الموضوع: دعونا نبكى فى صمت !

المشاركة الأصلية كتبت بواسطة prince_bondok1st

اولا سلام عليكم جميعا
عايز اكتب علي موقف معين حصلي وانا في كندا بس ظروف البلد و الوضع العام مخليني متردد
لكن اعتقد اني عايز احكيه واحكي وجهه نظري فيه
الموضوع يا حبايبنا اني كنت في بلد اسمها وينكلر
ووينكلر دي بلد تقريبا علي حدود كندا مع امريكا
يعني بينها وبين امريكا اقل من عشرين كيلو وبينها وبين وينيبج عاصمه الولايه اللي كنت فيها 130 كيلو
المهم كنت خلاص سايب البلد دي ومتوجه الي وينيبج
والطريق بياخد تقريبا ساعه ونص الي اقل من ساعتين
المهم كل الطريق تمام ولكن قبل وينيبج كده بحوالي تلاتين اربعين كيلو وجدت حادثه كبيره كانت لسه حاصله بمعني ان العفره والتراب كانوا لسه مغبرين الدنيا
الحادث هدي كانت عباره عن عربيتين نقل كبار دخلوا في بعض نتيجه ان سواق عربيه منهم انحرف شمال مره واحده بدون اشاره وكان جاي وراه عربيه نقل تانيه بسرعتها دخلت فيها واخدوا بعض واتقلبوا بره الطريق في النص بين الطريقين
والمنطقه بين الطريقين هناك مش حواجز اسمنتيه زي هنا لكنها عياره عن مساحه خضرا في حدود تلاتين متر تفصل بين الرايح والجاي
طبعا ركنت علي جنب مع كام عربيه اللي كانوا معديين ساعتها من الجانبين
وجرينا نلحق السواقين وبرغم ان الحادثه فظيعه بعني العربيتين اتقلبوا واتخرشموا لكن السواقين كانوا سلام تماما الا من خدوش بسيطه جدا نظرا لانهم كانوا لابسين حزام الامان وده اول شئ اخدت بالي منه
طبعا السواق الاول – اللي اتسبب في الحادثه – كان محشور جوه العربيه لكن حاولنا نفتح الباب بالعافيه وواحد جاب حاجه زي عتله كده وهيلا هوب لحد ما الباب اتفتح
طبعا مافيش حاجه اسمها نهجم نطلعه ونشده بره العربيه واحنا مش عارفين حالته لايكون مكسور ولا حاجه ..
اول كلام : انت سليم انت واعي تقدر تحرك اطرافك حاسس باي الم مع الحركه ؟؟ لاء ؟؟ طيب ياللا اطلع معانا وطلع ومشي معانا وقعدناه علي النجيله في الجنب
السواق بتاع العربيه التانيه طلع من الشباك لان العربيه كانت مقلوبه وطبعا بنفس الاسئله
لفت نظري حاجه تانيه وهي ان كان فيه اتنين مواطنين مكانوش مركزين مع السواقين لكنهم جابوا طفايات الحريق من عربياتهم وفضلوا يلفوا حوالين العربيات يتاكدوا ان مافيش حاجه مولعه او شراره
في نفس اللحظه اخدت بالي ان عربيه منهم كانت محمله حبوب – حاجه كده بين الحمص واللوبيا – ماتسالونيش ايه ده لاني مش عارف
والتانيه كانت محمله طين – وبردو محدش يسالني الطين ده ليه ورايح فين لاني مش عارف
طبع بعد ماخلوا في بعض واتقلبوا عالنجيله فالطين علي اللوبيا ملوا الطريق التاني مما يشكل خطر علي أي حد جاي
فاخدت بالي من ان فيه واحد ركن عربيته ومالوش دعوه خالص بالحادثه ولا نزل معانا يشوف فيه ايه لكنه ركن علي جنب ووقف زي عسكري المرور علي الطريق يشاور للعربيات الجايه يحذرها من الطريق عشان تهدي سرعتها
لاحظوا ان كل ده لاسعاف ولا مطافي ولا بوليس ولا لسه حد وصل
المهم انا رجعت للسواق الاولاني اللي اتسبب في الحادثه لان هو اللي كانت خدوشه كتير شويه وكان راجل كبير عجوز
المهم رحتله وكان حواليه شويه ناس منهم شابه صغيره – ماشاء الله عليها كانت زي القمر - كان معاها جوانتيات البلاستيك بتاعت الكشف والعمليات وكانت بتكشف علي الخدوش اللي في راسه ولما واحده ست سالتها جبتي الجوانتيات منين قالتلها متطوعه فالست قالتلها : اوه جود فور يو
طبعا انا مافهمتش متطوعه في الجيش يعني ولا ايه
الشابه دي قالتله انت مش حافظ أي رقم لاهلك نكلمه قاللها كل الارقام علي موبايلي
فقالتلي لو سمحت
قلتلها ايون تامري امر
قالتلي شوف الموبايل في العربيه
قلتلها وجب يا قمر
وفوريره علي العربيه المقلوبه .. وانا بجري لقيت شاب بيقوللي انا جاي معاك المهم دخلنا جوه جوه العربيه دورنا في الشنط لخد مالقيت المحفظه والموبايل وهو لقي المفاتيح وقاللي تمام كده ونزلنا
ادينا الحاجه للراجل وهي اخدت الموبايل قالتله تحب اكلم مين قاللها لورلا ولا لورينا مراتي
اللي غاظني في الموضوع ان الاموره ولا كاني موجود وقالت للشاب الحليوه اللي جاء معايا دي كل حاجه قاللها ايوه
والعربيه تمام وامنه تماما
قالتله كويس واضح ان عندك خبره قاللها كنت متطوع مطافي قالتله : اوووه جود فور يو
طيب وانا يا طنط اللي ضحيت بعمري وانا بجري ادور عالموبايل.. والشبشب اللي اتقطع من الازاز اللي في الارض وجوه المقطوره مافيش جود فور مي
خلاص هي بقت كده؟؟ ماشي
المهم وجهت كلامي للسواق : انت كويس يا عم الحاج .. اجيبلك مياه ولا حاجه؟؟ طيب قول الحمد لله
شويه والاسعاف كان وصل تلات عربيات واد خمس عربيات مطافي والشرطه وابتدوا يقوموا بواجبهم
تعليقي علي اللي حصل
برغم النظام البالغ في المرور والتزام الناس الا ان الخطا البشري وارد تماما والانتباه فعلا واجب
الواحد كان بيحسب ان الجدعنه ساعت الحوادث دي حكر علينا احنا العرب وان الاجانب بيخافوا علي حياتهم ومش بيتدخلوا في أي حادثه ولا بيساعدوا
لكن اللي لقيته العكس تماما بل انهم بيقسموا نفسهم لفرق تلقائي
موضوع بقي المتطوع والمتطوعه لما سالت صديق ليا مفيم هناك لما قابلته فهمت
الاموره دي كانت بتطوع في التمريض مثلا بدون اجر أي انها كانت بتكتسب كل الخبرات المتطلبه عشان لو حصل أي موقف تعرف تتصرف
والشاب متطوع مطافي نفس الموضوع بحيث ان لو حصل مواقف مشابهه يعرف يتصرف بل ويعاون فريق الانقاذ والمطافي عن علم وليس جدعنه
اللي بهرني ايه بقي بعد ماصديقي فهمني يعني ايه تطوع؟؟
ان الموضوع ده بدون اجر وانهم لما بيتطوعوا في شئ فانهم بيضحوا بجزء من وقتهم لفتره لا باس بها عشان الموضوع ده
طبعا لو قيسنا الموضوع ده علي مجتمعاتنا – خليها علي نفسي عشان محدش يزعل – انا هاروح اقل راحتي ليه وكمان مجانا ؟؟ عشان موقف ممكن يحصل وممكن لاء ؟؟
بس
ده اللي حصل ووجهه نظري

صحيح وانا باخد الصور للي حصل جاتلي واحده ست كبيره كده وبكل ادب قالتلي بعد اذنك انت تبع ايه
قلتلها تبع نفسي انا زائر هنا
قالتلي طيب من فضلك ممنوع التصوير الا للجهات المختصه
قلتلها انا معرفش بس انا حبيت اسجل النظام واللي حصل عشان اكتب عنه في بلدي
قالتلي طيب بس فعلا ممنوع لكن حاول تاخد صور مافيهاش وشوش الناس باينه
قلتلها تمام
وقامت مسلمه عليا بكل ادب ووجه بشوش وقالتلي
ويلكم تو كندا

ياااااااااااااه


اسلام بلا مسلمين


بيصعب عليا أوي الشعوب اللي شوارعهم نضيفة, وبيلاقوا شغل, ومواصلاتهم حلوة, ودخلهم كويس.. بس معندهومش 7000 سنة حضارة ولا واحد بيقولهم اد الدنيا وكلام غنا ... عايشين ازاي ؟؟؟!!!!