الموضوع: إخواني الأعزاء أنا شفت عربية عجيبة وعايز نصيحتكم

إمبارح طبعا زي ما قولتلكم كنت مسافر ولما رجعت الساعة واحدة من البلد لقيت العربية لسه واقفة قدام المعرض ما اتحركتش ، فاطمأنيت شوية إن سوقها مش ماشي وده عادي دلوقت لأن كله بيدور على التكييف والباور والشكل العام ، العربية في الأول والآخر بتعكس المكانة الاجتماعية لصاحبها .
النهاردة بعد صلاة العصر وأنا بالجلابية روحت المعرض أتأكد إنها لسه ما اتباعتش فلقيت التاجر هناك ، فلما شافني ووافتكرني طبعا رحب وقالي العربية تحت أمرك وقال لابنه يمسح العربية ويوضبها ، وقعد يوريني حاجات فيها ويحلي لي فيها ، المهم وراني رخصة العربية والتوكيل بتاعها وطلع إن التوكيل مش بإسمه ومعمول يوم 11 رمضان ، ففهمت إن العربية أكيد اشتراها تاجر صاحبه ومعرفش يبيعها فهو خدها منه علشان يبيعهاله والمكسب طبعا بالنص. ولقيت إن العربية باقيلها سنة في الرخصة وثلاث سنوات على الفحص ، قررت ساعتها أروح أجيب السمكري علشان يتفرج عليها لأني خايف الصاج بتاعها يكون دايب ولا حاجة ، خصوصا من تحت ، وقلت للتاجر فعزم عليا عزومة مراكبية إنه يوديلي العرابية لغاية عنده ، وطبعا شكرته وكده وروحت لبست هدوم الخروج ووأنا بالبس قلت فعلا ليه ماخدش العربية لغاية السمكري وده يبقى اختبار لمدى رغبة التاجر في بيعها ، لأن التجار بيبقى عندهم حرص كده على إن العربية ما تتحركش من مكانها والمشتري ما يحركهاش ، يعني بيعززها ، فلما روحتله وقلتلو إيه رأيك لو ممكن تيجي معايا علشان نرفع العربية في البنزينة بالمرة ، سكت لحظة وبعدين وافق ، والمدهش جدا إنو خلاني أسوقها بنفسي ، وأنا ماصدقت ووافقت على طول وهو قعد يسمي ويدعي كأن نفسه إن العربية تحلى في عيني ،
طلعت بالعربية ، ولاحظت أول حاجة إن المشاوير بتاعة الدواسات بتاعتها أقصر من عربيتي القديمة والمقاومة بتاعتها كويسة وما بتزيقش زي عربيتي القديمة وكمان الفرش تحتها مش دايب ، بالعكس الراجل عاملها فرش جلد طبيعي والفرش قديم لكن لسه بحالته ، المتور صوته متناسق ومستمر وناعم هو عالي شوية وده عادي في اللادا ، وكنت وأنا باتفرج قبل كده سديت الشكمان بإيدي فالعربية بطلت بعد ثانية واحده بالظبط وكان فيه مقاومه شديده لإيدي بس كان فيه حلقة سوده على إيدي وجايز الكاربارتير عايز يتحل ويتغسل وممكن تكون البكات عايزة تتغير.
العربية سحبها حلو والسرعة بتوصل ل20 بعد ثانيتين ثلاثة ولأربعين بعد خمس ست ثواني وكنت باتأخر شويه في النقل علشان أسمع صوت العربية وكمان علشان عربيتي القديمة ما كانتش بتجمع بالسرعة دي .
الدركسيون تقيل جدا وفيه خربطة في العفشة الأمامية وده دليل على إن العفشة عايزة تتحل وتتغسل والبيض يشحم وجايز يكون عايز يتغير .
الفرامل بتمسك كويس والعجلتين إللي ورا بيزحفوا .
المرايات الجانبية هي مرايات العربية الأصلية وسايبين شوية وعايزين يتغيروا
نصف قطر الدوران بتاع العربية أوسع من عربيتي القديمة وجايز ده لأن مقصات عربيتي القديمة ماكانوش الأصليين بتوعا .
الصالون نضيف جدا وباستغرب بشده إزاي الأكياس بتاعة الكراسي لسة سليمة لغاية دلوقت رغم إن شكلهم قديم وومقطعين شوية صغيريين ، الفرش بتاعه قطيفة في جلد وياريت لو حد كان شاف الموديل ده أول ما نزل يقولي هو ده الأصلي ولا لأ .
الضغط بتاع كراسي الصالون كويس جدا وده أعطاني إحساس بالراحة بالقياس لعربيتي القديمة .
الفتيس كويس جدا وتقيل شوية عن فتيس عربيتي القديمة والرأس بتاعته جديدة وبتلمع والحديد بتاعة لسة مدهون بلونه ومش باهت .
التابلوه مطفي شوية بس لسه برونقه والدراعات بتاعة الإشارات والمساحات وغيره لسه جديده وعليها الكتابة بتاعتها لكن فيه شقين طوليين أعل الدركسيون من الشمس والدراع بتاع فتح الكبوت حديد ولونه أحمر وده لفت نظري لأن الدراع بتاع عربيتي القديمة كان بلاستك معفن .
فرش الأبواب هو الفرش الأصلي وزجاج الأبواب فيه خطوط من الرفع والخفض وواضح إنه ماتحلش قبل كده قبل كده والبكر بتاع الإزاز تقيل شوية لكن مش قوي.
الأبواب نفسها بتقفل كويس برزعة خفيفة يعني مش برزعة جامدة زي عربيتي القديمة.
عموما لما روحت للسمكري ما لقيتوش فالتاجر تضايق جدا ، وقلتلو إن أنا هاجيبه الصبح واتفرج على العربية . وسقتها وأنا راجع برده والتاجر قال للعامل بتاع المعرض يخليني أتفرج على العربية في أي وقت وهو مش موجود.
بكرة إن شاء الله يا جماعة هحاول أخلص في العربية دي على 26 ولو زادت عن 27 مش هاشتريها ، ادعولي وانصحوني لغاية بكرة إن شاء الله بعد صلاة العشاء

رحت امبارح أنا واصحابي علشان نشتري وبعد ما قعدنا نتكلم شوية وجينا لكلام البيع والشرا التاجر قالي يعني انت بتفكر في كام يا دكتور قمت قلتله 24 ألف ، قام التاجر إللي معاه خدني على جنب وقالي انها واقفه عليه ب 28500 قمت قلتله بمكسبها ولا من غير مكسبها ، فقالي هو هياخد منك ألف جنيه بس مكسب فيها ، وقال يعني احنا هناخد ست ألاف مكسب في عربية ، إذا العربية غالية عليك ماتخدهاش . وبعدين قمت ماشي أنا وصحابي والبيعة باظت طبعا والحمد لله . ودلوقت أنا معايا الفلوس ومش عارف أشتري إيه ، أجيب 128 وخلاص ولا أعمل إيه ، لازم العربية تكون بشنطه .

المشاركة الأصلية كتبت بواسطة ahmadkeshta

الصالون نضيف جدا وباستغرب بشده إزاي الأكياس بتاعة الكراسي لسة سليمة لغاية دلوقت رغم إن شكلهم قديم وومقطعين شوية صغيريين ، الفرش بتاعه قطيفة في جلد وياريت لو حد كان شاف الموديل ده أول ما نزل يقولي هو ده الأصلي ولا لأ .

فرش الفابريكة بتاع ال 2105 موديل 95 بيكون كحلي قطيفة

المشاركة الأصلية كتبت بواسطة ahmadkeshta

رحت امبارح أنا واصحابي علشان نشتري وبعد ما قعدنا نتكلم شوية وجينا لكلام البيع والشرا التاجر قالي يعني انت بتفكر في كام يا دكتور قمت قلتله 24 ألف ، قام التاجر إللي معاه خدني على جنب وقالي انها واقفه عليه ب 28500 قمت قلتله بمكسبها ولا من غير مكسبها ، فقالي هو هياخد منك ألف جنيه بس مكسب فيها ، وقال يعني احنا هناخد ست ألاف مكسب في عربية ، إذا العربية غالية عليك ماتخدهاش . وبعدين قمت ماشي أنا وصحابي والبيعة باظت طبعا والحمد لله . ودلوقت أنا معايا الفلوس ومش عارف أشتري إيه ، أجيب 128 وخلاص ولا أعمل إيه ، لازم العربية تكون بشنطه .

بص علي كلامك العربية فيها شوية كلام في العفشة الامامية ,عاوزة تاخد وش نضافة وممكن تتطلع لك حاجة كمان يبقي العربية دي تخلص 26 بكتيره 26.5 عشان تصرف عليها 2 كمان تقف ب ال28 ودة سعر الخالة الممتازة ,بس بلاش 128 طالما فكرت في لادا لان في فرق بين الاتننين من حيث المتانة والاتساع

فرش الفابريكة بتاع ال 2105 موديل 95 بيكون كحلي قطيفة[/quote]
فعلا فرشها كحلي قطيفة والمخادع جلد متخيط في الفرش بخيط . والجنب بتاع الكرسي مطرح القعدة كده جلد برضة.
أنا بدأت أضعف من ناحية العربية دي خصوصا إن السمكري قالي إنها زي الفل وما فيهاش ولا ذرة برومة .
أنا محتاج عربية زي دي ، مشاكلها معروفة بالنسبه لي ، وحل المشاكل دي سهل ، وكمان العربية بسيطة جدا فمشاكلها بالتالي بسيطة زيها ، ولما أدفع ألفين جنيه زيادة في عربية هتريحني بعدين أحسن بكتير من لما أوفر ألف جنيه في عربية هتاخد مني أدهم عشر مرات بعد كده بس بالقطارة

العربية بدأت أقتنع بيها أكتر وأكتر خصوصا إنها بتلبي كل احتياجاتي ، واسعة ومصاريفها قليلة ومشاكلها بسيطة ديتها زيارة للعفشجي كل شهرين ثلاثة ، وتستحمل شوارع مصر ، لكن بقول لنفسي بعد سنتين ثلاثة مش هيبقى ليها سوق خالص تقريبا ، مش عارف أعمل إيه ؟ وكمان لو رجعت للتاجر بعد ما سبته ومشيت أول مرة هيبيع ويشتري فيه وجايز يغليها علي أكثر باعتبار إن أنا رجعتله برجلي تاني .
عامة ما حدش هياخدها غير صاحب نصيبها