الموضوع: ثاني حادثة بالنيو اكسنت (قدر الله وماشاء فعل) برده

اخر الاخبار دلوقتي ياجماعة
انا كنت ناوية اوديها التوكيل في ابو رواش لكن يوم الجمعة مساءاً إتصلت بالمهندس عاطف عبد السميع مدير مركز خدمة العملاء والعضو معانا هنا في المنتدي.
وبصراحة هو شخص محترم جدا وذوق جدا جدا واهتم بمشكلتي وطبعا قلتله اني رايحة اعمل صيانة الالف كمان فنصحني اني اروح توكيل قليوب افضل عشان اقربلي قاللي روحي الاول هياكل قليوب عشان المهندس يعاين ويعمل مقايسة وبعدين اقوله ان الاصلاح يتم بعد العيد وبعدين اطلع علي ميكانيكا قليوب اعمل الصيانة هناك ووصي عليا مهندس الصيانة وبجد الناس هناك اهتموا بالموضوع فعلا.
وانا من هنا بشكره على اهتمامه وذوقه وسعة صدره وبعتذرله لو كنت سببتله اي ازعاج.

بس فأنا يوم السبت رحت طلعت على قليوب عديت علي الهياكل وكلمت المهندس عاطف من هناك وكلم مهندس الاستقبال اللي عاين العربية قالله ان فيها شغل كتير ومش هالحق اخلصها قبل العيد فقالله طب خلاص سيبها تروح بيها وتبقي تجيبهالك بعد العيد للإصلاح.
المهندس عمل معاينة شفاهية كدة وقاللي هاتتكلف تقريبا 7000 جنيه
لإنه هايعمل الآتي:

1- تغيير رفرف امامي يمين "في حدود 600-700 جنيه"
2- تغيير كارتيرة تراب (اللي هي فوق العجلة الأمامية اليمين وتحت الرفرف الامامي يمين) "في حدود 200 جنيه"
3- تغيير فانوس امامي يمين (رغم ان الوش بس هو اللي اتكسر وباقي الفانوس سليم) لكن الفانوس عندهم بيتباع كله على بعضه "في حدود 1100 جنيه"
4- احتمال كبير يغير الباب الخلفي يمين لو السمكرة مجابتش نتيجة لإن الخبطة جت في عضم الباب من تحت " في حدود 1700 جنيه"
5- كان بيفكر يغير رفرف خلفي لإن برده الخبطة جت في عضم الرفرف من تحت لكني عرفت انه عشان يغيره هايقص ويقطع لإن الرفرف الخلفي مرتبط بالقايم وبالعربية كلها وده طبعا هايعيب العربية بعد كدة للأبد وهاتتحسب عليا انها مغيره ربع، لكني قلتله حاول تسمكره ولو ماعرفتش سيبه لكن متغيروش عشان ميأثرش علي العربية فيما بعد (لو هايغير هايكون في حدود 2300 جنيه) لو سمكرة هاتضاف مع سمكرة ودهان بقي.
6- تطبيقة في الرفرف الشمال (اللي هي بتاعة الراجل االولاني بتاع ال BMW ، المهندس قاللي سمكرة ودهان
7- الاكصدامين فيهم شوية خدوش وتطبيقة بسيطة في الاكصدام الامامي قالي هاضيفهم هما كمان.
تقريبا سمكرة ودهانات "في حدود 2500 جنيه"
يعني من الاخر العربية اتشلفطت وهايتغيرلها حاجات وهايترشلها حاجات كتير وهاتتكلف مبلغ وقدره كل ده وهي لسة يدوب 1500 كيلو .

المهم المهندس قاللي مش هاقدر اطلعلك مقايسة الا لو دفعتيلي 250 جنيه مقدم اصلاح او نتحفظ علي العربية، قلتله انا هاجي بعد العيد اصلحها وخلاص.
لما كلمت شركة التأمين قاللي لازم مقايسة عشان ميكونش في فرق بين تاريخ المحضر والمقايسة عشان الشركة تغطي الاصلاح.
اضطريت اروح تاني يوم قليوب عشان ادفع 250 جنيه ويطلعلي مقايسة، لكني فوجئت بمدير مهندس الاستقبال بيقوللي مش هاينفع تستلمي مقايسة الا لما تسيبي العربية قلتله طب مانا هادفع تمن المقايسة ، قاللي لو العربية خرجت بره بعد ماعملك المقايسة هاتكتبي اقرار انك استلمتيها علي مسئوليتك ولو لاقدر الله وجرالها اي حاجة شركة التأمين مش هاتغطي الحادث لإن العربية تعتبر في حيازة التوكيل طالما في مقايسة اصلاح طلعت من عندي.
المهم قلتله طب خلاص اسيبها وامري لله بس هاتاخد وقت في الاصلاح قاللي اوعدك اني اخلصها بدري علي قدر ماقدر، هو قال بعد اسبوع لكني مش عايزة اكون متفائلة زيادة عن اللزوم لإن شكلها كدة هاتاخد وقت اطول بكتير عشان فيها شغل كتير وهما عندهم تسليمات كتير كمان بس المهندس عاطف وعدني انه هايوصيهم عليا يمكن يقدروا يخلصوها بدري.
بس فسيبتلهم العربية وعشان مكنتش عاملة حسابي ومش مفضياها شالولي الحاجات اللي فيها وحطوها في الامانات عندهم وابقي استلمها مع العربية لما تتصلح بإذن الله.
واخدت المقايسة وروحت وبعتها لشركة التأمين علي الفاكس امبارح معاها صورة المحضر وصور الرخص وقالولي ان مهندس التأمين المفروض يروح النهاردة يعمل معاينة في التوكيل.
اديني في انتظار النتيجة بقي لما نشوف هاترسي علي ايه
وطبعا اكتر ازمة انا فيها دلوقتي اني رجعت اركب مواصلات تاني وفي رمضان المواصلات والتاكسيات حالها لايُرثى لها.
دلوقتي عايزة رأيكم في الاصلاحات اللي هاتم دي؟
وكمان ياجماعة عايزة اعرف من خلال شرحي للحادثة مين فينا اللي غلطان فعلا من الناحية القانونية؟
وايه الموقف القانوني للغلطان فينا من الناحية القانونية برده؟
واسفة على التأخير في الردود عشان كنت في الحوارات ب دي بقالي كام يوم .
ومتشكرة جدا لكل من اهتم بموضوعي وبعتلي رد ولو مواساة او دعاء وربنا يكرمكم جميعاً.

المشاركة الأصلية كتبت بواسطة zalabany2007

لاحول ولا قوة إلا بالله ربنا يعوض عليكي في البلد اللي احنا عايشين فيها دي اللي ما حد فيها بياخد حق ولا باطل

عند حضرتك حق فعلا انا بعد اللي شوفته بقيت ادعي ان ربنا يخرجنا من البلد علي خير النهاردة قبل بكرة لإني خلاص زهقت وقرفت ومبقتش طايقاها خلاص.

المشاركة الأصلية كتبت بواسطة Marwanelbendary

أنا اسف يا جماعة بيتهيألي كككدددههههه واله أعلم اني حذفت مشاركاتي معاكم...
على العموم أنا اسف...

وعموما يا رنا انتي تشرفي اللقاء و ان شاء الله هانكرره كتير ويبقى بصفة دورية و يبقى فيه نشاطات خاصة برواد الملتقى.

وان شاء الله عربيتك تخلص وكلها أيام وبتعدي و ماتزعليش نفسك وهي دي الدنيا يوم عسل و يوم بصل وأنا شخصيا خادت واحد بصل محترم لما كانت الأكسنتاية بتاعتي عاملة 3000 كيلومتر

مشاركات ايه اللي اتحذفت؟
مشاركات هنا في موضوعي يعني ولا في موضوع تاني؟
عموما حصل خير وميرسي جدا على اهتمامك يابشمهندس ومعلش على اليوم البصل بتاع الاكسنت بتاعتك برده كلنا لها .
ان شاء الله لما اصلح عربيتي ابقي اتابع لقائاتكوا وابقي احاول احضر معاكوا (بس ياريت يكون في بنات غيري معاهم نيو اكسنت يكونوا هايحضروا برده اهم يونسوني يعني )
وبجد انا بشكرك على مجهودك في المنتدي خصوصا ان قسم هيونداي مالهوش انشطة بصراحة ومالهمش لقائات زي باقي الاقسام فكويس جدا ان حضرتك عملت الموضوع ده عشان يجتمعوا فيه ونستفيد كلنا.
وميرسي مرة تانية لاهتمام حضرتك بموضوعي.

دي صورة للخبطة اللي في الرفرف الخلفي اللي المهندس كان عايز يغيره







هل دي فعلا تنفع تتسمكر ولا لازم يتغير فعلا.

بتوع الشرطه دول مفسدون في الارض

قدر الله ماشاء فعل و جاجه فعلا تنرفز جدا جدا ..الله يكون فى عونك
الحمد لله ان الموضوع ده حصل و انت مأمنه ..و الخسائر مش انت اللى هتدفعيها
السؤال انت اللى هتدفعى الاول ثمن الاصلاحات دى ... و بعدين التامين هو اللى هيدفعلك ...ولا التأمين هيتعامل مباشرا مع التوكيل فى الفلوس