الموضوع: عيوب ومميزات اوبل استرا كوزمو 2014 "Opel Astra Cosmo "

على فكره ياجماعه انا كان معايا نيسان صنى 83 وكنت دايما احط ليها بنزين 80 وكانت ماشيه زى الفل ببعد كذا تفوبله من كذا محطه عشان محدش يقول من محطه بعينها بدات احس ان العربيه ادائها وسحبها بقى زقت وبتكركر وبدات اشك فى ان العربيه داخله على عمره او ماشابهه وفى يوم لفيت مالقتش 80 حطيت 92 وذهلت ان العربيه رجعت احسن من الاول والسحب والتساره ممتاز صدقونى كل البنزين جودته قلت وانضغاط محرك الاسترا 1:11 يعنى على اقصى حدود 92 فلو مغشوش لازم تكركر وتنتش ده طبيعى

افهم من كدا ان كل العربيات اللي بتنزل مصر مليئة بالعيوب كوري يباني الماني فرنساوى ايطالي الخ .........
الواحد يجيب الصيني احسن ههههههههههه

المشاركة الأصلية كتبت بواسطة netera

السلام عليكم ,

انا كنت حاجز كورولا 2015 الفئة التانية
بس بصراحة لما شفت الاسترا و اتفرجت عليها في توكيل منصور العربية رائعة بصراحة


بس قلقت شوية دلوقتي من موضوع الرجة و نقل الفتيس ده , المشكال ديه موجودة في 2015 كمان ؟

و عامة هيا و لا الكورولا ؟ كعربية جوه البلد معظم الوقت

احنا مستنين رد التوكيل على نتشه الفتيس والكركره لان الدنيا مقلوبه فى منصور بسبب ان فى اكتر من مالك للسياره مقدمين شكاوي ضد منصور فى حمايه المستهلك واعلنوا انهم هينزلوا سوفت وير جديد يحل المشكله دي

لسه ناس مشترين 2015 وعندهم نفس المشكله واتحلت ببنزين 95 اللى معاه فلوس بقي يحط بنزين 95

المشاركة الأصلية كتبت بواسطة rasmaroon

متفق مع صاحب التقرير في رقم 1, 2 لكن قطع غيار السيارات كلها غالية ولو قارنتها بالكورولا مثلا نفس الاسعار تقريبا ودي سيارة مكونتها الماني فطبيعي ارتقاع اسعارها
التوكيل: هو متوسط وليس ممتاز كحال توكيلات مصر على الله والحقيقة انا ما وجهتش مع التوكيل مشاكل لكن هو ملتزم بالضمان
البنزين: انا بمون بنزين 92 من محطات الامارات وموبيل on the run ووطنية وبصراحة بتجنب اي محطات صغيرة أو مش نظيفة وماعنديش كركرة نهائيا على الرغم من ان الموضوع شائع في سيارات كثير ومنها كوري ويباني بسبب غش البنزين لكن هو يعتمد على نوع المحطة وموقعك الجغرافي في مصر
الفتيس: موضوع اول مرة اسمع عنه الفتيس هو الميزة الاولى في العربية 6 سرعات أكثر من رائع الفتيس نقلاته مبكرة لراحة الموتور وسلس وقليل الاعطال واحساس بمتعة في القيادة وكان من اسباب اختياري للسيارة ولا يوجد أي نتشة فتقريبا الحالة دي فردية أو لسبب اخر
لكن اعجبني فيها الثبات رائع والفخامة والجودة ومتانة السيارة متماسكة وعوامل امان
فقط حبيت اوضح ان بعض العيوب المذكورة ليست شائعة ومش موجودة عند اغلبية الملاك

شكرا لمرورك الكريم واسف لعدم الرد سريعا نظرا لمشاغل الحياه ردي على حضرتك بسيط جدا

1- قطع الغيار : مبالغ فيها جدا وزادت 20% زياده بعد موضوع الانسجنيا علشان يلموا المصاريف اللى دفوعها فى تصليح العربيات دي ... ياباشا دي حاجه البي ام ارخص منها يعني ايه اجيب تيل ب 1300 جنيه وبيتغير كل 15 الف كيلو!!!؟؟؟

2- البنزين : بفول من امارات مصر ومن وطنيه ومن موبيل on the run امارات مصر بعيده عليا طبعا علشان التجمع وجربتها ونفس القصه وطنيه مجربها نفس النتشه والكركره موبيل 1 (مش جايب عربيه ب 200 الف جنيه) علشان ادخل بيها التعاون ولا بنزينه مصر اكيد بدخل موبيل 1 ولازم يكون فيها on the run علشان بنيزنها مضمون وبينضفوا التانكات.

3- البنزين بردو عن السمع وليس التجربه الشخصيه البنزين 95 بيمنع المشاكل دي وطبعا طبعا محدش مجنون هيفول عربيته ب 450 جنيه 4 مرات فى الشهر ده مرتب موظف ياباشا!!!

4- الفتيس ... للعلم اكتر من عربيه سوقتها لحد دلوقتي 7 عربيات فيهم نفس النتشه ونفس الرجه ومنصور نفسه اعترف بالمشكله وهيحلها بالسوفت وير!! اذا مكنتش عند حضرتك يبقي متقولش ع الموضوع ده كتير لاني بنفسي هحسدك فى تأخير ملحوظ ورجه بتزيد مع الوقت بين النقله التانيه والتالته وكذا عربيه جابت فتيس وهقولك حالات فرديه اه وعددهم قليل بس مينعش انها جابت فتيس وفى كذا عربيه جابت كمبيوتر فتيس اللى لوحده فى حدود 25 الف جنيه والفتيس ب 70 الف جنيه

اظن كدا اكون جاوبت على كل اسئله حضرتك :)

المشاركة الأصلية كتبت بواسطة K.Ossama

متفق مع الكلام ده تماماً

دكتور اسامه مفيش عند حضرتك تأخير بين النقله التانيه والتالته على rpm قليل ؟ مش هقولك بتدي كيك داون وانت مثبت رجلك على دواسه البنزين مبيحصلش الرجه دي تحت منك؟

المشاركة الأصلية كتبت بواسطة netera

الله يطمنك يا اخي , ده انا كنت حاسس اني حجزت 128 لما الناس قالت رعشة و كركرة و نتشة في الفتيس ! رعبوني

ياباشا محجزتش 128 ولا حاجه بس لما ساعاتك تاخد عربيه وتدفع فيها دم قلبك وممكن تقسطها ويجي كل شهر البنك ياخد نص مرتبك وتلاقي مشاكل وتلف بيها على توكيلات منصور اللى فى القاهره كلها وكل واحد يقولك اصله طبيعي اصله بنزين اصل مرسيدس اصل بي ام ومحدش عايز يحل حاجه يبقي لازم يكون فى وقفه ياما سمعه العربيه هتاخد نفس سمعه الفكترا c علشان الناس كانت بتسمع كلام التوكيل وتقوله امين انت صح

المشاركة الأصلية كتبت بواسطة rasmaroon

لا يافندم كلام غير صحيح لكن احنا بنعمل من الحبة قبة بدون فهم التفاصيل وبنصدق اي حاجة وبنقول للتمرجي يا دكتور والميكانيكي يا بشمهندس
حضرتك انا كنت في توكيل كيا بعمل صيانة لسيارة كيا وسمعت عميل بيشتكي من التسقيف او ظاهرة الصفع لكيا ريو ودفعني الفضول للدخول في المناقشة وافاد المهندس انهم عندهم شكاوي كثير بسبب البنزين وفرغوا تنكات السيارات ووجدوا ان البنزين مخلوط بمياه ومواد اخري وماعندهمش حل للعميل غير انوا ينتقي محطة البنزين، وانا ايضا لم اواجه مشكلة التسقيف في السيارة الكيا لنفس السبب مع الاوبل اني بمون من محطات مضمونة وحضرتك ممكن تسأل مراكز الصيانة وتتأكد اذن الموضوع لا يقتصر على الأوبل فقط ده في مختلف السيارات وده مش عيب في السيارة واظن يعني كيا ريو منتشرة اكثر من الاوبل ومحادش بيعيب فيها ليه
محركات الأوبل عندها قدرة تحمل الكوارث دي وما مسمعناش عن اوبل استرا غيرت موتور بسبب بنزين شوف الماركات الأخري في سيارات غيرت مواتير بسبب حساسية محركاتها من البنزين المغشوش.
هو حضرتك فاكر المانيا هتنتج عربية بكل العيوب دي ولمدة سنتين او 3 على التوالي ده الالمان رأس مالهم الجودة
في نقطة اخيرة احنا عندنا سوء استخدام للسيارات و عشوائية في الاستخدام يعني كم واحد قرأ كتالوج السيارة قبل ما يركبها خصوصا عربية حديثة مليئة بالتكنولوجيا يا فندم استخدام العربية له اجراءات وخطوات بسيطة عشان سلامة المعدة ما حدش بيلتزم بها والنتيجة اعطال مفاجأة
مثال:
1-تعشيق الفتيس قبل فرملة اليد وتحميل السيارة على الجير بوكس
2-تحريك الفتيس في اتجاه عكسي والسيارة لم تتوقف بعد من r الي d والعكس والسيارة تتحرك ببطيء غلط لازم السرعة تكون 0 سرعة وقياسا على ذلك كل معدات السيارة يوجد سوء استخدام
3-توقف المحرك مباشرة بعد رحلة طويلة خصوصا لو المروحة شغالة (انتظر لما المروحة تتوقف) لان الحرارة عالية
طبعا الامثلة دي مش هتبوظ العربية من اول مرة ولكن مع الوقت واستمرار الاستخدام بنفس النمط تسمع بقى عن عيب في الفتيس وتسمع عن عطل ثرموستات ...الخ. دي مجرد امثلة افتكرتها لكن هناك امثلة كثيرة توضع في الاعتبار

سيدي الفاضل لا تدع خوفك على سمعه العربيه يخليك تنكر الحقيقه اولا كلنا بنقول لاي حد فى التوكيل يا بشمهندس حتي لو مكنش فاهم السما من العما ودي عندك حق فيها المفروض منقولش لاي حد يا بشمهندس واصلا الباشمهندسين يتعدوا ع الصوابع

ثانيا انا معايا بردو كيا ريو 2014 احب اقولك اني بقولها من التعاون ومصر وامارات مصر وموبيل اللى فيها on the run وموبيل اللى فيها mobil market وبتمشي زي الفل لا كركره ولا نتشه فى الفتيس وقمه النعومه والسلاسه فى نقلات الفتيس هيا حضرتك وكل العربيات الياباني والكوري كدا واتحداك لو جبت عربيه فيها نتشه من الموديلات دي اساسا التويتا الجديده نازله بفتيس CVT-is يبقي ازاي نتشه؟؟ اه لو حضرتك بتقول ان اي فتيس الماني بينتش كدا يبقي كلام معقول لكن الكوري عن تجربه ولا الهوا (عن 2014 اتحدث)

بالنسبه للمواتير الاوبل اللى مبتجيبش موتور.. هسأل حضرتك سؤال فى كام انسجنيا جايبه موتور وهيا مكملتش ال 10 الالف كيلو؟؟؟ هترك لحضرتك الرد وبما ان حضرتك بستمع كلام التوكيل اكيد هيقولولك ولا واحده ممكن حضرتك تدخل على فرع الصحراوي وتتفرج بنفسك
بالنسبه للاسترا اللى مبتجيبش فتيس؟؟ انا لا بعيب فى عربيتي اللى دافع فيها الشئ الفلاني علشان اشوه سمعتها وولا بيني وبين التوكيل مشكله شخصيه انا بتكلم على الحقيقه كل العربيات اللى سوقتها استرا من موديل 2013 : 2014 فيها نتشه الفتيس وفى كذا عربيه (نسبتهم قليله للمبيعات طبعا مش زي فضيحه الكروز ال 2010) جايبه فتيس او كمبيوتر فتيس

الكتالوج بيقول حاجات اكتر من اللى حضرتك سردتها دي بكتير والحمد لله بسوق اتوماتيك من فتره كبيره والاسترا دي العربيه رقم 10 فى تاريخ سواقتي فأكيد عارف ازاي اسوق اتوماتيك وازاي محملش ع الجيربوكس وامتي اغير زيت فتيس وان الكيك داون الكتير بيقلل من عمر الفتيس .. وللعلم حضرتك فتيس الاسترا الشركه المصنعه هيا شركه GM مش ياباني ولا حاجه ممكن لو حضرتك مش مصدقني تجيب ال part number بتاعه او تشوف ال specs من على النت

للعلم بقي مرسيدس اعلنت رسميا انها هتغير المواتير اللى باظت علشان رضا العملاء والمشكله دي محصلتش الا بنسبه 1% بس من مبيعاتها فى السوق المصري وهترضيهم علشان شركه ليها اسم وبتحافظ علي كيانها وبعد متحولت للنيابه طلعت البيان ده ... يبقي حضرتك عايز تقولى ان كل البنزين مغشوش؟؟؟ مهو لو البنزين مغشوش يبقي استحاله المواتير اللى باظت تكون 1% على 50%

الانسجنيا اتفرج حضرتك على العربيات اللى فى الصحراوي اللى جايبه مواتير وايه بقي الانسجنيا ماشيه من اول 90 عادي جدا والاسترا بتقبل من اول 91 والموصي بيه 95 وده كان السر اللى مخبيه منصور علينا :)

ولو حضرتك عندك حد فى حمايه المستهلك هتعرف ان حمايه المستهلك اعلنت رسميا ان البنزين مش مغشوش فى مصر .. خلص الكلام على كده وياريت منفتحش موضوع البنزين ده تاني لانه كلام انا مبصدقهوش

الالمان بالنسبه لاوبل بالاخص انا ابتديت اشك فى الجوده لاني بعتلهم ايميلات ومفيش حاجه بتحصل وعملت شكاوي فى GM ومفيش حاجه بتحصل

الخلاصه يا استاذي الكريم فى ناس مبتسمعش اي كلام وتقول عليه امين فى ناس بتشوف الموضوع بصفه فيها عدل وبتحكي الموضوع من اللى شايفاه للناس بأسلوب محايد علشان الناس تبقي على نور ... وفى ناس مبتطلبش بحقها وتقول منا عندي ضمان ولو حاجه حصلت هتتغير فى الضمان وفى ناس بتفكر فى حقها وازاي تعرف تجيبه ... واذا لقدر الله وحسيت بالنتشه دي فى يوم من الايام هتلاقي سعاتك اي مهندس فى التوكيل يقولك فين النتشه دي مش موجوده مش حاسس بيها لا انت غلط ويقعد بقي ميقتنعش بالموضوع ده الا لما الدننيا تتقلب وده حال توكيلنا المحترم

المشاركة الأصلية كتبت بواسطة spainmessi

اولا الف مبروك وربنا يديك خيرها ويكفيك شرها
اما بالنسبه لموضوع النتشه والكركره فانا معيا بيجو 301 واحد فيها نفس الحكايه دى هي العربية اول ماجيبتها كنت بحطلها بنزين من بنزينة محترمة بس جيت في مره كنت مسافر وحطيتلها بنزين وحش بدا معايا موضوع الكركره من يومها لحد مارحت التوكيل وحطولى منظف واختفي الموضوع ده نهائي وقالو حطه كل 5000 كيلو وبالنسبه لموضوع النتشه السوفت وير هيحل المشكلة وفي حل كمان انك وانته ماشي متزودش في دوسه البنزين والعربيه هتاخد غيار وجرب وقولى ايه رايك

شكرا على مرورك ياباشا قلتلهم فى التوكيل والله ينفع احط منظف دوره بنزين قالولى اوعي بيبوظ الرشاشات مفيش حاجه اسمها كده :) :) معنديش حل اني احط 95 وده طبعا فى المشمش ان شاء الله