الموضوع: مخصص للرد على أسئلة الأعضاء في مجال التوظيف و سوق العمل

المشاركة الأصلية كتبت بواسطة elpasha009

بجد جزاك الله خيرا يا أستاذة علا وجعله في ميزان حسناتك.
معلش أنا هتقل على حضرتك شوية بس أنا مطلوب مني أكتب Cv بتاعتي في خلال يومين وكنت محتاج من حضرتك بس الخطوط العريضة لكتابة Cv وأهم الحاجات اللي المفروض ناخد بالنا منها.
معلش تعبت حضرتك مقدما:) وشكرا.

جزاك الله خيرا على دعواتك و يا رب بتقبل و يجزيك المثل :)

هو طبعا موضوع كتابة السي في ده قصة طويلة عريضة محتاجة كورس كامل، انما مبدأيا كده لازم تاخد بالك من حاجات معينة في شكل السي في بتأثر على قرار اللي بيقرا السي في انه يكمل قرايتها أصلا و لا لأ.. من أهم الحاجات دي:

1- الفونت ما يكونش كبير أوي و لا Bold إلا في العناوين و على استحياء كمان، يعني أفضل حاجة هو كتابة السي في كلها بما فيها العناوين بفونت Tahoma 11 أو Times New Romans 12 أو Arial 10. ممكن بأه في العناوين تعمل الفونت Bold، عشان كل ما الفونت بتاع السي في بأه أصغر كل ما بأه شكلها more
professional

2- حاول ما تستعملش أي ألوان في السي في غير الإسود.. الإسود و بس.. أي ألوان تانية بتخلي السي في شكلها مش professional خالص.

3- ما تحاولش تستعمل أي word arts و لا جرافيكس في كتابة السي في.. هو الورد العادي و كيبوردك و بس.

4- ما تحاولش خالص تكتب السي في كلها بالcaps، خليها عادية.. كل ما كانت السي في بسيطة كل ما كانت أشد لفتا للنظر.. مش العكس.

لو اللي انا قلته ده أضاف ليك حاجة جديدة، اكتب السي في و ابعتها لي ع الخاص و انا هاشوف لو فيه حاجة محتاجة تظبيط هاظبطها و ابعتها لك تاني، انما ده بس عشان انت مفيش عندك وقت تعدلها بنفسك و تبعتها لي تاني، انما لو الحالة عادية و عندنا وقت، كنت هاقول لك تظبط فيها ايه و تظبطها بإيدك عشان لازم تروح انترفيو و السي في إيدك و انت اللي عامل فيها كل حاجة بإيدك.

المشاركة الأصلية كتبت بواسطة michohat

حاليا انا مستقر فى شركه وشغال فيها محاسب اول بس كل فترة والتانيه تيجى لى فرصه اظنها كويسة فبروح اعمل انترفيو
فنقطه الضعف (الناس شايفاها ضعف) انى فى بعض الاحيان بتعلثم فى الكلام
فمن اول ما بدخل وبقعد بفهم اللى بيعمل الانترفيو معايا انى بتلعثم فهل الاسلوب ده كده صح ولا فيه طريقه تانيه
و بعد اذن حضرتك ينفع تقيمى لى ال cv بس مش عارف اقدر ابعته ازاى

إوعى تعمل كده.. إوعى تدخل للي هايعمل معاك الانترفيو و تبدأ معاه بنقطة ضعف فيك (ده إذا اعتبرنا ان التلعثم عند محاسب أول هو نقطة ضعف أصلا)، انت هاتدخل و تقعد في ثقة تامة في نفسك و قدراتك و خبراتك و انت أصلا مش رايح تشتغل مذيع و اتصرف عادي تماما كإنك مافيش عندك حاجة خالص و خليك انت الطرف الأقوى و خد بالأسباب و الله سبحانه و تعالى عليه التوفيق.

اما بالنسبة للسي في فابعتها لي ع الخاص زي ما elbaz45 عمل، هو انا بافتح رسالته ع الخاص لقيت السي في بتاعته في وشي، معرفش عمل كده ازاي

المشاركة الأصلية كتبت بواسطة OlaOsman

اما بالنسبة للسي في فابعتها لي ع الخاص زي ما elbaz45 عمل، هو انا بافتح رسالته ع الخاص لقيت السي في بتاعته في وشي، معرفش عمل كده ازاي

على فكرة فى حاجة فى السى فى بتاعتى حضرتك ماخدتيش بالك منها ....

المشاركة الأصلية كتبت بواسطة elbaz45

على فكرة فى حاجة فى السى فى بتاعتى حضرتك ماخدتيش بالك منها ....

ايه هي الحاجة دي؟

المشاركة الأصلية كتبت بواسطة OlaOsman

ايه هي الحاجة دي؟

الكرافات كانت عايزة تيجى يمين شوية

المشاركة الأصلية كتبت بواسطة elbaz45

الكرافات كانت عايزة تيجى يمين شوية

انت جاي تعزي و لا جاي تهزر؟..
لا انا جاي أهزر
--------------------------------
طيب يا جماعة.. انا في انتظار المزيد من الأسئلة.