هوا ليه موضوع السخونة×الطوالي لسه متحلش

**zastaffa** · 13-08-2013 07:29 PM

لأ بجد ليه كل موضوعات السخونة في الطوالي وصلت للاشيء برغم أنه موضوع مهم جدا بتعاني من ناس كتير ومن كتر مايأسوا في أيجاد علاج حقيقي ليه بقوا يحاولوا يتعايشوا معاه؟؟!!!
عن نفسي معايا 28 موديل 79 حالتها العامة ممتازة وكل مازود السرعة عن 80 يبتدي مؤشر الحرارة يسرح مع نفسه لفوق وطبعا لما أتجنن شوية وأجري فترة العربية تسخن والمؤشر يعلي ولما أجي أمورها ألاقي لنبة الزيت أبتدت ترعش ودا أكيد عشان الزيت من كتر السخونة فقد لزوجته والطرنبة مابقتش عارفه تضخه بما يرضي الله...دا غير أنه الصبح لما أجي أدر العربية بيبقي صوتها ولا الديزل في خشونته ومجرد ماتسخن الصوت ده يروح!!!!!
طبعا الحالة المادية مهببة وأنا ماقدرش أروح أكوعلي 400جنيه راديراتير أو350شكمان وأنا مش متأكد من السبب الحقيقي للعيب وبالتالي قررت أتعايش معاه وأمشي زي البوبي وماعديش أل80!!!!

تم تعديل العنوان لعدم لياقته
مشرف الساحة العامة
أ2

**zastaffa** · 13-08-2013 07:35 PM

أه حاجة كمان...وش السلندر عندي تمام والمية مابتنقصش ولا حتي الزيت بيقل مللي واحد عن الماكس وتقليب الطرنبة فل الفل دا غير أن العربية جوا البلد في عز الحر مهما طالت مدة الزحمة والأشارات عمرها مابتسخن أو مؤشر الحرارة يعلي!!!!
بتوع الشكمانات مش قادرين يعرفوا أذا كان الشكمان مسدود ولا لأ بس واحد ثقة قاللي ممكن نعمل خرمين في العلبة الأدمانية ونشوف...لو بطلت تسخن يبقي شكمان مسدود!!!
ولما سألته طب والعلبة الأخيرة وضعها أيه قاللي دي مالهاش أي دعوة لأنها مجرد علبة تمرير للهوا ومفرغه من الداخل ومافيهاش أي فلاتر فأستحالة تتسد!!!!

**Fo1Fo** · 13-08-2013 09:19 PM

نصف كوب ماء بطاريه تركيز 30% ( حامض كبرتيك ) على لتر ماء تحطهم فى الرادياتير طبعا بعد فكه من مكانه وترجه رجتين تلاته لمده 10-15 ثانيه وتفضيه وتغسل الرادياتير بعدها كويس جدا جدا جدا العمليه دى ممكن تحسن من أداء الرادياتير لمده سنه عقبال ما ربنا يفرجها برادياتير جديد لأن السخونه فى الطوالى بتبقى غالبا من سوء حاله الرادياتير والله أعلم

**aw2100** · 13-08-2013 11:50 PM

المشاركة الأصلية كتبت بواسطة zastaffa

لأ بجد ليه كل موضوعات السخونة في الطوالي ع المنتدي هنا وصلت للاشيء برغم أنه موضوع مهم جدا بتعاني من ناس كتير ومن كتر مايأسوا في أيجاد علاج حقيقي ليه بقوا يحاولوا يتعايشوا معاه؟؟!!!
عن نفسي معايا 28 موديل 79 حالتها العامة ممتازة وكل مازود السرعة عن 80 يبتدي مؤشر الحرارة يسرح مع نفسه لفوق وطبعا لما أتجنن شوية وأجري فترة العربية تسخن والمؤشر يعلي ولما أجي أمورها ألاقي لنبة الزيت أبتدت ترعش ودا أكيد عشان الزيت من كتر السخونة فقد لزوجته والطرنبة مابقتش عارفه تضخه بما يرضي الله...دا غير أنه الصبح لما أجي أدر العربية بيبقي صوتها ولا الديزل في خشونته ومجرد ماتسخن الصوت ده يروح!!!!!
طبعا الحالة المادية مهببة وأنا ماقدرش أروح أكوعلي 400جنيه راديراتير أو350شكمان وأنا مش متأكد من السبب الحقيقي للعيب وبالتالي قررت أتعايش معاه وأمشي زي البوبي وماعديش أل80!!!!

موضوع السخونة ده يتلخص فى 3 حاجات نوع زيت الموتور وكوعة المية اللى فى الموتور والرادياتير
حضرتك انا كان معايا زاستافا 128 وكنت باسافر مصر على 110 ك وكانت الحرارة مابتزدش عن النص لية؟
حتغير كوعة المية اللى فى الموتور الأصلية وتركب واحدة صينى وتحط زيت موتور محترم شل الأحمر مثلا وده حيضبط حكاية خشونة الموتور فى بدء الدوارة واهم حاجة تغير الرادياتير اكيد طبعا نحاس اللى مركبة وتركب رادياتير استعمال خارج حديد بس تجيبه كويس مش مملح وتغسلة كويس وده احسن فى التبريد من النحاس المصرى علشان الريش بتاعته ضيقة فتشتت الحرارة بسرعة وخصوصا فى السرعات العالية وتحط مية خضراء نوع محترم وتمشى براحتك وتنسى السخونة لو فى عز الظهر وحتلاقى مروحة التبريد فى السلانسية تشتغل وتبطل وحاتدعيلى ان شاء الله !!

**zastaffa** · 14-08-2013 01:26 AM

موضوع السخونة ده يتلخص فى 3 حاجات نوع زيت الموتور وكوعة المية اللى فى الموتور والرادياتير
حضرتك انا كان معايا زاستافا 128 وكنت باسافر مصر على 110 ك وكانت الحرارة مابتزدش عن النص لية؟
حتغير كوعة المية اللى فى الموتور الأصلية وتركب واحدة صينى وتحط زيت موتور محترم شل الأحمر مثلا وده حيضبط حكاية خشونة الموتور فى بدء الدوارة واهم حاجة تغير الرادياتير اكيد طبعا نحاس اللى مركبة وتركب رادياتير استعمال خارج حديد بس تجيبه كويس مش مملح وتغسلة كويس وده احسن فى التبريد من النحاس المصرى علشان الريش بتاعته ضيقة فتشتت الحرارة بسرعة وخصوصا فى السرعات العالية وتحط مية خضراء نوع محترم وتمشى براحتك وتنسى السخونة لو فى عز الظهر وحتلاقى مروحة التبريد فى السلانسية تشتغل وتبطل وحاتدعيلى ان شاء الله !!

بالنسبة للزيت مش هاكدب عليك أنا بحط تعاون برتقاني عشان ده أرخص حاجة وهو اللي أقدر علي تمنه في الوقت الحالي بس لاحظت أن موضوع لنبة الزيت ده بيحصل حتي ولو الزيت والفلتر لسه متغيرين بشرط تجاوز المؤشر لل90!!! يعني طالما سخونة العربية مزادتش عن نوص المؤشر مهما جريت وقرصت علي الماتور عمر ماللنبة تنور لما أجي أمور وأهدي!!
يبقي أذن مشكلتي الرئيسية هي السخونة الزايدة اللي بتقلل من لزوجة الزيت وبالتالي ضعف قدرة الطرنبة علي ضغطة
بالنسبة للراديراتير أنا لسه سائل عليه وفوجئت بأن النحاس الأربعة ماسورة وصل 410 بعد مكان 360 من شهرين وبيقولك مصري بمواصفات ألماني وأسمه البستاني!!!!!! بس ده راديراتير كامل بالعلب بتاعته وجاهز علي التركيب بعد نقل الترموستات من الراديراتير القديم...وبصراحة عن نفسي مابحبش أفكر أشتري أي حاجة أستيراد طالما متوفر منها جديد ناهينا طبعا عن مشاكل الأستيراد وأجرام التجار وأسلوبهم الوقح عشان كدا مخلي الخيار ده أخر حاجة بعد متأكد الأول من الكوعة زي ماحضرتك قولت ونصحت بتغييرها
السؤال بأه::::هوا مش المفروض لو الراديراتير تعبان العربية تسخن جوا البلد أكتر من الطوالي؟؟؟
وموضوع خشونة الماتور وصوت الديزل الصبحية ده هل هو هيد سلندر ولا سبيكة خفيفة؟؟!!!

**rotanamasoud** · 15-08-2013 11:59 PM

سخونه على سرعات معناها ان منظومه التبريد غير قادره على تبديد الحراره عند التحميل على المحرك
بمعنى كمثال
لو الموتور بيطلع طاقه 50 حصان =50كيلو واط لازم منظومه التبريد واكتر نقطه معنيه هنا الرداتير يكون قادر على تبديد حرارى = ال50 كيلو واط
اللى عندك الرداتير قادر مثلا على تبديد 30 كيلو واط وده المحرك بينتجه حتى سرعه 80 فمفيش اى مشكله وعند زياده القدره يصبح فى عجز حرارى يظهر على الفور بزياده الحراره
يبقى انت لازم تراجع على منظومه التبريد ومسببات السخونه
المنظومه الرداتير والطرمبه والمروحه(لازم تكون بقوه كافيه)
مسببات السخونه انسداد الشكمان وقفش طنابير الفرامل
كان عندى عجله خرطومها الباكم عامل زى الصمام يدخل زيت الباكم تفرمل لاكن يرجعه بصعوبه فتفضل الفرامل ماسكه العجله وطبعا الاكتشاف ده كلفنى كتير عشان اعرفه وكان بيولع العربيه القديمه
فلازم تراجع على الحجات
لو الرداتير نحاس دوس ومتخفش وديه لواحد يفكه ويسلك ماسوره ماسوره قدامك ويقفله تانى واى اخرام هنا بتتلحم متخفش ولو صرف 50-70 مش خساره بس يرجع جديد
بعد التركيب شوف في تقليب ميه جيد ودوس بنزين واتفرج على التقليب بتاع الميه لو كويس يبقى الطرمبه سليمه لو ضعيف تتغير
اتاكد ان المروحه بتاعت الرداتير هواها قوى لان المروحه العيانه بتقلل من التبريد وتشتغل وقت اطول لو ضعيفه غير
راجع على ترموستات الحراره واتاكد انه مظبوط فى الفتح والقفل للمروحه وانه على كتاوت
اعملك مشوارين وشوف النتيجه ولو تمام ومفيش تسريب نزل الميه وحط ميه خضرا من الغاليه ومش حتندم لانها حتحافظ على اللى انت عملته
انت كده رفعت من منظومه التبريد للوضع الاصلى بتاعها وقت صناعه العربيه واللى صرفته حيريحك جدا ويظبط اداء واعتماديه العربيه معاك
لو لسه فى مشاكل حتشوف مسببات الحراره زى نظام الفرامل بالكامل وهل فى عجل بيقفش بيسبب سخونه او شكمان مسدود وتجرب تخرمه عشان تتاكد

**ahmed_h_g** · 16-08-2013 09:05 PM

أكشف على الردياتير و دورة التبريد بالكامل و جوان وش السلندر

**zastaffa** · 17-08-2013 02:35 AM

المشاركة الأصلية كتبت بواسطة rotanamasoud

سخونه على سرعات معناها ان منظومه التبريد غير قادره على تبديد الحراره عند التحميل على المحرك
بمعنى كمثال
لو الموتور بيطلع طاقه 50 حصان =50كيلو واط لازم منظومه التبريد واكتر نقطه معنيه هنا الرداتير يكون قادر على تبديد حرارى = ال50 كيلو واط
اللى عندك الرداتير قادر مثلا على تبديد 30 كيلو واط وده المحرك بينتجه حتى سرعه 80 فمفيش اى مشكله وعند زياده القدره يصبح فى عجز حرارى يظهر على الفور بزياده الحراره
يبقى انت لازم تراجع على منظومه التبريد ومسببات السخونه
المنظومه الرداتير والطرمبه والمروحه(لازم تكون بقوه كافيه)
مسببات السخونه انسداد الشكمان وقفش طنابير الفرامل
كان عندى عجله خرطومها الباكم عامل زى الصمام يدخل زيت الباكم تفرمل لاكن يرجعه بصعوبه فتفضل الفرامل ماسكه العجله وطبعا الاكتشاف ده كلفنى كتير عشان اعرفه وكان بيولع العربيه القديمه
فلازم تراجع على الحجات
لو الرداتير نحاس دوس ومتخفش وديه لواحد يفكه ويسلك ماسوره ماسوره قدامك ويقفله تانى واى اخرام هنا بتتلحم متخفش ولو صرف 50-70 مش خساره بس يرجع جديد
بعد التركيب شوف في تقليب ميه جيد ودوس بنزين واتفرج على التقليب بتاع الميه لو كويس يبقى الطرمبه سليمه لو ضعيف تتغير
اتاكد ان المروحه بتاعت الرداتير هواها قوى لان المروحه العيانه بتقلل من التبريد وتشتغل وقت اطول لو ضعيفه غير
راجع على ترموستات الحراره واتاكد انه مظبوط فى الفتح والقفل للمروحه وانه على كتاوت
اعملك مشوارين وشوف النتيجه ولو تمام ومفيش تسريب نزل الميه وحط ميه خضرا من الغاليه ومش حتندم لانها حتحافظ على اللى انت عملته
انت كده رفعت من منظومه التبريد للوضع الاصلى بتاعها وقت صناعه العربيه واللى صرفته حيريحك جدا ويظبط اداء واعتماديه العربيه معاك
لو لسه فى مشاكل حتشوف مسببات الحراره زى نظام الفرامل بالكامل وهل فى عجل بيقفش بيسبب سخونه او شكمان مسدود وتجرب تخرمه عشان تتاكد

باديء ذي بدأ كدا أنا مش عارف أشكر حضرتك أزاي علي ردك وشرحك الوافي وطرحك لكل الأحتمالات والخوازيق المتسببة في المشكلة....بس أنا أصلي المشكلة عندي حلزونية شوية عشان كدا عاوزك تركز معايا أوي يمكن نوصل مع بعض لشيء مفيد
أنا أول ماشتريت العربية ديه روحت للميكانيكي أغيرلها سير كاتينة وكنت شاري سير بتاع 128 ..فأول مافك السير القديم قاللي السير اللي أنت جايبه دا صغير والسير القديم اللي كان راكب مقاسة 118 بتاع ريجاتا...قولتله يعني أيه؟؟ قالي يعني العربية ديه متسقطلها ماتور ريجاتا...المهم روحت بدلت السير وخليته يركبه بس بعد كدا لاحظت حاجة غريبة..وهي أن الفرن عندي طالع منه ماسورة واحدة مش مشترك زي بتاع الريجاتا والنوفا وأل128 اللي مواتيرها1300.....
فهل ممكن اللي باعلي العربية لما كان جيه يسقطلها ماتور ريجاتا...ركب الفرن أبو عين واحدة بتاع الماتور أل1100القديم وبالتالي طبعا ماتور الريجاتا أعلي في السعة اللترية ومش هايستحمل فرن عين واحدة فهايتخنق في أخراج العادم وبالتالي بيسخن مع القدرة العالية؟؟؟!!!
وهل أصلا الماتور اللي راكب عندي بتاع ريجاتا؟؟؟؟
بمعني هل طالما سير الكاتينة مقاسة 118 يبقي الماتور بتاع ريجاتا وش؟؟؟؟ ولامش شرط؟؟؟؟