ايه هو اصعب موقف قابلك و انت سايق

**PAYOO** · 01-05-2007 08:44 AM

المشاركة الأصلية كتبت بواسطة د.أحمد سمير

التالتة ( مجمعة عشان الوقت والمساحة والحبايب )
أول مشوار للشغل :
أجازة نصف العام انتهت ، وقررت لأول مرة أذهب لشغلي بالسيارة ، أنا أعمل في إعلام الأزهر وهي في مقر الجامعة القديم بالدراسة وأنا أسكن في مدينة نصر ، كان المطر خفيف ، والأرض مزحلقة، وما كانش عندي فكرة عن ثبات العربية 127 ولا فراملها العادة .. الحكاية 10 أيام بس تجارب ، مشيت في صلاح سالم ، وأخذتني الجلالة واسترجعت ايام الماضي وفتحت بالعربية 100 110 يعني ، الحمد لله العربية جابت معايا وكنت فرحان بأداء الموتور ، دخلت نفق البعوث ، وطلعت على سرعتي ، وفجأة تاكسي شاهين نازل من كوبري الفردوس قرر فجأة يعبر صلاح سالم بالعرض ليدخل شارع المرور ، واخدني معه وأنا أحاول تفاديه وأنا باحدف يمين وباحاول اهدي ، مع أول مسكة فرامل جاامدة لتجنب الاصطدام ، العربية اتزحلقت وحدفت يمين ولقيت نفسي لابس في إكذدام هوندا سيتي عالزيرو ، نزلت لقيت صدر العربية بالرفرف اليمين والفوانيس وخلافة ، والكبوت طبعاً عجينة .. تخيل العربية شهر بتتظبط من سمكري لميكانيكي لكهربائي لخلافة بعد ما شتريتها بعشر أيام .. شوفوا الحسرة والندامة .
يتبع

يا ترى يادكتور الراجل بتاع الهوندا الزيرو عمل معاك أيه وحضرتك عملت معاه أيه ؟؟؟؟

**Abdallah** · 01-05-2007 12:43 PM

المشاركة الأصلية كتبت بواسطة samirpop2

انا شايف ان كل الاحداث دي ممكن تحصل بس مش كده ممكن اقول وسعت شويه ( انا اسف )

يا اخ سمير هو انا هستفيد ايه ولا حازم هيستفيد ايه لما نكذب على الناس هنا يعنى؟؟؟؟
عموما انا كل الى قلته دة حصل وفى مواقف بتبقا العن من كدة بس انا قلت موقف واحد يكفى وشكرا لردك :)

01-05-2007 12:49 PM

الموقف التانى اللى حصل معايا صورت جزء منة بالتليفون--علشان لو حد مش مصدقنى--لكن الموقف الاول كنت --طاااااااااااااااااااااااا اااااااا ير---وبصراحة ما قلتش كل حاجة --دة فية مواقف تهلك من الضحك--

**Abdallah** · 01-05-2007 01:03 PM

انا اذكر موقف حصل لواحد صديق بس جامد...
الراجل دة بيته جمب المنصورة فى قريبة كدة على بعد 17 كيول تقريبا, المهم كما معظم طرق القرى الطريق كان رايح جاى وضلمة وصاحبنا مروح الساعة 2 بعد منتصف الليل وبعد ما طلع من المنصورة بـ 3 كم النور اليمين فصل وطبعا مكلفش خاطره ونزل يبص عليه وقال اكتفى بالشمال وبعدها بكمان 3 كيلو تقريبا النور الشمال فصل وطبعا العملية بقة ظلام دامس قال مش مهم اشغل انتظار واهى هانت كلها 10 ولا 11 كيلو, المهم شغل الانتظار ومشى وبعد شوية مقاليش اد ايه الانتظار فصل وصاحبنا اتخنق وقال لما انزل افك مياه واجى , المهم نزل يعمل زى الناس والعربية وراه بشوية وهووووب يجى واحد نقل ثقيل يقوم رازع العربية ومنزلها فى الترعة و ههههههههههههههههههههههههه ههههه على الضحك الى انا ضحكته يومها بس طبعا العربية اتبهدلت بعدها.

01-05-2007 04:45 PM

في الحقيقة اقل موقف من اللي اتحكو لو حصلي كان ممكن يخليني ابطل اركب عربيات من اساسه مش بس ابيع العربية زي ما عمل m_elkhishin خاصة لان والدي كان ديما يجب زيرو وكان ايده في العربية علي طول فالحمد لله مكانش بيحصل مواقف درامية ( الا مواقف حصلت بالسيات والرمسيس بس اتحكيتلي محضرتهاش ) وانا كمان اول ما ركبت عربية بتاعتي كانت زيرو برضوا ومنساش اول يوم نزلت اروح الشغل الصبح ولقيت الكاوتش نايم قعدت حوالي 5 دقايق بدون مبالغة متنح ومش عارف اعمل ايه !!!؟
وديه كانت اول مره اغير فيها كاوتش بنفسي واول مره استخدم فيها الاستبن والكوريك .
المهم الموقف اللي هحكيه كان اول مره اسوق وده حصل لما كنت في تانية اعدادي وكنت قبلها بايام ركبت مع واحد صاحبي باباه معاه 128 وقعد (يتفلحس) عليا ويقولي انه بيعرف يسوق العربية وباباه بيسبوا يسوقها لوحدة وطبعا انا مسكتش وقولتله اني بعرف اسوق برضوا وبركب عربية بابا الخ الخ ) وكان والدي معاه دوجان اياميها المهم يوميها كان شم النسيم وكنا واخدين شقة جديده وبنوضبها وكنا لسه مخلصين توضيبات وحاطين عفش قليل وقولنا نقضي شم النسيم هناك جبنا الحاجة كلها (فسيخ ورنجة ولمون وبصل الخ الخ ) بعد ما طلعنا اكتشفنا اننا نسينا اهم حاجة في العربية ( شنطة فيها لمون وبصل اخضر ) اخدت المفتاح من والدي ونزلت اجيبة واثناء نزولي اكتملت الفكره المجنونة في دماغي ( اخد العربية اروح لاصحابي الف بالعربيية واتأرنن عليهم واوريهم ( خاصة الموزة بتاعتي ) اني القط ابو عنين قزاز
معلش انا بنقلكم تصور طالب في تانية اعدادي

المهم نزلت فتحت العربية ولاول مره قعدت قدام الدريكسيون وكنت جعان جدا ونازل معايا ساندوتش في ايدي حطيتة علي التابلوه وقعدت استرجع كل مشاهداتي لوالدي والمجتمع والناس في سواقة العربيات وطلع اني عندي خلفيه لاباس بها تخليني اعرف مكان الكونتكت وادور الباقي بقي اكيد مش هيختلف كتير عن سواقة عربيات التصادم بتاعة السندباد :P

المهم اخدت قطمه من الساندوتش القابع فوق التابلوه بسكون واعده لمكانه واتجهت ايدي لمفتاح الكونتكت حطيت المفتاح ودورت و فوووووووووو العربية نطت مني وجريت لانها كانت واخده غيار الله اعلم كان ايه ( ساعتها مكنتش اعرف الفتيس بيعمل ايه اصلا )
طبعا العربية لما نطت كده الساندوتش وقع من علي التابلوه علي الارض فنزعجت جدا ومديت ايدي عشان اجيبة كل ده والعربية ماشية وانا دايس علي البنزين وماسك الدريكسيون وهو منحرف قليلا بجه اليسار فمخلي العربية ماشية بالورب من اليمين للشمال

المهم جبت الساندوتش ونفضتة ولسه هاكول لقيت زيطة وظمبليتة تتييييييييييييييييييييت تيييييييييييييييييييييييي ت تييييييييييييييييت
لمحت في المرايه واحد جاي ورايا
في جزء من الثانية استوعبت الموقف لاكن بطريقتي الخاصة وهي انه راجل رخم ومستعيلني وعايز يعدي مني وانا ابن بارم ديلة ولازم اطنشة بس مينفعش اقعد اكل الساندوتش فاحطة علي التابلوه لحد ما يعدي .
( كل الكلام ده في ثانية او اتين )
وما ان وضعت الساندوتش علي التابلوه حتي سمعت طااااااااااااااااااااااخ وشيل وهبد وحط ولقيت نفسي راكب فوق الجزيرة اللي في النص وخابط في شجرة صغيرة استعدادا للنزول للصف التاني

نسيت اقولكم ان العمارة كانت علي طريق سفر اللي بيودي بيلبيس امام مدرسة البي بي سي واللي خبطني كانت بيجو الاستيشن محمله ركاب ومسافرين

اللي حصل بالظبط اني كنت ماشي بالورب زي ما قولتلكم والراجل كاان ماشي بسرعة ولاقني بحدف شمال زمر كتييييييييير بصراحة وفي الاخر لبس فيا من اول الرفرف الوارني شمال للراخر الرفر القدماني شمال برضو ده غير ان طلوع العربية فوق البلدورة العاليه بتاعة الجزيرة بهدل العربية منت تحت ( ساعتها سمعت لاول مره عن شرخ الشاسية ) اما البيجو فكانت سليمة لاكن من غير وش وديه كانت اول مره اشوف فيها ريداتير عريان

انا طبعا مستوعبتش من الموقف ده غير الذهول ( بجد مكنتش فاهم ايه اللي حصل ) وكنت متدايق لان كل حاجة علي التابلوه وقعت بما فيها الساندوتش

لما نزلت من العربية (سبحان الله الباب كان بيفتح ) شوفت المنظر واتدايق اوي ثواني والناس اتلمت الراجل صاحب البيجو مرضاش يتخانق معايا تقريبا لانة شاف الكاب بتاع الشرطة في خلفية العربية وبادج الشرطة ونزل واحد ( كان ظابط جيش ) وقعد يقول انا شوفت كل حاجة وانت مش غلطان ( الكلام موجه للي معاه البيجو ) وانا شاهد وووووو

وفي ثواني بعديها كانت الدنيا كلها اتلمت بما فيهم والدي والدتي لان صوت الخبطة كان جامد وانا مكنتش بعدت عن البيت كتير

وعلي قد خوفي من رد فعل والدي الا ان ظهورة في مسرح الاحداث كان طوق نجاه ليا لاني كنت في قمة البلاهة ومش فاهم حاجة ومكسوف من المصيبة الدوليه اللي عملتها ديه وفي الاخر مش فاهم حاجة برضوا

المهم السيد الوالد دخل في المعمعة وعايز كام وتاخد كام ووووو انا لقيته ملهي في الموقف روحت مسحب وكاتت

طلعت اجري وروحت بيت جدي وبدائت الم كل ما يمكن من متعلقات تنفع عشان هرب من البيت ( يعني جاكت تقيل عشان البرد شنطة اي فلوس ) هييييه هطفش من البيت

الحمد لله ماما لحقتني وكانت خايفة عليا جدا بس لقيتني مكبر دماغي خالص هيا كانت فاكره انها هتلاقيني غرقان في العياط

المهم مقدرتش طبعا اقولها اني كنت هطفش من البيت وهيا قعدت ساعة تعلمني اعمل نفسي خايف وبترعش من تاثير الصدمة العصبية اللي حصلتلي من الخبطة ( طبعا املا في استعطاف والدي حتي لا ينزل علي جام غضبة )

المهم قعدت يومين كل ما اشوف والدي اعمل ان ايدي بتترعش من الصدمة بس هو فقسني ومضربتش

ومن يوميها حرمت اركب عربيات تاني وهما حرموا يشمموني ريحة المفتاح اساسا وحتي لما كنت باخد البرايد بتاعة والدتي كان حدودي الشروق ولازم يكون معايا مرافق ووالدتي بيبقي قلبها في رجليها لحد ما ارجع

بس خلاص

ابو نورا ( الشهيره بنانا الزنانة )

01-05-2007 04:51 PM

دية تصلح قصة قصيرة--طيب والساندوتش --؟؟؟؟ عاوزين نعرف حصلة اية --وكان ساندوتش اية :P :P :P :P :P

**PAYOO** · 01-05-2007 04:56 PM

المشاركة الأصلية كتبت بواسطة Abonora

المهم قعدت يومين كل ما اشوف والدي اعمل ان ايدي بتترعش من الصدمة بس هو فقسني ومضربتش

ابو نورا ( الشهيره بنانا الزنانة )

[marq=right:d7bbc13e44]أنا موت من الضحك
[/marq:d7bbc13e44]

01-05-2007 05:47 PM

يعني بقولك يوم شم النسيم وبصل اخضر ولمون يبقي السندوتش فيه ايه ملوووووووووخييييييييييه

01-05-2007 05:51 PM

ههههههههههههههههههههههههه هههه--ماهم دة اللى كنت خايف منة--بس شكيت للحظة انة ممكن يكون كدة --يالا بالهنا والشفا --الساندوتش طبعا --

**Abdallah** · 01-05-2007 06:13 PM

والله يا ابو نانا فكرتنى بالذى مضى, انا اذكر وانا عندى حوالى 14 سنة كنت باخد المفتاح من ورا والدى واسرق العربية واطلع الف بيها شوية وطبعا ابويا مكانش يعرف حاجة وكنت اموت من الضحك لما ابويا يجى ويلاقى البنزين ناقص وهوا ماليه الصبح والراجل يا عينى كان هيتجنن من الموضوع ده وانا طبعا عامل فيها عبده العبيط :D , المهم العربية دى كانت 124 فيات ووالدى اياميها كان معاه مرسيدس 200 معدلة فمكانش تقريبا بيركب الفيات بس كان بيعتز بيها جدا وبيحبها زى عيل من عياله, المهم جيت فى يوم ادور العربية بعد ما سرقت المفتاح كالعادة والعربية كانت متعشقة وانا معرفش وهووب دارت هووب لبست فى العمود الى ادام البيت زطبعا ابويا عرف انى بسرق المفتاح وانى انا الشيطان الى مجننه عشان البنزين بقاله شهر وطبعا خدتلى كلمتين فى العظم وخلص الموضوع وطبعا الحاج خبى المفتاح منى, تفتكروا ان واحد عبقرى زى يفرق معاه الكلام دة طبعا لاء.... فضلت احاول لحد ما توصلت لتدوير العربية بسلكين من سلوك الكونتاكت وفتح باب العربية بسلك وبقيت محترف :D, المهم فى يوم اغبر خدت واحد صاحبى وطلعنا نتمشى عند مدرسة البنات وكدة وطبعا لازم اطلع امريكانى وحاجات من دى عشان اعمل نفسى القط ابو عين ازا على رأى ابو نانا فى احد الملفات وطبعا انا داخله على التانى وقارص على العربية والعجل الى ورا بيصرخ وانا عامل فيها شوماخر هوووووب القنطرة اتكسرت وطبعا القنطرة لمن لا يعلم هيا الى ماسكة العجلتين ببعض وانا جوة بلف الدركسيون والاقيه مبيلفش وطبعا دخلت فى الرصيف ببوز العربية ومن الخبطة العربية كادت ان تنقلب بس الحمدلله هى طلعت بنصها الادمانى على الرصيف فقط وطبعا صاحبى الانتيخ باعنى وخد تاكسى وروح وكتر خيره قاله عبدالله اتقلب بالعربية فى شارع اداب ومات :D , المهم ابويا بعتلى اخويا الكبير وقعدنا 5 ساعات نصلح فى العربية لحد ما مشيت وطبعا عفشجى جه وميكانيكى وحاجات غريبة المهم روحنا الساعة 12 بليل تقريبا ولقيت الحاج مستنينى قدام البيت وعينه بتضرب نار وماسك خرطوم فى ايده وعينك ما تشوف الا النور وانا اجرى وهوا يجرى ورايا وانا اجرى وهوا يجرى ورايا ومفيش داعى اقول ايه الى حصل بقة .....
وللعلم العربية اتكلفت حوالى 7 الاف جنيه تصليح وجالها طقم صاج كامل من الكبود للشنطة ما عدا السقف :D