الموضوع: شفت بالله عليك بنات آخر زمن..عمار يا مصر

المشاركة الأصلية كتبت بواسطة sab3aawy

مواقفك على كل كلمة قلتيها وكنت داخل اكتب الكلام نفسه

اما بالنسبة للأخ العزيز صاحب الموضوع فالقصة ببساطة ان فيه اختلافات بين فكره كل واحد فيكم عن مستقبله، لكن هذا الاختلافات لا تستدعى انك تقول عليها دلوعة ومستهترة وبنات آخر زمن والحاجات دى كلها

هى اذا كانت غلطت فى حاجة فهى انها مدرستش عرضك من الاول ومدرستش ظروف حياتك قبل ما انها توافق، وبالتالى الرفض تأخر شوية، لكن اختياراتها لحياتها هى حرة فيها زى ما انت اختياراتك لحياتك انت حر فيها وفى النهاية اذا لم تصلوا معا لنقطة اتفاق يبقى فراق باحسان من غير ما انك تقول عليها الحاجات دى،يعنى انت بتتكلم عن التربية الصالحة والتدين ، وشايف انها اجرمت فى حقك بالتصريح بما يناسبها فى حياتها، فهل شايف الكلام اللى انت قلته عليها وقراه آلاف من اعضاء المنتدى شئ صح؟ انت شايف ان من حقك تطلب اللى انت عايزه فى الطول والعرض والوزن واللون وهى مش من حقها انها تطلب ما تراه من شريك حياتها؟

اللى انت بترفضه فيه غيرك بيقبله والفتيات والسيدات ناس زينا لهم ما لنا وعليهم ما علينا ومن حقهم انهم يختاروا ما يرونه مناسبا لحيواتهم طالما لم يخالف شرع ولا قانون

على فكرة انا عدى على موقف مشابه جدا لموقفك ،انا من 12 سنة تقدمت لخطبة آنسة فاضلة طبيبة بشرية ، وبرغم الاتفاق المبدئى جائت بعد فترة وقالت لى ان ظروف عملها تحتم عليها الغياب الطويل عن المنزل و و ..الخ مما تتطلبه مهنة الطب من عمل ودراسة ولم اعترض، لكنها رأت بعد فترة انها من الانسب لها ان ترتبط بواحد من ابناء مهنتها حتى يكون متفهما لظروفها وبالتالى طلبت منى ان ننهى الامر ، وبرغم انى تضايقت قليلا وقتها لكنى لاحقا وحتى هذه اللحظة احترم هذة الانسانة التى كانت صريحة مع مطلباتها ومعى

مبدئياً الله ينور عليك يابشمهندس سبعاوي. :k49:

ثانيا بالنسبة للأخ صاحب الموضوع انا قريته اول مرة ومحبتش ارد وقلت افكر شوية واشوف الناس هاتقول ايه وبعدين اقول رأيي لإن العنوان بصراحة واسلوب الكلام عن البنات عموما والمصريات خصوصا ضايقني وعلى فكرة اي بنت مش مصرية كان ممكن تكون بتفكر كده واصعب كمان وبتشترط هيا كمان وتختار رغم ان برده عندهم عنوسة يعني.

اينعم الجواز بقي صعب وصعب جدا الحصول علي عريس جاهز مادياً بس الأصعب منه بقي الحصول على عريس مناسب دينياً وشخصياً ونفسياً وعاطفياً وانا قلت مناسب مش معاناها متفوق في كل شئ لكن يتناسب مع طبيعة البنت مش اكتر عشان الحياة تكمل بينهم.
ومش معني ان الجواز بقي صعب يبقي البنت المفروض انها اول مايجيلها عريس جاهز تقبله بكل طباعه وشروطه وشخصيته وتبوس ايديها وش وضهر وتشكره انه رحمها من العنوسة ومتفكرش لمجرد ان الجواز صعب طب ماهو الطلاق برده أصعب وأمر بمراحل لو لاقدر الله محصلش توافق بينهم بعد الجواز يبقي هي برده بتتبطر او بتدلع وعشان كده اتطلقوا؟ لا طبعا الموضوع في الأول والأخر توافق بين الاتنين سواء في الشخصيات أو في الظروف يعني هي مرفضتش شخصية حضرتك هي فقط رفضت الظروف اللي هاتتحط فيها لما تسيبها شهر كامل تكلم نفسها من غير زوج وكمان من غير شغل والفراغ وحش لأبعد الحدود اللي ممكن الواحد يتخيلها خصوصاً للبنت وللست المتجوزة اشد بكتير ولو مكنش ايمانها من حديد واخلاقها تمام يبقي وقوعها في اي خطأ لاقدر الله شئ وارد.
هي مش متمسكة بالشغل عشان حقوق المرأة والمساواة والشعارات والكلام ده بس هي سألت نفسها هي في الشهر اللي هاتغيبه عنها ده هاتعمل ايه وحتى في الشهر اللي حضرتك هاتنزل فيه متفتكرش انك هاتسخرلها وقتك كله وتقعد معاها ال 24 ساعة × 30 يوم بتوع الشهر وتقضوا الشهر ده حياة رومانسية هادئة حضرتك هايبقي عندك زيارات عائلية ومقابلة اصدقائك ومشاوير لمتطلبات اسرتك وواجبات عائلية واستعداد للسفر وترتيب للشغل للشهر الجاي.
انا مختلفة معاها بس في مواعيد العمل اللي من 7 لحد 7 دي لان فعلا مفيش راجل هايوافق علي ده وانا شخصياً لما اتجوز مش هاتحمل اشتغل من 7 الصبح ل 7 باليل ولو ده هايتعارض مع واجبات بيتي هاشوف شغل بمواعيد اقل او هاسيب الشغل فهي كان عندها مجموعة حلول ومش عارفة ليه مستخدمتهاش يإما كانت تكتفي بالدراسات العليا ودي هاتشغلها وقت بشكل كويس وكانت ممكن بجانبها يبقي في العمل التطوعي ده لو مفيش تعارض يإما كانت تشوف وظيفة بمواعيد مناسبة واجازة يومين في الإسبوع وتحاول تاخد اجازات اضافية من رصيد اجازاتها في الفترة اللي حضرتك هاتكون موجود معاها فيها واهي الحياة ممكن بعد كده تمشي وتوكبوا نفسكوا علي الظروف دي فيما بعد.
بس مش عارفة ليه انتوا قررتوا ان الحل الوحيد هو الإنفصال لو حضرتك رافض موضوع الشغل من اساسه فإسمحلي كان لازم يتقال الكلام ده في اول قعدة اتفاق مابينكوا وقبل الخطوبة كمان عشان كل واحد يبقي عارف هو داخل على ايه وميرجعش يعترض بعد كده وهي برده كانت المفروض انها تحسبها كويس وتفتح الموضوع ده معاك من قبل اي خطوبة عشان تقرروا ان كان الوضع مناسب ولا لأ.
وعلى فكرة جملة (وصل الدلع والاستهتار بالبنات لدرجة انهم عاوزين يتساوي بالرجاله؟؟) دي غريبة اوي هو عشان البنت بتفكر وتختار اللي يناسبها ويناسب عقليتها وظروفها وتقرر توافق او ترفض تبقي بتساوي نفسها بالرحالة او ماشية بسياسة العين بالعين والند بالند؟

انا مؤمنة جدا ان الرجال قوامون على النساء

قال الله تعالى : { الرجال قوامون على النساء بما فضل الله بعضهم على بعض وبما أنفقوا من أموالهم } النساء/34
قال الله تعالى : { وليس الذكر كالأنثى } آل عمران/36

بس ده لايتعارض مع ان من حقها تختار مواصفات شريك حياتها زيها زي الراجل بالضبط وتشترط عليه زي ماهو بيشترط عليها بالضبط طالما مش حرام وطالما ده كان بهدف الوصول لظروف مناسبة للاتنين وبس من غير ماحد يظلم حد :Angel_anim:

في النهاية اتمني ان حضرتك متزعلش من كلامي بس الدنيا مش وردية اوي ومش كل بنت هاتلاقيها فيها كل المواصفات 10/10 ولا كل راجل فيه المواصفات اللي البنت عايزاها 10/10 لازم يبقي في شوية تنازلات من الطرفين ولابد من وجود اوجه اتفاق وتناسب اساسية من البداية.
وزي ماحضرتك قلت ان شاء الله هي أكيد لها قدر من الله مع غيري وأنا ليا قدر من الله مع غيرها في ميعاد معين لا يعلمه إلا الله
وتقبل خالص تحياتي :Angel_anim: