على اي اساس بيتم اختيار السهم ؟؟
اولا قبل اختيار السهم لازم تحدد انت ايه .. بمعنى انت اي نوع من انواع المستثمرين اللي بينقسموا لثلاث انواع :
1- مستثمر طويل الاجل
وده اللي بيشتري السهم من اجل الاحتفاظ بيه لمدة لا تقل عن 6 شهور
2 -مستثمر متوسط الاجل
بيحتفظ بالسهم مدة اقل من 6 شهور
3- قصير الاجل وده اللي اسمه مضارب ..
وده اللي لما بيحتفظ بسهم شهر بيبقى طول معاهوممكن تقسم المحفظة الي جزء استثمار وجزء مضاربة (وده اللي بفضله ) على ان يكون جزء المضاربة لا يتعدى 25 % من محفظتك لأمان اكتر ..
وعلى الاساس ده الاسهم بتنقسم لاسهم استثمار او اسهم مضاربة واجيام(جمع جيم) واسهم سيم داي واسهم تصلح للاستثمار والمضاربة والسيم داي معا..
يعني ايه اجيام ؟ هنشرحها بعدين .. مش وقتها ..
طب السيم داي يعني ايه ؟ او اسهم الشراء والبيع في نفس الجلسة ؟الطبيعي ان اي سهم بتشتريه .. متقدرش تبيعه قبل يومين من تاريخ الشراء .. ودي قاعدة في كل الاسهم ويطلق عليها T + 2 (تي بلاس تو)..
مثلا و اشتريت سهم يوم الاثنين .. متقدرش تبيعه قبل يوم الاربعاء يعني مينفعش تبيعه الثلاثاء.. واضحة دي ؟؟
فيه بقى بعض الاسهم تتميز بامكانية الشراء والبيع في نفس الجلسة بجانب القاعدة الاساسية T + 2 (ودي اللي بيطلق عليها اسهم السيم داي او T+ 0(التي زيرو)
وفي حالة السيم داي ممكن تشتري باكتر من فلوسك .. الضعف او اكتر حسب الشركة اللي بتتعامل معاها ..طيب افرض انك اشتريت على اساس البيع في نفس الجلسة وملحقتش تبيع او معرفتش تبيع في جلسة التداول (اللي هي من 10.30 ل 2.30 ).. الوضع بيكون ايه ؟؟
لو كنت شاري على قد فلوسك .. مفيش اي مشكلة .. بتحتفظ بالاسهم عادي وتتحول من تي زيرو الى تي بلاس تو ..
طب لو كنت شاري باكتر من فلوسك ؟؟؟؟؟
هنا التصرف بيكون حاجة من اتنين حسب الشركة اللي بتتعامل معاها
اما ان الشركة بتبيع تلقائي من نفسها على اي سعر في ساعة معينة .. وغالبا بتبقى 2 ..الشركة بتبيع ماركت .. ماركت يعني حالا وعلى السعر اللي شغال على الشاشة مهما كان اكتر او اقل من سعرك
واما ان الشركة بتسيبلك الاسهم على اساس انك تسدد المديونية اللي عليك قبل نهاية الاسبوع وبصراحة معرفش تفاصيل اوي عن الموضوع ده لاني مبشتريش غير على قد فلوسي .. وخليني في الامان ..
المفضلات