نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[husseinoo]

اخوك جديد لنج فى موضوع السواقة
برغم انى معايا رخصة هههههههههههههههههه

المهم ... طبعا خايف من السواقة
يمكن دلوقتى عملية الخوف دى قلت كثيير

وانا من راى اهم حاجة تقلل الخوف ان اللى بعلمك يكون بيفهم
موش سواق وخلاص

يعنى انا مثلا
خرج معايا واحد صاحبى وكان فاهم كويس قوى اكثر من السواقيين اللى خرجوا معايا

واول نصيحة لى منه هى ...
رجلك على الفرامل واضغط دبرياش وانت بتعدى على اى تقاطع او اى يو تيرن او زحمة عربية
لو ظهر لك اى حاجة هاتضغط على الفرامل على طول

طبع فضلنا كثيير نتدرب على الموضوع ده
وزعق معايا كثيير ازاى تدخل على اى تقاطع ورجلك موش على الفرامل والدبرياج يكون جاهز وفاصل الحركة
عشان فى اى وقت وقفت انقل الغيار ببساطة والعربية ماتبطلش
ولو حصل وظهر لك اى شىء مفاجىء رجلك اساسا على الفرامل مافيش اى مشكلة هاتضغط عليها

لكن لو رجلك على البنزين مع الخوف هاتضغط على البنزين وتحصل مشكلة لا قدر الله

طبعا التدريب ازاى تتحكم فى سرعة العربية عن طريق الفرامل
تفضل تضغط عليها براحة لحد ما تاخد العربية السرعة المناسبة
مثلا اليو تيرن لازم اكون داخل براحة قوى
الملفات لازم اكون داخل عليها براحة قوى
التقاطعات لازم اكون مهدى العربية كويس
واى مكان فيه زحام متوقع

طبعا فى المنحنيات والتقاطعات لازم تدخل عليها اصلا بسرعة بسيطة
عشان لو ظهر لك اى حد بشكل مفاجىء او خطأ تلحق تقف ببساطة

دى اول نصيحة

النصيحة التالية
اى ملف لازم تكون هادىء جدا فى سرعتك وتكون داخل الملف فى حارتك "طبعا فى الغالب بجوار الرصيف"
واوعى تخرج من حارتك اللا بعد ما العربية ما تعدل نفسها
وقبل ما تدخل الملف لازم تبص على الناحيتين يمين وشمال

يعنى لو داخل يمين بص شمال بسرعة على العربيات اللى جاية
وارجع بص امام عربيتك
اوعى تنسى وتفضل باصص على العربيات اللى جاية من الشمال
لحد ما عربيتك تنزل نص الشارع

نفس الكلام لو داخل شمال

وطبعا والعربية بتلف تكون محضر الغيار المناسب عشان تمشى على طول وطبعا ما دام رجلك اصلا ضاغطة على الدبرياج هاتقدر تختار الغيار المناسب بسرعة وكده العربيات اللى خلفك موش هاتعمل لك "كلاكس" لانك ماشى كويس ومافيش اى عطلة

وطبعا لو بتلف فى حارتك بجوار الرصيف
حتى لو فيه حد جاى بعربيته وبيجرى هاتكون انت فى الامان قوى
ولو لا قدر الله كان فيه حد بيجرى فى نفس الحارة اللى هى بجوار الرصيف وده طبعا نادر هايلحق يلم نفسه ويبعد عنك
وفى الاول والآخر انت داخل صح بجوار الرصيف وملتزم بحارتك تماما ولا يوجد عليك اى خطأ
واوعى تنقل نفسك من الحارة اللى بجوار الرصيف فجأة دون النظر فى المرايات

اما لو كنت بتعمل يوتيرن
وكنت فى الحارة الخارجية وليست الحارة التى بجوار الرصيف
نفس الكلام لازم تفضل ملتزم بها
واوعى تخرج منها حتى بعد ما تلف بالعربية اليو تيرن
عشان ماترميش نفسك على اى عربية تانية



النصيحة التالية
الالتزام بالحارة التى تسير فيها
يعنى الحكومة عاملة خط بين كل حارة
اوعى تمشى على الخط
لان كده معناه انك شاغل حارتين
والعربيات عشان تعدى منك لازم تعملك "كالكس" وتسبب لك ازعاج
عشان كده لازم تمشى داخل حارتك تماما وليس على الخط الموجود بين الحارتين

كده اللى عايز يعدى هايعدى بدون مشاكل وعمره ما هايضايق منك حتى ولو كنت ماشى بطىء

النصيحة التالية
لو كنت فى شارع سريع مثلا "شارع المطار"
وانت فى طريقك الى المطار
طبعا صعب انك تمشى فى وسط الشارع وانت بطىء
خصوصا انه معروف ان الشارع ده بتاع جرى
يبقى الافضل انك تمشى فى اليمين

النصيحة التالية
لو حصل وظهر لك مطب
اوعى تغير مسار عربيتك الى حارة تانية
الافضل تاخد المطب وامرك لله
احسن ما تغير مسار العربية فجأة الى حارة تانية وتسبب خطر لك وللآخرين
كل العربيات بتاخد مطبات مافيش مشاكل
لكن الخطر انك تخبط عربية تانية
طبعا ممكن تغير مسار عربيتك من حارة الى حارة بعد النظر فى المرايات والتأكد من خلو الطريق والانتقال يكون تدريبجى "سنة سنة" وبراحة قوى ولو فيه اشارة يبقى هايل
عشان اللى جاى وراك ياخد باله

ولو ظهر لك حد ماشى على رجليه امامك
انا من وجهة نظرى الافضل تهدى سرعتك حتى لو لزم الامر انك تقف تماما بالسيارة
افضل من انك تغير حارتك وتسبب مشاكل للآخرين
خصوصا لو عديت امام المشاة ممكن يجرى امامك بدل ما يتوقف وساعتها تحصل مشكلة كبيرة لا قدر الله



النصيحة التالية
لو حصل وكنت عايزة تقف مرة واحدة او هاتنقل نفسك من حارة الى حارة او هاتلف فى يو تيرن
لازم تنظرفى المراية كويس وتشوف مين اللى جاي وراك او بجوارك ... ودى اصعب حاجة "موضوع استعمال المرايات"
خصوصا ان المرايات فيها نقاط عمياء لا تظهر فيها السيارة الموجودة بجوار الباب الخلفى
ولما تنقل نفسك من حارة الى حارة تفاجئى بأن فيه عربية بجوار الباب الخلفى وانت موش شايفاها
معلهش دى بالممارسة والتدريب الجيد جدا جدا لازم تراعى الموضوع ده لانه بيحصل منه مشاكل كثيير

النصيحة التالية
لو مشيت لوحدك بالعربية طبعا يفضل يكون يوم الجمعة مثلا قبل الصلاة الساعة 8 صباحا
امشى ساعة ولا ساعتين مافيش مشاكل عشان تاخدى الثقة

النصيحة التالية
لو حبيتى تركن عربيتك
اركن فى مكان واسع فى الاول
لحد ما تتعلم الركنة كويس
ما تحاولش تركن فى مكان ضيق وانت لسه بتتعلم عشان ماتخبطيش عربيتك وعربيات الناس التانية

فى البداية موش مطلوب انك تجرى بالعربية
كفاية انك تمشى بها حوالى 60 كيلوا
لحد ما تتعود على المشى كويس
وتنقل الغيارات بسهولة
وتقدر تقف لو ظهر اى حاجة مفاجأة
السرعة مطلوبة فى نقل الغيار المناسب وليس الجرى بسرعة
السرعة مطلوبة فى اختيار المكان المناسب للسير عشان مااعطلش باقى السيارات

والنصيحة التالية
لازم يكون بينك وبين السيارة التى امامك مسافة
لازم تحافظ على المسافة دى


والنصيحة التالية
لو ماشى فى طريق طوالى
ممكن ترفع رجلك عن البنزين
عشان السرعة تخف
دون الحاجة الى الضغط على الفرامل

الفرامل فقط فى التقاطعات
والزحام
واليو تيرن
رجلك لازم تكون عليها ومستعدة
والتوقف لا يكون مفاجىء بل تدريجى
بعد التدريب هاقدر تعرف قوة فرامل عربيتك وتحس بها

واخيرا اوعى تمشى فى اماكن زحمة عشان ثقتك فى نفسك ما تتهزش
امشى مع اى حد راكب معاك فى اماكن خالية وخليه يعلمك
وتدريجى اختر اماكن زحمة تدريجيا
وفى اوقات مختلفة

النصيحة التالية
لو هاتعدى مطب صناعى
لازم تكون ضاغط على الدبرياش والفرامل
وعن طريق الفرامل تتحكم فى سرعة العربية
واول ما عجل العربية الامامى يكون فوق المطب وهايبدأ ينزل
تكون اخترت الغيار المناسب "الغيار الاول او الغيار الثانى" حسب سرعة العربية
وطبعا ما دمت انت دايس على الدبرياج اساسا
خلاص هاتختار الغيار المناسب وهاتمشى على طول
لدرجة ان العربيات اللى خلف موش هاتحس انك مبتدأ
لازم تتدرب على الموضوع ده كثيير وتختار شارع يكون فيه مطب صناعى

النصيحة التالية
احترس من اى سيارة بتركن
او خارجة من جراج
او بتفتح الباب
احترس من الاطفال وتحركهم المفاجىء
احترس من سيارات الاجرة والميكروباس لان تقفهم مفاجىء ومتكرر وفى اى مكان بدون تحذير

فى البداية فى ناس تفضل انك تمشى فى جهة اليسار بجوار الرصيف
واللى عايز يجرى يجرى
خصوصا ان كل تركيزك هايكون فى اللى جنبك من الجهة اليمنى فقط
طبعا الكلام ده ينفع فى الطريق الداخلى
لكن لو كان الطريق سريع يبقى خطأ انك تمشى شمال وانت سرعتك بطيئة جدا "خطر جدا"

ولو عرفت اى حاجة جديدة هاقولك ان شاء الله

مع اطيب التمنيات
اخوكم حسين غزالة

[midomizo]

زيادة كمان
الملفات الشمال كلها فى مصر خدها على الواسع والملفات اليمين خدها على الضيق
عشان لو اخدت ملف شمال على الضيق ممكن تقابل حد فى وشك لا قدر الله
اتمنى تكون فاهمنى

[ahmdmagdy]

زيادة كمان
الملفات الشمال كلها فى مصر خدها على الواسع والملفات اليمين خدها على الضيق
عشان لو اخدت ملف شمال على الضيق ممكن تقابل حد فى وشك لا قدر الله
اتمنى تكون فاهمنى

مظبوط عشان لما تاخد الملف الشمال ع الواسع بتكون ف جهة اليمين و ده سليم و العكس صحيح

[aymansaad]

انا بعلم زوجتى السواقة خلتها تقرا العناصر السابقة كلها

[nadeen]

شكرا جدا على مجهودك ، اكيد افدتنا..

[macdiv]

مينفعشي مقلوشي انه مجهود رائع ،، و برده مينفعشي مقلوشي ان لو السواقه كده ممكن اعمل ذي عادل امام في فيلم امير الظلام و انا مطمن ان مفيش حاجه هتحصلي ... قاعده اخيره شافية و وافيه وهي ((( دائما توقع خطأ الغير ))) تسلم بإذن الله

[islambana]

السلام عليكم ازيك يا استاذ حسين ايه اخبارك بقالك كتير مش باين في المنتدي ايه اخبارك وهل اشتريت عربيه ولا لسه وطبعا شكرا علي النصايح المفيده اللي فوق

[husseinoo]

السلام عليكم ازيك يا استاذ حسين ايه اخبارك بقالك كتير مش باين في المنتدي ايه اخبارك وهل اشتريت عربيه ولا لسه وطبعا شكرا علي النصايح المفيده اللي فوق

حبيب قلبى الباشمهندس اسلام

انا لسه حالا كتبت رد لحضرتك فى قسم البيجو

العملية رسيت على تويوتا كورولا 1984

عربية جميلة
ناعمة
استهلاك فى البنزين ممتاز جدا تقريبا 200 كيلوا فى الداخلى
الحرارة ممتازة ثابتة تقريبا
السحب ممتاز ممكن تجيب الـ 100 فى منتهى السهولة

كله شىء تمام
الا السواق
ههههههههههههههههههه

عايز اعرف حاجات كثيير لسه
والبركة فيكم
نتعلم منكم

كيف التخلص من الخوف
لكن باسلوب علمى
وبكلام مفهوم وواضح
وكلام ناس عندها خبرة

مع احترامى للجميع
انا عارف ان المشى بالعربية هو اللى هايعلم الواحد
لكن مشى بدون ما الدماغ يكون فيها كلام سليم وتعليمات واضحة وسليمة
يبقى المشى كده خطر على الواحد وعلى الآخرين

والتعليم اذا ما كانش على قواعد سليمة
وتدريجية
يعنى موش كل حاجة فى نفس اليوم
لازم يكون كل اسبوع التدريب على شىء معين

كل اللى انا كتبته ده
هو اللى اتدربت عليه لمدة اسبوع او اسبوعين

ايه اللى المفروض اتعلمه فى الاسابيع القادمة الله اعلم

سألت صديقى فاضل اد ايه
قال لى: فاضل لك اربع اسابيع
عشان تسوق زى ما انا عايز
وتقدر تعتمد على نفسك

لو كان فيه اى نصائح منك يا اسلام
او من اصدقاء نايل موتورز

يا ريت نسمع منكم

لكن عايزين نقسم الكلام الى مراحل
يعنى موش كل حاجة فى نفس الوقت

السؤال: ايه المفروض نتعلمه فى الاسبوع التالى

فى انتظار تواصلكم

وشكرا لك جدا يا اسلام ولكل رجالة البيجو المحترمين

مع اطيب التمنيات
اخوكم حسين غزالة

[Maged_Samy]

زيادة كمان
الملفات الشمال كلها فى مصر خدها على الواسع والملفات اليمين خدها على الضيق
عشان لو اخدت ملف شمال على الضيق ممكن تقابل حد فى وشك لا قدر الله
اتمنى تكون فاهمنى

الملف الشمال تمشى فى الناحية الشمال والملف اليمين تمشى فى الناحية اليمين عشان تقاوم القوة الطاردة المركزيه مع السرعة العاليه واللى ممكن تخلى العربية تخرج عن الطريق وتتقلب لو السرعة زيادة ولو الطريق مفيهوش ميل فى الجانب العكسى للملف .

[dolly13]

الف مبروك على العربية والفين مبروك على تعلم القيادة والرخصة
نصيحتى لك انك تسمع كل الكلام اللى انت كتبته ده وتنفذه بحذافيره لان هى دى اخلاق واداب القيادة اللى هاتجنبك احراجات كتير جدا
ثانيا اوعى تستعجل خد وقتك وبراحتك خالص على الاقل شهر كمان تدريب مع صاحبك فى اماكن هادية وبعدين هو اللى هايقولك انك هاتنزل فى وسط الزحمة دلوقتى
اكيد اول مرة بتبقى صعبة جدا ومليانة توتر لكن اوعى تنسى للحظة ان كلنا اتعلمنا بنفس الطريقة لكن اللى يفرق واحد عن واحد مدى التزامه باداب القيادة وده بتتعود عليه لما تبقى بتزيد فترة تدريبك
لكن الناس اللى بتتعلم فى اسبوعين والسلام للاسف بينزلوا الشارع يعكو الدنيا وبعدين يتعودوا على العك ده وتبقى دى طريقتهم فى القياده لفترة طويلة اوى
انا كترت فى الكلام اوى بس انا مبسوطة انك بتتعلم صح وربنا يوفقك

[kmhbravo]

بالإضافة للكلام اللى إتقال فى الموضوع فى بعض النصايح البسيطة :

1. ركز على تجنب أخطاء الأخرين وما تركزش فى إنك أما تتخبط تقول أنا اللى صح هاتفيد بإيه .
2. فى الطريق الطوالى أو السريع سوق عربية اللى قدامك يعنى تبص لمسافة أزيد من العربية اللى قدامك .
3. تحفظ العربيات اللى حواليك من الأربع إتجاهات وطريقة سواقتهم عشان تتوقع أى خطأ منهم ولازم تتدرب على إستخدام المرايات الثلاثة فى نفس الوقت .
4. خللى بالك دايماً من العربيات القديمة اللى قدامك على اليمين ركز عنده مرايا شمال ولا لأ عشان لو لأ هاكيد هايغلط ويزنقك لو حاولت تعدى من الشمال .
5. أما الطريق يقف فجأة حضر نفسك قبلها ب 150 متر ودوس مفتاح إنتظار وقبل ما توقف ب 60 متر مثلاً بص فى المراية وتبطأ قبلها ب 30 متر وتبص فى المراية لحد اما تتأكد إن اللى وراك هدى خلاص عشان الخطر جاى من وراك ممكن أى حد يخبطك ويبقى قى مساحة تتفاداه بمناورة .
6. فى التقاطعات سواء يمين أو شمال ما تركزش على العربية اللى قدامك بس شوف اللى سايقها باصص فين يعنى واخد باله وإلا لأ .
7. ما تتكلمش فى الموبايل خلاص وإنت سايق لحد أما تتمكن من السواقه .

[ahmedbasto]

تمام والله معظم النصايح واهم حاجة نمسك الدريكسون بأيدينا الأثنين (كنت هبوس عمود بسبب الموضوع دة)

[kisho55555]

نصائح جميلة وممتازة .... وفعلا عى محتاجة شوية تعود ...

[ramyworm]

نصيحة مني حتحتاجها انشاء الله قدام شوية . هيا يمكن المفروض ماتتقلش لان اللي حقوله غلط بس ده اللي بيحصل .
اول ما تتمكن في السواقة ويروح الخوف من جواك حتلاقي نفسك عاوز تجري بالعربية صح وخاصة لو اصحابك معاهم عربيات حيفضلو يستفزوك عشان تجري معاهم .
حذاااااااااري من الشد مع العربيات عشان ماحدش بيخاف على حد حتى لو صاحبك ممكن يزنقك ويسببلك مشاكل لاقدر الله .
يوم ماتجري اجري لوحدك ماتشدش مع حد ( طبعا اللي بقوله ده غلط بس زي ما بيقولو نص العمى ولا العما كله ) . وبعدين هو ده اللي بيحصل مع كل الشباب لازم بيجروا .

[د.محمود صلاح]

نصايح حلوة باين على صديقك مخضرم