الموضوع: ماهو افضل زيت 5w30

المشاركة الأصلية كتبت بواسطة Minaaa

الأول بس عشان نبقى على نور خلينا نتخلص من شوية أساطير غير صحيحة:
● مفيش حاجة إسمها زيت خمستلاف وعشرتلاف.. ده مجرد اجتهاد لجدولة وتنظيم عملية تغيير الزيت.. الزيت بيتغير لما تتغير خواصه ويبدأ يفقد قدرته على التشحيم أو السيلان بكفاءة في المحرك.
● مفيش حاجة إسمها إن ماركة زيت هي الوحيدة اللي تنفع لعربية كذا.. ده بزنس يا باشا وبيضغطوا عليك بالضمان عشان البزنس يتم.. والحقيقة إن صانع الموتور بيكتب لك مواصفة الزيت المناسب للمحرك بتاعه وانت تختار براحتك بين ماركات الزيوت المختلفة حسب جودة المنتج والخدمة المقدمة.
● موضوع إن الزيت كل ما يكون لزج أكتر كل ما يبقى أفضل.. وده كلام غير علمي وهشرح ليه.
● برضه من الأساطير إن الزيت لو لونه بقى إسود يبقى وحش.. والحقيقة إن إسوداده ده معناه إنه قام بدوره في تنظيف شوائب الكربون داخل المحرك ودي حاجة كويسة.. أو إنه إتحرق جوة المكنة وفي الحالة دي بيبان من ريحته ويبقى زيت أي كلام.
خلاص تحررنا من الأساطير؟ طيب يالا نبدأ:
● الزيوت حالياً 3 أنواع.. تخليقي، نصف تخليقي، معدني
التخليقي بيكون عبارة عن مركبات كيميائية بالكامل تعطي درجة سيولة وتدفق داخل المحرك عند درجات الحرارة المنخفضة (في البرد زي بداية الدوارة صباحاً في الشتاء مثلاً)، وكذلك لزوجة جيدة عند وصول المحرك لدرجة التشغيل المثالية وهي 90 درجة اللي بيكون وقتها مؤشر الحرارة عندك وصل للمنتصف تماماً وثبت. وهذا النوع هو أغلاهم.. مناسب للمحركات الجديدة (تحت 130ألف كم) عشان المكنة لسة جديدة والخلوصات بتاعتها ضيقة فمحتاجة انسياب كويس في البرد عشان ما تحتكش ببعضها بدون سائل تليين فمع التكرار المستمر المحرك ياكل في بعضه ويبدأ يظهر بوش بين الأجزاء بدري.
● النصف تخليقي بيكون مركب كيميائي كذلك ولكن مضاف على قاعدة بترولية تُشكِّل حوالي نصف كمية السائل تقريباً.. هيديك لزوجة كويسة في الحرارة لكن إنسيابه داخل المحرك الجديد صباحاً في البرد أقل. وهو أرخص شوية من التخليقي.. مناسب للمحركات المتوسطة (من 130 ألف إلى 250 ألف كم) عشان المكنة بدأ يبقى فيها بوش بسيط بين الأجزاء المتحركة فده يدي اداء جيد معاها لزوجة وانسياب.
● المعدني بيكون عبارة عن مركب بترولي خاااالص عليه شوية إضافات تحسن خواصه.. هيديك لزوجة في الحرارة، لكن الانسياب ضايع في البرد.. مناسب للمحركات الأقدم (من 250 ألف كم وانت طالع) عشان البوش بقى واسع بفعل الاحتكاك والحركة طول العمر ده وانت محتاج زيت تقيل يملأ الفراغات دي لحد ما تخرطه تاني في العمرة إن شاء الله.
● العلامة اللي تعرفك إمتى تنقل من نوع إلى النوع اللي بعده هي إن الزيت يقل في المكنة (بدون تسريب) وذلك على غير العادة، وكما ن صوت المكنة يعلى قبل الموعد المعتاد لغيار الزيت.
طيب أعرف إزاي أفرّق بين التلاتة؟
● التخليقي المعتاد والمناسب للجو مصر في الغالب المواصفة بتاعته بتبقى (5w-30, 5w-40) وبالكتير خالص (5w-50) اللي زي موبيل-وان كدة وده يعتبر تقيل شوية على المكنة الجديدة عشان كدة بيبدأ يخل معاك على 7000 كم
● النصف تخليقي المناسب لمصر برضه المواصفة بتاعته (10w-40, 15w-40)
● المعدني المواصفة بتاعته (20w-50) اللي زي موبيل xhp
من الكلام اللي فات ده طبعاً نفهم ليه لما حضرتك بمنتهى الطيبة بتحط xhp في محرك يعتبر لسة زيرو (أقل من 100 ألف) بتسمع الموتور بيجعر وصوته عالي.. هو في الحقيقة بيستغيث وبيطلب الرحمة لأن الزيت كابس على مراوح قلبه ومحتاج زيت أخف.
تبقى بعض الملاحظات:
● شخصياً بشجع المنافسة بين شركات الزيوت عشان اضمن إنهم يفضلوا يطوروا من مستوى جودة زيوتهم وأنا المستفيد
● شخصياً برضه بفضّل الزيوت المستوردة فقط لضمان رقابة الجودة على المنتج واتطمن إنه مش مغشوش ومضروب في أي حتة جوة مصر بناءً على سمعة وكيله.
منقول للامانه...

أولا.. أحب أحييك لحرصك على إفادتنا بالمعلومات الكاملة..

وأحب أحييك كمان لأمانتك في ذكر إن المعلومة منقولة..



بس اسمحلي أوضح لحضرتك إن بعض المعلومات المذكورة خاطئة ومبنية على لخبطة واضحة في المفاهيم... وللأسف.. الموضوع ده منتشر.


أولا.. أتفق تماما مع رأي كاتب الموضوع في رفضه للأساطير الأربعة اللي ذكرهم..

بس تحديد عمر الزيت مش بيتقاس بالملمس ولا الكلام للحلو ده.. لإن تحديد عمر الزيت محتاج اختبارات معملية مش متوفرة للغالبية العظمى من الناس...

ويمكن أفضل الحلول دلوقتي هي الموجودة في بعض السيارات الألمانية اللي "بتحسب" عمر الزيت في الموتور بناء على المعلومات اللي جاية للكمبيوتر عن ظروف تشغيل الزيت في الموتور خلال فترة الخدمة.. زي درجة حرارة الزيت وسرعة دوران الموتور ودرجة الضغد على دواسة البنزين.. وحاجات تانية كتير.. والمبنية أساسا على ربط الظروف دي بنتائج الاختبارات المعملية المسجلة مسبقا.

علشان كده .. الناس اللي معندهاش العربيات اللي بتحسب دي مضطرين يعتمدوا على توصيات الكتالوج.. وهو ده الحاجة الوحيدة المتاحة لأغلب مالكي السيارات في العالم.



بالنسبة لاختيار اللزوجة.. فده بردو بيتم حسب اسلوب استخدام العربية وبناء على توصيات الكتالوج.. وموضوع زيادة اللزوجة بعد عمر معين أو مسافة معينة مالوش أساس علمي.. خصوصا لو تم اختيار الزيت بطريقة صحيحة حسب الكتالوج.. وكمان .. لو تم اختيار زيوت تخليقية.

ده غير إن مواصفات الزيت ماهياش مجرد اللزوجة وبس.. إنما فيه مواصفات تانية مهمة جدا هي اللي بتحدد جودة الزيت



انصحك تقرا الموضوع ده..

http://www.nilemotors.net/Nile/477071-100.html

الموضوع اللي في الرابط ده فيه تفاصيل كتير بتنفي تماما مبدأ زيادة اللزوجة مع زيادة المسافة اللي ماشياها العربية.. خصوصا إن التآكل والخلوصات والكلام ده كله مش معتمد على المسافة اللي ماشياها العربية لوحدها... إنما داخل فيها عوامل كتير زي:

أسلوب السواقة..
نوع الزيت المستخدم..
طبيعة انتظام الصيانة خلال فترة خدمة العربية..

للأسف.. الكلام ده بقى أسطورة جديدة .. هي كمان محتاجة غسيل دماغ.

آخر حاجة بردو فيها أخطاء.. هي موضوع الصوت...

والحقيقة.. إن كل ما كان الزيت أتقل كل ما كان صوت الموتور أهدى.. لإن طبقة التزييت بتكون أسمك وتمتص الصدمات بصورة أفضل.

بس الأهم.. إن صوت الموتور لا يعتبر مقياس على جودة الزيت.. إنما مواصفات الزيت هي المعيار الأساسي.


...

المشاركة الأصلية كتبت بواسطة vivid190

السلام عليكم ورحمة الله وبركاته

سؤال في السريع البني

هو زيت امسويل 5w50 سيجنتشر يمشي مع فيرنا عامله 28000 كم ؟؟؟

اختيار الزيت لازم يكون حسب الكتالوج...

دي صورة لكتالوج الفيرنا... ولو عندك الكتالوج الأصلي يكون أحسن:




حسب الكتالوج ده فاللزوجة المسموح بيها في جو مصر (فوق الـ40 م علشان الصيف) هي:

20W-40 و 20W-50
15W-40 و 15W-50
10W-40 و 10W-50

مع مستوى أداء لايقل عن API SH (يعني يمشي معاك بردو SJ و SL و SM و SN)


...

المشاركة الأصلية كتبت بواسطة tasaka

وافر التحيه و الشكر لخبير المنتدى المهندس بوريو

لى عده اسئله ان اتسع صدرك للاجابه

1- ماهى النسبه المئويه المتوقعه لتوفير البنزين باستخدام زيت a5 بدلا من a3 .. بالتقريب

2- هل يوجد زيت synthetic لزوجه 5w-40 له مواصفه a5 .. و ان وجد هذا الزيت فماهى ظروف التشغيل الملائمه لاستعماله

3- هل يمكن استخدام 5w-30 ( اعتقد ان اللزوجه المناسبه لى يجب ان تشمل الرقم 40 ) .. استعمالى هو لمسافات قصيره جدا .. الاستعمال السنوى حاليا لا يزيد عن 3,000 الى 4,000 كم

مع وافر التحيه و التقدير

العفو أخي العزيز... يا رب أكون ساعدتكم فعلا بشيء جديد..

بالنسبة لأسئلة حضرتك..

١- النسبة المتوقعة للتوفير باستهلاك البنزين عند استخدام زيت acea a5 لا تقل عن ٢.٥ % بالمقارنة مع زيوت a3 .. وده حسب مواصفة الـacea لزيوت المحركات .. وأنا شخصيا أتوقع إن النسبة ممكن توصل لحد ١٠% حسب الفرق بين لزوجة الزيت الـa3 والـa5.


٢- حسب معلوماتي.. فالزيوت تحت تصنيف a5 غير متوفرة بلزوجات عالية... وأعلى لزوجة موجودة منها هي 5w-30 (سواء معدنية أو تخليقية)... وطبعا لزوجات 5w-20 و 0w-20 ممكن تتصنف تحتها...

الأهم من كده.. لازم ناخد بالنا كويس إن مش كل الزيوت باللزوجات دي يتم تصنيفها كزيوت a5... إنما ممكن جدا تلاقيها مصنفة a3 أو a1

والمشكلة الأساسية هنا في زيوت a1... لإنها زيوت غير مخصصة للاستخدام الشاق ولازم تتغير بسرعة (بما لا يزيد عن المقرر في الكتالوج).. على عكس زيوت a3..

والمعروف إن زيوت a5 لها خصائص الـa3 (من ناحية الاستخدام الشاق) + a1 (من ناحية التوفير في الوقود).


٣- بالنسبة لحضرتك.. فالالتزام بتوصيات الكتالوج شيء أساسي.. وبالتالي فالأفضل هو استخدام لزوجة 5w-40 إذا كانت هذه هي التوصيات (اعذرني لأنني لا أتذكرها الآن)..

إنما بالنسبة لموضوع الاستخدام البسيط.. فاحنا في الحالة دي مضطرين نحسب بالوقت مش بالمسافة... وأغلب الكتالوجات وصانعي الزيوت بتنصح بتغيير الزيت كل ٦ أشهر (حتى التخليقية تماما).

تحياتي الخالصة لك.


...