الموضوع: كيا نيو سيراتو .. خدعة كبيرة في السوق المصري ( وجهة نظر )

المشاركة الأصلية كتبت بواسطة ali357

اولا احب اشارك صديقى المحترم احمد مختار اللى اتعرفت عليه على الطبيعة وكان ليه الشرف اخد معاه جولة بسيطة واشاركه تقريره ورأيه ,وفعلا زى ما هو قال انها وجهات نظر , وكل واحد بياخد العربية اللى شايفها من وجهة نظره بيرتاح معاها ويقدر يتغاضى عن حاجة مقابل حاجة ,

عن نفسى انا واحمد مختار حبينا شكل السيراتو خارجيا بس ده بيمثل 5% من تقيمنا للعربية ولما احب اركب الكورى اركبه بره مصر فى الخليج ويكون هيونداى , بس فى مصر مركبش هيونداى من اللى عملوا فينا غبور , وفعلا اللى بيركب كيا الفلبينين والهنود هناك والله زى ما تفضل وتكرم العضو samcar وقال , وانا كمان روحت الدوحة وشوفت بنفسى الكلام ده هناك وشوفت عربيات الكيا بكل انواعها راكبها الهنود والفلبنين , اما الهيونداى سيارات اعلى شوية من الكيا وناس كتير بتركبها فى السعودية وفى بلاد كتيرة ومحترمة عن اللى بنزل هنا مصر

بخصوص صاج الالنترا راخر ضعيف بس السيراتوا اضعف منه وانزلوا المعارض وشوفوا واضغطوا بصوابعكم والمصحف من غير ما حتضغطوا قوي حتلاقوا الصاج بتاع الابواب بيدخل لجوة وضعيف موت ,

وبعدين الناس اللى بتقول انتوا ظالمين العربية اوى , انزلو واتفرجوا ومش تقيموا بعين الانبهار بالشكل.. واتفرجوا بالعين العملية المعمرة لناس حتدفع مبلغ كبير وحتفضل معاها عربية لمدة كبيرة ومش حتغيرها

غير كدا انا عارف ان ناس كتير حتزعل من كلامنا ده , بس دي حقيقة وشوفناها بعنينا , وكمان ناس قالت ان العربية من جوة فيها نيكل , وطلع لا يوجد نيكل من جوة فى العربية وده كله عبارة عن بلاستيك مطلى بلون النيكل الفضى , والنيكل موجود فى الاوكر من بره على الابواب , والخامات الداخلية فعلا متوسطة

بخصوص بقا التصفيح من تحت وقدام احنا روحنا واتفرجنا على sx4 ووطينا من تحت العربية لقينا بها مصفحة بين الشكمان وبطن العربية ومكنش تصفيح بلاستيك وكان فى بردوا تصفيح صلب قدام ورا الاكصدام مش يضايق حد فى تغيير الزيت ومكانه حلو جدا ومرتاح , وسعر السوزوكى بقا ب107 على الامكانيات اللى فيها فحلو جدا وحجمها حجم الميجان بس لو رجعت تغلى تانى حيبقا حرام التيدا حتكون احسن , اما بقا التيدا السيدان وصل سعرها الى 111 الف وكمان110 الف وده سعر حلو جدااااا بس بصراحة مش بصينا بصراحة عليها من تحت لاننا كنا عند ريان فى الشارع ونسينا بامانة , , بس اكيد حعرف بردوا بعد كدا موضوع التصفيح ,
المهم قصدى من الكلام ده ايه انه عشان يحطوا كماليات كتيرة اوى فى السيراتو فبيخفوا من حاجات على حساب حاجات , وكل واحد بقا وهو حابب يستغنى على ايه على حساب ايه ,

وعن نفسى استغنا عن الشكل والكماليات اللى بخامات بسيطة واخد ماتور معمر ويابانى ونعومة وسمعة من زمان فى مصر ومحترمة جدا زى النيسان تيدا مثلا وابقا احطله الكماليات اللى محتاجها ,

وفى الاخر اذواق واراء ولازم تحترم عشان محدش يزعل ويقول اننا بنهاجم او ظالمين عربية , احنا عن نفسينا نزلنا وشوفنا بعنينا وحبينا نوضح للناس اللى ممكن يمهما الامر

وعلى فكرة حتى الكروز الجديدة ب120 الف اللى شفناها ومش فيها ولا جنط ولا اى حاجة وفاضية عشان الناس اللى بتسال على الكروز وبردوا حرام حتى عليها ال120 فاضية او لو كانت ماليانة ولو بالسعر ده بردوا حرام

وفى النهاية احنا والله مش متعصبين لحاجة ابدا ولما نزلنا على الطبيعة فى جولة قصيرة عشان ظروف الوقت كنا نازلين عشان نتفرج على السيراتو الاول لان احمد لوحده كان عاوز يشترى عربيتين اصلا ولما روحنا وشوفنا مش عجبتنا من الناحية العملية بس اكيد ممكن تعجب ناس غيرنا , وبردوا شهادة حق هى شكلها شيك , بس لناس بتهتم بالشكل وبتحط تقييم الشكل بنسبة كبيرة , لكن احنا مش بنحط للشكل اكتر من 5% او لو زاد يبقا 10%

وكل سنة وانتم طيبين

الموضوع ده ممتاز عشان كده حبيت اقول رأى
أنا معايا كيا بيكانتو و أن شاء الله ناوى أغير قريب و كان تفكيرى فى الكارنز أو النيو سيراتو
و رحت شفتهم على الطبيعه الاثنين كويسين من حيث الشكل طبعا بس فعلا الخامات الداخليه مش عجبانى
عشان كده فكرت أكتر فى الكارنز للآنى أعتقد أن صاجها أقوى كتير من السيراتو و سياره عائليه و ده اللى أنا محتاجه و لكن
لاقيت السعر ده ممكن فعلا أجيب بيه عربيه أفضل زى التيدا مثلا أو أزود شويه وأجيب سكودا a4 رغم انها موديلها راح بس أفضل و معمره و مصفحه و التيدا يابانى 100% و أن كنت أفضل الهاتش باك عشان السيدان شكلها مش مريح
السيراتو سياره جميله طبعا من حيث الشكل و الموتور القوى و الاوبشن بس فعلا مش معمره و يمكن يكون الموديل السابق معمر عن النيو سيراتو
دى وجهة نظر مش أكتر
شكرا للجميع

اللى يدقق فى خامات العربيه السيراتو وكمان قعدتها حيلاقى انها مش حاتفرق حاجه خالص عن الريو اللى هى بسعر ااقل وكمان فعلا انا لما شفت الخامات الداخليه حسيت وده احساس انى قاعد جوه عربيه صينى ومحدش يزعل منى زى ما قلت حرية الراى مكفوله للجميع واخيرا الكورى ما يستاهلش يندفع فيه اكتر من ميت الف جنيه

عزيزى احمد
اولا اشكرك على تقريرك عن الكيا لانه بجد خلاصه ويدل انك فعلا فاه فى العربيات بس ممكن اسالك انت احتياجاتك ايه فى العربيه اللى انت عاوزها وثانيا ميزانيتك كام وهل انت اسره ولا شاب يعنى سوف احتياجاتك ايه وميزانيتك وبعد كده اختار وانا عن نفسى حاقولك التويوتا بجميع فئاته بس بلاش الم ام تى خلليك فى الاتوماتيك او اليدوى بجد لو تعاملت مع التويوتا بجد حاتحس انك مرفه وكمان عربيات معمره وغير كده سعر البيع ثابت وعالى على العموم ربنا يوفقك ويهديك للى فيه الخير ليك ان شاء الله

المشاركة الأصلية كتبت بواسطة ghost2

بصراحة يا جماعة بعد تقليبة كده في جوجل واستعادة لذكريات جولة الامس في معارض السيارات الكبرى .. انا مش متقبل شكل التيدا تماما ... بدأت ارجع للهوندا تاني .. واستحمل التوكيل
وربنا يستر

ياجماعه احنا قعدنا نطلع عيب العربيه فى 6 صفحات طب النتيجه ايه

مدناش بدايل للناس تمشى على اساسها وتكون بدايل فعلا تستاهل التغير الفكرى لكن انا شايف البدايل عاديه جدا ومش البديل القوى اللى يخلينى اغير يعنى مثلا الكروز ماهى كورى ومش هتفرق يعنى الفرق الشاسع عن السيراتو والالنترا كذلك كله من منشا وفكر صناعى واحد ده غير ان هيونداى صاحبة كيا اصلا فده لوحده حوار وشغل تسويق

لكن نرجع بقا للواقع ان مصر هنا ليها مقايسس خاصه فى كل حاجه سعر العربيه مثلا والعربيه اللى تناسب الطرق بتاعتنا وهل توكيلها محترم ولالا وهل قططع غيارها متوفره واسعارها ايه كل ده يفرق معانا

فنيجى للسيراتو ونشوف بتتوافق مع كام طلب من طلبات السوق المصرى

اول حاجه توكيل محترم
قطع غيار كورى مش غاليه مقارنه باليبانى ومتوفره
عربيه عاليه وثباتها حلو على الطريق يعنى مطبات وجرى كويسه
موتورها كويس جدا ومعمر
امام كل ده خامات التابلوه ردئيه وليست بالسيئه والكونصل شكله متوسط مش شيك اوى وسعرها فعلا عالى شويه على قيمتها

ده تقيمى المتواضع للموضوع كله ومفيش عربيه نازله من السما اى شيىء فى الدنيا فيه عيوب وفيه مميزات ولكن الصح ان المميزات ترجح كفة الميزان ويكون فى الاخر المستهلك هو اللى مرتاح لان لو جبت بوجاتى حتى هتلاقى ناس بتعيب عليها فى الشكل والاداء وكل حاجه

فلولا اختلاف الازواق لبارت السلع

والكمال لله وحده وكل سنه وانتم طيبين معلش طولت عليكم

ومتنسوش انا لحد دلوقتى محتار لسه واخرى فى الميزانيه 120 الف

يا جماعه اي واحد بهين عربيته بتهينه مهما كانت ... وفي مصر محدش بيقول علي عربيه حلوه ابدا لازم نطلع في كل حاجه 1000 عيب ..لو عملوها فولازيه يقولك بس شكلها وحش و مفهاش اوبشنز و لو عملوها باوبشنز رهيبه علي حساب بعض الخامات بردو بنعترض ..انا شايف ان كل واحد يشوف هو عايز ايه بالظبط من العربيه اللي هايجبها ..و الخبطات والحوادث دي ربنا ميجبها بس معلش يعني مفيش عربيه جديده بتتخبط و مبتتفرتكش و حاليا في مصرنا المحروسه لا جديده ولا قديمه .. بس انا مش شايف الفرق الرهيب في الصاج بينها و بين منافسيها باستثناء الاكصدام الامامي عامل زي العجينه فعلا بس لما بتدوس عليه بيدخل و يرد تاني مش بيتكسر و يفتح من الجنبين ودا مفيد في الخبطات البسيطه ..لكن اصل انت مش هتلاقي دبابه تركبها يعني و بردوا كل واحد علي اد فلوسه. يعني لما فكرت في العربيه .لقتها مناسبه لامكنياتي موتور كويس ثبات كويس اوبشنز ممتازه شكل جميل توكيل محترم كوري يعني قطع غيار متوفره و مش غاليه اوي . و تصونها هتصونك موضوع العمار دا بقا متقنعنيش ان ال 128 و ال127 افضل من النيو سيراتو و اهم مخليليين من 40 سنه و اصلا مش هنضحك علي بعض محدش بيجيب عربيه و بيقعد بيها اكتر من 6 سنين و بعدين بيبعها و معتقدش ان 6 سنين دا كتير لان عندك الاكسنت و اللانوس اهم اردء منها بمراحل و كوري بردو ايام مكان الكوري زي الصيني و لسه ماشيين..والباقي ربنا هو الحافظ ..بس نصيحه بقا بلاش السيتي .شوف التيدا حتي لو شكلها مش عاجبك

ويا جماعه متنسوش ان كيا ليها موديلات لسه معمره فى مصر وكانت جامده اوى زى الكيا شوما

انظرو لهذا الوجه الملائكى لعله يرقق قلوبكم وتحبوها

أنا معايا نيو سيراتو وكيل و عاملة 15000 كيلو أول فئة أوتوماتيك, أول دفعة نزلت من الوكيل و مش شايف العيوب دى كلها

1- العربية فى خاماتها ميفرقش عن الالنترا مش رديئة بالصورة دى يعنى
2- صاج العربية اللى يحكم فيه اختبارات الامان مش نحكم لما بندوس بيدخل ولا لأ
3- عافشة العربية اللى بيتقال عليها ناشفة زيها زى الهوندا رياضية و دة طبيعى
4- السخونة اللى الناس بتتكلم عليها فى الكونسول انا عرفتها من المنتدى مع انى معايا العربية, يعنى مش ملحوظة اصلا

المشكلة ان اللى بينتقض بيكون اصلا بيدور على عربية فبيكون متحفز للعيوب عشان ميشتريش و يندم لكن فى مميزات كتير مش بيشوفها الا اللى عندو العربية و سايقها

1- العربية بجد سواقتها متعة و مش هيعرف دة الا اللى ساقها
2- موتور العربية ما شاء الله ممتاز
3- العربية ثابتة جدا على السرعات العالية (180 ك طريق مصر-اسكندرية)
4- العربية واسعة جدا من جوا (أقل من التيدا و اوسع من السيفيك بمراحل)
5- الشنطة واسعة جدا
6- العربية بجد ممتازة فى الملفات بجد بتديك ثقة غير عادية لازم تجربوها
7- كماليات اكتر بكتير من اى عربية فى نفس الثمن و من اللى اعلى كمان
8- شكل شبابى و ملفت للنظر
9- توكيل اكثر من ممتاز

كل ده و العربية وحشة او اتخدعت فيها طب ازاى!!

يا جماعة انا مش بدافع عن العربية عشان معايا و خلاص, انا حاجز واحدة تانية sx من 3 شهور, ولو انا بدافع و خلاص مكونتش حجزت واحدة كمان أو حتى كنت سحبت فلوسى و كفاية عربية واحدة, بجد نيو سيراتو عربية ممتازة و صفقة رابحة بكل المقايس و اسأل مجرب