الموضوع: حد نفسن عليك من ال Hr وانت رايح مقابلة عمل ؟

اللى يغيظ ان اليوم اللى قبل وقفة العيد اللى فات ده رايح الشغل الصبح الاقى اعلان على نجوم اف ام عن احتياج اوراسكوم لمهندسين جدد و الله قعدت اضحك مع نفسى :)

حصلت مرة معايا فى بنك معروف قدمت فيه و اتصلوا بيا و رحت و عملت امتحان تحريرى و طول ما انا جوه كل الناس تسألنى هو انت قريب أستاذ ............... أقولهم لا مش متأكد و أتارى أستاذ فلان ده يبقى أكبر واحد فى البنك فى مصر (العضو المنتدب) و كل يوم و التانى صور فى الجرايد
المهم كان المفروض اعمل مقابلة مع مدير شئون الافراد و رحت مكتبه و أول ما قدمت name tag بتاعة الزوار و مكتوب فيها اسمى سالنى نفس السؤال .هو انت قريب أستاذ فلان ؟؟؟ أقول مش عارف بصراحة يقولى طب أتفضل حضرتك !!!!!
نفس الموضوع مع المدير المالى و اتفضل حضرتك !!! و بعده المشرف على الفروع و برضه أتفضل حضرتك !!! انا قولت فى نفسى سبحان الله أيه البنك الكوسة ده ؟!! لحد ما وصلت للعضو المنتدب و عملت معاه مقابلة و كانت المقابلة بعيدة كل البعد عن الشغل و كلها كانت عبارة عن انت جدك مين و منين و جد جدك مين و منين و عمامك و طلع فى فعلا قرابة بس من بعيد يمكن من الجد الخامس على ما افتكر (الاتنين كانوا أخوات) !!!و فى الاخر قالى بصراحة احنا البنك عندنا بيمنع تعيين الاقارب و طبعا زى ما انت شفت اللقب بتاعك عمل قلبان فى البنك و لو عينتك الناس حاتفضل تتكلم و مش حانخلص و فعلا اعتذر باسلوب مهذب و خلاص........
ده بقى موقف من أغرب المواقف اللى اتعرضتلها فى رحلة المليون (المليون وظيفة مش الفلوس) و مالوش علاقة بأى نفسنة او عقد و لكن اعمل ايه ؟؟؟ و بصراحة مش لاقى للموقف ده اسم !!!

والله يا جماعه انا حصل لى موقفين واحد هزنى بجد والتانى ثبتنى ورجع ثقتى فى نفسى
(لازم اعرفكم انى بتلعثم فى الكلام ومعظم الناس مش مدركه و بتشوف ده نوع من التخلف العقلى او ما شابهه بس الحمد لله انا مش شايفه عيب شايفه ميزة وانه كفايه انه صفه من صفات نبى الله موسى)
الاول:
انا شغال محاسب فى الزقازيق ومطور تطبيقات اوركل (شغل خاص) و كنت سمعت من واحد زميل لى ان بى تك عاوزة محاسبين فى فرعها فى الزقازيق وان التقديم والمقابلات فى مركزها ف القاهرة خلال فترة كذا لكذا مش حطيت فى دماغى
ولقيت انه فى نفس التوقيت ده جت لى مقابلة تانيه فى القاهرة فقولت اروح اقدم واشوف اللى هيجرى
ففعلا روحت لمقر شركة بى تك و دخلت وقدمت نفسى وقولت انى جاى علشان وظيفة محاسب لفرع الزقازيق
و دخلت عملت الامتحانات المطلوبة ورد واكسل وبور بينت وانجليزى و سرعه كتابه وتنسيق المهم خلصت الامتحان وطلعت عند اللى هيصحح لى الامتحان وقعدت مستنى النتيجه فلقيته بينادى عليا بيقول لى ورينى انت عملت معادله الاكسل دى ازاى (شكله كان متفاجئ انى حلتها) فشرحتها له نظرى وعملى فحسيت من تصرفاته زى ما يكون لقى لقيه و قالى لى استنى دلوقتى هتدخل تقابل ال hr وفهمنى انى اعتبر كده اتقبلت واتكلم معايا هتقدر تتفرغ امتى من شغلك الحالى وتيجى تستلم
قعدت استنى ال اتش ار ودخلت ولقيت ال اتش ار اللى هيعمل معايا المقابلة مدام وقابلتنى بابتسامه ف استبشرت خير ولكن اول ما بدئت ارد على كلامها (اتعلثم) اكنها صحيت من كابوس لقيت وشها اتغير و قالت لى ثوانى وكلمت السكرتيرة ودخلت ومعرفش ايه حصل (مش فاكر) لقيتها بتقول اتفضل استنى بره وهنادى عليك
ففهمت اللى فيها وطلعت واستنيت بره (مقابلتى مع ال اتش ار مش كملت 4 دقائق) وقعدت مستنى لحد السكرتيرة ما طلعت وطبعا زحلقتنى بالرد الدبلوماسى المشهور اللى معناه انت كده عملت المقابله وان شاء لو فيه نصيب هنكلمك
فساعتها بجد انصدمت
انصدمت من طريقة المعاملة اللى اتعاملت بيها واللى كان من الممكن انها تكون ازوق من كده
وفكرت انى اتقدم بشكوى لإدارة الشركة لطريقة معامله ال اتش ار بس فكرت لو كان ده اسلوب مدير الموارد عندهم فما بالنا بالمديرين
والمقابلة دى عقدتنى لفترة لحد ما الحمد لله عديتها

الثانيه:

رن تليفونى بنمرة غريبة رديت
شركة اوراسكوم معاك يا فندم
ايوه خير
فى وظيفه متاحه تناسب سيادتك فهل حضرتك مهتم باجراء المقابله "والله حصل"
اكيد
الوظيفة supervisor sales administrator
ميعاد الانتر فيو يوم كذا فى المكان الفلانى الساعه كذا
شكرا

قفلت معاها وانا مستغرب
لا عمرى قدمت ف اوراسكوم ولا سعيت لوظيفه من الكاتيجرى دى
دورت فى الايميلات اللى كنت بعتها للشركات ولا ايميل اتبعت ل اوراسكوم
المهم سرشت على النت علشان اعرف متطلبات الوظيفة وقريت وفهمت

رحت الانتر فيو
لقيت ورقى كله عندهم (مخى راح لواحد زميل والدى كان معشمنى بشغل)
وقعدت والانتر فيو مشى حلو جدا (مع انى برضه كنت بتلعثم) وحسيت ان اللى قدامى ناس فاهمين (على الاقل بيسمعوا مش زى ناس)
وقبل ما الانتر فيو ينتهى سئلتهم ممكن اعرف ورقى جه ازاى قالوا لى انهم جابوه عن طريق موقع توظيف اسمه ايجى ريك كنت مسجل عليه من زمان (قولت مدام كده يبقى مفيش توصية والمقابله طلعت فشنك)
فالمهم طلعت من عندهم وقولت خلاص زيها زى غيرها
بعد كام يوم لقيت تليفون تانى بيكلمونى علشان اروح اعمل مقابله تانيه "يعنى المقابله الاولى كانت فلترة والحمد لله عديت منها"
رحت المقابلة التانيه واتفاجأت ان اللى هيقابلنى هوا السوبر فيزر العام للشركه الام
وكان بجد مثال للعقليه المتفتحه الناضجه
وخلصت المقابله ومشيت والمرة دى مش كانت فارقة معايا انهم يكلمونى تانى لانى حسيت ان فى ناس لسه بتفهم وبتعرف تنقى كوادرها صح فاطمنت و كمان مش نسيت فضل ربنا عليا وانه بعت لى الموقف ده علشان اطمن وافتكر ان فى الرزاق


ودول كان موقفين حصلوا معايا وعشتهم بجد واتأثرت بيهم والشركتين شتان الفرق بينهم
حبيت اشارككم معاكم مع العلم انى مش حكيت لاى حد قبل كده