الموضوع: عيوب ومميزات اوبل استرا كوزمو 2014 "Opel Astra Cosmo "

المشاركة الأصلية كتبت بواسطة melsaber

والله يا جماعه انتو رعبتوني من الاسترا فعلا , بقالي شهرين باقارن بين الاسترا والفلوانس والكورولا والفوكاس واخيرا لسه النهارده حاجز الاسترا الكوزمو 2015 بعد حيره ولف شهرين ,بس الكلام اللي انا قريته في التقرير ده رعبني وخلاني اندم علي مقدم الحجز اللي انا دفعته , بس الحمد لله برده انا لسه علي البر ولو علي مقدم الحجز هافضل وراهم لحد ما استرده , المشكله اني رجعت لنفس الحيره تاني , اعمل ايه , انا بايع عربيتي بقالي شهر دلوقتي ومتبهدل في المواصلات وكنت خلاص ظبطت حالي ان استلم الاسترا الاسبوع اللي جاي وهي بصراحه شكلها تحفه ومن جوه روعه ودخلت قلبي ومش هاعرف اختار حاجه غيرها بسهوله بس بعد الكلام المكتوب في التقرير ده لازم افكر الف مره تاني قصدي عاشر , موضوع البنزين ده مش هاعرف احله لاني ماقدرش احط بنزين 95 لاسباب اقتصاديه طبعا ده فضلا عن اني من البحيره ومافيش فيها بنزين 95 اصلا وكمان اقرب بنزينه نضيفه ينفع احط منها بنزين 92 مضمون هيا بنزينة امارات علي مسافة 70 كم او طاقه (taqa) علي مسافة 40 كم ومعرفش بردو طاقه دي نضيفه ولا لأ . الخلاصه حد يقوللي اعمل ايه واسف علي الاطاله .

معالى الباشا نصيحتي استني لحد اخر شهر 11 علشان نشوف هيحلوا النتشه بتاعه الفتيس والكركه دي ولا لاء زي ما التوكيل بيوعد انه هيتحل لو متحلش كلنا هنقفلهم متقلقش الناس فى ناس كتير متجمعه ضد العيوب دي علشان التوكيل يصلحها وسمعتها متضيعش

المشاركة الأصلية كتبت بواسطة K.Ossama

الصراحة موضوع بطء النقل ده كان موجود اول ٥ آلاف وبعدين اتحسن بشكل كبير جداً. موضوع النتشة مش موجود فى الأربع العربيات اللى أنا جربتهم بس كانوا ٢٠١٣ و ٢٠١٢ هاتش. مش عارف بقى فى حاجة حصلت بعد كدة فى الدفعات الجديدة. علشان كدة انا مش عارف وحاسس انك متحامل أوى على العربية. هى الكركرة دى موجودة حتى الآن بس انا أعرف ناس كتير عنهم الموضوع ده وماركات تانية منهم ريو ٢٠١٤ بالمناسبة.
ده يخلينا نروح لموضوع غش البنزين ده أكيد موجود. حماية المستهلك قالوا الوزارة معاملها مضبوطة لكن الغش بيحصل فى عربيات النقل والمحطات اللى مافيش رقابة عليهم خالص.

دكتور اسامه بالنسبه للتأخير بتاع النقلات ده هو اللى عامل النتشه وده مرحش من اول 5 الاف كيلو وعربيتي دلوقتي عامله 11 الف وحلهم اللى بيعملوه فى التوكيل انه بيعلى ال rpm شويه بيقلل من احساسها ولكن بتبقي موجوده وبعد فتره بتظهر تاني

الريو 2014 تعالى حضرتك جربها واركبها معايا ومش هتلاقي فيها اي كركره ومستعد افولها من البنزينه اللى انت نفسك فيها

غش البنزين وارد وانا مبحطش بنزين فى الاسترا بالاخص الا من البنزينات المشهوره والمعروف سمعتها زي ماذكرت فى المواضيع اللى فاتت

النتشه ابتدت تظهر عندي بعد 1000 كيلو ومحدش عايز يعترف بيها وظهرت فى موديلات 2013 و 2014 اللى جربتهم وعربيه واحده جربتها هاتش باك 2012 كان فيها الرجه دي

كلام حضرتك اني متحامل على العربيه ابدا مش متحامل عليها ولكن ضد ان التوكيل مبيعترفش بالمشاكل ويفضل متجاهلها لحد مالعربيه تبوظ بعد الضمان وتدفع انت تمنها ... بمعني لو العربيات اللى فيها رجه دي فيها مشكله فى كمبيوتر الفتيس والمشكله دي اتسكت عليها الفتيس بطبيعته هيبوظ لان اوامر الكمبيوتر بتروح غلط لل valve body اللى بدوره هيبوظ وهيبوظ معاه التروس وشكرا.... لكن لو دي طبيعه العربيه يبقي المفروض يطمنونا فى التوكيل ويمدو فتره الضمان ... الكركره الكتير مثلا بتأثر على عمر الموتور على المدي البعيد وفى واحد عربيته جابت مانافول موتور وهو عامل 60 الف كيلو فطبيعي مينفعش لا انا ولا حضرتك نسكت ع الكلام ده بغرض ان العربيه متفقدش سمعتها بالعكس احنا لازم نشوف حل فى التوكيل علشان العربيه فعلا متفقدش سمعتها

المشاركة الأصلية كتبت بواسطة احمد فهمى

نصيحه ابعد عن الاوروبي وبالترتيب كده سيفك كورولا تيدا ماذدا ومش عيب فى الاوروبي لا عيب فى بنزين مصر ومصر نفسها

لا يا احمد باشا مش عايزين نتحامل على الاوروبي الصراحه انا معاك ان العيب فى مصر بس الالماني ركوبته مختلفه تماما عن الكوري رفاهيه وفخامه وثبات ملوش مثيل

طيب هل عيوب الفتيس دى كانت موجوده فى الاوبل استرا الهاتش 2012 ؟؟ انا جربت الاسترا التربو و سافرت بيها مره محستش بالكلام ده الصراحه بس يمكن مكنتش مركز اووى مع الفتيس

المشاركة الأصلية كتبت بواسطة mahmoudshahen

طيب هل عيوب الفتيس دى كانت موجوده فى الاوبل استرا الهاتش 2012 ؟؟ انا جربت الاسترا التربو و سافرت بيها مره محستش بالكلام ده الصراحه بس يمكن مكنتش مركز اووى مع الفتيس

بص ياباشا الله اعلم التيربو ايه ظروفه ممكن يكون صاحبه حاطت 95 فمش حاسس بالمشاكل دي وممكن يكون موجود وانت مختدش بالك وعموما بردو فى سوفت وير نزل اصلا لموديلات 2012 فما اقل يصلحلهم العيب ده اللى ناقص بس موديلات 2013 و 2014

Gm رد عليا النهارده الباشمهندس المحترم محمد عيسي مدير صيانه gm وقالى اروح جسر السويس وهيحله المشكله دي فان شاء الله هروح واقولكم التفاصيل ايه واوبل بردو ردت عليا والصراحه ردهم محترم جدا الناس بتاعه اوبل المانيا قمه فى الاحترام وتفهم المشاكل