الموضوع: عيوب ومميزات اوبل استرا كوزمو 2014 "Opel Astra Cosmo "

السلام عليكم ورحمه الله وبركاته

انا كنت حابب اعمل موضوع جديد فيه المميزات والعيوب بتاعه الاسترا بكل موضوعيه بعد استخدام لمده سنه..

نيجي للميزات:
1- ثبات على الطريق.
2- امان وثقه فى السفر. بسبب الصاج والايرباج كأي عربيه اوروبي.
3- رفاهيه فى المقصوره الداخليه وجوده خامات التابلوه والكراسي.
4- نعومه السياره مقارنه بسيارات اخري لديها نفس الجنط 17.
5- تكييف قوي مقارنه بالعربيات الاوروبيه واليابانيه.
6- شكل رياضي وانسابيه فى التصميم.
7- النظام الذكي للسياره.
8- التوازن الالكتروني اللى بيساعد على التحكم فى السياره رغم ارتفاع السرعه.

طيب نيجي للعيوب:
1- قطع الغيار المبالغ فيها (كالعاده طبعا).
2- توكيل اكثر من سئ (منصور).
3- كركره فى الموتور وبين تنقلات الفتيس بين ال d و n و p بسبب نضافه البنزين (اللى كل العربيات بيحطوا من نفس البنزينه والمشكله دي فى الاسترا بس سبحان الله).
4- ضعف السحب مع تشغييل التكييف (بسبب ان العربيه تقيله على الموتور) بس بأمانه انا شايف ان سحبها اي نعم بطئ بس مرضي والتسارع بيزيد بعد ال 80 كم حتي لو مشغل تكييف
5- صوت الموتور عالى اللى حد ما (بس انا شايف انه رياضي لكن ممكن يكون عيب لبعض الناس اللى بتحب الهدوء علشان كده حطيته فى العيوب)
5- نتشه ورجه فى الفتيس بين النقلات الاولى (وده على حسب كلام التوكيل انه عادي جدا فى كل موديلات 2014)
6- عزل الصوت ليس بالقوه الكافيه.
7- فيها عيب فى سينسور سرعه المروحه اللى على طول بيبوظ وبيتغير فى التوكيل.

بس كده ابقي انا عملت موضوع الى حد ما محايد علشان اللى بيفكر يجيبها يبقي عنده ال feedback بشكل محايد من غير ما الواحد ينفخ فى العربيه علشان سمعتها الخلاصه ان تقييمي ليها 7 من 10

واي استفسار انا تحت امركم :)

ايه يا جماعه مفيش ولا اي استفسار ولا اي رد بعد 41 مشاهده؟

المشاركة الأصلية كتبت بواسطة mustafa_farouk

i love this car awi

وانا كمان بحبها ومن وجهه نظري شايفها احسن عربيه فى فئتها :)

المشاركة الأصلية كتبت بواسطة swimmer25

لما جربتها في 2013 كان فيها تأخير بين النقلات ودي حاجة مزعجة بالنسبالي جدا
ولما عربية تنزل بمشكلة زي دي ومتتحلش قبل طرحها في السوق يبقى عيب أوي
الأوروبي قيمته راحت بصراحة والياباني متفوق والكوري بدأ يتفوق

اليابااني لا يعلى عليه بس بردو الالماني يفرق فى الجوده والخامات موضوع الفتيس ده التوكيل قال ان في سوفتووير جديد هجربه وابلغك وهيا النتشه بين التاني والتالت فقط الصراحه ومبتبقاش ملحوظه الا لو انت مركز مع العربيه بالمناسبه هيا بردو موجوده فى الياريس الجديده معرفش الكورولا فيها الموضوع ده ولا لاء

المشاركة الأصلية كتبت بواسطة omar mahmoud

شكرا علي التقرير
السرعة القصوي للعربية كام؟؟و الثبات ممتاز لحد سرعة كام؟؟؟
و ربنا يباركلك في عربيتك

السرعه القصوي للعربيه فى ناس جايبه بيها 210 وزي الفل انا عن تجربتي جبت بيها 175 وكان ثباتها ممتاز من وجهه نظري بس انا عموما بخاف من السرعه مبزودش عن 120 فى الغالب :) لكن اللى بيجري بيها بيقول ثباتها ممتاز على 210

المشاركة الأصلية كتبت بواسطة ashourashour

العفشه اخبارها اه في شوارع المخروبه ؟

ضهر العربيه مستقر ولا بيطلع وينزل ويزعج اللي قاعد ورا ؟

على سرعه 100كم ال rpm كام ؟

وربنا يباركلك

1- العفشه مش زي الطاسات طبعا فى الشوار المخروبه لكن هيا فعلا انعم عفشه شوفتها فى الجنط ال 17 بس بردو متجريش على 60 على شارع متكسر لكن لو ماشي على 20 او 15 مثلا ولا هتحس باي حاجه.

2- مجربتش الموضوع ده الصراحه بس محدش قعد ورا واشتكي ابدااا وبيني وبينك وانا سايق عمري محسيت بضهر العربيه وهو بيعوم او بيطلع وينزل لا ثبات مينفعش اتكلم عليه وامان وصاج الله اكبر الصراحه.

3- على ما اتذكر ممكن 2 بالكتير اوي وسرعه الفتيس بتكون على السادس الصراحه الفتيس بيريح فى الموتور

ولو انت مسافر وثبت السرعه على 100 هتلاقي راحه وتوفير بنزين زي الفل هتنبهر بجد :D