رخصة بالواسطة

**engamrnour80** · 20-04-2008 08:48 PM

انا طلعت الرخصة من اول مرة بس الكلام ده كان فى سنه 98 بعد ما كملت 18 على طول كان ساعتها الرخصة ورقة عريضة و طويلة و شكلها غبى و كان من الصعب تحطها فى المحفظةو كان والدى ((الله يرحمه)) معايا كان ظابط جيش بس للامانه انا عقدت اتدرب على الاختبار قبلها ب اسبوع و لمن لا يعرف انا من سوهاج و اختبار السواقه عندنا على شكل حرف S رايح جاى و للى مش فى مدرسة السواقة بيعملو الاقماع على قد العربية بظبط لدرجة ان فى يوم ما الناس مش عارفة تعدى الاختبار ف راحو اشتكو للظابط ان الاقماع ديقة قام قال للمهندس انزل وريهم ازاى العربيية تعدى الاقماع قام معرفش:):)
و اسف على التطويييل

و شكرا

و لمن لا يعرف

**Ahmad Allawy** · 20-04-2008 09:41 PM

والله يا عمرو بك..
انا عن نفسي كنت باسوق من وانا في اولي ثانوي.. علي خفيف بصراحة..
كانت عربية سيات..صغيرة يعني..
وبعدين بدأت اسوق اكتر شوية.. و كنت متخصص ركن.. كنت باستني والدي يرجع بيها و انزل اركنها موازي للرصيف و الشارع زحمة جدا في منطقة وسط البلد.. و كنت باحركها كتير من مكان لاخر..
المهم كنت محترف ركن و خافظ ابعاد العربية لأقصي درجة..
اختبرت في مرور الوايلي اكتر من مرة..3 مرات.. كل مرة كنت بادوس علي خرف قمع مثلا او ازقه بعجلة العربية.. يقوم يقولي اتفضل امشي..
مع العلم انهم كانوا فعلا بيضيقوا الاقماع اصغر من العربية..
يعني انا فاكر ان طول ال3 مرات اللي روحت فيهم كنت بابقي موجود من اول الاختبار لأخره يمكن مشوفتش بعيني غير واحد بس او 2 علي الاكثر اللي نجحوا من غير واسطة..و قبل ما البيه يشوف ان الاقماع معقولة و يقول للعسكري يضيقها..
عموما.. بالواسطة.. اختبرت بعربية كريسيدا 97 طبعا زي المركب..ووقعت اقماع.. بس عديت.. مع العلم اني كنت معدي اختبار الاشارات بمجهودي :)
والحمد لله اهي معايا بقالها 6 سنين من ايام الرخصة الورق اللوحة دي اللي مقاسها 40*25 :)

**Ahmad Allawy** · 20-04-2008 10:00 PM

بالنسبة لموضوع مدرسة السواقة التابعة للمرور يا باشا..
انا ليا معاها تجربة بس كانت غير مفيدة بالمرة.. بل بالعكس دي بينت قدامي قد ايه الفساد ضارب القطاع ده..
روحت قدمت و حضرت بدل الخصة 2 النظري..
وبعدين جه معاد السواقة بقي.. رايح كلي تفاؤل و سعادة.. انا باعرف اسوق بقي.. هاروح اتدرب و امشي بين العربيات.. قولت عظيم..
روحت واذا بيا افاجأ بان الستات بيركبوا عربيات لادا سمارة و كيا برايد و شاهين..
و الرجالة و الشباب بيركبوا ايه..؟؟
تخيلوا كده معايا..
عربيات نص نقل.. الدبابة دي.. 1.5 طن..
ليه يا جماعه؟؟ هو انا رايح اطلع رخصة نص نقل ولا رخصة درجة اولي او مهنية..؟؟ مفيش فايدة.. كل واحد ليه رقم العربية اللي هيتدرب عليها.. و مفيش اي طريقة لتغييرها..
قولنا امرنا لله.. نص نقل نص نقل بس نتعلم.. واهي برضه عربيات نضيفة و جديدة..
الا واني الاقي بقي حظي وقع في اوحش عربية في المدرسة.. عربية مازدا نص نقل لونها احمر..(فاكر كل التفاصيل الكئيبة..) العربية يا جماعه اكاد اجزم ان مفيش ولا لمبة واحدة فيها بتنور..
العربية من جوة خردة بمعني كلمة خردة.. ولا لمبة في التابلوه بتنور.. ولا اشارة ولا نور عالي ولا واطي ولا الهوا..
مفيش مراية جانبيه..و المراية اللي في الصالون (وعفوا اني اقول صالون علي الصندوق الحديدي اللي كنت قاعد فيه بس ماعرفاهاش اسم تاني) كانت بتتلخلخ كده و عمالة تلعب..
الدركسيون فيه بوش..(اكتر من تلت لفة كاملة في الفاضي.. يعني تلف و العجل ميلفش..)
الدواسات بقي حدث ولا حرج. البنزين ميت علي الارض.. الفرامل هزيلة جدا.. متفرقش كتير عن البنزين.. و الدبرياج زيهم (يعني هي جت عليه ده..؟؟)
والمفاجأة بقي..
واقسم بالله العظيم اني مش بابالغ.. ولكنا الحقيقة..
العربية مكانش ليها مفتاح.. والله والله كنت بادورها بسلكتين.. زي الحرامية بتوع الافلام..
و الراجل يقولي لأ استني افصل بقي احسن تحق المارش..(ياخي يحرق دي مدرسة علي العربيات اللي فيها) قولت يمكن اول مرة كده بس وبعدين عربية نضيفة..
روحت دبيت خناقة كبيرة بعد تاني مرة.. قالولي هنصلحها.. (وطبعا الكلمة واضحة.. اشتغالة..)
تالت حصة لقيت عربية نص نقل برضه بس جديدة.. انما ايه تحفة بصراحة.. ناعمة جدا و زي الفل.. الراجل عشان يعاقبني بقي و شافني باعرف اسوق.. خلاني اتعلم بيها الركن بس..
ممشيتش بيها اكتر من الاولاني..
ورابع حصة لقيت العربية الخردة دي تاني..
قال ايه سواق العربية الجديدة دي كان اجازة اليوم ده فجابهالي عشان الخردة كانت بتتصلح..
شوفتها قدامي ركبني عفريت.. روحت عملت خناقة كبيرة و شتمتهم و مشيت.. و ده كان اخر يوم.. و استعوضت ربنا في الفلوس..
وروحت طلعتها بالواسطة بعدها بيومين.. و الحمد لله..
وحسبي الله و نعم الوكيل في مدرسة المرور دي..

**islamnabil** · 22-04-2008 01:46 PM

انا الحمد لله لا كان معايا واسطة ولا دفعت فلوس
الكلام ده في مرور القاهرة الجديدة من حوالى شهر
راجع الموضوع التالي
http://www.nilemotors.net/Nile/showthread.php?t=20404

**SaLM!Na** · 23-04-2008 03:18 AM

اول مرة رحت امتحنت كنت لوحدي و ماقولتش لحد ف البيت بس للاسف سقطت ف النظري
لما رحت بعد كده كنت برضه من غير واسطة و بابا جه معايا جبت ف النظري 100 من 100 عشان بابا كن عاملي ملخص للاسئلة بتاعت النظري
جيت بقى في ال s
اديت للراجل 30 جنيه و قولتلوا ادي قهوتك وريني بقى همتك
المهم مفيش ربع ساعة و قالولي تعالي اتصوري و بعديها ب 10 دقائق لقيت ان الرخصة جاهزة للاستلام بصراحة مكنتش مصدقة اني هاخودها بالسرعة دي
بس الحمد لله ربنا سهلهالي اوي

**نور القمر** · 25-04-2008 01:54 AM

انا طلعتها ب 400 جنيه مش فاكرة كنت بسوق ولا لا وقتها
بس فاكرة اني اتعلمت السواقة في مدرسة تعليم

**OldVic** · 26-04-2008 02:48 PM

سؤال جميل جدا و ها هى تجربتى مع الرخصة:

أخذت عدد كبير من الحصص العملية و كذلك التدريب على اسئلة الكمبيوتر ثم ذهبت لاستخراج الرخصة و هنا كانت المفاجأة!

دخلت امتحان الكمبيوتر و وصلت الى السؤال التالى: "هناك طفل يبكى فى المقعد الخلفى فماذا تفعل؟" و كانت الاختيارات هى: 1- تعطية شىء يلعب به 2- تكلمه حتى يهدأ 3- تقف بالسيارة. فكان اختيارى الطبيعى جدا ان اكلمه حتى يهدأ و هنا كانت المفاجأة!!! اجابة المرور "الصحيحة" هى "اعطيه شىء ليلعب به"!!!!!

كيف بالله عليكم ان التفت لطفل اثناء القيادة؟!!! و نتج عن ذلك رسوبى فى الامتحان حيث اجبت 9/12 و حد النجاح 10/12. و نتج عن ذلك منعى من التقدم للامتحان لمدة 90 يوم!

المهم، بعدها باسبوعين اجريت عدد من الاتصالات على مستوى عالى جدا و حصلت على الرخصة بدون اى امتحانات او رشوة او غيره.

**ايمن محمود محمد ابراهيم** · 26-04-2008 04:04 PM

انا طلعت الرخصة بعد ما دخلت مدرسة تعليم السواقة فى غمرة ودرست واتدربت فيها لمدة شهر بعد ما دفعت الرسوم وهى حوالى 160 جنية والكلام ده كلة كان من 5 سنين وكان بدون اى واسطة والله
ياجماعة بلدنا لسه بخير وفبها حاجات حلوة كتييييييييييييييير قوى

**crazylambada** · 26-04-2008 04:12 PM

طلعتها بالواسطة بعد ما تميت 18 سنة بيومين
و عملتها في ساعة و نص
بس كان بقالي سنة بسوق
و بسوق كويس

**Mzeid** · 22-05-2008 03:08 AM

المشاركة الأصلية كتبت بواسطة SaLM!Na

اول مرة رحت امتحنت كنت لوحدي و ماقولتش لحد ف البيت بس للاسف سقطت ف النظري
لما رحت بعد كده كنت برضه من غير واسطة و بابا جه معايا جبت ف النظري 100 من 100 عشان بابا كن عاملي ملخص للاسئلة بتاعت النظري
جيت بقى في ال s
اديت للراجل 30 جنيه و قولتلوا ادي قهوتك وريني بقى همتك
المهم مفيش ربع ساعة و قالولي تعالي اتصوري و بعديها ب 10 دقائق لقيت ان الرخصة جاهزة للاستلام بصراحة مكنتش مصدقة اني هاخودها بالسرعة دي
بس الحمد لله ربنا سهلهالي اوي

معلش يا سلمى أنتي دفعتي ال 30 جنيه لمين بالظبط .. ؟!
:):)