الموضوع: مقارنة الأربعة الكبار: كورولا - سيفيك - لانسر شارك - مازدا 3

المشاركة الأصلية كتبت بواسطة ahmed21015

هو حضرتك متعصب كدة لية
انا ركبت كرولا 2009
مش 2008 وركبت الفوكس ال 2008
والله العظيم الفوكس افضل منها بمراحل (اسف للفظ تضربها بالجزمة) من فخامة وثبات وكدة
نيجى بقا لموضوع البنزين اللى حضرتك بتتكلم عنو
اولا حضرتك فاكر انها عربية امريكانى من ام 8 سيلندر والحجات دى والبنزين الرهيب وكدة
العربية دى استهلاكها للبنزين عادى جدا مش زى منت متخيل نيجى لموضوع سعر اعادة البيع دة اة انا معاك انو بيقل بس معتقش انو هيبقى قليل اوى لان العربية انتشرت كتير وابتدت تنتشر والناس يعترفو بيها فمصر (انا على فكرة مبعترفش بنظام السوق المصرى العقيم اللى هو بيفضل الفيرنا والانوس والكلام دة)
وبالنسبة لقطع الغيار
حضرتك ممكن تدخل قسم فورد وتشوف قطع الغيار اللى فاكرها حضرتك انها نار ولعلمك هتلاقيها اقل من السيفيك
(بالله عليك انت بقا قطع غيار السيفيك والكرولا رخيصة ولا غالية)

هيا فعلا الفوكس واخدة تقدير في الثبات على الطريق اعلى من الكورولا والسيفيك والحقيقة انا شوفت العربية في المعرض وقعدت فيها وكده لكن للأمانة مسوقتهاش لكن انا عندي نوع من الثقة في تقدير المجلة .. لكن برضو مش الفرق الرهيب الي حضرتك متخيلو يعني الفوكس خدت 410 نقطة من 680 في الثبات على الطريق والسيفيك خدت 390 والكورولا 370 ..

الحاجة اتلانية انا عارف موتور الفوكس ايه مش بقول انها في البنزين رانج روفر يعني انا عارف انها اقتصادية بس انا بقارنها بالباقي بتاخد اكتر من الكورولا والسيفيك والمازدا 3 والشارك.

بالنسبة لقطع الغيار انا عارف ان قطع غيار الكورولا والشارك مش رخاص لكن على الأقل ارخص من الفوكس لكن السؤال اصلا مين عندو كورولا بيحتاج قطع غيار اصلا الا لسمح الله في حالة الحوادث ؟!!

بخصوص سعر اعادة البيع انا بتكلم في الموجود دلوقتي الله اعلم هيحصل ايه لكن حاليا سعر اعادة بيعها اقل كتير من الالاربعة وعموما عشان تبقى عارف ومن قديم الازل العربيات الامريكي سعر اعادة بيعها قليل جدا وهديك مثل بسيط من 9 شهور بس كنت في الامارات وبلف في سوق الجمعة للسيارات في مصفح في ابوظبي تخيل ان الجيب جراند شيروكي فل اوبشن موديل 2000 ب15 الف درهم يعني 22 الف جنيه بس ؟؟!!!!!!!!!!!!!

هيا عربية كويسة لو ناوي تستعملها اربع سنوات وتبيعها وتجيب جديد اما الي عايز سيارة معمرة عشان امكانياتو انو مش هيقدر يغير العربية غير بعد فترة طويلة فالباقي افضل.

المشاركة الأصلية كتبت بواسطة ahmed21015

ياباشا هو حضرتك مش عايش فى مصر ولا اية
الناس فمصر طوووووووووووول عمرهم بيشترو اليبانى والكورى وعمر حد ما بيفكر فى الفورد او الدودج او الحجات دى
الناس ابتدت تفهم ودة بيتمثل فى انتشار الفوكس والفيستا ابتدت تنزل
وبالنسبة للدودج مثلا يعنى عندك الدودج رام منتشرة
وبالنسبة للعربية اللى حضرتك بتقول مشاكلها كتير اللى هيا الاوبل
عايز اقول لحضرتك ان الاستر البانوراما والفكتر عربيات المانى بمعنى الكلمة واحسن من اى يبانى

تصحيح بس .. الناس في مصر طوووووووول عمرهم بيشترو ياباني ... دي جملة خاطئة .. الجملة الصحيحة .. الناس في العاااااالم كله دلوقتي على الأقل بتشتري ياباني ومبتجيبش الامريكي.

على فكرة انت وقعت في الحارة بتاعتي عشان انا كان عندي اوبل فكترا موديل 2004 وبجد وتني الويل والعذاب الي محدش شافو وقهرتني اكتر لما جيت ابيعها وبعتها بالعافية بخسارة كبيرة جدا ربنا يعوض في 2007 ونصيحة لوجه الله يا جماعة الاوروبي محترم وكل حاجة بس الاوروبي الي مش تابع لجنرال موتورز زي اوبل بجد انا مش عايز حد يمر بالي مريت بيه مع الفيكترا تحديدا ماليش تجارب مع الاسترا خالص لكن ليا اصحاب عندهم كورسا كتير اشتكو منها برضو.

انا عايز اقول ان في ناس بجد مش مصدقة ان ممكن يطلع حاجة تنافس بل وتتفوق على الامريكي والاوروبي زي الياباني وده الواقع الآن .. زي بالظبط ما الناس مش مصدقة ان في اي فريق يقدر يكسب الاهلي . مع العلم اني اهلاوي

وربنا يوفق الجميع

المشاركة الأصلية كتبت بواسطة smartman310

عن عن نفسى الاربعه احسن وافضل من بعض وكل واحدا من العربيات دى تمتاز بشىء ويعيبها شىء

السيفيك واطيه وده عيبها المشهور فى شوارع المحروصه

التويوتا كرولا طبعا عيب الموتور الجنوب الافريقى

انا عن نفسى ترتيبى للعربيات

1- السيفيك
2- التويوتا كرولا
3-المازدا
4- الشارك

هو انا احترم رأي حضرتك بس تصحيح بسيط مفيش اي عيوب في الموتور الجنوب افريقي .. الفكرة كانت ان الناس مش واخدة على الجير الجديد الي هو في شفتات اوتومانيوال لكن الموتور ده مالوش دعوة اصلا بجنوب افريقيا ده بيستوردوه من اليابان.

المشاركة الأصلية كتبت بواسطة Kemo0o

بصوا الاربعة كويسين جدا جدا ولكن هنستبعد الشارك عشان موتورها اضعف من الباقي والمازدا عشان برضه بحس انها خارج المنافسة بين الكورولا والسيفيك مع اني بحترمها جدا جدا

المهم بالنسبة لموضوع التسارع من صفر ل 70 تقريبا فتسارع الكورولا افضل حبتين عشان الفتيس ال mmt ولكن لو العربيتين نفس الفتيس فالسيفيك تكسب يعني الكورولا الاوتو بصراحة مش قد السيفيك الاوتو وعن تجربة شخصية

الكورولا ال mmt انا كبست معاها وانا راجع من الدائري من عند نزلة التجمع لحد نزلة الاسماعيلية بصراحة العربيتين ماطلعوش من بعض نهائي يعني ماشيين مع بعض بسم الله ماشاء الله الاتنين جامدين جدا جدا

انا عن نفسي اخترت السيفيك لانها اجود من الكورولا من ناحية دقة التصنيع والخامات وكمان ياباني 100% والذي منه وكمان عربية يتعمل فيها Tunning ولعب بسهولة عشان انا من هواة التعديل وكمان متوفر ليها قطع للتعديل اكتر من الكورولا اللي تعتبر عربية ( عجوزة ) يعني مش بتاعت تعديل ولكن:-
الكورولا تكسب من ناحية اعادة البيع والصيانة الخارجية وقطع الغيار والذي منه
الكورولا تكسب برضه من ناحية ارتفاع السقف عن الصالون على عكس السيفيك وده للناس اصحاب القامة الطويلة

صدقوني الاختيار صعب ما بين السيفيك والكورولا ومش صعب بس لا ده صعب جدا جدا

من الاخر السيفيك سيارة رياضيه شبابية والكورولا سيارة كلاسيكية جدا لها طابع خاص

حضرتك قولت المفيد هي اصعب مقارنة على الاطلاق .. بس الموضوع متوقف على الزوق طالما الميكانيكا واحدة يعني الي هفرق مع الناس ازواقها في شكل العربية .. مع اني سوقت السيفيك بنفسي وبجد حسيت انها متنفعش فشوارع مصر بسبب انها واطية انا كل ما احك في مطب ابص لصاحابي الي هو صاحب العربية الاقيه يقولي يبني عادي ده انا بحك في الاوطى منو بجد بتوجع انك تدفع المبلغ ده كله وتقريبا كل مطب تحك.

المشاركة الأصلية كتبت بواسطة mandooo

بصراحه ده واضح جدا مين اللى متعصب والدليل انك بتقول تديها بالجزمه وبتحلف بالله وكلام غريب وبعدين انت عرفت منين ان الفوكاس ثباتها احسن ...الفوكاس مبنيه على نفس شاسيه الماذدا 3 وبما ان الماذدا 3 اقل فى الثبات بكتير عن الكورولا يبقى الفوكاس نفس الحال
وعلى فكره شوف مبيعات السيارات فى 2007 وهتلاقى الكورولا والسيفيك اعلى فى المبيعات من الفوكاس على الرغم ان الفوكاس تبع فورد الامريكيه ودول من اليابان
وما تقارنش نعومة ولا استهلاك البنزين للكورولا باى عربيه تانيه علشان ما تظلمش العربيه اللى هتقارنها بيها
وتقبل تحياتى

انا الحقيقة اول مرة اعرف معلومة ان الفوكس نفس شاسيه المازدا 3 شكرا يا استاذ ماندو انك افدتني بجد .. بس غريبة ان مجلة اوتو كار تدي الفوكس تقدير ثبات عالي كده !! والله شكلهم كمان بيحاولو يبيعو الامريكي.