أوبل أسترا كوزمو أم رينو فلوانس؟؟

**mohamed.afifi** · 29-01-2014 04:04 AM

والله ياجماعة أنا تعبتكو معايا كتير..معلش..
بس هو صحيح لو جبت الأسترا لازم أروح لمنصور كل 5000 كيلو؟!! وللا ينفع مثلا كل 10000؟
يعنى أروح للتوكيل أكتر بكتييير من لما عربيتى اللانشيا القديمة كانت بتودينى للميكانيكى؟ :)

**mohamed.afifi** · 29-01-2014 04:08 AM

المشاركة الأصلية كتبت بواسطة mostafa afifi

انا ممكن اقدر افيد حضرتك شويه
بالنسبه للاسترا هي تكسب في الشكل من بره و من جوه و الثبات........تخسر في توكيلها و سحبها زي الفلوانس تقريبا و استهلاك البنزين و فتيس الاوبل مش معمر اوي و مش بتاع قرص و وزنها تقيل اوي هيعلي ثباتها و هيقلل سحبها شويه و العربيه ضيقه اوي من جوه
بالنسبه للفلوانس عربيه واسعه جدا و عائليه و فيها لمسه شبابي حلوه جدا ..انا شايف ان سحبها حلو جدا و ده فيديو عامله واحد في المنتدي و مش قارص و انا شايفه كويس
fluence 2014 acceleration from 0-120 km/hr - youtube
و بالنسبه للثبات الراجل بيقارنه بالمرسيدس يعني مش هتحس بفرق الثبات اوي و مش هتحس بتقص من غير esp انا معايا 406 من غيره و مش حاسس بنقص بصراحه ......و التابلوه انا شايفه حلو مش وحش بس تكيف احسن عشان يباني و فتيس معمر اكتر بردو عشان يباني و توكيل احسن ... وشكلها من قدام شيك جدا و فخمه بس شكل الفوانيس الخلفيه كلاسيك اوي بس مقدور عليه ...
صلي صلاه استخاره بردو
استخير الله و رينا يوفقك في اختيار عربيه مناسبه انشاءالله و اركب الاتنين و اللي تستريح فيهم اتكوكل علي الله و اشتريه

يارب يامسهل..

بس حضرتك بتقول
فتيس الاوبل مش معمر اوي و مش بتاع قرص
دى معلومة خطيرة جداً ...

**ahmedelfeky** · 29-01-2014 04:11 AM

شوف حسب جدول الصياته بتاع منصور ايه بس عامه كل صيانات ال 5000 الاف دي اي كلام معموله بس عشان لو في اي حاجه انت بتشتكي منها يشفوهالك وبيشيكوا علي الزيوت والسوائل وتربيط عفشه وطبعا بيبصوا ع التيل لو انت مثلا 15 الف كيلو انما ال 10 الاف طبعا تغيير زيت وأسأل المندوب اللي هيبعللك العربيه ونصيحه هان من التوكيل نفسه لو امكن ماكنش يبقي توكل علي الله وربنا يباركلك ف اللي تختار وان شاء الله ماتندمش علي اي من الاتنين

**medori** · 29-01-2014 02:05 PM

المشاركة الأصلية كتبت بواسطة mohamed.afifi

والله ياجماعة أنا تعبتكو معايا كتير..معلش..
بس هو صحيح لو جبت الأسترا لازم أروح لمنصور كل 5000 كيلو؟!! وللا ينفع مثلا كل 10000؟
يعنى أروح للتوكيل أكتر بكتييير من لما عربيتى اللانشيا القديمة كانت بتودينى للميكانيكى؟ :)

الصيانة كل 10,000، انما بيطلبوا منك تيجى كل 5000 عشان يشيكوا على العربية بس، انا كان فى الميجان بيعملوا معايا كدة و صيانة ال5000 دى بتبقى مجانية الا لو عملوا شغل فى العربية مش عارف الحقيقة فى منصور و دلوقتى فى eim لسة النظام دة ماشى و لا لأ

**medori** · 29-01-2014 02:11 PM

المشاركة الأصلية كتبت بواسطة meggieboy

باشا...حضرتك المعلومات دى عن تجربة الاتنين و لا بالسمع...على فكرة انا مش بشكك فى كلامك و لكن للإستفادة و خصوصا لى....
حسب المواصفات و ده فى الموقع الرسمى لكل سيارة
الفلوانس الفيس ليفت من 0-100 كم/ساعة فى ١١ ثانية
الأسترا من 0-100 كم/ساعة فى ١١.٩ ثانية

موتور الفلوانس الفيس ليفت عزمه ١٥٦ نيوتن متر عند ٤٠٠٠ لفة فى الدقيقة
موتور الأسترا عزمه ١٥٥ نيوتن متر عند ٤٠٠٠ لفة فى الدقيقة
و بالأحصنة الاتنين ١١٥ حصان
يبقى علمياً كل حاجة بتقول ان الفلوانس اسرع من الاسترا و ده بناء على كلام الصانع أو على الاقل زى بعض.. فمش عارف ازاى حضرتك بتقول ان الاسترا طلقة و تطلع من الفلوانس in no time و اكبر عيب فى الفلوانس ان سحبها وحش!!
انا فعلا بسأل للإستفادة و مش للتشكيك فى كلام حضرتك....
تقبل تحياتى

لا يا فندم، انا لسة مجربتش الفيس ليفت خالص للاسف، انا كان كلامى على ال2013 قبل الفيس ليفت الصراحة

**ALshahba** · 29-01-2014 02:35 PM

المشاركة الأصلية كتبت بواسطة mohamed.afifi

يارب يامسهل..

بس حضرتك بتقول
فتيس الاوبل مش معمر اوي و مش بتاع قرص
دى معلومة خطيرة جداً ...

معلش انا بشك فى المعلومه دي ...... لان العربيه اصلا لسه جديده ومحدش جربها لوقت طويل علشان نحكم
لكن بصفة عامه اي اوروبي حتلاقي طلعاته الاولي بطيئة نسبيا ...... يستثني من هذا المواتير التيربو

**ALshahba** · 29-01-2014 02:39 PM

المشاركة الأصلية كتبت بواسطة mostafa magdy

يا برنس الليالي أولا انا مشفتش منك فيديوهات :d
ثانيا انا لما سوقت الأسترا حسيت أنها متزنه و تقيله جدا .. بس هي عربيه اصلا تقيله في الوزن .. و بعدها ركبت الفلوينس لاقيت ثباتها مقبول .. راجع ردي اللي فوق و شوف أي أختلاف ..
باش مهندس هاني بقا .. أنا حسيت بصراحه أن الأسترا أسرع .. و كان ساعتها معايا الأوكتافيا لسه .. حست إنها فعلا سريعه عنها بكتير يعني جبت بيها 160 و 170 و العربيه ولا الهوا كاني ع 80 و كان ع الدائري يعني مش بعيد ..
العربيه أثبت و أسرع و أنا كتبت لأخونا اللي بيستفسر كده

فرق الاحصنه بين الاوكتافيا والاسترا حيكون اكيد لصالح الاسترا
اوكتافيا = 105 حصان
استرا = 115 حصان

بس استهلاك البنزين ..........فى صالح الفلوانس علشان الفتيس cvt

**horas3000** · 29-01-2014 02:53 PM

بص يا زعيم
يمكن انا من القله اللي ساقت الاتنين و عامل تقارير عنهم كمان
بس الفلوينس القديمه مش الفيس لفت

العربيتن ميتخيروش عن بعض و الفروقات ما بينهم مش كبيره ابدا
سواء كثبات او تسارع
بس انت حدد انت عايز ايه بالظبط من العربيه عشان نقدر نفيدك اكتر

لكن بشكل عام
و زي ما الناس اجمعوا
الاسترا ذات طابع رياضي و شبابي اكتر و تجهيزاتها مايله لكده
الفلوينس ذات طابع كلاسيكي شويه و تميل للراحه و الفخامه و تجهيزاتها تميل لكده
شخصيا كان في حد سالني و شبهة له الاسترا بال bmw و الفلوينس بالمرسيدس
و عشان كده لازم تحدد اولوياتك و اسلوب سواقتك عشان تقدر تختار صح

**Hany Saad** · 29-01-2014 03:01 PM

المشاركة الأصلية كتبت بواسطة medori

الصيانة كل 10,000، انما بيطلبوا منك تيجى كل 5000 عشان يشيكوا على العربية بس، انا كان فى الميجان بيعملوا معايا كدة و صيانة ال5000 دى بتبقى مجانية الا لو عملوا شغل فى العربية مش عارف الحقيقة فى منصور و دلوقتى فى eim لسة النظام دة ماشى و لا لأ

تمام يا فندم....لسه النظام فى eim زى ما هوه....الصيانات الدورية كل 10 ألاف كيلو و مضاعفاتها و دى مش مجانية
و فيه صيانات مجانية كل 5 ألاف كيلومتر و مضاعفاتها لفحص السيارة

فى منصور أوبل الصيانات كل 5 ألاف كيلومتر و مضاعفاتها أو كل 4-6 شهور أيهما أقرب و مفيش حاجة مجانية....