الموضوع: سبب زحف السيارة مع الفرامل

يا جماعة بغض النظر عن كون العربية فيها abs او مفهاش انا شايف ان الغلط كان من عندى انا , لية ؟
انا بقالى اكتر من 20 سنة بسوق عربيات مفهاش abs وعمرى ماشوفت زحف زى اللى شوفتة ، ولكن بعد تفكير منى فى الموضوع دة واللى قراءتة من تعليقات حضراتكم فقد توصلت الى النتيجة الاتية:

1- اللى متعود يسوق abs عمره ما حيقدر يغيرة عشان هو اتعود خلاص على كبس الفرامل مرة واحدة وساعتها الـ abs بيسعفه وميخليش العربية تزحف.
اما اللى ماعندوش abs فهو اتعود على عدم كبس الفرامل مرة واحدة واستخدامها تدريجيا حتى تقف السيارة ( مثال : اى حاجة طلعت مفاجاة امامة ، ساعتها بيكبس على الفرامل مرة لتهدية العربية وبعدها بثانية يكبس جامد ، تقوم العربية ماتزحفش جامد مقارنا بكبس الفرامل على مرة واحدة.
اللى حصل معايا انى للاسف عشان العربية جديدة فـ مش متعود لسا على حساسية الفرامل فكبست الفرامل مرة واحدة فزحفت العربية جامد ، بالاضافة الى ان الالنترا فراملها حساسة جدا وقوية جدا مقارنة بعربيتى السابقة ، فاعتقد مع الوقت حتعود على حساسية الفرامل واستخدام مهارة السواقة فـ انى لا اكبس مرة واحدة على الفرامل زى ما انا عملت ،
الناس اللى ماعندهاش abs يا جماعة ياريت مايقلقوش عشان احنا طول عمرنا بنسوق عربيات بدون abs ، صدقونى هى مسألة تعود خصوصا لو كانت العربية لسا جديدة ، الحكاية كلها اسلوب سواقة ومهارة مش اكتر.
وعلى فكرة لاصحاب الـ abs ، انا اعرف واحد صاحبى عنده abs فرمل فجاة وفعلا اتفادى اللى امامة بس للاسف الاتوبيس اللى خلفه مفهوش abs و ركب علية وعجنة على العربية اللى قدامه ، يعنى عربيتة لو مفهاش abs كان ممكن الزحف يفيدة ساعتها ، طبعا اى كان دة مقدر ومكتوب ، فأعتقد ان كل حاجة ليها عيوبها وليها مزاياها ، اهم حاجة مهارة السواقة واتخاذ الاسلوب الصحيح فى الحالات المفاجاة ، وطبعا قبل كل حاجة التوكل على الله عشان اللى مكتوب بيبقى مكتوب حتى ولو العربية فيها 5 abs.

2- طبعا حكاية الكاوتش دية مهمة جدا وسوف تؤخذ فى الاعتبار.

3- برضة حشيك عند الصيانة اللى جاية للتأكد من ان الفرامل الخلفية بتشتغل كويس ومتكونش مأخرة عن الامامية.

عموما اشكر كل من اهتم بهذا الموضوع