الموضوع: 301 ...صيانه و 3 شهور استخدام...من الاخر

المشاركة الأصلية كتبت بواسطة د.عماد صلاح

املك بيجو 301 بيز لاين من 3 اشهر و الحمد لله معي اوبترا 2013 من سنه...هكتب تجربتي مع البيجو و بطبيعه الحال غصب عني هيبقي في مقارنه بينها و بين الاوبترا في وسط الكلام
اولا عملت صيانه ال 3 اشهر والعربيه عامله 2200 كيلو العربيه بتاعه المدام و استخدامها ليها خفيف ممكن العداد انا عامل نصه ....الاستقبال في مركز ابو رواش جيد مكان الانتظار فقير شويتين لا يمكن رؤيه السياره اثناء الصيانه ولم يحدث اي تغيير للسياره بعد الصيانه رغم اني اشتكيت من بطء السحب
ثانيا ..اداء السياره ...سحب السياره علي البطء سئ للغايه و مع التكييف العربيه بتبقي ميته في السحب ولازم تضغط عليها جامد عشان تسحب ولازم الار بي ام يعلي جدا فوق ال 3 عشان تحس بتسارع معقول و صوت الموتور ساعتها بيعلي جدا
التكييف ...متوسط جدا ..وبصراحه كده انا كارمه ...خاصه علي السرعات البطيئه ...يعني النهارده وانا راجع من التوكيل و في الزحمه اللي قبل المطب بتاع حازم حسن التكييف كان وحش جدا جدا ..طبعا التوكيل قال مافيهوش حاجه
فرامل العربيه كويسه
السوند سيستم طبعا سماعتين بس ..لكن معقول جدا
النهارده ضغط علي العربيه شويتين يعني رحت بيها القصر العيني ورجعت علي ابو رواش و بعدين الهرم ...علي اخر المشوار حسيت انها فيصت مني .....
المشاكل ..حصل لي مشكله لمبه التشيك ..بس العربيه كانت ممونه من بنزينه مختلفه قبل المشكله دي و المشكله راحت في 30 دقيقه
الثبات ..كويس بس في الملفات ولو معدي جنبك نقل بيتاثر جامد و فوق ال 120 تبدا تحس بالسرعه
الخلاصه .....بالنسبه للسعر هي عربيه كويسه و لو استخدام خفيف يبقي مش هتعمل مشاكل كتير ...لكن اعتقادي انها مش للبهدله

موضوع السحب وخصوصا مع التكييف واضح انه مشكلة عامة في الاوتوماتيك
ده كان سبب تخوفى من الاوتوماتيك في البداية والحمد لله انى جبت المانيوال

التكييف كان عندى الشحن فضى بسبب واحد كان هينصب عليا ربنا ينتقم منه لما كنت بغير المقص بعد ما العربية اتخبطت واستعوضت ربنا وشحنت برة وكان زي ما بتقول ضعيف في السلانسيه تقريبا بيفصل خالص في الزحمة بس مقابل كدة مكنش بيأثر على العربية خالص بعد الحركة دى ، وفي الطوالى ممتاز وبالليل تلاجة جدا


بعد كدة رحت شحنته في توكيل غمرة في صيانة 10 الاف ، هم عندهم شحن بالكمبيوتر و العربية بتقعد نص ساعة او اكتر تتشحن ، بصراحة رجع ممتاز جدا ، انا اقدر اقول انه زيه زي بتاع الكورولا دلوقتى مفيش فرق يذكر والحمد لله معنديش تاثير ملحوظ على السحب


مشكلة التيل مش مشكلة اوى مع انى داخل على 12 الف ولسة ما غيرتش التيل ولا حتى صفر معايا الحمد لله وان شاء الله يقعد معايا فترة معقولة ، (دى برضه ممكن تكون مرتبطة اكتر بالاوتوماتيك)

الثبات في الملفات كويس وفي الطوالى كويس بس بحس بالسرعة بعد 140 طبعا ولو ماشى ع الصحراوى وفي هوا جامد جدا هتحس ان العربية عايزة تحدف ( اعتقد كويس عليها في الفئة دى ) بس هى تحت الـ 120 حلوة اوى وتحسسك انها ماسكة نفسها وكويسة

الاوبترا كوضع الزيرو هتبقى حلوة معاك بس اتقل شوية وهتلاقى شوية مشاكل برضه في البوابة والباور والفرامل والعفشة والمشكلة والطامة الكبرى عن تجربة اسعار قطع غيار الاوبترا غالية جدا ولا كانها عربية كوري موديل قديم ! حتى الاستيراد غالى جدا بحجة ان الجديد مضروب والتوكيل غالى بهبل !


هو من الاخر فعلا انت قلت كلمة حكمة مفيش عربية هتبقى كاملة في الفئة السعرية دى ، اصلا مش عايز اقولك لحد 200 الف هتلاقى برضه العربيات بيتقال عليها متوسطة ومش بتدي كل حاجة وفيها عيوب برضه

بسم الله الرحمن الرحيم

الإخوه الأفاضل جميعآ

لقد قرأت كلماتكم بهدوء وتأن و دقه و للمشاركه أود أن أخبركم برأى فى البيجو 301 و إليكم التفاصيل.

إتصل بى منذ حوالى شهر صديق لى و طلب منى أن أرافقه إلى بيجو أبو رواش لأنه سيستلم سياره بيجو 301 جديده أوتوماتيك و يخاف من قيادتها و يريد من أن أذهب معه لأستلم السياره ثم أقودها حتى المنزل ومنذ ذلك الحين قدت هذه السياره أكثر من مره لأكثر من غرض حيث أن صديقى يخشى قيادة هذه السياره فى الزحام وبعد قيادة السياره أكثر من مره إليكم رأى فيها.

1 - سحب السياره يتدرج من ضعيف إلى ميت
هذه مشكله خاصه بالبيجو 301 و ليس كل الأوتوماتيك بهذا السحب المزرى و أنا لا أتحدث من خيال بل إننى أيضآ حظيت بقيادة لانسر بوما القديمه و الحق يقال أنه لا مجال للمقارنه بين السيارتين فبمجرد أن تأمر لانسر بالحركه تثب السياره كالأسد

2 - الشبكه الأماميه مثبته فى جسم السياره بكلبسات و لذلك مجموعه صغيره من المطبات تكفى لفك نصفها و عندما قمت بإعادة تركيبها بيدى مره ثانيه أحسست كما لو كنت أتعامل مع ورق كرتون من شدة ضعف مقدمة السياره و خفة وزن الشبكه الأماميه

3 - إشتكى بعض الأعضاء من أن غيارات الفيتيس الأوتوماتيك فى ال301 مخنوقه و هى إما تؤدى لأن تقفز السياره بك للأمام أو العكس أن يتأخر تسارع العربيه بعد الخروج من المطب الصناعى مثلآ (فضلآ راجع الموضوع فى الرابط الآتى http://www.nilemotors.net/Nile/426786-301.html)
وقد وجدت هذه المشكله بالحرف فى سيارة صديقى. الفيتيس مخنوق جدآ كما لو كانت الغيارات غير منتظمه أو الفيتيس بطىء جدآ

4 - فى النهايه لن أشعر بالإطمئنان إن سافرت بهذه السياره مثلآ كما إننى لم أجد لها شىء يميزها عن أى سياره أخرى بل بالعكس أجدها أقل من سيارات أخرى كثير.

أرجو ألا يسبب كلامى ضيق للإخوه الذين إشتروا هذه السياره و كذلك للإخوه المتحمسين لها. أنا عبرت عن رأى بصدق و الإختلاف فى الرأى لا يفسد للود قضيه.

وأؤكد أننى أتمنى أن يبارك الله للإخوه الذين إشتروها فيها لأننى أعلم منى أن تدفع شقى عمرك فى سياره

السلام عليكم و رحمة الله و بركاته

المشاركة الأصلية كتبت بواسطة 2CODE

خلاص العربية دي طلعت مقلب كبير وفريق التسويق اللي موجود هنا في المنتدى لعبها صح بأسم بيجو وقت ما طلعت جديد !!!!!!!!!!

بقايا العربيات من بيجو صنعوا بيها عربيات غير صالحة للاستعمال الادمي من هروب فرامل وتيل فرامل اخره 5000 كيلو وموتور ضعيف جداً وطقة في العفشة وبطئ في السحب مع التكيف وخراطيم بتتقطع في الفحص !!!!!!!

اقول لك ايه بس يا فندم !!!!!!! قولنا الكلام ده مليون مره لكن فريق المبيعات بتاع الشركة هنا في المنتدى كان واقف قدامنا

والله يا فندم التعليقات دي يتضحكني فعلا
واضح انك مركبتش العربية و انك مجرد بتقرا عالنت مش اكتر ومعظم كلامك مشاكل فردية بتحصل في كل العربيات
ولو عاوز انا ممكن اقولك كل العيوب دي واكتر منها كمان في العربيات الكوري مثلا او غيرها

http://www.nilemotors.net/Nile/429277-301-20-000-a.html

حضرتك دة تقرير عن صيانة ال 20000 والحمد لله مفيش شكوي من العربية في اي حاجة
ياريت تقراه

http://www.nilemotors.net/Nile/430860-301-7500-a.html
ودة كمان تقرير من احد ملاك العربية ياريت تقراه ...
وياريت زي ما فيه ناس بتقرا المواضيع اللي فيها مشاكل فقط ياريت نقرا المواضيع اللي مفيهاش مشاكل كمان عشان اللكلام يبقي بحيادية

والله يا دكتور جبت من الآخر
بس التكييف اقل من المتوسط بكتير
اخويا عندي اكسنت 2000 تكييفها احسن من الـ 2014 بيجو 201