الموضوع: حوار من القلب للقلب - الجزء الأول

صديقي العزيز المهندس احمد ...
واحشني جدا .. و واحشني كل الناس الحلوة اللي هنا .. وواحشني الموضوع بتاع نور من يوم ما ابتدي ...

أبو على فينك ياراجل مختفى ليه وحشنى بجد حمد لله على السلامة ياراجل

حادخل في الموضوع علطول...

بعض كلمات .. و مطلوب من حضرتك تقوللي ماذا تعني هذه الكلمة بالنسبة لك

-شهر رمضان

بستناه من السنة للسنة - به جرعة كبيرة من العبادة وتهذيب النفس - والتقرب لله بالطاعات

والدعاء - ربنا يبلغنا رمضان ويتقبل منا يارب - بالاضافة للجو الروحانى وتجمع العائلة على مائدة

الافطار شعور لا يضاهيه شعور

- سيراتو اوتوماتيك

تجربة مش بطالة - مع انى كنت خايف من الكورى - بس الحمد لله ... دى جاية بعد الاستخارة

- تمبرا

مفتقدها بجد .... كان لى بها احساس غريب ملوش وصف معين بس هى حاجة كده....

مش حسسها فى السيراتو بالرغم من اختلاف العمر والحداثة ....

- الصديق الوفي

نادر ...بس موجود

- الحب

من غيره الدنيا ملهاش لازمة

- نايل موتورز

أدمان ...عمرى ما ارتبط بموقع او منتدى طول هذه المدة او بالكثافة دى لتواجدى يوميا

بس اظن الارتباط بالناس اللى مشكلة المجتمع الافتراضى لنيل موتورز حصل بينا وبين بعض

الفة .... واغلب الموجودين مع اختلاف اعمرهم واتجاهتهم الفكرية الا انهم بينهم حاجة مشتركة

وهى حب افادة الاخرين .

- اوباما

مش متفائل بيه اوى- هى امريكا دولة ليها سياستها ولازم رئيسها يطبق هذه السياسة مش

ماشى بدماغه وان اختلفت طرق تنفيذ هذه السياسة من رئيس الى اخر (بس بالنسبة لى اى حد غير جورج بوش هيكون افضل بكثير)

- دول الخليج

بحسدهم ... مش على غناهم بس على النظام والرقى اللى بقوا فيه وخذ للمرورعندهم مثل

وكمان اهتمام حكمهم بمواطنيه مقارنة بحالنا والذى صرنا اليه من هرجلة وهمبكة وقلة قيمة

ودى مش مشكلة حكم وحكومة بس دى مشكلة الشخصية المصرية للا سف الشديد .

- الخيانة

ربنا يكفيك شرها

- التلفزيون

ما بقتش اشوفو من فترة زمانية طويلة

- السياسة

متابع لها من بعيد لبعيد

- كلية الهندسة

كانت هدف والحمدلله اتحقق

- مدام أحمد اسماعيل

ربنا يبارك فيها

* مش عارف حد سألك السؤال ده و اللا لأ ...بس ما معني su الموجودة في اسمك ؟

هنا فى المنتدى محدش سئلنى ....

معنى SU ده ليه حكاية ..... فيه هواية اسمها هواة الراديو Radio Amateur

يعنى سعدتك بتمتلك راديو لاسلكى ارسال واستقبال وتحادث به اصدقاء يمتلكون نفس الهواية

من مختلف انحاء العالم ولهم اتحاد دولى واقليمى وكل واحد ليه رمز نداء يبقى مميز بيه عن

غيره وعلشان تحصل عليه بتتقدم لامتحان صغير شفوى وتحريرى لمرفق الاتصالات وبعد مابتنج

بيطلعلك رخصة بها رقم ندائك التعريفى والبلاد مقسمة كل بلد ليه كود .. وكود مصر هو SU

وكود الهواة هو (1 ) يبقى وبعدين اول حرفين من اسمك يبقى الكود بتاعى كما يلى su1-AI

وينطق وانت بتعرف نفسك (اس يو وان الفا انديا ) يبقى اللى بيسمعك يعرف انك من من مصر

والفا انديا هو اختصار اسمى احمد اسماعيل ... وبيقت لما اسجل فى كل المنتديات بحط الاختصار ده

وجعت دماغك مش كده ؟؟!!!

* اذا كنت من سكان القاهرة ... ايه المنطقة اللي بتحبها و تحب تسكن فيها ...

ايوه انا من سكان القاهرة ... واتولدت وعشت فى الجيزة لحد ما اتجوزت وعديت الجانب الاخر

من النيل ... علشان كده بحب الجيزة مش علشان حاجة مجرد ارتباط نفسى ... نفس اسكن على النيل فى اى حتة

و ايه المكان اللي نفسك تسيب القاهرة و تروحه .. و ايه البلد اللي نفسك تعيش فيها لو مكانتش مصر ؟؟

اى مكان فيه خضرة وهدوء على اطراف القاهرة ....

لو دولة عربية يبقى فى المدينة المنورة اطهر ارض ...ولايمكث فيها غير الطيبين (المدينة تلفظ خبائثها)

لو دولة اجنبية تبقى فرنسا .

* احمد اسماعيل لما يكون متضايق ( ربنا مايجيبش ضيق ) بيعمل ايه .. بيروح فين .. بيتصرف ازاي ؟

عادة اتجه الى ربنا بالصلاة والدعاء...... او بافضل اسوق العربية من غير هدف الى ان يتغير مودى

* ايه معني التكنولوجيا بالنسبة ليك .. و هل ليها اثر سلبي او ايجابي علي حياتك ... و ايه اكثر تطبيقاتها اللي بتستخدمها في حياتك ؟

طول عمرى من وانا طفل صغير غاوى تكنولوجيا واللى كانت متوفر وقتها الراديو الترنزوستر

وكنت اهيم به وبوظت يمكن مائة راديو منهم على مدار سنين الطفولة وحتى الان اهيم بالرديو

الترنزوستر ولو انه بقى اى سى وامتلك اكثر من 12 جهاز باشكال مختلفة فتقدر تقول كل ماهو

يدور فى فلك الالكترونيات والكمبيوتر والانترنت والسيارات تلقينى راشق على طول وكذلك اغلب قرائتى فى هذا المجال

واعتقد ان الاكثر استخداما هى الانترنت فبها انت معاك كنوز العلم والمعرفة و الترفيه كمان

اثرها سلبى على ماعتقد من ناحية الارتباط العائلى الذى قل بدرجة كبيرة لانى اغلب ان ماكنش

معظم الوقت على الانترنت وخصوصا من بعد ماجبت لاب توب فبقى معايا فى كل حتة حتى فى الحمام

*اذا بصيت بصة علي الشباب الايام دي .. ماذا تري .. هل الجيل مبشر بالخير و اللا ... و هل فيه مشاكل معينة يعانيها الشباب هذه الايام تحتاج الي حلول جذرية ؟

والله الشباب مظلوم لانه بيفتقد القدوة الجيدة وطلع على مفاهيم بتقلل من قيم العمل والاجتهاد وبتعلى من

قيمة الهمبكة و والتهليب وشغل الثلاث ورقات وبالتالى مافيش امه بتتقدم بالهجص بتتقدم بالشغل

واثابة المجتهد - حل - انا مش متفائل بأن ياتى حل فى القريب العاجل وخاصة ان اكثرمن جيل

اتربى على المفاهيم المغلوطة واللى صعب جدا انها تتصلح الا على مدار سنوات طويلة جدا

وساعات بحس انى ظلمت ولادى ان جبتهم للدنيا - ربنا يستر

* الرضا عن النفس .. بيتحقق امتي عند احمد اسماعيل ؟

لما بساعد حد وخاصة اذا كان محتاج المساعدة وارى فى عينه نظرة الارتياح - ومش شرط مساعدة مادية
ببقى مبسوط منى قوى وبدعى ربنا دائما ان يوفقنى فى قضاء حوائج الاخريين .

* ان شاء الله حتجيب عربية جديدة قريبا .. تتمني تركب ايه ... ؟

اتمن ان اركب النجمة الفضية (مرسديس)
........................

اقعد أزأز في دول لحد ما اظبطلك كام سؤال تانيين :)

أزأز ... والله ايدى وجعتنى من كتر الاجابة - الواحد عاوز كى بورد تكتب اللى يجى على البال مش بالصوابع.

دمتم بخير

ربنا يكرمك