الموضوع: يوميات مواطن بيسوق كل يوم في بلد راحت خلاص :(

المشاركة الأصلية كتبت بواسطة elawany13

بصيت على العربيات اللى ركنه صف تانى لاقيت عربية لانوس راكنة صف تانى والغريب والعجيب انه راكن صف تانى وسايب الركنة الطبيعية اللى بجوار الرصيف الصف الأول فاضية !!!!
الموضوع أثار فضولى فضلت واقف جنبها دقيقه كده لاقيت الباشا جه ومشى وانا عمال ادور على تفسير ليه سايب الركنة فاضية وراكن صف تانى وحاولت اشوف اى تفسير منطقى مش لاقى !!!!
مفيش ثوانى لاقيت عربية أوبل استرا جديده جت وقفت مكان اللانوس صف تانى بردو رغم بردو ان المكان فاضى ويكفى العربية مستريحه جدا
ونزل منه بنت وقفلتها ومشيت
روحت ناديت للعسكرى اللى عند الاشارة وقولتله ينفع منظر الشارع ده
راح اخد كل اللى واقفين صف تانى مخالفات
قولتله مش كفاية مخالفه لازم يعرفوا انهم اخدوا مخالفة والمفروش كلبش كمان
ولا حياة لمن تنادى ويبقى الوضع على ما هو عليه
وحسبنا الله ونعم الوكيل

ماهو الافندية اللي بيركنوا صف تاني و يسيبوا مكان الصف الاول فاضي بيعملوا كده علشان بدل مايركن هو صف أول و ييجي واحد تاني يركن عليه صف تاني و مايعرفش يطلع

شوفت بقي الامخاخ الزبالة ؟؟
حاسس أن بعد كده هايبقي فيه صف ثالث و رابع و الشارع يتقفل تماما طول مافيه ناس بالعقول دي

المشاركة الأصلية كتبت بواسطة Elawany13

مهو ده التفسير الوحيد اللى جه فى دماغى لما شوفت الاسترا بتركن صف تانى .... حاجه تنقط بنعذب بعض وبنعمل المشاكل والازمات وكل واحد شايف انه صح وانه مش هو المشكلة

Sent from my GT-S6500D using Forum Runner

دي أسمها أنانية و عدم أحساس بالاخرين و حب أمتلاك و منظرة و فشخرة

طيب هأقول لك علي حاجة مشابهة :
في الرحاب اللي هيا المفروض المدينة الفاضلة و فيها ناس من علية القوم
داخل السوق و بأركن عمودي علي الرصيف في المكان المخصص للانتظار و طبعا داخل مشغل الكاميرا الامامية علشان اركن اقرب مايمكن من الرصيف من غير ما أخبط فيه و لكي أوفر اكبر قدر من المساحة للسيارات للمرور في الشارع و بالتالي أبعد أذاهم عن ظهر سيارتي

المهم .. لاقيت زوجتي اللي كانت بجانبي بتقول لي أنت قربت من الرصيف كده ليه ؟ المفروض تركن بعيد عنه علشان ماحدش ييجي يقف وراك
طبعا انا بصيت لها بأستغراب و أسبهلال و رديت الرد المنطقي اللي هو لو كل واحد عمل زي ماهي بتقول يبقي الباركينج المخصص لعدد 4 سيارات ده مش هايكفي غير لعربيتين و كمان الملف هايتقفل و الطريق هايقف

قالتي لي و ايه يعني المهم ماحدش يقفل عليك

و فعلا رجعنا من السوبرماركت لاقيت عربيتين واقفين ورا بعض و قافلين عليا , يعني لو لاقيت صاحب العربية الاولي مش هألاقي صاحب التانية و كمان الشارع اللي كان يسمح بمرور عربيتين مرتاحين أصبح يادوب يدخل عربية بالعافية و طبعا مدخل السوق كله واقف بسبب البهوات اللي وقفوا ورايا

المهم دورت العربية و شغلت الانتظار و هاتك يا كلاكسات و فين و فيييييييييين لاقيت واحد جاي يجري و يقول لي أسف و برضه ماعرفش يطلع لأن العربية التانية راكنة وراه و قافلة عليه
فضلنا واقفين منتظرين صاحب العربية التانية و طبعا أستغليت الفرصة علشان أدي لصاحبنا درس في الادب و الذوق و أنه كان المفروض يركن في مكان أخر مش لازم يركن قدام المحل اللي هو نازله و أن مافيهاش مشكلة أنه يمشي علي رجليه شوية أمتار زيادة

المهم شوية و لاقينا واحدة ست جاية تتمختر بمنتهي الهدوء و لا علي بالها و لا حتي أعتذرت , طبعا أنا بصيت لها بقرف من فوق لتحت و دخلت عربيتي و بدأت أرجع لورا
صاحبنا أيه (اللي ورايا) أتنرفز عليها و بدأ يزعق لها و لما بدأت انا أرجع و طبعا شايف المسافة بيني و بينه كويس جدا من الكاميرا الخلفية بدأ هو يتوتر و أضطر يرجع بسرعة في الوقت اللي الست هانم بترجع فيه علي اقل من مهلها و ما أعرفش هو يقصد أو لا راح مريح عليها و مطير لها فانوس الاشارات اليمين

طبعا وقفت و فتحت الباب و نزلت تردح له و هو نزل يرد عليها في الوقت اللي المسافة كانت كافية أني أطلع فطلعت منه و سيبهم و مشيت يولعوا مع بعض

هي دي العقول (للأسف بأقول العقول) اللي بنتعامل معاها في الشارع (أقصد حديقة الحيوانات المفتوحة)

وربنا يسلم طريقنا جميعا و يحفظنا من شره و من شرور الاغبياء