الموضوع: استهلاك البنزين للبيتلز

المشاركة الأصلية كتبت بواسطة RAAFAT10

أخوانى الأعزاء
بالنسبة لتعليق الأستاذ أحمد حسن , وهو عدم معرفة الأستهلاك بالظبط فأحب الفت نظرة لأن ممكن يكون هناك عيب بالعداد بالنسبة لأرقام الكيلو متر لأن المشكلة دى كانت معايا وهى سببها أنة يوجد ترس صغير راكب بأكس متصل بالأرقام ,الترس دة كان مشروخ من ناحية فتحتة اللى راكبة بالأكس وطبعا دة ممكن يفوت فى لف الأكس وبالتالى لا يحرك الأرقام فى بعض الأحيان أو يفوت فى عد كذا كيلو فيظهر مرة أن أستهلاكها عالى ومرة أستهلكها كويس وعلى فكرة أصلاحة سهل وأنا صلحتة بنفسى

السلام عليكم و رحمة الله و بركاته

شكراً جزيلاً لإهتمامك بالمشكلة يا أستاذ/ رأفت
و بجد حضرتك لفت نظرنا لحاجة جديدة و هى موضوع ترس قلب عدد الكيلو مترات و أتمنى من حضرتك إنك تشرحلنا إزاى بتصلحه بنفسك أو بتغيرو عشان كلنا نستفيد.
و لكن المشكلة عندى مش فى عدد الكيلو مترات الصحيحة أو أنها خطأ و لكن مشكلتى إن العوامة لما بفول التانك بيبقى المؤشر مظبوط و لكن لما التانك بيكون فى نصه بلاحظ إن المؤشر بيكون على العلامة الحمراء ( يعنى التانك فاضى ) و لما بروح أمون بلاقى العربية بتاخد 16 لتر تقريباً .
و لو سيادتك تقدر تفيدنا فى الموضوع دا فا يبقى الواحد عاجز عن الشكر .

وعلى فكرة بالنسبة للبنزينة اللى تاخد فلوس زيادة فالحل بسيط وهو أنك متسألوش عايز كام , أنت تشوف العداد عد كام فلوس وتديلة المبلغ المطلوب حسب العداد ولو عايز تديلة زيادة من نفسك , بحريتك , طبعا هو مش هيقدر يمسك فيك وزى ما هما عندهم الجراءة والبجاحة يطلبوا زيادة أحنا كمان عندنا الجراءة نقلهم لأ , وتركب عربيتك وتمشى

و هو دا فعلاً إللى بعملو فى غالبية الوقت و هو تصرف سليم

شكراً على الإهتمام مره ثانية

انا باعمل من 150 -160 كم فى الصفيحة تقريبا داخل البلد

المشاركة الأصلية كتبت بواسطة RAAFAT10

الأستاذ أحمد حسن ,تحياتى لك
بالنسبة للترس دة غالبا بيكون مشروخ من على الجانب يعنى الفتحة اللى راكبة فى الأكس واسعة . كل اللى تعملة أنك تفك الترس من مكانة وتلف فتلة خيط رفيعة عدد من اللفات كافية على شفة فاتحة الترس بحيث تتمكن من تضييق الفاتحة مع الضغط بحيث أنها تعمل على ضم الشرخ وأرجاع الفاتحة الى حجمها الطبيعى ثم تضع نقطة أمير بحزر على لفات الخيط فقط حتى تتشربة وتتركة مدة كافية حتى يجف ثم تقوم بتركيبة فى الأكس بالضغط مرة أخرى فيكون بهذة الطريق قد لحمت الشرخ وأرجعت الفتحة لحجمها الطبيعى بحيث تعطى أحكام للترس على الأكس
بالنسبة لحالة العداد عندك ممكن يكون سببة برضة عدم رجلشة المؤشر العداد بشكل سليم وممكن يكون فى الملف اللى فى العوامة طبعا لازم نحدد العيب جاى منين فى الأول
أول خطوة نقيس الفولت اللى جاى من العوامة عن طريق جهاز يقيس الفولت(أفوميتر) ,فطبعا لو قسنا الفولت عندما يكون المؤشر على أعلى درجة بما يعنى أن التنك مليان ووجدناة 6 فولت معناة أن كدة يبقى العوامة بتدى الفولت المظبوط
الخطوة الثانية نقيس الفولت عندما يكون المؤشر على أقل درجة أى بما معناة أن التنك فاضى ولقينا الفولت صفر معناة أن الفولت على العوامة سليم ويبقى العيب فى رجلشة المؤشر (يوجد رجلشتين للمؤشر واحدة لأقصى درجة وواحدة لأخر درجة ولازم أن الرجلشتين يتعملوا متوافقين مع بعضهم )والرجلشة دى بتبقى عايزة دقة شوية ..
وفية طريقة كويسة لعمل رجلشة المؤشر وهى فكة من العداد وتوصيل الطرفين بأدبتر يعطى تيار 6فولت وتوصيل التيار الى طرفى المؤشر , فى هذة الحالة لابد أن يصل المؤشر لأقصى درجة فأذا تعداها أو لم يصل اليها فتقوم برجلش المؤشر من الفتحة الخلفية أسفل علبة المؤشر حتى تجعل المؤشر يقف فوق أعلى شرطة للعداد ثم تقوم بفصل التيار من الطرفين فسوف تجد أن المؤشر يهبط الى أقل درجة فأذا لم يصل اليها أو تعداها تقوم برجلشة المؤشر من الفتحة الأخرى حتى تجعل المؤشر يقف عليها (لاحظ أن هناك فتحتين للرجلشة ولابد أن تقوم بالتوفيق ببين الرجلشتين من الفتحتين حتى يكون المؤشر على أعلى شرطة عند توصيل التيار وعلى أقل شرطة عند فصلة )
اأما أذا وجدت المؤشر يعطى قراءة سليمة بعد أختبارة بهذة الطريقة فأن العيب سوف يكون بالتأكيد بسبب المقاومة المتغيرة فى العوامة .
أرجو أن أقوم قد نجحت فى التوضيح وقد قمت بشرح نظرية عمل المؤشر فى المشاركة السابقة.
تحياتى لك
ودة شرح كيف يعمل المؤشر من المشاركة السابقة

بالنسبة لعطل عداد البنزين أنا طبعا فكيت العداد قبل كدة وصلحت فية ترس الكيلو متر بنفسى لأن عندى أعتقاد أنى محدش هيعملى الحاجة صح زى منا عايز لأن معظم اللى بيصلحوا, يصلحلك حاجة ويبوظلك حاجة تانى , فأى حاجة أطول أعملها بأيدى فى العربية بحاول أعملها بنفسى لأن دى هواية عندى وبالمرة مخليش حد ما يفهمش يبوظلى الحاجة بدل ما يصلحها, بس للأسف فى حاجات كنت أتمنى أطولها علشان أحط أيدى فيها ,المهم أنا لما فتحت العداد لقيت عداد البنزين بيشتغل بطريق غريبة شوية وهى أنها بتعتمد على ملف سلك حرارى بيسخن حسب قيمة فولت الكهرباء اللى الواصل الية وملفوف على صفيحة نحاس قابلة للأنحناء طبقا لدرجة السخونة اللى بيسببها الملف الملفوف عليها وهى من نوعية المعدن الموجود فى ترموستات المكواة الكهربائية القابل للأنحناء طبقا لدرجة الحرارة وهذة الصفيحة متصلة بطريقة معينة (مفصلة) بمؤشر العداد فعند تمدد أو أنكماش هذة الصفيحة تنحنى فيتحرك المؤشر سواء بالزيادة أو النقص , وزى ما قلت قبل كدة,أن المؤثر على التمدد بالحراره هو قيمة الفولت الواصل للملف,وطبعا قيمة الفولت دة بتتحكم فية العوامة اللى فى التنك لأن بها ملف عبارة عن مقاومة متغيرة تحدد قيمة الفولت الواصل الى مؤشر العداد حسب كمية البنزين فى التنك وأرتفاع العوامة أو أنخفاضها , ومؤشر البنزين يصل الى أقصى قرائة عندما يكون فولت التسخين على الملف قيمتة 6 فولت ,طبعا كل ما يقل البنزين فى التنك يقل الفولت اللى بيغذى السلك الحرارى فى العداد فيعطى قراءة أقل, ويوجد داخل العداد أسفل الجزء الخاص بمؤشر البنزين فتحتين يمكن عن طريقهم رجلشة مؤشر العداد بحيث يعطى أكبر قراءة على أخر شرطة فى العداد ويعطى أقل قرائة للعداد على أخر شرطة بعد المنطقة الحمراء ,طبعا الرجلشة دى بتاخد وقت شوية وعايزة صبرودقة لكن بتتظبط فى النهاية بشرط أن يكون ملف العوامة فى التنك سليم
أرجو أن أكون تمكنت من أيضاح الصورة والشرح
وشكرا لكم

الأستاذ / رأفت ... المحترم
شكراً لذوقك و سرعة الرد و الإهتمام
و شكراً على الشرح الجميل و إن شاء الله هافك العداد قريب و أجرب و ربنا يسترها

المشاركة الأصلية كتبت بواسطة RAAFAT10

أخى أحمد حسن أحب أنى أنبهك انة مش لازم تفك كل العداد يعنى مش لازم تفك الأطار والزجاج أنت ممكن تفك عداد البنزين فقط لوحدة لأنة مربوط بمسمارين من الخلف فقط علشان الأجزاء الأخرى متتعرضش لأى أزى وخلي بالك عقرب المؤشر معدن خفيف جدا ممكن يتنى فخليك حريص علية وتعامل معاة برفق وربنا يوفقك وقلى عملت أية ,وعلى فكرة فية علبة معدن مربوطة فى ظهر العداد , دى فكها وأفصلها فى حالة أنك هتظبطة خارج العربية بالأدبتر على 6 فولت لأن داخلها أيسى فيدتة يخفض الفولت اللى داخل على العداد من 12 فولت الى 6 فولت وأوعى توصل الكهرباء للعداد من غيرة لما ترجع تركبة بالعربية لأن لو دخل 12 فولت على الملف هيتحرق,وبالنسبة للرجلاش فهو عبارة عن خرمين يظهرمن داخلهم سنون رفيعة ممكن تحركهم شمال أو يمين بسن المفك

السلام عليكم و رحمة الله و بركاته

متشكر جداً يا رأفت باشا إنك لفت نظرى للمواضيع دى و هو دا المهم إن إللى يشرح حاجة يلفت نظر الأعضاء للنقط الهامة و التحزيرات المطلوبة.
و إن شاء الله أنا كنت بفكر أفكو عشان أفك اللمض بتاعة العداد و أغيرها كمان بالمره.
و أعتقد الجزء اللى حضرتك بتتكلم عليه دا يسمى إستبليزر على ما أعتقد ؟
و إن شاء الله لما أجرب هاحكيلكو النتيجة
جزاك الله كل خير و شكراً لإهتمامك

شكرا جزيلا يااشتاذ رأفت على التوضيح والشرح الوافى
وانا كمان هفك العداد واجرب بنفسى وكمان هعمل زى احمد حسن واغير لمض العداد بسى عاوز اسأل سؤال هل ممكن اغير لمض ملونه الوان غير الاصفر حمراء مثلا او زرقاء وياريت لوينفع اشتريهم منين اوهما اسمهم ايه او مقاساتهم ايه