تقييم سريع للجيتا

**mohamed_hamdi** · 06-12-2008 01:17 PM

السلام عليكم، اولا كل عام و انتم بخير بمناسبة عيد الأضحى المبارك.

بعد شرائي للجيتا الخليجي 2009 ( استلام شهر 9-2008 ) و بعد عمل اول صيانة لها5000 كيلو ، حبيت اعرض بعض الملاحظات على النحو التالي للافادة :

1- سحب الموتور جيد جدا قياس بكونه 1600 سي سي 102 حصان للشاب المتزن في قيادته و لا يبحث عن الشد و الأمريكاني خلافه حتى مع وجود حمل بالسيارة.
2- العفشة ناعمة جدا ماشاء الله و خصوصا مع النيتروجين بالكاوتش بمعنى الاحساس بالمطبات و الطريق و في نفس الوقت الاتزان مع السرعات و الملفات.مقارنة بالأكتافيا A5 الجيتا عفشتها انعم بكتير.
3- عزل الصوت و خامات التشطيب جيدة جدا ماتحسش نهائي ان السيارة دي تجميع مكسيكي علما بأن نفس المصنع بالمكسيك يتم تصدير السيارة منه للسوق الأمريكي.
4- موضوع الارتفاع عن الأرض يتم التعود عليه مع الوقت بمعنى ان السيارة ليست بارتفاع اوكتافيا عن الأرض و ليست بانخفاض السيفيك و هو ليس مشكلة كبيرة معي الا مع المطبات السيئة جدا و يتم التعامل معها بالجنب بدون مشاكل علما بأن كل الخليجي به تصفيح سفلي كامل ( فيبر قوي و ليس صاج ).طبعا الكل عارف ان الارتفاع عن الأرض له علاقة مباشرة بثبات السيارة على الطريق.
5- عملت صيانة 5000 عند محمد سمير بجسر السويس خلف حديقة بدر- تشمل زيت شل هيلكس 10000 كم و فلترزيت و ربط عفشة وغسيل موتور و تشحيم العفشة باسبراي خاص بمبلغ 420 جنيه. المركز جيد و ينقصه فقط بعض الاحترافية في الأداء ليصبح بديل 100 % للتوكيل و لكن بصفة عامة كافي جدا حاليا و ارشحه لجميع مالكي الخليجي لعمل الصيانة الدورية كل 10000 كيلو بعد ال 5000 الأولى.
6- استهلاك البنزين في حدود 240 كيلو للصفيحة مع تشغيل التكييف في السفر فقط و طبعا بنزين 92.
7- مع كامل احترامي للأكتافيا A5 والسيات الا أن سيارات فولكسفاجن الأم حاجة تانية من حيث العفشة و عزل الصوت و التشطيب الداخلي.
8- قمت بتغيير الكاسيت سي دي الموجود بها Rcd 500 بمغير ست اسطوانات داخلي و Mp3 الى Multimidea Unit كاملة جبتها معايا من المانيا في زيارةعمل من شهر. الوحدة الجديدة اسمها Zenec لسه نازلة اوروبا في شهر 6 -2008 شاملة كل حاجة من Dvd وmp3 و Bluetooth و راديو Rds و الوحدة دي متفصلة على الفولكس Mk5 تحديدا بمعنى تشيل القديم و تركبها بدون اي توصيلات اسلاك اضافية.

8- من وجهة نظري عيب السيارة في حاجتين :
- السعر مبالغ فيه شوية و لكن بعد ارتفاع سعر الياباني اصبح منطقي نوعا ما.
- قطع الغيار غالية جدا بس معمرة كطبيعة كل الألماني.

خالص احترامي للجميع و كل عام و انتم بخير.

م / محمد حمدي

**Mostafa Hessen** · 06-12-2008 02:13 PM

ربنا يبارك ليك فيها

وعقبال 50000

**red_4_blood** · 07-12-2008 02:37 AM

كان ليا شوية اسئلة كدة ...

انت عربيتك بكام

وايه الفرق بين الخليجي و العادي .. و تنصحني اجيب خليجي ولا عادي
و هل فيه خليجي ستاندرد اللي ب 170.000 تقريبا ؟؟؟

و الكاسيت ( العادي مش اللي انت مركبو ) فيه مشغل ام بي ثري ... ولا اوديو سي دي بس ...و هل صوتو كويس ولا محتاج تغيير؟

و بالنسبة لثبات العربية اخبارو ايه ؟؟؟ و في الكيرفات و الملفات عاملة ايه ؟

و ياريت ايميلك ....

**red_4_blood** · 07-12-2008 02:48 AM

انا سمعت كمان اني ممكن اغير الكاسيت ب كاسيت تاني ب 2000 جنيه

ايه النظام في الكاسيت ده ..... و هل ينفع مع الاستاندارد 170.000 جنيه ؟

**mohamed_hamdi** · 07-12-2008 12:00 PM

الى الزميل red-4-blood

بخصوص سعر سيارتي فهو 209000 من ناشيونال موتورزاستلام 9-2008 موديل 2009.
- طبعا أنصح بالخليجي لأنه بنفس سعر التوكيل بتاخد كماليات أعلى كتير + موضوع الضمان مش فارق كتير لأنه كده كده وكيل فولكس في مصر سيء في المعاملة و غالي جدا + الصيانة بتتعمل بره بنفس الطريقة عند التوكيل ( خصوصا محمد سمير ) + ناشيونال بتدي ضمان سنة أو 20000 كم مع العربية و أخيرا قطع الغيار كلها موجودة بره التوكيل ( حتى لو غالية ) أو من النت بالفيزا كارد.
- بخصوص الثبات في الملفات و كده ، ياباشا الألماني لا يعلى عليه في موضوع الثبات ده و بالتالي مافيش حاجة تتقال على الجزئية دي علما بأن السيارة بها ASR .
- بخصوص الكاسيت الأصلي ، فيه مشغل MP3 و صوته رائع جدا و لكن الكاسيت التاتش اللي ب 2000 ج زيادة لازم تشتري العربية من جابر عبد الشهيد فقط علشان يغيرلك الكاسيت الأصلي بالكاسيت التاتش الجديد. أما عند ناشيونال موتورز فالموديلات الحالية عنده بتنزل بالكاسيت التاتش فيها بس سعرها 215000 ج أعتقد.
- موضوع الموديل الاستاندارد ب 170000 جم ، الحقيقة ماعرفش غير الموديل اللي ذكرته أعلاه بس نصيحة الجيتا لازم تركبها بالكماليات علشان تستمتع بيها بس مش لازم يعني الهاي لاين لأن سعره 220000 ج لأن بعض الكماليات مالهاش لازمة في مصر زي الحساسات ( ضوء و مطر) و سخانات الكراسي.
شكرا.
محمد حمدي

**dr_3eshoo** · 10-12-2008 01:48 AM

الف مبروك على العربيه ربنا يباركلك فيها و يديك خيرها و يبعد عنك شرها الفولكس لايعلى عليه اسالني انا 5 سنين راكب باسات ماشيه 180 الف كيلو سفر و جوة البلد دي سعات كانت بتفضل 24 مش بتبطل محمد سمير من احسن الناس الي بتصلح فولكس بس بعد مايعمل الصيانه خليه يراجع على العربيه بنفسه علشان سعات الصنايعيه بتنسى حجات دول مره نسوا يربطوا قاعده الفتيس بس مش مشكله ربطها بس هو امين و شاطر

**Ahmosality** · 11-12-2008 11:18 PM

الف مبروك اخي الكريم على العربية الجديدة وربنا يديك خيرها ويكفيك شرها
على فكرة انا كمان لسه مستلم عربيتي الجيتا 2009 خليجي من اسبوعين بس و لسه مرخصها الخميس الي فات العربية لسه معرفش اقيمها دلوقتي انا عامل 600 ك بس
بس انا عاجبني عزل الصوت و خامات التشطيب وكمالياتها ظريفة مرايات ضم و زينون و مثبت سرعه و سينسور خلفي بس انا عندي عيب خطير
السيارة بدون مخدع امامي

**asarhan** · 12-12-2008 01:35 AM

المشاركة الأصلية كتبت بواسطة mohamed_hamdi

الى الزميل red-4-blood

بخصوص سعر سيارتي فهو 209000 من ناشيونال موتورزاستلام 9-2008 موديل 2009.
- طبعا أنصح بالخليجي لأنه بنفس سعر التوكيل بتاخد كماليات أعلى كتير + موضوع الضمان مش فارق كتير لأنه كده كده وكيل فولكس في مصر سيء في المعاملة و غالي جدا + الصيانة بتتعمل بره بنفس الطريقة عند التوكيل ( خصوصا محمد سمير ) + ناشيونال بتدي ضمان سنة أو 20000 كم مع العربية و أخيرا قطع الغيار كلها موجودة بره التوكيل ( حتى لو غالية ) أو من النت بالفيزا كارد.
- بخصوص الثبات في الملفات و كده ، ياباشا الألماني لا يعلى عليه في موضوع الثبات ده و بالتالي مافيش حاجة تتقال على الجزئية دي علما بأن السيارة بها ASR .
- بخصوص الكاسيت الأصلي ، فيه مشغل MP3 و صوته رائع جدا و لكن الكاسيت التاتش اللي ب 2000 ج زيادة لازم تشتري العربية من جابر عبد الشهيد فقط علشان يغيرلك الكاسيت الأصلي بالكاسيت التاتش الجديد. أما عند ناشيونال موتورز فالموديلات الحالية عنده بتنزل بالكاسيت التاتش فيها بس سعرها 215000 ج أعتقد.
- موضوع الموديل الاستاندارد ب 170000 جم ، الحقيقة ماعرفش غير الموديل اللي ذكرته أعلاه بس نصيحة الجيتا لازم تركبها بالكماليات علشان تستمتع بيها بس مش لازم يعني الهاي لاين لأن سعره 220000 ج لأن بعض الكماليات مالهاش لازمة في مصر زي الحساسات ( ضوء و مطر) و سخانات الكراسي.
شكرا.
محمد حمدي

مبروك ياباشا
انا الحمد الله جبت من ناشونال الفئه الاقل اللي من غير حساسات بس اتعرضت لموقف غريب شوية كنت عايز اسئلك عليه و هو الكود بتاع الكاسيت مش موجود عندهم وده اكتشفته بعد ما استلمت بيومين وده كان قبل العيد فطلبوا مني اني اروح مركز الصيانه بتاعهم علشان يفكوا الكاسيت ويخدوا الرقم بتاعه و يبعتوه بالفاكس و يردو عليهم بالكود
هل هذا الكلام منطقي؟؟؟ لاني المفروض اروح اعمل الكلام ده يوم الاثنين القادم
وشكرا