الموضوع: عشاق ومحبى فيات 128 كل ما يخص سيارة الشعب

طريقة فتح الشنطة من جوه العربية لرجالة ال 128 فقط :D
المقادير :D
1- قربة سنتر لوك 2 طرف ( ب 15 جنيه من عند حكيم فى التوفيقية و السعر شامل الخوص والقفل )
2- عدد 2 خوصة توصيل .
3- قفل .
4- خوصة تثبيت .
5- مفتاح كلكس ( ب 5 جنيه وفيه نوع تانى معدن ب 8 جنيه ) اى نوع مش هيفرق .
6- 5 متر سلك 1 ملى .
7- وردة مقاس 10 حجم مناسب .
8- شريط لحام .


------------------------------------------------------------------------------------------
نيجى لطريقة التركيب
1- هنثبت القربة فى الخوصة المخرمه اللى جايه معاها بمسمارين ونربطها فى صاج الشنطة عند حرف الشنطة من الناحية اليمين ( لو ركبت فى الناحية الشمال يبقى هنعكس توصيلة الكهرباء .. السلك الازرق هيبقى فى صاج الشنطة والاخضر هوا اللى هيتوصل عالمفتاح ) .



2- هنثبت مفتاح الكلاكس فى اى مكان فى العربية حسب الرغبة ( التابلوه - الكونسوله - الباب - اى مكان حتى لو هتعلقه فى الهوا :p ) .



3- هنفك كالون الشنطة الداخلى ( صامولتين 10 ) ونروح لأى سمكرى او بتاع شكمانات او اى حد بيلحم اكسجين ( باللندة :p ) ونخليه يلحم الوردة فى ظهر لسان الكالون عشان نقدر نوصل بيها الخوصة بتاعت القربة وبعد اللحام اتأكد ان اللسان بيتحرك بسهوله وميكونش فى حاجة مضايقاه من مكان اللحام وبعد كده يتركب زى ماكان تانى .






-------------------------------------------------------------------------------------------
دلوقتى الدنيا جاهزة عالتوصيل
1- هنجيب فردة سلك نربطها فى المفتاح ونوصلها على كهرباء مباشرة ( ممكن تاخدها من الضفيرة او الفيوزات ) .
2- الفردة التانية بتاعت المفتاح هنربطها ونوصلها بالسلك الازرق بتاع القربة فى الشنطة ( طبعا هنمشى السلك تحت فرش العربية وساعتها هنضطر نفك العتب ونربطه تانى )
3- فردة السلك الاخضر بتاعت القربة هنحطها تحت الخوصة ونربط عليها بالمسمار ( كده تبقى متوصلة بالارضى ) وبكدة تكون القربة جاهزة عالتشغيل .
4- نركب خوصة فى طرف القربة ونربطها فى القفل والخوصة التانية هنعديها فى الوردة اللى فى لسان الكالون ونربطها برضه فى القفل بحيث تبقى مظبوطة مع حركة دفع القربة ... وبكدة نكون خلصنا بحمد الله ومبروك عليك التجديد بقيت زيك زى العربيات الحديثة :D
متنساش بعد ماتخلص تدارى اى سلك عريان بشريط اللحام عشان ميحصلش قفلة فى الكهرباء وخصوصاً سلكة القربة اللى واصلة بالمفتاح .



وأى خدمة يارجالة انا تحت أمركو :)

هوا الناس راحت فيييين ؟؟؟؟؟؟؟؟؟؟؟؟

وليد باشا .. تمام يا صاحبى .. عاش من شافك ياراجل .. الجروب ماله بقى مهجور كده ليه وشايفه مضلم دايما والعنكبوت عشش فيه .. مبقاش فيه حد بيجيى ينضف ولا حد بيقعد فيه ولا ايه :d
فين ايام زمان ولمة زمان :)

المشاركة الأصلية كتبت بواسطة mhussien32

يا أبو يووووسف بعد إذن حضرتك :)
انا قلبت الدنيا على الكونسول اللى فى الصورة ده.. اللى حضرتك ركبت فيه الزرار بتاع الكلاكس.. و مش لاقيه

انت جبته منيين؟؟
ضرورى ربنا يكرمك :)

ياباشا موجود فى اماكن كتير .. التوفيقية موجود لو دخلت من الشارع اللى على ناصيته السينما اللى قدام القضاء العالى سيب اول تقاطع هتلاقى 3 محلات جنب بعض بتوع 28 بس هتلاقى عندهم وبالنسبالى انا كنت جبته من محل اسمه على عبد الهادى فى عابدين فى الشارع اللى قدام محل المواردى وسعره 30 جنيه .

تحت امرك ياباشا