زيت الفتيس للهيونداي اكسنت اتوماتيك

**emad1973** · 17-08-2009 01:34 AM

السلام عليكم اخواني الكرام
انا معايا عربية هيونداي اكسنت موديل 1999 اوتوماتيك من حوالي سنة كنت اشتريتها
زيت الفتيس بتاعها كميته في الكتالوج بتاعها 6,5 لتر تقريبا
انا سبتها عند صانيعي علشان كان فيه مشكلة في السحب والعربية لا تنقل الا بعد rbm يعلي لحد 3
ورجعت قالي انه فتح علبة البلوف ونظفها وغير زيت وحط 3 لتر وكوعني تمن 3 لتر زيت غير 100 مصنعية
(طبعا مطلعش ده العيب في الي حاصل بس هتدفع يعني هتدفع )
فانا لم اطمئن له لان العيب ما زال مستمر فقصرت ورحت التوكيل
وتم تصليح العربية بتغير الحساسات
وقلت للفني علي قصة الزيت فالفني قاس الزيت
وقالي ده ناقص وجبنا لتر كمان وزوده للسيارة
فانا بصراحة خايف
والنهاردة انا رحت الفرع وقابلت مدير فرع الصيانة قالي
انها تشيل من 4 الي 4,5 لتر
وقال كلام كده مصطلحات انا مفهمتوش المهم اربعة لتر احسن علشان لما الزيت يسخن وحاجات غريبة
المهم عمل قياس علي البارد بعد ما دور العربية لانها كانت بايته عنده ونقل السرعات علي الواقف
ولقي ان المقياس مضبوط علي الكولد
اعلي من الحد الادني واقل ا م من الحد الاقصي للكولد
فقالي كده مضبوط وتوكل علي الله
فانا اقتنعت
لكن السؤال ازاي الكتالوج يبقي فيه 6 لتر والعربية تاخد اربعة ونصف بحد اقصي فقط
ثانيا هل الي عمله الصنعي الاولاني صح ولا غلط وايه بالضبط فايدة علبة البلوف دي
وحاجة اخيرة ازاي زيت الفتيس ينقص لو كان زيادة
ارجوكم حد يرد عليا
وشكرا لاهتمامكم

**Ahmed Hassan** · 17-08-2009 02:40 AM

أكيد عندك الزيت لما تفضيه بيبقى شوية زيت داخل الفتيس مش بينزلو و هما دول اللي بيعملو الفرق. لو الزيت زياده ممكن ينقص من الكبه بتاعة الزيت. بالنسبه للصنايعي محدش يعرف هوا عمل ايه اصلا علشان نعرف اذا كان غلط و لا صح.

**emad1973** · 17-08-2009 03:19 PM

الف شكر ليك يا صديقي العزيز علي ردك
شوف هو قالي انه حل علبة البلوف ونظفها لانها كانت شديدة الاتساخ وغسلها ونضفها وركبها تاني
وقالي ان ده هيريح الفتيس عموما
فالسؤال
ايه علبة البلوف دي وفايدتها ايه وهل توجد مشكة ما في حلها وتركيبها
يعني الي ا تعمل ده ضر العربية في حاجة ولا ايه بالضبط

**Fadi Ezzat** · 18-08-2009 05:52 PM

ولا اى زلمة مش هتعمل حاجة
هيا مشكلة سينسورز مش اكتر

**samirayad** · 20-08-2009 08:47 PM

علبة البلوف هى اللى باينه قدامك على الصوره ومكتوب عليها valve body
بتكون عباره عن بلوك مصنع ومشكل بطريقه هندسيه معقده وبها حارات دقيقه للتحكم فى سريان الزيت
على علبة البلوف بتوجد البلوف
البلوف بيطلق عليها هندسيا مجموعة السولونويد solenoid valves
يتم التحكم فى السولونيدات من خلال التحكم فيها كهربيا بواسطة وحدة التحكم الخاصه بالفتيس
بناء على ظروف التشغيل ....والأشارات الوارده الى وحدة التحكم من الحساسات ( حساس السرعه أو حساس وضع الخانق )وهكذا
حيث تقوم الوحده بأخذ القرار لأثارة سولونويد كهربى معين
وبالتالى يتم توجيه الزيت الى كلاتش مرحلة تعشيق معينه بناء عن ظروف السرعه والحمل
دى فكره مبسطه عن سيناريو الأحداث ....أما الأمور فهى أعمق من هذا

**emad1973** · 20-08-2009 11:43 PM

المشاركة الأصلية كتبت بواسطة samirayad

علبة البلوف هى اللى باينه قدامك على الصوره ومكتوب عليها valve body
بتكون عباره عن بلوك مصنع ومشكل بطريقه هندسيه معقده وبها حارات دقيقه للتحكم فى سريان الزيت
على علبة البلوف بتوجد البلوف
البلوف بيطلق عليها هندسيا مجموعة السولونويد solenoid valves
يتم التحكم فى السولونيدات من خلال التحكم فيها كهربيا بواسطة وحدة التحكم الخاصه بالفتيس
بناء على ظروف التشغيل ....والأشارات الوارده الى وحدة التحكم من الحساسات ( حساس السرعه أو حساس وضع الخانق )وهكذا
حيث تقوم الوحده بأخذ القرار لأثارة سولونويد كهربى معين
وبالتالى يتم توجيه الزيت الى كلاتش مرحلة تعشيق معينه بناء عن ظروف السرعه والحمل
دى فكره مبسطه عن سيناريو الأحداث ....أما الأمور فهى أعمق من هذا

اخي العزيز والله لا اجد كلمات احيك بها عي تلبية طلبي وكمان بالرسم التوضيحي
فعلا انت انسان محترم جدا والف شكر لذوقك
واخيرا اخي قصة تنظيف العلبة دي حقيية
يعني فعلا ممكن تتنظف
وليه وايه الي بيوسخها اصلا
وهل النظافة دي تفرق عموما
وفي ايه بالضبط
معلش تقلت عليك
ورمضان كريم

**samirayad** · 21-08-2009 01:08 AM

اخي العزيز والله لا اجد كلمات احيك بها عي تلبية طلبي وكمان بالرسم التوضيحي
فعلا انت انسان محترم جدا والف شكر لذوقك

الله يخليك يا أستاذ :عماد
وعلى فكره بسبب موضوعك ده ....أنا عملته موضوع فى المنتدى التعليمى من أجل التحاور بين جميع الزملاء
لأن الفتيس الأوتو .....قصه كبيره ....ومعقده للغايه
بس أهو بنحاول .....أحسن من الوقوف بدون القرع على الأبواب

واخيرا اخي قصة تنظيف العلبة دي حقيية
يعني فعلا ممكن تتنظف

نعم

وليه وايه الي بيوسخها اصلا

دى بيكون فيها ممرات وحارات دقيقه (أخرام يعنى )
لما الزيت بيحصل عليه أكسده بسبب السخونه وخلافه
بتتكون رواسب زيتيه .....الرواسب دى بتعمل أنسداد جزئى للمرات الدقيقه ...وبالتالى بيحدث ضعف فى سريان الزيت الى أماكنه المقرره
وبالطبع ده بيؤثر على آداء الفتيس
لأن الضغط بيقل على بساتم تعشيق الكلاتشات clutch packs على الرسم ....وده ممكن يعمل تفويت فى العشيق (لأن قوة التعشيق حتقل )
وده زى مابيحصل فى الدبرياج العادى (مع الفارق طبعا )

أذا النظافه جانب وقائى مهم جدا للحفاظ على آداء جيد للفتيس

**samirayad** · 21-08-2009 01:30 AM

شوف تصميمه الهندسى بيبقى معقد أزاى للغايه
دى صوره لأحد علب البلوف المطبقه فى بعض الأنواع

**emad1973** · 22-08-2009 05:31 AM

باشمهندس سمير
شكرا ليك
فعلا انا عضو جديد في المنتدي
لكن بذوقك وسرعة ردك ومعلوماتك الحاضرة
وكمان تجاوبك
حسيت اني اعرفك من زمان جدا
وفعلا ازداد ارتباطي جدا بالموقع رغم ظروف عملي
فشكرا لك ودمت لنا ذخرا ورمزا للعطاء