طبعا لازم نستحمل الظابط اللي بيفتش عربياتنا بدون سند قانوني ومفيش مانع نستحمل سيادته برده لو كسر باب شقتي في نص الليل علشان الباشا شاكك إني إرهابي ولازم يقطع الشك باليقين واركن الديمقراطية دلوقتي على جنب مش وقته
ولازم نستحمل وزارة الكهرباء اللي بتقطع الكهرباء كل يوم في الشتاء أما في الصيف فالحمد لله هنرجع لعصور الظلام وأهي فرصة العيلة تقعد مع بعض شوية وتبقى صلة أرحام برده
ولازم نستحمل أزمات السولار إيه يعني لما نقف في الطابور ساعتين تلاتة علشان مسر ؟!
ولازم نستحمل قلة السيولة والعجز الاقتصادي وغلاء الأسعار احنا لازم ندي بلدنا من جيوبنا مننظرش هي اللي تدينا
ولازم نستحمل البلطجة وتثبيت العربيات والقتل والخطف اليومي ما البلطجية دول نتيجة ظلم المجتمع لهم وده أكل عيشهم وباب رزق ليهم زائد إن الشرطة مش فاضيالهم في حاجات أهم في عيال بتشيل مساطر وبلالين لونها أصفر !
ولازم نستحمل القتل والسجن والاعتقال والتعذيب وفض المظاهرات دول شوية إرهابيين خونة مش بيحبوا بلدهم ولازم المجتمع ينضف بقى من الأشكال دي ولازم نضرب بيد من حديد
الطريف بقى إن الجماعة اللي عايزين يستحملوا دلوقتي دول هما هما من سنة بس اللي مكنوش عايزين يستحملوا لا أزمة كهرباء ولا سولار ولا بنزين ولا غاز ومكنش في حل غير نعزل ونحاكم ونشيل أول رئيس شرعي منتخب علشان مش عارف يحل نتيجة عشرات السنين من الفساد في كام شهر واحنا مش هنستحمل أكتر من كده أمال احنا عملنا ثورة يناير ليه ؟!
وهكذا يتم صناعة الفرعون الكبير ليحكم الفراعنة الصغار فهنيئا لهم لأنهم لا يستحقون إلا ذلك وكما تكونوا يولى عليكم
المفضلات