الموضوع: رابطه مالكي الباسات b5&b5.5 من 1996 الي2005

المشاركة الأصلية كتبت بواسطة muhammad 80

تسلم وأشكرك على الإستقلبال الحلو ده :)
هو الحقيقه عندى بعض الإستفسارات
أولاً: أنا عملت بعض الصيانات أول ما اشتريتها وعايز أعرف أيه اللى ناقص
١- تغيير سير التقسيم والدينامو والتكييف
٢- تغيير فلتر الهوا
٣- تغيير زيت موتور وفلتر زيت
٤- تغيير مية الريدياتير
٥- العربية بتعمل صوت (تزييىء) جامد ولما رفعتها فى البنزينه العامل بعد ما نضفها رشها بزيت موتور قديم والصوت قل جدا بس لسه شوية مع الملفات

ثانيا العيوب
١- التكييف ضعيف جدا وفى النهار تقريبا مفيش تبريد (التكييف تاتش)
٢- لو طلعت على مطب بسرعة العربيه بتهبد من الجنب الشمال
٣- دراع اللى ماسك المساحة اتكسر فى البنزينه وانا بشحمها
٤- فردتين الكاوتش اللى قدام شكلهم قربوا يتمسحوا

وطبعا محتاج أعرف مين فى اسكندرية أشترى منه قطع الغيار ويعمل الصيانه والإصلاحات المطلوبة

تحت أمرك بص بالنسبه للعيوب
1-التكييف روح لحد يزود لك فريون علشان هتلاقيه ناقص وعلى فكره تكييف العربيه بعد ماهتشحنه ويشتغل أن شاء الله مش هتستحمله على 2 لأن تكييف العربيه دي ياباني فابريكة وموضوع عدم السقوعيه بسبب الفريون ولسه حاصله في عربيتي وزودته بقى تمام الحمد لله.
2-موضوع المطب ده مساعدين روح لعفشجي يشوفالمساعدين أو ارفع العربيه لو لقيت المساعدين جايبه زيت غيرهم
3-دراع المساحات شوفه عند حد بتاع قطع غيار فولكس
4-غير فرد الكاوتش وهات بريدجستون تورنزا أفضل اختيار وعندك ميشلان ممتاز وكونتيننتال ممتاز برضه
5-موضوع التزييق ده عادي في العربيه لما جلب المقصات بتلم تراب وطينه ولازم تتغسل كل أسبوع علشان ماتزيقش طبعا علشان شوارع مصر نضيفه جدا جدا جدا(بهرج طبعا)

بالنسبه للصيانات زود فلتر تكييف وفلتر بنزين وزيت الفرامل غيره بالكامل بزيت توتال dot4 وكل سنتين واظب على تغييره وزيت الباور وحط زيت باور أصلي جيبه من بتوع قطع الغيار الفولكس وهتلافي رقمه مكتوب على علبه زيت الباور وبرضه ضروري انك تغيره علشان تحافظ على الطرمبه في ناس هتقلك الزيوت دي بتتزود مش بتتغير اوعى تسمع كلام حد يقولك كده الزيت ده ماده كيميائية وبتتغير خواصها مع الوقت وتبتدي تأكل في الحاجه اللي فيها بدل ماتزيتها زي زيت الفرامل لو فضل اكتر من سنتين في العربيه يبتدي يأكل جلب المساتر بتاعت الفرامل وعلى الوقت الطويل تلاقي الفرامل باظت وبرضه الباور تلاقي الباور باظ وأولها الطرمبه وكمان عربيتك لو اتوماتيك هتغير زيت فتيس وفلتر زيت فتيس والعربيه بتاخد 4لتر زيت اتوماتيك ابيض. وعندك الأصلي اللتر ب 275ج وفيه فيبي ألماني محترم جدا اللتر ب 100ج ولو مانيوال غير زيت الفتيس المانيوال أمان ليك وبس ياسيدي معلش هتلاقى حاجات كتير بس ده الصح اللي يخلي العربيه مظبوطه ومتعرفش طريق الميكانيكي أن شاء الله وبالنسبه لبتوع قطع الغيار في اسكندريه في موضوع في قسم الفولكس مثبت باسم ورش وامحلات قطع الغيار دور فيه أو أي حد من زميلنا في الرابطه من اسكندرية يقولك لاني من القاهره فمعرفش حاجه فى اسكندريه ويارب أكون افدتك وأي استفسارات انا في الخدمه

المشاركة الأصلية كتبت بواسطة manchestr_viru

رأيك الافضل مقصات جديد ولا استيراد ؟ و الجديد الالماني بكام و الاستيراد بكام ؟
ولو جبت مقصات مش الماني هتبوظ بعد قد ايه عشان انت خوفتني اني مجبش الماني لما قولتلي هترمي فلوسك في الارض

بص ياباشا الأفضل من وجهه نظري الجديد ماركة فيبي أو سواج الاتنين واحد تبع بلاشتين انضف حاجه وبيعملو في حدود 4000ج الطقم كامل ببارات الدركسيون وشدادين الميزان والاستيراد بيعمل في حدود 1200ج بس أهم حاجه يتنقوا كويس بيبقوا تمام غير كده مش مضمون لأن الحاجات التانيه بتبقى معموله بخامات رديئة وخلي بالك الشدادات دي ألومنيوم يعني لو مش خاماتها مطابقة للمواصفات بتاعت العربيه تتكسر من أول مطب أو حفره جامده وعمرها مش طويل خالص وكلامي ده مؤكد لاني مشترك في منتدى اجنبي وشفت واحد كان كاتب انه عمل حادثة والعربيه اتخبطت منه بسبب انه اتكسر من عنده شداد سفلي وكاتب انه كان لسه جايبهم وماركتهم كمان توبران اللي هتلاقى ناس بتقولك الماني وهو صيني ده واحد اتكسر عنده شداد والطرق بتاعت بره غيرنا طبعا فما بالك بطرقنا فشوف كده هتعمل ايه وأبقى طمنا عملت ايه

المشاركة الأصلية كتبت بواسطة muhammad 80

ربنا يكرمك
بالفعل أفدتنى جدا جدا
بس انا نسيت اقولك انى شحنت فريون فعلا ومعملش حاجه وواحد بتاع تكييف بس مش عارف مدى شطارته كشف عالكومبريسور وقالى ضعيف ولازم تغيره ولازم يكون اصلى وقالى حتلاقيه بحوالى ٧٥٠ او ٨٠٠ وأكيد يقصد استعمال
بالنسبة للفتيس هو اوتوماتيك كنت عايز اعرف الفلتر بيعمل كام ونوعه ايه

خلاص لو الكباس بتاع التكييف باظ جيبه استيراد وعلى التجربه وقبل ماتركبه خلي بتاع التكييف يغير له زيت الكومبريسور اللي موجود جواه وده مهم جدا وبالنسبه لفلتر الفتيس انا مركب الفيبي الألماني ب 90ج زي الفل مش فارق عن الأصلي والكلام ده من بق واحد صاحبي بتاع قطع غيار ومعاه الباسات بتاعنا وغيره 3مرات في 3 غيارات وعند ك الأصلي بيعمل في حدود 375 ج تقريبا وبس ياسيدي وأي استفسار تاني تحت أمرك

المشاركة الأصلية كتبت بواسطة muhammad 80

السلام عليكم
إخوانى أعضاء المنتدى كل عام وأنتم بخير ورمضان كريم
وأنا بقلب شوية على الإنترنت لقيت الموضوع الجميل ده والرابطة اللطيفة دى حبيت أشارككم وأكون معاكم وأستفيد من خبراتكم
عندى باسات ١٦٠٠ موديل ٢٠٠٠ اشترتها من أقل من شهر ونص وكانت عاملة ١١٨ ألف كيلو وحالتها ممتازة ما عدا طبعا بعض أعراض قلة استخدام العربية

قصة العربية دى غريبة معايا أنا كنت موصى تاجر عربيات معرفة يدورلى على بى ام دبليو موديل ٢٠١١ أو ٢٠١٢ فئة تالتة وكلمنى بالفعل ورحت أشوفها وكانت فعلا ممتازة لكن ترددت لأنى ساكن فى شارع وحش العربيات بتتجرح كتير والركنة صف تانى فقلتله بلاش بى إم دلوقت خلينى لما أنقل لبيتى الجديد كمان شهرين وأركن فى جراج أبقى اشترى بى إم
قالى يعنى عايز عربية مؤقتة تمشيك اليومين دول قلتله اه بس عربية تكون محترمة مش عربية تبهدلنى لمجرد انها مؤقتة
فرجنى على عربيات كتير ياريس ورينو سيمبول وكلها موديلات حديثة ومفيش حاجة عجبتنى لدرجة انى كنت حاخد جيب ليبرتى قلت محدش حيقربلها ولو عجبتنى اكمل بيها ولو انى مش بحب الجيب اصلا

النهاية لقيته كلم واحد وقالى فيه باسات موديل 2000 وانا سمعت 2000 دى وقلتله انسى الموضوع مش واخدها طبعا دى عربية قديمة انا اخرى 2007 فضل يتحايل عليا ويقولى طب بس شوفها الأول وبعدين نتكلم عربية محترمة جدا وسعرها حنين
قلت مكسفوش واشوف
مكدبش عليكم اول ما شفتها قالى اركب ولف بينا لفه ركبت فعلا ولفيت بيها
اول ما نزلت منها لقيتنى خدت القرار انا حاخد العربية دى
بالفعل اخدتها وبصراحة كل يوم احترمها اكتر ولما دخلت هنا وقريت الشعر اللى كتبه فيها زميلنا hitmangate وانا حبيتها أكتر خاصة ان كلامه بلاقيه حقيقى فى الواقع
صدعتكم بقصتى مع العربية دى لكن بما إن الموضوع خاص بيها فقلت لما أعرفكم بقصتى معاها أيه :)
لما أقرا ترحيبكم حبتدى أغلس واسأل شوية أسئله عنها وبالمناسبة أنا من اسكندرية عشان أكيد حسأل عن أماكن خاصة بصيانتها وقطع غيارها
شكرا للمتابعة

الراجل دة عندة مركز وشاطر جدا عندك فى الاسكندرية 01222866906 اسمة اشرف زكى اما تكلمة قلة انك جاى من طرف محمد موسي بتاع بورسعيد حيعمل معاك الواجب وزيادة

المشاركة الأصلية كتبت بواسطة manchestr_viru

هو رقم موتور العربية موجود فين عشان مش لاقيينه وانا بعمل فحص في المرور ؟
عايز اعرف صفارة التكييف من تيل التكييف ولا من بلية شداد التكييف اعرف ازاي ؟ عشان كل ما اروح لميكانيكي يفتيلي فتوة

بالنسبه لرقم الموتور هتقف في وش العربيه والموتور قدامك هتلاقى ناحيه اليمين مواسير المنافول بتاع الهوا هتلاقى الرقم تحتية على البلوكه بتاعت الموتور اللي هيا النص التحتاني في الحته اللي تحت وش السلندر وبالنسبه لموضوع صفاره التكييف لو الصفاره اول مابتشغل التكييف وبتروح يبقى السير لأن لو بليه هتسمع صوت خشونة متواصل اذا كانت الشداد أو يليه الكومبريسور نفسه