الموضوع: استهلاك البنزين للبيتلز

السلام عليكم و رحمة الله و بركاته

موضوع إستهلاك البنزين يتوقف على عدة أمور أهمها :-
1- كفائة الماتور و سحبه فكلما كان الماتور سليم كان سحبه و تسارعه أفضل و بالتالى استهلاك أقل للبنزين.
2- نظافة الكربراتير و مسمار البيك و قطر فتحة مسامير البيكات و بالتالى سهولة إنسياب البنزين و حرقه بالصورة المطلوبة دون تهدير لكميات بنزين إضافية تخرج فى صورة عادم نيىء.
3- جودة طقم الكهرباء ( بوجيهات - أبلتين - كوندينسر ) و بالتالى حرق أفضل و سحب أفضل.
4- التاكيهات لا بد أن تكون سليمة و مظبوطة بفيلر بالمقاس المطلوب تمام و بالتالى لا يوجد تحميل على البوجيهات و استهلاك قليل للبنزين.
5- ضغط إطار السيارة لو كان أقل من المطلوب بالتالى إحتكاك أكبر بالأرض و الحاجة لزيادة العزم بزيادة الكبس و بالتالى إستهلاك أكبر للبنزين.
6- لا بد من التأكد من أن زوايا العجل مظبوطة لأنها أيضاً تؤدى لزيادة إحتكاك الكاوتش بالأرض و استهلاك بنزين أكثر للوصول للتسارع المطلوب.
7- الأمركة أو الطلوع بالسيارة بسرعة جداً يؤدى لزيادة إستهلك البنزين.
8- الوقوف الكثير فى الإشارات و المحرك يعمل يزيد من استهلاك البنزين.
9- الوقوف المتكرر للسيارة.
10- حجم الإطارات فكلما زادت الرقعة الملامسة للأرض لما زاد الإحتكاك و بالتالى بنزين أكثر.
11- استهلاك الماتور للبنزين داخل البلد بيكون أكثر من الطرق الطويلة.
12- الكبس الزائد على دواسة البنزين لزيادة التسارع يزيد إستهلاك البنزين .
13- القيادة الهادئة تقلل استهلاك البنزين.

* لو تم مراعاه ما سبق سوف يتم تقليل استهلاك البنزين .
* الطريقة الصحيحة لحساب الإستهلاك هو تفويل السيارة فى بداية طريق طوالى سريع و قراءة العداد و بعد مسافة كبيرة بدون توقف يتم التفويل مرة ثانية و قسمة عدد الكيلو مترات على كمية البنزين المضافة مؤخراً ، و هنا سوف يظهر عدد الكيلو مترات اللى بتعملها السيارة فى اللتر.

* الكلام السابق مأخوذ من آراء و موضوعات خاصة بأعضاء منتدانا الكبير Nilemotors و من كلام غالبية الميكانيكية اللى تم التعامل معهم و من تجربة شخصية.
و من يرى غير ذلك من الأعضاء الكرام يفيدنا كلنا
و آسف على الإطالة
شكراً

المشاركة الأصلية كتبت بواسطة raafat10

اصدقائى اللأعزاء
أحب أشاركم فى الموضوع دة وهو أن عربيتى ماتور 1200 بتعمل داخل البلد فى 35 لتر حوالى 250 كيلو و مجربتهاش فى السفر بس أنا حاسس أن دة أستهلاك عالى شوية وهل أنا لو نظفت الكاربراتير هيتحسن الأستهلاك خصوصا أنا منضفتوش من ساعة ما أشترتها من 8 شهور لأنى مش عايز حد يلعب فية فهل لو أشتريت الأسبراى والمننظف اللى يضاف على البنزين يكون مفيد ويغنى عن فكة؟
وشكرا لكم

مش هنقدر نحكم على سيارتك فعلا بتستهلك بنزين كتير ولالا غير لما انا وباقى الاعضاء نحسب المسافات والاستهلاك لسيارتنا ونعلنها هنا ان شاء الله انا عن نفسى لسه مفول امبارح ومش هحسب المسافه غير لما اخلص نص التانك علشان اكون استهلكت صفيحة بنزين واعرف عملت بيها كام كيلو وطبعا باقى الاعضاء يقولولنا ووقتها نعرف مين اللى عنده مشكله فى الاستهلاك وزى ماذكر الاستاذ احمد حسن المعلومات الجميله عن اسباب الاستهلاك كده يبقى لازم نقول كل بيانات سيارتنا كام سىسى ومقاسات الكاوتش وبنظبطه على ضغط كام امتى اخر مره عملنا صيانه دوريه للسياره وغيرنا طقم الكهرباء وطبعا مهم جدا نذكر البنزين اللى بنستخدمه 80 ولا 90 وبنمشى فى الطوالى دايما ولا داخل البلد وشكرا لرد الاضاء وتعاونهم وطبعا الهدف فى الاخر ان كلنا نستفيد وننفع بعض بالمعلومات

انا النهارده حسبت المسافه بعد استهلاك 20 رتل بنزين تقريبا عملو معايا
170ك وهو مشوارى تقريبا كل يوم من المعادى للقطاميه على الدائرى بيعمل حوالى 30ك رايح جاى والبنزين 80 والسرعه بتكون تقريبا 70 او 80 حسب الطريق وطبعا من المعادى للدائرى يعتبرحوالى 4ك فى الزحام وطبعا السرعه من العوامل المؤثره على استهلاك البنزينلان امثل سرعه لاستهلاك سليم هى 70الى 80فى الساعه اقل او اكثر من كده يعتبر استهلاك اكثر للبنزين ده بخلاف الاسباب اللى ذكرها اخونا احمد حسن من قبل وياريت كل الاعضاء اللى شاهدو الموضوع يردو علينا ويفيدونا بتجربتهم فى الاستهلاك

ماشاء الله كده كويس جدا
على فكره انا نسيت اذكر ان عربيتى 1500سىسى وده مهم جدا للذكر برضه لان السىسى بيفرق