البورصة .. خد فكرة واشتري بكرة

**Ayman_Abdullah** · 28-09-2008 08:08 PM

موضوع ممتاز ياريت تكملى و شكرا على المجهود الرائع
و بصراحة انا خسران على الورق بس اليومين دول و مش عارف أخرج

**Miss_Pharma** · 30-09-2008 03:33 AM

المشاركة الأصلية كتبت بواسطة AHMEDCAR

بالنسبه للشهاده دى بجد انا كمان نفسى اخدها لو عندك اى معلومات قوليلى علشان العبد لله مطحون فى الشغل و مش عارف يسال على اى حاجه
تحياتى

انا ليا اصحاب في اسكندرية خدوها ..
بس معرفش هنا ممكن اروح فين او اسال مين ..
هيا 3 levels وممكن تمتحن على طول منغير متاخد الكورسات بس طبعا يفضل انك تاخدها ..
لو عرفت حاجة ان شاء الله هقولك ..

المشاركة الأصلية كتبت بواسطة Hock

و بصراحة انا خسران على الورق بس اليومين دول و مش عارف أخرج

كل الناس اليومين دول خسرانة والله ..

بس لازم تتحرك مع اسهمك .. مش هينفع تسيبها كده ..
انت اكيد عارف ان حتى لو في طلوع .. اسعار 4 شهور فاتوا مش هترجع في يوم وليلة ..
ربنا مع الكل ..
ان شاء الله تتصلح الاحوال بعد العيد ..
وهبقى اشرح برضه بصورة مبسطة ازاي ممكن تتحرك مع اسهمك الخسرانة ..

**Ramy_Ali** · 30-09-2008 02:54 PM

كملى ياريت كملى

**tamohsen** · 09-10-2008 06:37 PM

فيييييين؟؟؟؟؟

**Mystique** · 10-10-2008 02:45 AM

شكرا ليكي Miss_Pharma على الموضوع الجميل ده

فعلا استفدت منه ومن طريقة الشرح المبسطة وأتمنى تكملي الموضوع.

**waled369** · 10-10-2008 02:47 AM

شكرااااااااااااااا ليكي يا مس فارما

**zakiali** · 10-10-2008 11:15 AM

نصيحة لوجه الله ابعدوا عن صالة القمار اللي اسمها البورصة دي وانفد بجلدك .

.

**Miss_Pharma** · 18-10-2008 08:52 PM

انا اسفة جدااااا جدااااااااااااااااااااااا اااا على التأخير ..

**Miss_Pharma** · 18-10-2008 09:35 PM

شاشة التداول
هي الشاشة اللي بنتابع عليها اسعار الاسهم وحركة البيع والشراء وعدد الاسهم المتداول عليها .. وطبعا البيانات دي يومية ويتتغير كل يوم وقت الجلسة ..
وبتشتغل 4 ساعات في اليوم من 10.30 ل 2.30 لاسهم داخل المقصورة ومن 2.45 ل 3.15 لاسهم خارج المقصورة
والشاشة دي بتديهالك الشركة مجانا او بمبلغ شهري .. او بتعمل اشتراك فيها عند شركات تانية او فيه شاشات مجانية بس بتكون بطيئة شوية ..

بالنسبة للبيانات اللي بنشوفها على الشاشة هي واحدة في كل الشاشات بس مع اختلاف ترتيبها وشكلها ..
نشوف الشاشة دي ونقول ايه اللي فيها

البيانات من الشمال لليمين :
1- كود السهم (كل شركة من شركات البورصة ليها كود بيعبر عنها وبيكون مختصر الاسم بالانجليزي) يعني مثلا شركة
اوراسكوم تيليكوم .. Orascom Telecom كودها ORTE
او مثلا
مصر للزيوت .. Misr Oil & Soap كودها MOSC
وهكذا ..

2 - تاني خانة اللي عليها ظرف دي معناها اخبار .. يعني لو فيه اي اخبار نازلة على السهم ..

3- السعر الاخير او LAST وده معناه اخر سعر بيتداول عليه السهم .. وده اللي بيتيغير اثناء الجلسة كل كام ثانية ..

4- خانة CH ودي معناها التغيير في قيمة السهم بين سعر الفتح وسعر الاغلاق .. سعر الفتح ده اللي هو OPEN اللي موجود عندي اخر خانة في الشاشة ..

5- بعدين CH % ودي معناها قيمة التغيير بالنسبة المئوية ..

6- بعد كده HIGH وده اعلى سعر وصل ليه السهم اثناء الجلسة .

7- وبعدين ال LOW وده اكيد هيكون اقل سعر وصله السهم اثناء الجلسة .

8- خانة ال VOLUME دي بتعبر عن حجم التداول .. يعني عدد الاسهم اللي تم التداول عليها اثناء الجلسة .

9 - اما بقى ال TURNOVER ده قيمة التداول على السهم .. وطبعا بتختلف عن العدد .. يعني لو مثلا السهم قيمته 15 جنيه ونفذ 50 سهم .. ساعتها هيبقى الفوليوم 50 انما الترن اوفر 750 جنيه .. تمام ..

10 - HIGH BID معناه اعلى طلب .. يعني اعلى واحد طالب يشتري طلبه بالسعر ده ..

11- LOW ASK معناه اقل عرض .. يعني اقل واحد عارض يبيع اسهمه عارضها على السعر ده ..

12 و 13 - TOTAL BIDS و TOTAL ASKS يعني اجمالي عدد العروض والطلبات على السهم ..

14- خانة VWAP وده متوسط الاغلاق .. يعني متوسط التنفيذات على السهم في الجلسة ..

15- OPEN ده اللي قلنا عليه سعر الفتح ..

طبعا كل رقم من دول ليه معنى وليه فايدة ..

**human** · 18-10-2008 09:58 PM

المشاركة الأصلية كتبت بواسطة meza

-فى البورصة .. سهل جداً التحكم فى حركة الأسهم عن طريق ملاعبات يقوم بها كبار المستثمرين .. فى الفوركس صعب جداً و إن لم يكن مستحيل لأن عدد المتعاملين فى الفوركس يقدر ب 3 تريليون مستثمر.

المخاطرة فى الفوركس من وجهة نظر أعلى من البورصة بفارق كبير.

كوكب الارض اللى احنا عايشين فيه كل الناس 6 مليار بنى ادم وشويه فكه
و المليار الف ميليون والتريليون الف مليار
جم منين ال3 تريليون دول؟ من مجره تانيه ولا خدنا فى حسابتنا الكائنات التانيه اللى عايشه معانا
:)
ماتزعلش انا بس بهذر