الموضوع: استهلاك البنزين للبيتلز

المشاركة الأصلية كتبت بواسطة ahit

و الله انا أوقات بحس إنها بتوفر أوى فى البنزين و أوقات تانية بحس إنى راكب أمريكانى مش بيتل
و طبعاً دا بيكون نتيجة القرص على الماتور فى بعض الأحيان و السرعة و الزحمة كمان و الإشارات و ....
و آخر لما زهقت قررت أكبر دماغى و ماحسبلهاش :k8:

+11111111111111111

هههههههههههههه
النهارده ياجماعه وانا بمون من بنزينه مصر للبترول اللى قدام محطة مترو الزهراء لقيت مكتوب حسابى 17جنيه ونص يعنى ماكملش 20لتر واتفاجئت بالراجل بتاع النزينه بيقوللى 19 جنيه يابيه قولتله ازاى ده مكتوب 17 ونص بس قاللى ده الشاى بتاعنا قولتله هو انتو بتفرضو اتاوه علينا قاللى والله مش عاجبك متبقاش تيجى تمون من هنا تانى
طبعا هو كان بنزين 80 والله مش عارف اقول ايه هى كانت ناقصه عمال البنزينه كمان
حسبنا الله ونعمه الوكيل

السلام عليكم و رحمة الله و بركاته

للأسف بعض المصريين بينتهزو فرصة وجود أعياد أو ناكبه أو أزمات و على طول يزودو الأسعار أو يطلبو بقشيش زيادة أو يحتكرو منتجات و غير ذلك من الأمور اللى نهى عنها الإسلام و العرف و القانون.
الدولار يغلى نلاقى كل شىء بسرعة يغلى قدامة أضعاف حتى ولو محلى
الدولار يقل نلاقى كل حاجة تفضل زى ما هيا غالية و ما ترخصش

البنزين و السولار يغلو تلاقى المواصلات غليت و الميكروباصات و التاكسيات كمان البنديرة تغلى حتى لو العربية غاز !!!!

البنزين الـ 80 مش متوفر و بتقف عليه بالطوابير و كمان اللى يجننك إن عمال البنزينة يحسسوك إنك من المرتزقه و هما اللى بيدولك حسنة و كمان مش مفروض تاخدها و كأن أهاليهم هى اللى بتوزع اللحمة بتاعة العيد على الفقرا !!!!!!!!!!! و كمان يطالب ببقشيش زيادة.
و كمان فيه بعضهم بيبيع الليتر بجنية و أوقات بجنية و 10 قروش
و مرة واحد باعلى الليتر بجنية و ربع و دا كان فى آخر طريق المنصورية عند حتى اسمها برقاش و سوق الجمال تبع الجيزة لما كنت راجع بليل من مزرعة هناك تبع شغلى و كنت مطر لأن مفيش غير البنزينة دى قدامى و كمان مفيش 90.

و الله أوقات فى بنزينات بتديك الباقى و مش بتطلب أى حاجة عشان كدا الواحد بيراضيهم بنفس راضية .

و أنا لو مكانك كنت بهدلتو و الله لأنه المفروض ما ياخدش اللى هو عاوزه من الباقى بتاعك و يسيبك إنت تراضية.

على العموم معلش هو دا الأسلوب المتبع من غالبية الناس دلوقتى
و حسبى الله و نعم الوكيل

والله ياجماعه انا بصراحه سكت ودفعت مضطر مش على شان مش هاعرف اخد حقى بس علشان كنت متعجل ورايح مشوار مهم وفى نفس الوقت لقيت كل عمال الببنزينه متفقين مع بعض على كده وبعد ماكنا ندفع نص جنيه بقشيش بمزاجنا واحنا راضيين بقى العامل هو اللى بيحدد الاتاوه اللى هياخدها وكانها بقت عزبة ابوه يعمل زى ماهو عاوز
انا بقترح اننا اقل حاجه نعملها ان اى حد يتعرض للموقف ده انه يكتب هنا اسم البنزينه ومكانها فين وايه اللى حصل معاه لعل وعسى اى حد من المسؤلين يوصله الكلام ده ويتعمل متابعه عليهم وياريت لو حد يعرف رقم تليفون شكاوى للحاجات اللى زى دى واحنا نبلغ عنهم هى مش ناقصه عمال البنزينه كمان يفرضو اسعار جديده علينا ويستغلونا ده غير ان الناس دى مرتباتهم كويسه جدا مش بسيطه بس الطمع والجشع خلاص ملا قلوب البشراللى يطول حاجه ياخدها تخيل لو العامل كمان فرض على كل واحد جنيه هيطلع بكام فى اليوم ده يبقى ملك مش باشا كمان واحنا اللى غلابه
حسبنا الله ونعم الوكيل

السلام عليكم و رحمة الله و بركاته

بنزينة ميدان سفير -- ناس محترمة
بنزينة ميدان روكسى -- أوقات و اوقات
بنزينة المطار -- ناس محترمة
بنزينة التعاون المنيل -- لازم أتاوه
بنزينة السيدة زينب -- لازم أتاوه
بنزينة البساتين قبل القسم -- شكلها مش أوى بس محترمين
بنزينة التعاون المقطم -- حسب اللى واقف بيبع

الاماكن المحدوفة طبعاً لازم تدفعلهم اللى عاوزينو !!!
كل بنزينات الإسماعيلية و طريق الصالحية الجديدة و القنطرة والشرقية متعاونين جداً و مش بيطلبو زيادة و كمان ممكن يملولك عربية مليانة جراكن بنزين ( هههههههههه ) ناس عسل يعنى :k48: