الموضوع: حرام ولا حلال اللى بيحصل ده يا جماعه !!!!!

والله يا جماعة الموضوع يحزن فعلا و لكن مش عارف اقول ايه
لما بارجع بالذاكرة حوالى 20 سنة و افتكر اول رخصة قيادة و انا باستلمها سألنى الضابط (المعرفة صديق خالى لزوم تطليع الرخصة) "و انت بقى يا ابنى طالب فين؟" و لما عرف انى فى كلية الطب قال لى "بص يا حبيبى ، انسى قسم الطب بتاعكوا ده و لو لقيت حد مخبوط فى الشارع بلاش الشهامة تاخدك و تحاول تاخده لأقرب مستشفى لأننا بنمسك اللى قدامنا أضمن و لو جرى له حاجة هاتلبسها يابنى ... مالكش دعوة و لو عايز اطلب الأسعاف من تليفون عمومى و ماتقولش مين ... و الباقى ده بتاع ربنا" !!!
و بصراحة للأسف الكلام ده صح ، لأن عندنا بيمسكوا اللى موجود علشان يضمن ان فيه حد مسئول عن الحادثة بدل ما تتقيد Hit & run
مرة زمان كنت راجع بالليل من صلاح سالم و لقيت نقل تريلا طالع زى المجنون من شارع جانبى (يظهر مبرشم) و كسر مرة واحدة و لا يمكن انسى صوت التريلا و هى بتصفر فى الهوا و بتعوم وراه ، ربنا ستر قدرت افاديها و لكن موتوسيك رشق فيها ، و طبعا التريلا كمل اسرع من الأول ولا كأن حاجة حصلت ، و لما وقفت على جنب و ناديت للأمين اللى على الموتوسيكل لقيته بيقول فى اللاسلكى بعد ما بلغ "و تم القبض و التحفظ على المتسبب فى الحادث يا افندم" و كانت ليلة سوداء فى المستشفى لحد ربنا ما كرمنى قبل الفجر و المصاب فاق و قال ان اللى خبطه التريلا مش انا و لكن قبل كده الكل كان مكدبنى
المشكلة ان الناس عندنا عايزة جنازة و تشبع فيها لطم ، و ممكن لو وقفت تلاقى اللى بيقول "هو ده ، و انا حتى شفته و هو بيخبطه" مع وصلة من "اتقوا الله ، هو عشان ركبتوا عربيات تدوسوا الخلق الغلابة ... الخ"
حصلت معايا فى ش الجامعة ، قدام مدرسة السعيدية فى عز الزحمة 3 ولاد بيوزعوا الأعلانات على العربيات المعدية و فجأة سمعت واحد منهم (الكل ماشى على مهله فانت سامع اللى حواليك فى الشارع) بيزعق لزميله "الحق أبوك جاى" ، و لما التانى خاف و حاول يجرى كنت انا جنبه مباشرة ، فحاول ينط من فوق الكبوت و لكن اتزحلق و وقع من الناحية التانية ، و نزلت بسرعة مخضوض فلقيته بيجرى ، و لسه بأقول الحمد لله الناس اتلموا على و كانوا عايزين يضربونى ، ناهيك عن اقذر الشتائم اللى ممكن تسمعها ، و اتفضوا لما جاء الضابط و قلت له ان الناس دى (نقيت اكتر 3 كانوا قمة فى قلة الأدب) بيتهمونى انى خبطت واحد و لكن ده ماحصلش بدليل ان مافيش حد مخبوط (و ما قلتش موضوع الولد و انكرت حدوثه تماما) و انهم كانوا بيحاولوا يسرقوا حاجات من العربية و علشان كده عملوا التمثيلية دى ، و هنا ساعتها الموضوع اتقلب و بدأ الناس فى "معلش يا باشا ، و الصلح خير ، و دول غلابة ما يقصدوش" ، مع ان لو كان الولد اتصاب فعلا (برغم ان ماليش ذنب) كان زمانى باسف التراب
طبعا انا صعبان على المصاب و لكن ليه يغامر بحياته ؟؟ ما فيش حاجة تسوى
ده برغم ان الواحد الحمد لله بصحته و لكن ساعات لو على رجلى و عايز اعدى شارع كبير باخد تاكسى للناحية التانية و بلاش مجازفة ، هو العمر بعزقة
طولت عليكم معلهش
و تحياتى

المشاركة الأصلية كتبت بواسطة دموع الثلج

ايه ده انا اتخضيت من رده الفعل على الراجل اللى مرمى
ليه بقينا كده استغفر الله يعنى خايفين من الحكومه ولا الشرطه ومش خايفين من ربنا

لما هيسالنا يعنى لو كل واحد افترض نفسه لاقدر الله فى مكان الشخص المصاب وفى موقفه والناس بتعدى حواليه وكانه شى لا يذكر المفروض احنا بنعامل ربنا

فين اتباعنا لسنه الرسول نسينا تقريج الكربه ومساعده المحتاج واغاثه الملهوف
فعن أبي موسى - رضي الله عنه - قال: قال رسول الله - صلى الله عليه وسلم -: "على كل مسلم صدقة.قالوا: يا نبي الله! فمن لم يجد؟ قال: يعمل بيده ويتصدق.قالوا: فإن لم يجد؟ قال: يعين ذا الحاجة الملهوف...

ولا تلقوا بانفسكم فى التهلكة

MMamdouh