤدية لاي حل لاني عايشة حياتي معتمدة على جوزي 100% انا حتى لو معايا فلوس مش هعرف اعمل بيها حاجة
مش عارفة ناقصني ايه ومش عارفة ازاي ممكن اقدر اعتمد على نفسي بدون ماحتاج حد مش عارفة ايه العوائق في دولة زي السعودية مش عارفة حاجة على ارض الواقع انا كل خبرتي في الحياة
كونتها من خلال المدرسة و الانترنت وشوية مواقف ابدأ منين ؟ ايه الحجات الي بيعتمد بيها اي انسان طبيعي سوي على نفسه ؟ ازاي اقدر اتخلص من مشاكلي مع نفسي ومع جوزي ومع المجتمع ومع القوانين الي ضدي
عوائق كتيرررررررر ووضع معقد وزوج مش ممكن هيسمحلي باني ابعد خطوة بعيد النت انا اخري نت ويمكن يصدق ويشوفلي وظيفة ويمكن لا مش عايزة يكون اعتمادي كله على اه او لا وحياتي كلها وحياة بنتي متوقفة على كلمة او يمكن كم من العوائق الي انا مش عارفاها ومش شايفاها من مكاني


سأظل وأبقى .. الأنثى التي لا تسمح بإنتزاع حلم واحد من احلامها المتبقية ولا لحظة واحدة من عمر ملكها سأظل وأحيا رغم ضعفي و يأسي وكل العوائق التي تحيط بي
انا اخاف ولكن لا اخضع
فأين الطريق وما السبيل وما المخرج

المشاركة الأصلية كتبت بواسطة youssef_u

لو معاكي جواز سفرك حاولي احجزي وانزلي مصر منغير ما حد يعرف

كده غلط تقبله على نفسك

لازم اشراك الاهل فى المشكله

المشاركة الأصلية كتبت بواسطة aboomar22

هو صحيح انك اتظلمتى لكن فى النهاية هى ارادة الله اختاه قدر الله وماشاء فعل بلاش نتكلم فى اللى فات خلينا فى اللى جاى بصى لنماذج غيرك اتعرضت للزواج من عرب فى سن جدودهم وتركوهم واولادهم بلا ماوى ولا فلوس يعيشوا منها ولا اى شىء ارضى بما قسم الله لكى وليكن صبرك فى سبيل الله وابتغاء مرضات الله واعلمى ان الله سوف يجعلك لكى بعد العسر يسر قربى لزوجك انا حاسس انه يجى منه وممكن يبقى احسن من كده معاكى واحذرى من التعامل مع من لاتعرفى عن طريق الانترنت او فيس بوك الكلام بحسن النية مع اشخاص لاتعرفيهم قد تسمعى من كلامهم المعسول الكفيل بما يقلب حياتى راس على عقب استعينى بالله وعيشى لزوجك وابنتك بصى لغيرك اكيد هتلاقى ناس لما تشفيهم هتقولى الحمد لله انا احسن منهم بكتير

اخي الفاضل انا لا انكر ان هذا الانسان لم يسيء لي
صحيح انه ظلمني بظلمه وعدم عدله بيني وبين زوجته وفي حرماني من اسعد لحظات حياتي لانه خائف على بيته
ولكن هذا بسبب خوفه "على حساب بيتي" ليس كرها ومفتكرش انه حاسس بحجم احساسي بالظلم ويمكن لو كان يعرف مكنش عمل كدا ولكن انا استطيع ان اسامح واغفر
ولكن لا استطيع ان اتنازل عن كل حياتي
هو اكرمني وعاملني بالحسنى وظلمني وحرمني
وانا اكرمته وعاملته بالحسنى وتحملت ظلمه وحرماني من حقوقي 7 سنوات من حياتي
ولكن انا "اشتاق" ان اعيش حياتي كما عاشها هو وعلى فكرة هو تزوج قبل مايتزوجني وطلق وبدون علم زوجته
يعني خبى عني كل شيء عن حياته بالاضافة لمشاكل كل شيء متعلق بيه من زوجة وابناء و عمر وسجن وغيرها كتير
انا مش حاسة بالذنب اني عايزة اسيبه لاني عارفة كويس ان كدا انا برحمه من ظلمي اكتر وبرحم نفسي من ظلمه اكتر
لكن لو معرفتش اسيبه ؟ هعمل ايه ؟
وهل اني اسيبه هيكون حل فعلا ؟
انا بجد محتارة وحاسة اني داخلة في دوامة ليها اول ملهاش اخر ومش عارفة افكر لوحدي وخايفة من بكرة وخايفة اظلم بنتي بتصرف متهور

اخي احمد سامي انا بشكرك جدا على رايك وعارفة انك بتنصحني بصدق
لكن انا بجد مش مسألة خوف من اني ملقيش حد يتجوزني انا مش بفكر بالشكل دا
انا كل همي اني مبقاش معتمدة الا على نفسي
ومش عارفة اعمل ايه ؟ وخصوصا في بلد زي السعودية حضرتك عشت فيها واكيد عارف
عنصرية وقوانين ضد الزوجة بالاضافة اني اجنبية
ف ياريت تقولي اي حل من وجهة نظرك ممكن يستمر معايا وينفع كحل حقيقي لمشكلتي
لاني صبرت 7 سنين ومش مستعدة اصبر لما الاقي نفسي كبرت وحياتي ضاعت وانا بين 4 حيطان
وفنفس الوقت بنتي ذنبها ايه تعيش مع ام محطمة زيي او ام متهورة لو هاخد قرار
انا مرعوبة عليها وعلى نفسي ودماغي هينفجر مش عارفة ازاي ممكن اامنها واامن نفسي من بكرة وبعده
انا منكرش إني نفسي اعيش مع انسان بحبه واحس انه جوزي لكن كمان مش هو الشيء الرئيسي دا
انا دلوقتي عايزة اضمن ( أساسيات ) الحياة لي ولبنتي الاشياء التانية دي بعتبرها ثانوية
مع انها بالنسبالي في قمة الأولويات لكن عشان بنتي هعتبرها ثانوية وهتوجه لهدف أهم عشان كدا عايزة اعرف ازاي اضمن حياتي بإعتمادي على نفسي

طـيب انا طبعـا قريت الـ 3 صفحات و رآئى الاعضاء الكرآم ,, وبصراحة كلامهم عين آلعقل ,, طيب ليه متحاوليش تشـوفى شغل عالنت ؟ اقولك على حـآجة انا قريت فى مشآركتك آنك بتتعلمى لغات برمجة ؟ ,طيب جميل دة يمكن يخليكى تفتحى شغل فى مجال الاستضافة , وتطوير مواقع الويب .. وعلى فكرة شغلهم سهل مش صعب . , وبالتالى هتكونى مشغولة فى حاجات لسة هتتعلميها ودة كله بتتعلمية عالنت ,, فى مواقع كتير هتفيدك .. وفى نفس الوقت زى ما قولتلك هتلاقى نفسك مشغولة ويمكن تفكيرك ينشغل كمان . . لكن فكرة آنك تروحى بلد انتى معشتيش فيها دى صعبة شوية .. عارفة معلش هقولك على حاجة انا عارف إنك فى حيرة وهديكى مثـآل , واحد عشان يروح بيته فى طريقين والاتنين بيوصلوه للبيت , فضل يفكر هيمشى من انهى طريق وفى الاخر معرفش يقرر !! ,, آنتى بردو حيرآنة ما بين آنك ترجعى مصر بس هتعيشى اذاى , ولو فضلتى عندك هتعرفى تكملى اذاى . :) سبيها على آلله وآعرفى إن ما ضيقت الا لما فرجت .. وزى ما قولتلك آشغلى وقتك .

وعلى فكرة انا ممكن آبعتلك دورآت كتير هتسآعدك إن قررتى تشتغلى زى ما قولتلك :)