الموضوع: رابطة مالكي السويفت

المشاركة الأصلية كتبت بواسطة sewefy

السلام عليكم عندى مشكله مضيقانى حبتين كل ما اروح مشوار القى الميه فى الريداتير بتقل بعد كل مشوار وكل يوم الصبح ابص تحت العربيه ملقاش ميه جايه نفسى اعرف الميه دى بتنقص ليه مع انى غيرت الغطا بتاعها كتير ومفيش نتيجه

المشاركة الأصلية كتبت بواسطة ahmed76

بص يا باشا كويس على الفواصل اللى عند حواف الرادياتير من فوق لو لقيت اثار صدأ ( او لون اصفر حوالين الرادياتير من فوق ) غالبا هتحتاج تغير القطعه الفيبر اللى راكب عليها الغطاء

لان التسريب بيبقى لفوق علشان كده مش هتلاقى مياه تحت العربيه

وهى بتركب (عاشق ومعشوق ) مش لحام لان الرادياتير فيبر مش نحاس

وعلشان تتأكد دور العربيه وسيبها تسخن لغايه المروحه اما تدور وبص على نفس المكان هل فيه مياه بتسرب ولا لا

بس لازم طبعا بتاع الرادياتير يأكد لك الكلام ده

كلام جميــــل و ميه ميه
عاوزك تراجع المشاركة رقم 132
كما أرجو ملاحظة انك تراجع عالترموستات اذا كان راكب وانصحك بشدة انك تشيله لأن كده كده الردياتير 2 ماسورة وصغير فكفاءته مش عاليه بحيث انه يتلج العربية
وكذلك تجيب خرطوم ميه سريع وتغسل بيه الردياتير اذ ربما يكون الريش بتاعه مسدودة بتراب
أي حاجة تسد دورة الميه او تحوش التبريد تخلي الميه تسخن وتتبخر
مش شرط يكون فيه تسريب

المشاركة الأصلية كتبت بواسطة exact

يارجالة أنا العربية سخنت امبارح
وديتها للدكتور
كشف عليها ولقينا فيه حصوه فالردياتير

آه والله...لقينا الردياتير مليان زلط ورواسب كلسية من الميه القذرة

على اني حاطط ميه خضرا من اللي المفروض انها بتدوب الصدا
ومفيش ولا ماسورة سالكة

كنت راجع من القاهرة وجيت عند أجا كده لقيت المكيف الله اجعله خير ولا الديب فريزر على غير العادة مع ان الجو نااااااااااااار
لدرجة اني من كتر البرودة قلت افتح الشباك
اسمع المكنه بتكركر كان فيها بنزين 70
مع اني كنت ماشي على 90 ومديها الرابع
رحت راكن على جنب وقبل ما اقف اجاركم الله من اللي حصل
الاقي العربية بتطلع دخان من كل مكان ومش قادر المس الكبوت
فتحت الكبوت بالعافية ولقيت كل شئ في حوض الموتور بلا استثاء بيدخن
مع ان عداد الحرارة ثااااااااااااااااابت فالنص

والقربة ناشفة حجر وبتدخن جامد جدا
قعدت ييجي ساعة جنبها
رفعت مقاس الزيت لقيته سليم ولله الحمد بس الزيت طبعا اتحرق وطاروا ال 230 جنيه بتوع الموبيل وان

جبت القمع وفتحت الردياتير ودورت العربية ولسه باحط المية لقيت صاروخ ميه سخنة كان هيطير عيني لولا ستر ربنا والحمد لله على النضارة
استنيت شويتين وبعدين زودت واحدة واحدة لحد اما شبعت

الغريب حكاية عداد الحرارة مع انه بيتجاوب مع السرعة وكانت العربية سخنت قبل كده من فترة وكان بطلع وينزل

المهم انا باوجه من هنا رساله لكل واحد بيسافر...ركز مع الردياتير جامد جامد جامد

[justify]
بمناسبة الكلام عن الموضوع ده أنا حصل معايا موقف من يومين أحب انقله لكم علشان الكل يستفيد

كنت راكن العربية لمدة 17 يوم نظرا لظروف سفر ، وبعدين لما رجعت ، وقبل ما أدور العربية بصيت على الزيت والمياه
طبعا منسوب الميه فى القربة لقيته مش ناقص كتير وده خلانى مفتحتش غطاء الرادياتير

المهم وأثناء مشوار - فى عز الظهر - ركنت العربية لمدة دقيقة واحدة - وكانت دايرة - علشان اشترى حاجة .. ولما رجعت ولسه هطلع لقيت مؤشر الحرارة داخل على المنطقة البيضاء
بطلت على طول ونزلت فتحت الكبوت ، حسيت ان الموتور هيولع من السخونية
استنيت دقيقتين ودورت تانى وبصيت على المروحة لقيتها شغالة ومفيش تسريب مياه تحت العربية ولا حاجة والقربة فيها مياه زى ما هيه .. طيب فيه ايه ؟؟
بطلت العربية تانى وعملت حركة غبية أوى .. قلت أبص على الميه فى الردياتير .. طبعا أنا عارف انها هتبقى مولعة وهتفور بس قال ايه أنا كنت متخيل ان لما افتح غطاء الرادياتير بشويش خالص مش هيحصل حاجة وممكن اتحكم فى فوران المياه !!

وابتديت افتح غطاء الردياتير بشويش لغاية ربع اللفة الأولى وبمجرد ضغطت على الغطاء وبكمل فتح لقيته بيقولى عنك انت شكلك مش عارف تفتح .. ولقيت نافورة ميه مولعة اندفعت من فوهة الردياتير .. الحمد لله ربنا نجانى انى نطيت بعيد عن العربية فكانت الخسائر ان ايدى اتحرقت وفضلت تؤلمنى طول اليوم
طبعا لما النافورة اللى غرقت العربية بطلت .. قربت ووقفت محتار مش عارف اتصرف ازاى

للأسف كنت مستعجل فرحت مدور العربية تانى علشان ازود مياه - كنت متخيل المياه اللى هزودها حاجة بسيطة - لقيت العربية خدت 3 ونصف لتر مياه !!
طبعا زعلت وكنت خايف ده يأثر على وش السلندر
وبعد كدة كملت مشوارى والحرارة كانت طبيعية
[/justify]

الاجراءات اللى ناوى اعملها :
- تغيير الزيت من باب الاحتياط - مع انه مكملش 800 كيلو
- تغيير غطاء الردياتير

الدروس المستفادة :
- متتخدعش بمستوى الميه فى القربة وخاصة لو العربية مركونة كام يوم وبص على مستوى المياه فى الردياتير
- اياك تفتح غطاء الردياتير والعربية ساخنة
- متزودش العربية مياه وهى سخنة وانتظر عليها شوية حتى ولو كنت مستعجل
- حاول تتجنب المشاوير الظهر بقدر الامكان رأفة بالعربية

الســـؤال :
- هل غطاء الردياتير مقامش بوظيفته بسحب مياه من القربة
- ازاى أتأكد ان محصلش مشاكل فى وش السلندر

المشاركة الأصلية كتبت بواسطة sewefy

متشكر اولى على الرد الوافى بس انا بدور العربيه واقف قدمها واستنى المروحه وبردو مش بلاقى ميه والحاجه الثانيه اعرف مينين ان طرمبة الميه هيه اللى مش شغاله مين اللى يفدنى بتاع ريداتير او ميكانيكى

طيب فى سؤالين :
- معدل نقص الميه قد ايه .. وهل بتنقص فى الردياتير بس ولا فى القربة كمان بنفس المعدل
- مؤشر الحرارة عندك بيكون ثابت على النص أو أزيد بقليل .. ولا بيزيد كتير

أما بالنسبة لطلمبة الميه لو مش شغالة أصلا هتلاقى الموتور سخن فى دقائق ودرجة الحرارة عدت المعدل المسموح

فانت ممكن توضح لنا اكتر بانك تدور العربية تسيبها دايرة ثلث ساعة أو اكتر وتبص على الاتى - من بداية الدوارة :
- مؤشر الحرارة شغال ازاى - يعنى بالاخص المروحة بتشتغل امتى وتبطل امتى وبتفضل شغالة قد ايه
- بالنسبة لخرطوم الميه العلوى شوفه بيبدأ يسخن بعد التدوير ولا بعدها بفترة بيسخن مرة واحدة
- وجود تسريب فى أى مكان فى دورة التبريد - راجع على الخراطيم وأماكن تربيط الخراطيم بالمحرك والرادياتير
- وجود تسريب من عند طلمبة الميه - يوجد فتحتين فى جسم الطلمبة قد يحدث تسريب منهما عند تلف الحشوة (الميكانيكل سيل) - الطلمبة موجودة على الناحية الشمال وانت واقف وجهك للعربية
- بص على طنبورة طلمبة الميه - فقد يحدث انزلاق للسير على الطنبورة - الطنبورة اللى فى النص بين الدينامو وكمبرسور التكييف
- الميه فى القربة نقصت ولا ثابتة - هيبان معاك اكتر بعد ما تبطل العربية وتستنى شوية لما تبرد
- بعد ما العربية تبرد تماما - استنى فترة كافية حتى لو ساعتين - افتح غطاء الدياتير وبص على الميه شوفها نقصت ولا ايه
- الميه اللى بتزودها عادية ولا مقطرة

وبكده نكون عرفنا أداء معظم أجزاء دايرة التبريد .. لما ترد علينا