انت تسأل وإستشاري منتدى متسوبيشي يجيب (2)

**hhhhhh** · 13-03-2010 02:18 PM

السلام عليكم
ممكن حضرتك تفيدني معروض عليا عربيه لانسر اتوماتيك موديل 2004 1300 سي سي عامله 100 الف كيلو
هي حالتها كويسه انا بس قريت عن موضوع انها 1300 اوتوماتيك بيكون سحبها ضعيف هل الكلام دا حقيقي و هل الموديل ده فيه مشاكل
نصيحة حضرتك ايه
شكرا

**مصراوي جدا** · 13-03-2010 03:51 PM

المشاركة الأصلية كتبت بواسطة borgelharm

مع اشد اعتذاري للبشمهندس طارق انما ايدي بتاكلني بقي اعمل

اسمحلي يا باشا ارد:-
.......................
محمد فهمي

بالعكس انا بارحب فعلا بالمساعدة في الرد على اسئلة الأعضاء خاصة علشان احيانا باكون مشغول واتأخر في الرد واحيانا انتظر لغاية لما اجيب ردود من مهندسي التوكيل على بعض اسئلة للأعضاء

المشاركة الأصلية كتبت بواسطة ebhhu2

السلام عليكم يا بشمهندس طارق
أنا سؤالى بخصوص كاسيت ميتسوبيشى اللى بييجى مع العربية اللى هو بشرايط.
أنا بس عايز أعرف ازاى يظهر الـ volume على الشاشة بتاعته.
و يفضل بعد اذنك لو تبعت الكاتالوج بتاعه علشان فى اوبشنز كثيرة مش عارفها.
و شكرا جزيلا..

في البومة مش بيظهر وللأسف الكتالوج مش عندي

المشاركة الأصلية كتبت بواسطة mohamedmg

بسم الله الرحمن الرحيم
السيد المهندس المحترم / طارق.
اتمنى ان يتم تعميم هذه الخدمة الجليلة لكل وكلاء السيارات في مصر. حيث أنها توفر علينا مالكو السيارات الكثير من الوقت والجهد في الإستفسارات التي لاتحتاج الى زيارة التوكيل.
امتلك سيارة لانسر 2007 1600 خليجي. الأسبوع اللى فات خبطت كلب فكسر الإكصدام الأمامي . محتاج اعرف تمنه بالدهان الفضي والتركيب وهل يجب احجز في يوم واركب في يوم تاني وهل الجديد يأتي بالكلبسات لأن القديمة اتكسرت
والإكصدام الخلفي مفارق عن جسم العربية محتاج ضبط ولا املك الكثير من الوقت فمحتاج اعملهم في يوم واحد ومحتاج فاتورة علشان التأمين . انا من المعادي فأي مكان توكيل اقربلي يعطيني فاتورة معتمدة للتأمين وشكراً
م/ محمد مبروك
مهندس نظم تحكم

اهلا يا باشمهندس محمد وشكرا لكلامك
ايه حكاية الكلاب اللي مطلوقة على العربيات اللانسر اليومين دول ، فيه برضه عضو معانا عمل موضوع مشابه بس عربيته شارك
هو الاكصدام الأمامي بالدهان حوالي 2000 جنيه وفيه الكلبسات و الخلفي ممكن يتم ظبطة انما موضوع يوم واحد مش هينفع علشان الدهان انما ممكن حضرتك تجيب العربية في يوم وتاخدها بعد يومين والكلام ده عندنا في مركز الخدمة الرئيسي في قليوب لأن جسر السويس بالحجز ومراكز الخدمة المعتمدة في القاهرة (الرواس) مش عارف ظروفهم ايه

المشاركة الأصلية كتبت بواسطة ahmed_nbe

السلام عليكم
عندى سؤال سمعت ان فتيس لانسر cvt لا يوجد تصليح له هل هذا صحيح وخصوصاً أنى سمعت ان ثمنه تقريباً 30000 ارجو التوضيح من حيث أن أى عطل به يتم تغييره كله أم أشياء معينه فقط

هو لو عطل فعلا لازم يتغير بالكامل انما مش اي عطل يعني فيه اعطال بيتغير فيه حساسات الفتيس sensors والكشف على الفتيس بوحدة تحليل الأعطال هي اللي بتحدد الفتيس مشكلته ايه

المشاركة الأصلية كتبت بواسطة Ruin Scud

اشتريت امبارح لانسر شارك 2008 وبعدين وجدت انه في الكتالوج ينصح بوضع بنزين 95 فيما اعلى للمحركات 1500 هل معنى كده ان ماينفعشي احطلها 92 !

لأ ابدا كل ملاك العربية بيستخدموا بنزين 92 بدون اي مشاكل

المشاركة الأصلية كتبت بواسطة hhhhhh

السلام عليكم
ممكن حضرتك تفيدني معروض عليا عربيه لانسر اتوماتيك موديل 2004 1300 سي سي عامله 100 الف كيلو
هي حالتها كويسه انا بس قريت عن موضوع انها 1300 اوتوماتيك بيكون سحبها ضعيف هل الكلام دا حقيقي و هل الموديل ده فيه مشاكل
نصيحة حضرتك ايه
شكرا

فيه مواضيع كتير اتكلمت في الموضوع ده هنا في المنتدى وممكن تبحث عنها بكلمة (لانسر 1300) وتشوف آراء الأعضاء والمجربين
وانا رأيي الشخصي ان الموضوع يتوقف على طبيعة السائق يعني لو حضرتك استخدامك عادي او هادي فمش هتشعر بأي مشكلة اما لو بتحب الشد والجري بالعربية فمش هيعجبك سحب العربية وتحس انها ضعيفة خاصة لو سقت 1600 قبل كده
انما الموديل مفيهوش اي مشاكل

**TarekGaafar000** · 13-03-2010 06:12 PM

السلام عليكم
هل توجد نية لنزول لانسر بومة لأعوام قادمة , أم يكون العام 2010 هو آخر أعوامها بمشيئة الله , وفى الحالة الثانية هل سيظل انتاج الشارك , ام سينتج موديل ثالث بشكل جديد كلياً ؟

**مصراوي جدا** · 13-03-2010 10:00 PM

المشاركة الأصلية كتبت بواسطة TarekGaafar000

السلام عليكم
أحب أسجل أولاً إحترامى لشخصك لما لمسته لإحترامك وأدبك فى ردودك وتعليقاتك على الأعضاء , والتى تمكنت من قرائة بعضها .
عايز حضرتك تقولى ايه الفرق بين الفتيس الجديد ( Automatic Sport Mode) اللى نازل فى البومة 2010 , والفتيس cvt خاصة وان الأخير كان أهم مميزاته هو عدم شعور السائق بالنقلات وسلاسته , فهل تتوافر هذه الميزة فى الفتيس الجديد ؟

اهلا وسهلا بيك يا استاذ طارق وشكرا لكلماتك الجميلة

الفتيس الجديد الأوتوماتيك مع Sport mode واللي بينزل مع البومة الآن موديل 2010 للمحرك 1600 سي سي (وليس 1300) هو اللي صورته في توقيعي وهو مثل الستيبترونيك في السيارات الأخرى اي اوتوماتيك مع امكانية التحكم فيه مانوال + و -

أما الـ CVT فهو ناقل حركة دائم التغير أي ان السائق لا يشعر بالنقل من نقلة لأخرى لأن هناك سير بين بكرتين يتم من خلاله نقل الحركة وبالتالي فنقل الحركة يكون ناعما غير محسوس به وهو اللي كان بينزل مع البومة خلال السنوات السابقة محرك 1600 سي سي فقط

الفتيس الجديد ليس به CVT لكن هناك موديلات من ميتسوبيشي يوجد بها CVT مع Sport Mode في ناقل الحركة في آن واحد مثل الشارك 2000 سي سي موديل 2010 لكن بالطبع لن نراها في مصر لأنها 2000 سي سي

المشاركة الأصلية كتبت بواسطة TarekGaafar000

السلام عليكم
هل توجد نية لنزول لانسر بومة لأعوام قادمة , أم يكون العام 2010 هو آخر أعوامها بمشيئة الله , وفى الحالة الثانية هل سيظل انتاج الشارك , ام سينتج موديل ثالث بشكل جديد كلياً ؟

المؤكد باذن الله ان البومة مستمرة لعام 2011 أما ما بعد ذلك فلم تعلن ميتسوبيشي عن توقفها وبالتالي قد تفاجأنا باستمرارها لعام 2012 او اكثر
ولم يعلن حتى الآن عن انتاج اي شكل جديد من اللانسر وانما فقط استمرار البومة والشارك خلال 2011

**seaman** · 13-03-2010 11:50 PM

باشمهندس طارق ..
اولا انا بشكر حضرتك على ذوقك وادبك واحنا بنعتبرك مكسب كبير لينا فى المنتدى
ثانيا.:استفسار بعد إذنك...انا الحمد لله أشتريت لانسر بومه 2010 1600 خليجى وعايز أعمل الصيانه فى التوكيل ينفع ولا لا...
ولو ينفع تتكلف كام صيانه 1000 كم..
-وكنت عايز أركب فوانيس شبوره فى التوكيل تعمل كام ..
وتقبل تحياتى مره أخرى

**invisiblebaby** · 14-03-2010 12:38 AM

السلام عليكم

الأخ الفاضل / م. طارق

واجهتني اليوم مشكلة غريبة في سيارتي ( لانسر سوبر أكشن 2008 )

باختصار:
عند إدارة المفتاح تقوم لمبة ال abs كغيرها بالاضاءة لثواني ثم تنطفيء ولكن المشكلة هي صدور صوت غريب من داخل الكبوت وأعتقد بنسبة كبيرة صدوره من وحدة ال abs الصوت يشبه صوت دوران موتور كهربي صغير , الصوت يستمر لثانية أو ثانيتين فقط ويحدث كل مرة يتم ادارة المفتاح فيها سواء قمت بإدارة المحرك أم لا، وغالبا يحدث بعد أن تنطفيء لمبة ال abs مباشرة وأحيانا قبل أن تنطفيء
مع ملاحظة أنه لو قمت بالضغط على دواسة الفرامل قبل إدارة المفتاح في الكونتاكت لا يحدث الصوت

وأيضا عند الضغط على دواسة الفرامل أحيانا يحدث هذا الصوت مصحوبا برعشة ومقاومة ملحوظة جدا في دواسة الفرامل ولكن يستمر الصوت والرعشة بالدواسة طالما استمر الضغط على دواسة الفرامل حتى أثناء توقف السيارة ( أيضا يحدث ذلك بعد إدارة المفتاح بالكونتاكت سواء كان المحرك يعمل أم لا )

المشكلة ظهرت عقب غسل السيارة من الخارج والصالون ولكن لم يتم غسل المحرك

مع العلم أني قمت بتجربة فرامل الABS بعد المشكلة وتعمل بصورة طبيعية رغم استمرار المشاكل التي ذكرتها.

آسف للإطالة
وجزاك الله خيرا

**shady333** · 14-03-2010 10:42 AM

بشمهندسنا المهندس طارق المحترم جدا

كنت سالت حضرتك بخصوص البنزين قبل كده و حضرتك قالتلى يفضل وضع 92
بس الفكرة لما العربية دى نزلت مصر سنة 98 ماكنش لسة فى بنزين 92 و قريت برضه ان فى حاجة اسمها نسبة انضغاط المحرك و هى دى اللى بتحدد انهو نوع بنزين المفروض يحطه فممكن حضرتك تيفيدنا بأجابة شافية بخصوص هذا الموضوع

معلش فى حاجة غريبة لحظتها ان العربية بيبقى سحبها و ادائها احسن بكتيير فى الجو الحر عالما باننى استخدم زيت شيل التخليقى 100% و الذى يعمل10000 كيلو فهل الزيوت التخليقية مثلا لا تناسب هذا الماتور 1300 سى سى 1998

هل فرع جسر السويس به جهاز بط المحرك و هل يوجد جهاز للكشف عن الفيتيس الاوتوماتيك و ضبطة عالشان انا حولت و نفسى اجى فرع قاليوب عالشان اتعرف على حضرتك لكن للاسف توهت على الدائرى

متشكر جدا على تعاونكم و اسف على الاطالة

**rabeden** · 14-03-2010 12:22 PM

السلام عليكم
سؤال لحضرتك، هل التوكيل كافى دون غيره للكشف على سيارة لانسر كريستالة او بطة قبل الشراء لانى شايف كله على البومة والشارك اكتر بس وشكرا لسعة صدرك وجزاك الله عنى خيرا