الموضوع: ثاني حادثة بالنيو اكسنت (قدر الله وماشاء فعل) برده

اليوم انقل لكم اليوم احداث الحادثة الثانية للعربية النيو اكسنت اللي حيلتي
امبارح روحت شغلي في امان الله وبعدين استأذنت حوالي الساعة 11:30 عشان اروح البنك ادفع قسط العربية في روكسي يادوب طلعت شارعين بعد الشغل وبعدي تقاطع زي ماهو موضح في الرسمة المرفقة

عشان التوضيح بس عربيتي المربع اللي لونه نبيتي عربية الراجل اللي خطبني لونها اخضر والعربية اللي لونها ازرق ده لوري راكن جنب الرصيف والفاصل الملون اللي بين الشوارع ده جزيرة وسطي
المهم بعد ماعديت الصينية الصغيرة (اللي لونها اسود) وكنت مهدية جدا لإن كان في عربية قاطعة الطريق من شمالي واستنيتها تعدي وبعدين اتحركت ولمحت الراجل اللي في الشارع اللي جاي علي يميني مهدي وبيعدي المطب بس مش باصص قدامه خالص وكان باصص علي الشمال فتوقعت انها هايشوفني ويهدي ويستناني اعدي خصوصا اني اتحركت ببطء وكنت خلاص عديت نص الطريق وخلاص داخلة الشارع اللي في وشي وإذ فجأة اسمع صوت خبطة تقيل وتكسير ولاقيت عربيتي اتنطرت وراحت خابطة في اكصدام حديد بتاع عربية لوري بتبيع خضار كانت راكنة جنب الرصيف عموما الشكل كله واضح في الرسمة.

نزلت لاقيت الفانوس الامامي يمين عندي متدغدغ والرفرف الأمامي متشلفط على الأخر وده من خبطة الراجل صاحب العربية ال BMW (مش عارفة ليه حظي كدة مع البي ام بالذات) ولاقيت في الجنب اللي ورا الرفرف (او الحتة اللي فوق العجل منه) معووجة ومتكحتة وجزء من الباب من تحت برده معووج ومتكحت ودول كانوا من اثر نطرة العربية وخبطتها في اللوري اللي راكن .
ده غير ان الباب اللي جنب السواق مش بيفتح عشان الرفرف قافل عليه .
هو بقي خسايره علي حسب ماسمعت لإنه ركن بعيد ونزل يتفاهم معايا النمر عنده اتكسرت وتقريبا في اعوجاج بسيط في الشبكة الامامية عنده .
البيه نزل وانا نزلت وببصله بذهول ومش مصدقة اللي عمله ده الاقيه يقوللي أولا انا العميد فلان وبصي انتي اللي غلطانة ده طريقي انا وانتي اللي خبطتيني وده شغلي وانا عارف بقول ايه واحمدي ربنا انتي خسايرك اقل من خسايري.
قلتله غلطانة ايه أولا ده تقاطع يعني لاطريقك ولا طريقي وثانيا انت مش باصص قدامك اصلا وخطبتني وبهدتلي عربيتي وتقولي خسايري اقل .
المهم كان في عسكري واقف قال نتصل بالشرطة قولتله اتصل (طبعا قبلها حاولت اقوله يصلح خبطته دي لكنه رفض وكان عايز يحملني حق خبطته كمان) اتصلت بناس عندي من الشركة عشان يكون معايا حد ومبقاش لوحدي.
المهم اتصلنا بالدورية وعلي ماجه امين الشرطة فضلنا بتاع نص ساعة واقفين واحد نزل من العمارة سلم على العقيد ده وقعد يقولي انتي اللي غلطانة (مع انه مشافش الموقف وبإعترافه انه نزل علي صوت الخبطة بس نازل يجامل جاره على حسابي انا) والاقيه يقوله هي ماشية بسرعة قلتله اتقي الله امشي بسرعة ايه دانا كنت مهدية عشان اعدي عربية من الحارة اللي قبليه امشي ازاي بسرعة في مكان زي ده اصلا حرام عليك هو اللي مكنش مركز ومش باصص قدامه والناس طبعا المطيباتية يقولولي بسيطة قلتلهم بقولكوا ايه محدش يقوللي بسيطة طالما مش هايدفع اللي بيقول بسيطة يتفضل يدفع حق تصليحها وجه امين الشرطة وطبعا عرفه بنفسه انه العميد فلان والامين عاين مكان الحادثة وعاين تلفياتي وتلفياته والراجل من بجاحته يقوللي انا هارجع عليكي وعلي شركة التأمين عشان تصلحولي عربيتي والمحضر هايطلعك انتي الغلطانة المهم خلصنا بعدين طلعنا على القسم عشان نكمل المحضر الضابط لما ادي رخصي ورخص الراجل اللي خبطني للعسكر عشان يعمل محضر العسكري اول مابص فيهم وشاف الوظيفة عقيد قاله ياباشا راح الضابط قاطعه وقالله واحنا مالنا ومال وظيفته اعمل محضر وخد اقوالهم هما الاتنين.
وروحت معاه واخدوا اقوالي المهم في النص جه عسكري تاني نده للي بيكتب المحضر وقالله بخصوص المحضر بتاع العقيد فلان هات المحضر واطلع لرئيس المباحث ولا معرفش فلان بيه فوق عشان عايزك.
لما نزل لاقيته بيقوللي انتي كلمتي حد قلتله بإستغراب لأ ليه؟ قاللي ابدا اصل فلان بيه بيوصيني اخلصلك المحضر بتاعك وامشيكي على طول ومأخركيش يعني شكلك متوصي عليكي قلتله انا مكلمتش حد بس معايا ربنا هو احسن من اي حد.
المهم خلص اقوالي ومضاني عليها واداني رقم المحضر قلته طب عايزة صورة المحضر قاللي الطرف التاني لسة مجاش لما ناخد اقواله تعالي بعد ساعة يكون وصل وناخد اقواله وتاخد صورة من المحضر قلتله طب قدر مجاش قاللي لازم ييجي رخصه هنا قلتله ياسيدي ده عقيد يعني ممكن يمشي من غير رخص اصلا. قاللي بس تعالي بعد ساعة بس وهاخلصلك كل حاجة.
رجعت شغلي وطبعا مديري عرف وكلمني عشان يطمئن عليا وشاف العربية وقاللي متقلقيش ان شاء الله بسيطة والتأمين يصلحها بس رحس خدي صورة من المحضر ومش مهم اقوال الطرف التاني طالما تأمينك بيغطي اخطائك واخطاء الغير.
وفعلا روحت ولاقيت المحضر جاهز بأقوال الطرف التاني اخدته وروحت اصوره لاقيت الراجل كاتب كلام يلبسني في الحيط واني كنت ماشية بسرعة وبدون الالتفات لحركة الطريق ودليل سرعتي ان نور الفرامل لم يضئ (معرفش جابها منين دي) وان انا اللي خبطته وان تلفياته تقدر بحوالي 2500 جنيه وانه متمسك بجميع حقوقه القانونية تجاهي. طبعا اتجننت لما شوفت الكلام ده وروحت طلبت اضيف اقوال للمحضر ونفيت انيموضوع السرعة وقلت اني كنت لسة علي الغيار الأول وان هو مكنش باصص قد=امه ونزل من المطب واخد سرعته ودخل في عربيتي وان تلفياتي تقدر بأكتر من 5000 جنيه العسكري قاللي نخليهم 8 قلتله ماشي 8000 جنيه واني برده متمسكة بجميع حقوقي القانونية تجاهه.
واخدت صورة المحضر وكلمت شركة التأمين ويم السبت ان شاء الله رايحة اعمل صيانة الألف واشوف موضوع الحادثة بقي والمقايسة والحوارات دي.
وادي صور عربيتي بعد ماتشلفطت .
دي الخبطة الامامية

ودي الخبطة الخلفية بتاع اللوري

انا بجد تعبت وقرفت ومبقتش عارفة اعمل ايه من اسلوب الناس وكدبهم واذيتهم لعربيتي .
انا اتعقدت من العربية لدرجة اني قلت لو مكانتش تقسيط كنت بعتها وخلصت من وجع القلب ده .
عموما قولولي بقي توصياتكم بخصوص الحادثة دي وياتري هاتكلف في حدود كام وإيه اللي هايتغير وايه اللي هايتسمكر ويتصلح.