نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[husseinoo]

بسم الله الرحمن الرحيم
السلام عليكم ورحمه الله ،يسعدني جدا اني اكون معاكم في المنتدي ومن غير ما اطول عليكم نتوكل على الله .
الدرس الاول

فى الانتظار بشغف كبيير

[aboharf]

الدرس الاول
(فحص العربيه)
قبل ما نبتدي نسوق العربيه لازم نعرفها كويس ولازم افحص عربيتي كويس قبل ما اتحرك بيها يعني لازم تعمل فحص روتوني يومي على العربيه عشان تمشي وانت مطمئن .
-ابدا اولا بفحص جسم السياره الخارجي وذلك بانك تبدأ من ناحيه باب السائق وتاخذ دوره حول سيارتك باتجاه دوران عقارب الساعه تشوف كل حاجه من الابواب الاربعه والزجاج امامي وخلفي واكصدامات امامي وخلفي والفوانيس والمساحات وبالاضافه الى الاربع عجلات وضغط الهوا فيهم بالاضافه الى اهم شئ وهي اللوحات المعدنيه هل موجودين في مكانهم ولا اتسرقواااا ، هل فيه خبطات او خدوش في عربيتك ولا لأ,,, هل فيه حاجه او اواولاد بيلعبوا ورا العربيه او فيه حيوانات تحت العربيه او حجاره وكل ده مش هاياخد منك دقيقه ، على الاقل تبقى ماشي وانت مرتاح البال.
-بعد كده تفتح كبوت العربيه وياريت نعرف بيتفتح منين وازاي ومش عيب نسال ونفحص مستوى السوائل الخاص بالعربيه من زيت المحرك وميه التبريد وزيت الفرامل وزيت الدبرياش واذا كان فيه زيت باور برضه افحصه بالاضافه الى ميه المساحات وكل ده مش هايكلفك غير نظرات قليله لان كل حاجه باينه قدامك بس اتاكد ان كل الزيوت والسوائل في مستوياتها الطبيعيه وفيه علامات بتبين كده وهتلاقي العلامات باينه min --max يعني اقل او اكتر واللي ناقص زوده وبرضه اسال عن اماكن الاشياء دي وامتى اغيرها او ازودها, بعد كده اقفل الكبوت وبص تحت العربيه واتاكد ان مافيش بقع زيت او ميه ولو فيه حاول تعرف مصدرها منين.
- افتح الشنطه وافحص الاطار الاحتياطي لان الاطار الاحتياطي مع الركنه بيسرب الهوا وزوده لو ناقص هوا في اقرب بنزينه وهايبقى موقفك وحش لو نامت منك العجله ولقيت الاستبن نايم، تاكد من وجود الكوريك وذراع الكوريك ومفتاح فك العجل وخصوصا لو عندكم اكتر من عربيه في البيت لان ممكن حد من العائله يعملها فيك وياخد منك العده وتبقى انت محتاس في الشارع. وطبعا الطفايه وشنطه الاسعافات .....
- اخيرا تاكد من وجود اوراقك معاك ،رخصه القياده ورخصه العربيه وتاريخ الانتهاء ولو بتسوق العربيه بتوكيل يبقى معاك صوره عشان اللجان المروريه...
كل ده مش هاياخد منك دقيقتان وله فوايد كتره اولها انك هاتطمن للعربيه وثانيهما انك بالطريقه دي هاتحافظ على صيانه العربيه وبالتالي هتلاقي عربيتك جاهزه في اي وقت لما تحتاجها
---شويه واكمل الدرس الثاني وشكرا

[husseinoo]

كلام سليم ومية مية
انا عندى جارتى ... للاسف عربيتها الاسبوع ده جابت وش سلندر
عشان غطاء الراديتير كان بيسرب المياه
ومشيت والعربية ناقصة مياه
والنتيجة العربية عطلانة فى الجراج ونفسها اتسدت
لدرجة انها سافرت كندا ... قبل ما دمها يتغير هههههههههههههههه

شوف حاجة بسيطة قوى زى غطاء الراديتير والمياه ... بس النتيجة ربنا يلطف بنا عملت كارثة


فى الانتظار

[aboharf]

الدرس الثـــــــــــــــــــــــــاني
(كيف نظبط الجلوس داخل السياره)
قبل ما ابتدي احب اعتذر اني انا ماشرحتش ازاي نكشف على مستوى الزيوت والميه في العربيه لان ده محتاج اشرحه عملي وبالاضافه الى كده معنديش وقت احط صور او اني ازود في الكلام لان ده هياخد كلام كتير بس احب اطمنكو اي حد بيسوق لفتره طويله ومتبهدل عند الميكانيكيه ممكن يشرحلكو بسهوله بس انتوا اسالوا وماتتكسفوش....
نرجع لموضوعنا .........
=لما تركب العربيه وتعقد على كرسي السواق لاول مره طبعا هتلاقي قدامك الدركسيون ووراه ذراعين اليمين خاص بالمساحات ،،والشمال خاص بانوار العربيه والاشارات يمين وشمال ،،
ووراهم تابلوه العدادات واللي بيشمل عداد السرعه وعداد لفات المحرك او rpm ومؤشر الحراره والبنزين وعداد المسافات واللي بنعرف منه العربيه ماشيه كام كيلو.
=على يمين الدركسيون شويه وخصوصا في منتصف تابلوه العربيه او منتصف السياره هتلاقي مفاتيح خاصه بالمكيف ودرجات حرارته ومفتاح خاص بتسخيين الزجاج الخلفي عشان تشيل الشبوره (بص على الزجاج الخلفي هاتلاقي عليه خطوط دي خاصه بتسخين الزجاج الخلفي)
ومن فوق فيه مفتاح الانتظار او مفتاح تشغيل الاربع اشارات واللي بنستخدمها في حاله الخطر فقط او الانتظار طبعا الاماكن ممكن تتغير باختلاف موديلات العربيات0
= تحت التابلوه وعند مستوى القدمين هتلاقي ثلاثه دواسات
اللي في اقصى اليمين دي دواسه البنزين واللي عن طريق الضغط عليها بنزود السرعه.
اللي في الوسط وهيا الفرامل وعن طريق الضغط عليها بالتدريج بنهدي سرعه العربيه او بالضغط عليها بقوه ومره واحده بنوقف العربيه
الاخيره اللي في اقصى اليسار وهيا الدبرياش او فاصل الحركه وهي تستخدم عند نقل الحركه او تغير السرعه للاسرع او للابطأ.
=يمين كرسي السائق في منصف السياره تماما للامام قليلا يوجد عصا ناقل الحركه واللي من خلالها نقدر نغير السرعات وذلك عن طريق تحريك عصا ناقل الحركه الى السرعه المناسبه لتحريك السياره الى الامام او الى الخلف.
الطريقه الصحيحه للجلوس على كرسي القياده
اولا: اجلس على الكرسي وحاول ان تصل قدميك الاثنتين الى دواسات البنزين والدبرياش وذلك بالضغط على الدبرياش بقدمك اليسرى الى ان تلتصق الدواسه بارضيه السياره, واذا لم تصل قدمك حاول ان تقدم الكرسي الى الامام قليلا بحيث تكون رجليك مثنيتن بزاويه 45 درجه وغير مفرودتين ثم احرص على ان يكون هناك فرق بين ركبتيك وتابلوه السياره الاسفل بمقدار خمسه اصابع يعني ممكن تضع كف ايدك (سيف اليد يعني )بين ركبتك والتابلوه فاذا كانت رجليك طويلتين ارجع الكرسي الى الوراء قليلا اوظبط قاعده الكرسي من خلال الذراع الموجود اسفل الكرسي المهم لاتجعل رجلك تلتصق بالتابلوه من الاسفل
ثانيا:بالنسبه لطريقه وضع ايدك على الدريكسيون ارجع ظهرك الى الخلف بحيث يكون ملتصقا بظهر الكرسي مد يدك الى الامام في مستوى كتفك وضع يدك على الدريكسيون واستخدم طريقه ( عشره وعشره)يعني تحط ايدك على الدركسيون زي عقارب الساعه لماتكون عقارب الساعه عشره وعشر دقائق بحيث تكون ايدك الاثنين على الدركسيون من فوق شويه مش مفروده على الاخر ولا مثنيه زياده عن اللزوم يعني تكون فيه تنيه بسيطه من عند الكوع او المرفق ولو حصل غير كده سواء بالزياده او بالنقص تقدر تتحكم بكده من خلال انك تظبط ضهر الكرسي من الذراع الموجود في جانب الكرسي من جهه اليسار وذلك باستخدام ايدك اليسار.
ثالثا:ظبط المسند الخلفي للراس وذلك بان ترجع راسك الى الوراء وحاول ترفع او تنزل مسند الراس بحيث تكون راسك مستريحه ومسنوده عند ارجاعها الى الخلف وهي خطوه مهمه جدا لان لاقدر الله عند حدوث فرمله جامده او حدث تصادم من الخلف فان الراس دائما ماترجع الى الوراء وممكن ان يحدث كسر في الرقبه اذا لم يكن مسند الراس موضوعا بشكل جيد.
خلاصه الكلام انك متكونش لازق قوي في الدريكسيون وبرضه ماتكونش بعيد جدا عن الدريكسيون بحيث انك تقدر تتحكم في العربيه بشكل كويس0000
الطريقه الصحيحه لتظبيط المرايات
اولا:المرآه الوسطى او مرايه الصالون 000
بعد ماتظبط الكرسي بالطريقه السابقه افرد ظهرك على الكرسي وضع يدك الاتنين بطريقه عشره وعشره على الدريكسيون واترك يدك الشمال على الدركسيون ثم مد يدك اليمين الى مراه الصالون وامسكها من خلفها من اقصى يمين المرآه يعني ماتخليش ايدك تغطي المرايه وماتحاولش تمسكها من النص وبرضه ماتحاولش تلمس زجاج المرايه عشان بصمات ايدك ماتتطبعش على المرايه وبالتالي المرايه هاتتلطخ ومش هاتشوف بيها كويس، طبعا هتلاقي المرايه جايه في وشك بالظبط وبالتالي مش محتاج انك تلف راسك او تتعب نفسك بس حرك عينيك تجاه المرآه.
طيب هاتشوف ايه بالظبط في المرايه؟؟؟؟
هانحاول نحرك المرايه بادينا بحيث نشوف الزجاج الخلفي كاملا واللي من خلالها هانشوف السما من بعيد في نصف المرايه الاعلى وبرضه هانشوف الارض اللي ورانا من بعيد في نصف المرايه الاسفل يعني نقسم المرايه نصفين بالعرض ونشوف السما والارض من ورا العربيه.....
في نص مرايه الصالون في ذراع بيتحرك للامام والخلف الذراع ده دايما خليه للخلف جهه الزجاج الامامي وده فايدته انك لو ماشي بالليل وحد من السائقين ازعجك بالنور العالي لان النور هايضرب في المرايه وبالتالي هايضايق عينيك ماعليك الا انك تسحب الذراع ده للامام ناحيتك وبكده هاتكسر نور العربيه اللي وراك وفي نفس الوقت هاتبقى شايفها برضه.....
ثانيا: المرايا الجانبيه.....
المرايه الشمال اللي جنب السواق هانقسمها نصفين بالعرض ونحاول نشوف السما في النصف الاعلى والارض في النصف الاسفل يعني نخلي خط الافق اللي بين السما والارض في نص المرايه بالعرض،،،، عشره في الميه من جسم المرايه من الداخل اي من جهه السائق نشوف بيها جسم العربيه بدايه من نهايه مقبض باب السائق بالاضافه الى الباب الخلفي والرفرف الخلفي
طبعا نفس الكلام ده هانطبقه على المرايه اليمين،،، طبعا الكلام ده يدويا او لو عندك مرايات كهربا هتلاقي مفاتيح المرايات على الباب او تحت الدركسيون من جهه الشمال...
حزام الامــــــــــــــــــــــــــــــــــان
بعد ما تظبط كل حاجه شد حزام الامان بس بايدك اليمين يعني لف جسمك شويه ناحيه الشال اي ناحيه حزام الامان وشده بايدك اليمين وحاول انك لما تركب الحزام انه يكون مفرود مش لافف او مبروم وان الحزام يمر على منتصف الكتف الايسر ويمر تحت البطن مش على البطن ولما تركب الحزام تاكد انك ضغط عليك كويس عشان ميفكش يعني لازم تسمع تكه بسيطه كده تعرف منها ان حلقه الحزام ركبت في مكانها الصحيح..
للناس القصيرين او الطوال ممكن تظبط ارتفاع الحزام من خلال رفع او خفض ذراع تظبيط الحزام واللي موجود على القائم الايسر في منتصف السياره المهم الحزام مايكونش زانق على الرقبه او نازل تحت الكتف بجانب الذراع الايسر....
نكمل بكره وسامحوني على الاطاله.....

[A.Saad]

[QUOTE=nadeen;3872421762]

السلام عليكم ورحمة الله وبركاته

المشكلة الغريبة عندى انى مش عارفة اتعامل كويس مع المرايا وبالذات المراية اليمين ،يعنى مثلا امبارح كنت نازلة الكوبرى وعايزة ادخل يمين مش بعرف اقدر إذا كان العربية اللى انا شايفاها فى المرايا دى مسافتها بعيدة عنى كفاية يعنى اعدى ولا لأ وبالتالى بطول فى القرار ده شوية لغاية ما الطريق يفضى ( حاجة غبية شوية بس هعمل ايه) هو ممكن ابص من فوق الكتف ناحية اليمين وخلاص ولا لازم المراية وكمان حضرتك بتعمل ايه لما تكون طالع من تقاطع على شارع رئيسى وفى عربيات كتير راكنة فى الرئيسى على اليمين لدرجة انك مش شايف اللى جاى ؟

المرايا تظبطيها بحيث تبين اخر جسم عربيتك مش لازم الجسم كله علشان تقللى النقطة العميا اللى عندك
وتقدير سرعة العربية ده هييجى بالممارسة
المهم ادى اشارة
ولو شفتى حد عمال يقلب نور ويدى كلاكس تاخدى بالك

لو طالع من تقاطع
اطلع سنة سنة
لو بالاليل
قلبى نور
نهار
كلاكسات

[A.Saad]

http://www.nilemotors.net/Nile/104623-a.html

http://www.nilemotors.net/Nile/9229-a.html

http://www.nilemotors.net/Nile/100519-a.html

[aboharf]

[fonzi]

تسلم يا ابو حرف والله استفدت كتييرررررررررررر ربنا يباركلك

[husseinoo]

[QUOTE=aboharf;3[COLOR=Blue]872425372] الدرس الثـــــــــــــــــــــــــاني
[/COLOR] (كيف نظبط الجلوس داخل السياره)
قبل ما ابتدي احب اعتذر اني انا ماشرحتش ازاي نكشف على مستوى الزيوت والميه في العربيه لان ده محتاج اشرحه عملي وبالاضافه الى كده معنديش وقت احط صور او اني ازود في الكلام لان ده هياخد كلام كتير بس احب اطمنكو اي حد بيسوق لفتره طويله ومتبهدل عند الميكانيكيه ممكن يشرحلكو بسهوله بس انتوا اسالوا وماتتكسفوش....

والله انا من يومين وجدت الراديتير "مليان مياه" ومية مية ... المفاجأة ان قربة المياه هى اللى خلصت ... على طول زودت مياه "خضراء" عشان الاملاح ... طبعا انا محتفظ بجيركل فى شنطة السيارة ... لكن الخطأ اللى عملته انى زودت المياه اكثر من العلامة "ماكس" ... عشان كده اول ما شغلت العربية ... طبعا خرطوم "الفايز" اللى خارج من القربة فضل ينقط مياه خضراء ... بعد شوية توقف لوحده

نرجع لموضوعنا .........
=لما تركب العربيه وتعقد على كرسي السواق لاول مره طبعا هتلاقي قدامك الدركسيون ووراه ذراعين اليمين خاص بالمساحات ،،والشمال خاص بانوار العربيه والاشارات يمين وشمال ،،
ووراهم تابلوه العدادات واللي بيشمل عداد السرعه وعداد لفات المحرك او rpm ومؤشر الحراره والبنزين وعداد المسافات واللي بنعرف منه العربيه ماشيه كام كيلو.
=على يمين الدركسيون شويه وخصوصا في منتصف تابلوه العربيه او منتصف السياره هتلاقي مفاتيح خاصه بالمكيف ودرجات حرارته ومفتاح خاص بتسخيين الزجاج الخلفي عشان تشيل الشبوره (بص على الزجاج الخلفي هاتلاقي عليه خطوط دي خاصه بتسخين الزجاج الخلفي)
ومن فوق فيه مفتاح الانتظار او مفتاح تشغيل الاربع اشارات واللي بنستخدمها في حاله الخطر فقط او الانتظار طبعا الاماكن ممكن تتغير باختلاف موديلات العربيات0
= تحت التابلوه وعند مستوى القدمين هتلاقي ثلاثه دواسات
اللي في اقصى اليمين دي دواسه البنزين واللي عن طريق الضغط عليها بنزود السرعه.
اللي في الوسط وهيا الفرامل وعن طريق الضغط عليها بالتدريج بنهدي سرعه العربيه او بالضغط عليها بقوه ومره واحده بنوقف العربيه
الاخيره اللي في اقصى اليسار وهيا الدبرياش او فاصل الحركه وهي تستخدم عند نقل الحركه او تغير السرعه للاسرع او للابطأ.
=يمين كرسي السائق في منصف السياره تماما للامام قليلا يوجد عصا ناقل الحركه واللي من خلالها نقدر نغير السرعات وذلك عن طريق تحريك عصا ناقل الحركه الى السرعه المناسبه لتحريك السياره الى الامام او الى الخلف.
الطريقه الصحيحه للجلوس على كرسي القياده
اولا: اجلس على الكرسي وحاول ان تصل قدميك الاثنتين الى دواسات البنزين والدبرياش وذلك بالضغط على الدبرياش بقدمك اليسرى الى ان تلتصق الدواسه بارضيه السياره, واذا لم تصل قدمك حاول ان تقدم الكرسي الى الامام قليلا بحيث تكون رجليك مثنيتن بزاويه 45 درجه وغير مفرودتين ثم احرص على ان يكون هناك فرق بين ركبتيك وتابلوه السياره الاسفل بمقدار خمسه اصابع يعني ممكن تضع كف ايدك (سيف اليد يعني )بين ركبتك والتابلوه

حلو قوى معلومة الفرق بين الركب وتابلوه السيارة "معلومة جديدة وكويسة

فاذا كانت رجليك طويلتين ارجع الكرسي الى الوراء قليلا اوظبط قاعده الكرسي من خلال الذراع الموجود اسفل الكرسي المهم لاتجعل رجلك تلتصق بالتابلوه من الاسفل

ثانيا:بالنسبه لطريقه وضع ايدك على الدريكسيون ارجع ظهرك الى الخلف بحيث يكون ملتصقا بظهر الكرسي مد يدك الى الامام في مستوى كتفك وضع يدك على الدريكسيون واستخدم طريقه ( عشره وعشره)

والله انا سبحان الله بحط ايدى على الدركسيون بالشكل ده طبيعى كده من غير ما اعرف

يعني تحط ايدك على الدركسيون زي عقارب الساعه لماتكون عقارب الساعه عشره وعشر دقائق بحيث تكون ايدك الاثنين على الدركسيون من فوق شويه مش مفروده على الاخر ولا مثنيه زياده عن اللزوم يعني تكون فيه تنيه بسيطه من عند الكوع او المرفق ولو حصل غير كده سواء بالزياده او بالنقص تقدر تتحكم بكده من خلال انك تظبط ضهر الكرسي من الذراع الموجود في جانب الكرسي من جهه اليسار وذلك باستخدام ايدك اليسار.

ثالثا:ظبط المسند الخلفي للراس وذلك بان ترجع راسك الى الوراء وحاول ترفع او تنزل مسند الراس بحيث تكون راسك مستريحه ومسنوده عند ارجاعها الى الخلف وهي خطوه مهمه جدا لان لاقدر الله عند حدوث فرمله جامده او حدث تصادم من الخلف فان الراس دائما ماترجع الى الوراء وممكن ان يحدث كسر في الرقبه اذا لم يكن مسند الراس موضوعا بشكل جيد.
خلاصه الكلام انك متكونش لازق قوي في الدريكسيون وبرضه ماتكونش بعيد جدا عن الدريكسيون بحيث انك تقدر تتحكم في العربيه بشكل كويس0000
الطريقه الصحيحه لتظبيط المرايات
اولا:المرآه الوسطى او مرايه الصالون 000
بعد ماتظبط الكرسي بالطريقه السابقه افرد ظهرك على الكرسي وضع يدك الاتنين بطريقه عشره وعشره على الدريكسيون واترك يدك الشمال على الدركسيون ثم مد يدك اليمين الى مراه الصالون وامسكها من خلفها من اقصى يمين المرآه يعني ماتخليش ايدك تغطي المرايه وماتحاولش تمسكها من النص وبرضه ماتحاولش تلمس زجاج المرايه عشان بصمات ايدك ماتتطبعش على المرايه وبالتالي المرايه هاتتلطخ ومش هاتشوف بيها كويس، طبعا هتلاقي المرايه جايه في وشك بالظبط وبالتالي مش محتاج انك تلف راسك او تتعب نفسك بس حرك عينيك تجاه المرآه.
طيب هاتشوف ايه بالظبط في المرايه؟؟؟؟
هانحاول نحرك المرايه بادينا بحيث نشوف الزجاج الخلفي كاملا واللي من خلالها هانشوف السما من بعيد في نصف المرايه الاعلى وبرضه هانشوف الارض اللي ورانا من بعيد في نصف المرايه الاسفل يعني نقسم المرايه نصفين بالعرض ونشوف السما والارض من ورا العربيه.....

انا نفسى اشترى مراية محترمة ... لكن موش عارف اشتريها منين
الموجودة كويسة لكن صغيرة
نفسى فى مراية كبيرة وممتازة

في نص مرايه الصالون في ذراع بيتحرك للامام والخلف الذراع ده دايما خليه للخلف جهه الزجاج الامامي وده فايدته انك لو ماشي بالليل وحد من السائقين ازعجك بالنور العالي لان النور هايضرب في المرايه وبالتالي هايضايق عينيك ماعليك الا انك تسحب الذراع ده للامام ناحيتك وبكده هاتكسر نور العربيه اللي وراك وفي نفس الوقت هاتبقى شايفها برضه.....

ثانيا: المرايا الجانبيه.....
المرايه الشمال اللي جنب السواق هانقسمها نصفين بالعرض ونحاول نشوف السما في النصف الاعلى والارض في النصف الاسفل يعني نخلي خط الافق اللي بين السما والارض في نص المرايه بالعرض،،،، عشره في الميه من جسم المرايه من الداخل اي من جهه السائق نشوف بيها جسم العربيه بدايه من نهايه مقبض باب السائق بالاضافه الى الباب الخلفي والرفرف الخلفي

دى معلومة حلوة قوى ... خصوصا طريقة تقسيم المرايا وكمان موضوع 10% من جسم العربية
لان كثيير قوى بيضبطوا المرايا خطأ .... بصراحة انا صديقى هو اللى ضبط لى المرايا ومابحاولش اغيرها ... لانه ضابطها عشرة على عشرة

طبعا نفس الكلام ده هانطبقه على المرايه اليمين،،، طبعا الكلام ده يدويا او لو عندك مرايات كهربا هتلاقي مفاتيح المرايات على الباب او تحت الدركسيون من جهه الشمال...
حزام الامــــــــــــــــــــــــــــــــــان
بعد ما تظبط كل حاجه شد حزام الامان بس بايدك اليمين يعني لف جسمك شويه ناحيه الشال اي ناحيه حزام الامان وشده بايدك اليمين وحاول انك لما تركب الحزام انه يكون مفرود مش لافف او مبروم وان الحزام يمر على منتصف الكتف الايسر ويمر تحت البطن مش على البطن ولما تركب الحزام تاكد انك ضغط عليك كويس عشان ميفكش يعني لازم تسمع تكه بسيطه كده تعرف منها ان حلقه الحزام ركبت في مكانها الصحيح..

احب اضيف انى احيانا كثيير انسى تركيب الحزام ... برغم ان غرامة الحزام 50 جنيه ههههههههههه ... ربنا يستر

للناس القصيرين او الطوال ممكن تظبط ارتفاع الحزام من خلال رفع او خفض ذراع تظبيط الحزام واللي موجود على القائم الايسر في منتصف السياره المهم الحزام مايكونش زانق على الرقبه او نازل تحت الكتف بجانب الذراع الايسر....
نكمل بكره وسامحوني على الاطاله.....
[/QUOTE]

[QUOTE=A.Saad;3872425921]

المرايا تظبطيها بحيث تبين اخر جسم عربيتك مش لازم الجسم كله علشان تقللى النقطة العميا اللى عندك

معلومة النقاط العمياء ده ... مهم جدا جدا جدا ...ربنا يستر
ومعظم مشاكل المبتدأين من موضوع النقاط العمياء

وتقدير سرعة العربية ده هييجى بالممارسة
المهم ادى اشارة

ولو شفتى حد عمال يقلب نور ويدى كلاكس تاخدى بالك
لو طالع من تقاطع
اطلع سنة سنة
لو بالاليل
قلبى نور

فعلا تقليب النور ده حل ممتاز وعملى جدا بالليل

نهار
كلاكسات

كلام عشرة على عشرة .... النهارده كنت اضرب كلاكس فى التقاطعات ... وام الاولاد كانت مستغربة شوية ... قلت لها: النهارده الجمعة وممكن يكون فيه حد خارج من التقاطع وفاكر ان الناس كلها فى اجازة ... موش مهم الكلاكس ... المهم انه يسمع وياخد باله

وكمان لما واحد بيطلع من التقاطع اول ما يسمع الكلاكس ... "بيلم نفسه على طول" ... ويخلى عربيته فى الحارة اللى بجوار الرصيف

[husseinoo]

النهارده اول خروج لى "رسمى" بالعربية مع الاسرة الكريمة

ههههههههههههه

طبعا كنت عامل زى التلميذ اللى داخل امتحان

وكمان شكلى كان هايبقى وحش قوى امام "ام العيال"

طبعا انا فضلت الخروج فى الصباح الباكر هههههههههه الساعة 9 تقريبا عشان ابعد عن الزحام والحق ارجع وفعلا رجعت البيت حوالى الساعة 11 والمواصلات كانت رايقة ومعقولة

المهم حصل معايا موقف واحد او اثنين خلال المشوار

الموقف الاول
كان فيه يو تيرن
لكن انا كنت ماشى على طول
والشارع يا دوب حارتين
انا فعلا كنت ماشى ناحية الحارة اللى بتوجه الى اليون تيرن

على اساس انى كنت خايف اروح للحارة اللى فى اليمين

قلت لنفسى خليك على طول احسن ... بدل ما يجى واحد من على يمينك انت موش شايفه وتحدف عليه

اللى حصل ان جه من ورايا عربية ميكروباس "ملاكى" ... ومرة واحد دخل امامى وهدى عربيته عشان يدخل اليو تيرن

طبعا لولا انى داخل على التقاطع بالراحة ورجلى على الدبرياش والفرامل
على طول هديت العربية على ما سيادته يدخل اليو تيرن

طيب الصح ايه فى الموضوع ده

انا اللى غلطان انى ماشى على طول وكان لازم التزم بالحارة اليمين عشان ابعد عن اليو تيرن

ولا هو اللى غلطان عشان كان لازم يهدى "ثانيتين" ويدخل ورايا على اليو تيرن


نفس الحكاية
وانا بعدى الإشارة
كنت ماشى ناحية الحارة اليسار بجوار الرصيف
طبعا وانا بعدى الاشارة فيه عربيات كانت امامى متجهة الى اليسار
وانا ماشى على طول
فضلت انى اهدى شوية لحد ما يدخلوا شمال واستمر انا فى السير على طول

طبعا خفت انى اغير اتجاهاى واحاول انى اروح للحارة اليمين عشان خايف حد يكون جاى من ورايا بسرعة

طيب الصح ايه فى الموضوع ده

مع العلم ان فى الغالب الشارع ده بيكون زحمة جدا
يعنى صعب انك تغير اتجاهك من حارة الى حارة



آخر حاجة عملتها انى دخلت على ميدان ابن الحكم ... لكن اعتقد دخلت خطأ
لانى دخلت على الجزيرة على طول
وكان الافضل انى ادخل من اقصى يمين الصينية بعيدا عن السيارات اللى بتلف مع الصينية
خصوصا انى متجه على طول وموش هالف مع الصينية
يا ريت توضيح


انا النهاردة سعيد جدا بمشاركة اصدقاء جدد

وفى انتظار التواصل

مع اطيب التمنيات
اخوكم حسين غزالة

[aboharf]

---

#e02828بسم الله الرحمن الرحيم
احب ان اعبر عن امتناني من تواصلكم ورغبتكم في المعرفه
-هاحب اوضح حاجه عن الدروس اللي بقولها ودي دروس للمبتدئين في السواقه اللي اول مره يركبوا عربيه فمعلش سامحوني يمكن اطول شويه لغايه مانوصل للمراحل الاحترافيه....
- اعذروني اليوم مش هاقدر اكتب حاجه كتيرعشان اليوم كان مشحون جدا لدرجه الارهاق
-بالنسبه لموضوع النقطه العميا عشان نعرف ايه هيا النقطه العميا ونشوفها ازاي هانعمل الاتي:
اجلس داخل السياره مكان السائق وظبط الكرسي والمرايا كما ذكر سابقا واطلب من صديق لك انه يقف بجوار سيارتك من ناحيه باب السائق في منتصف العربيه بالظبط يعني بين البابين الامامي والخلفي وخليه يبعد عن جنب العربيه بمسافه متر او متر ونص وحاول تشوفه في المرايه الشمال ،، طبعا مش هاتشوفه ،،،،،،،طيب وانت في مكانك حرك راسك شمال ناحيه صاحبك وبص عليه هيا دي النقطه العميا والحركه اللي انت عملتها براسك دا حل النقطه العميا يعني نظره خفيفه على شمالك فوق الكتف تقريبا وماتطولش في النظره هيا لمحه بسيطه تعرف منها مين اللي جنبك وبعد كده انظر الى الامام.
اطلب من صاحبك انه يرجع للخلف من مكانه وخليك باصص في المرايه لغايه ما يظهر في المرايه عندك ،، المسافه دي كلها اللي مشاها صاحبك لغايه مايظهر في المرايه الشمال بتختفي فيها اي سياره ماشيه جنبك ، وبالتالي لازم نعرف ان المرايات الجانبيه بتورينا اللي ورا العربيه من جهه الشمال واليمين مش بتورينا اللي جنب العربيه.
-بالنسبه للاستاذ حسين (مبرووووووك وربنا ينورلك طريقك)
بس حابب اقولك دايما وانت ماشي الزم اليمين ليه ؟؟؟؟؟مش عشان ان احنا بنخاف لا ،،ده عشان التجاوز يعني اللي مستعجل يتفضل يتجاوز من الشمال ولو انت فضلت ماشي في الحاره الشمال بسرعه بطيئه معنى كده انك بتعطل حركه السير ،، يعني ماتمشيش في الحاره الشمال الا اذا كنت في حاله تجاوز وبعد ماتتجاوز ترجع تاني للحاره اليمين او اذا كنت هاتعمل يو تيرن او اذا كنت هاتدخل اي شارع شمال .
بس هانصحك نصيحه لو انت ماشي في شارع حارتين وهاتلتزم الحاره اليمين لازم تحافظ على مسافه الامان بينك وبين اللي قدامك
يعني خلي بالك من التاكسيات والمكيروباصات لن اي حد هايشاورلهم هايقف فجاه .
طيب ازاي نعرف او نحسب مسافه الامان ؟؟؟؟؟؟؟
لازم وانت ماشي تشوف العجل الخلفي للعربيه اللي قدامك وكمان حوالي متر من الارض او الاسفلت اللي بينك وبين عجل السياره اللي قدامك يعني خلي بينك وبين العربيه اللي قدامك مسافه تقدر ب حوالي خمسه او سته متر او بمعنى اخر قدر ان فيه عربيه مخفيه بين عربيتك وبين العربيه اللي قدامك.
طيب مسافه الامان هاتفيدنا بايه ؟؟؟؟
-هاتفيدنا باني اتفادى ان اخبط العربيه اللي قدامي لو وقف فجاه
-بتدينا فرصه ان احنا نتجاوز العربيه اللي اقدامنا يعني لو تاكسي قدامي وقف فجاه نقدر نتجاوزه بسرعه واحنا مستريحين ويبقى عندنا فرصه نبص في المرايات ونستخدم الاشارات.
-وانا واقف في اشارات المرور برضه احافظ على مسافه الامان بيني وبين العربيه اللي قدامي لان السياره اللي قدامي فجاءه ممكن تعطل وهاتضطر تستنى لغايه مايشغلوها او يشيلوها او هاتنزل تزق يا عسل لو مستعجل.
-مسافه الامان بتديك فرصه انك تشوف الارض اللي تحت العربيه اللي قدامك يعني اللي قدامك بيبقى شايف المطبات والحجاره والبلاعات وبيقدر يتفاداها ،،ولو انت لازق فيه هاتلاقي نفسك لابس في حجر او واقع في بلاعه او طاير من فوق مطب اوعجله من عجل العربيه نزلت في حفره .
اما لو انت ماشي في شارع ثلاث حارات خليك ماشي في الحاره اللي في الوسط وريح بالك يعني اللي عايز يقف لزبون عنده الحاره اليمين واللي عايز يتجاوز عنده الحاره الشمال .
بالنسبه للصينيه زي ماقلت حضرتك لو انت ماشي علطول خليك في الحاره اليمين او في الحاره اللي في الوسط ولو عايز تلف الصينيه يو تيرن او تدخل شمال الزم الحاره الشمال ......
وربنا يستر طريقك

[husseinoo]

---

#e02828بسم الله الرحمن الرحيم
احب ان اعبر عن امتناني من تواصلكم ورغبتكم في المعرفه

والله انا كل يوم افتح المنتدى مخصوص ... عشان اشوف حضرتك هاتكتب لنا ايه واتعلم منك
لانك بتكتب كلام مية مية ... وبتراعى انك بتخاطب مبتدأ ... وكمان موش مهم ان الكلام ده او بعض منه يكون متكرر فى اى مشاركة ... يا ريت حضرتك تستمر معانا لحد ما الدورة تخلص ... عشان انا باعتبرها دورة تدريبية كاملة ... موش سؤال فى مشكلة وخلاص ... وطبعا لو فيه اى استفسار لن نجد افضل من حضرتك ومن اصدقاء المنتدى الكرام بالتكرم بالإجابة على التساؤل .... شكرا جزيلا لحضرتك

-هاحب اوضح حاجه عن الدروس اللي بقولها ودي دروس للمبتدئين في السواقه اللي اول مره يركبوا عربيه فمعلش سامحوني يمكن اطول شويه لغايه مانوصل للمراحل الاحترافيه....

وانا عن نفسى ادعوا لك ان ربنا يجازيك كل خير عن كل حرف بتكتبه ... واكتب براحتك يا بيه كل كلمة بتكتبها مفيدة جدا لنا

- اعذروني اليوم مش هاقدر اكتب حاجه كتيرعشان اليوم كان مشحون جدا لدرجه الارهاق

الله يكون فى عونك .. ويكرمك دنيا وآخرة .... اكيد طبعا نشكرك على استقطاع وقت منك خصوصا انك مرهق ... معلهش احنا آسفين جدا ... لكن على العموم ... خد وقتك وبراحتك خالص واحنا مع بعض ... مافيش اى مشكلة ... لما تكون مرتاح وتمام التمام ... استكمل لنا الدورة التدريبية

-بالنسبه لموضوع النقطه العميا عشان نعرف ايه هيا النقطه العميا ونشوفها ازاي هانعمل الاتي:
اجلس داخل السياره مكان السائق وظبط الكرسي والمرايا كما ذكر سابقا واطلب من صديق لك انه يقف بجوار سيارتك من ناحيه باب السائق في منتصف العربيه بالظبط يعني بين البابين الامامي والخلفي وخليه يبعد عن جنب العربيه بمسافه متر او متر ونص وحاول تشوفه في المرايه الشمال ،، طبعا مش هاتشوفه ،،،،،،،طيب وانت في مكانك حرك راسك شمال ناحيه صاحبك وبص عليه هيا دي النقطه العميا والحركه اللي انت عملتها براسك دا حل النقطه العميا يعني نظره خفيفه على شمالك فوق الكتف تقريبا وماتطولش في النظره هيا لمحه بسيطه تعرف منها مين اللي جنبك وبعد كده انظر الى الامام.
اطلب من صاحبك انه يرجع للخلف من مكانه وخليك باصص في المرايه لغايه ما يظهر في المرايه عندك ،، المسافه دي كلها اللي مشاها صاحبك لغايه مايظهر في المرايه الشمال بتختفي فيها اي سياره ماشيه جنبك ، وبالتالي لازم نعرف ان المرايات الجانبيه بتورينا اللي ورا العربيه من جهه الشمال واليمين مش بتورينا اللي جنب العربيه.

كلام ممتاز وعشرة على عشرة ... وطريقة جديدة وعلمية وجميلة
يعنى الحل النهائى للموضوع ده ان الواحد ينظر نظرة سريعة من فوق كتفه سواء يمين او شمال
عشان يشوف اى عربية عند الباب الخلف تقريبا ... صح كده

-بالنسبه للاستاذ حسين (مبرووووووك وربنا ينورلك طريقك)

الله يكرمك يا رب ويسعدك دنيا وآخرة .. وينور لك طريقك

بس حابب اقولك دايما وانت ماشي الزم اليمين ليه ؟؟؟؟؟مش عشان ان احنا بنخاف لا ،،ده عشان التجاوز يعني اللي مستعجل يتفضل يتجاوز من الشمال ولو انت فضلت ماشي في الحاره الشمال بسرعه بطيئه معنى كده انك بتعطل حركه السير ،، يعني ماتمشيش في الحاره الشمال الا اذا كنت في حاله تجاوز وبعد ماتتجاوز ترجع تاني للحاره اليمين او اذا كنت هاتعمل يو تيرن او اذا كنت هاتدخل اي شارع شمال .

نصيحة مضبوطة مية مية
لكن بالنسبة لى عشان انا مبتدأ .. طبعا بخاف من التوقف المتكرر للعربيات فى جهة اليمين
وكمان بخاف من التقاطعات والعربيات التى تظهر فجأة من اى تقاطع جهة اليمين
او سيارة بتكون بتركن او خارجة من جراج
او وجود مشاة اسفل الرصيف

بس هانصحك نصيحه لو انت ماشي في شارع حارتين وهاتلتزم الحاره اليمين لازم تحافظ على مسافه الامان بينك وبين اللي قدامك
يعني خلي بالك من التاكسيات والمكيروباصات لن اي حد هايشاورلهم هايقف فجاه .
طيب ازاي نعرف او نحسب مسافه الامان ؟؟؟؟؟؟؟
لازم وانت ماشي تشوف العجل الخلفي للعربيه اللي قدامك وكمان حوالي متر من الارض او الاسفلت اللي بينك وبين عجل السياره اللي قدامك يعني خلي بينك وبين العربيه اللي قدامك مسافه تقدر ب حوالي خمسه او سته متر او بمعنى اخر قدر ان فيه عربيه مخفيه بين عربيتك وبين العربيه اللي قدامك.
طيب مسافه الامان هاتفيدنا بايه ؟؟؟؟
-هاتفيدنا باني اتفادى ان اخبط العربيه اللي قدامي لو وقف فجاه
-بتدينا فرصه ان احنا نتجاوز العربيه اللي اقدامنا يعني لو تاكسي قدامي وقف فجاه نقدر نتجاوزه بسرعه واحنا مستريحين ويبقى عندنا فرصه نبص في المرايات ونستخدم الاشارات.
-وانا واقف في اشارات المرور برضه احافظ على مسافه الامان بيني وبين العربيه اللي قدامي لان السياره اللي قدامي فجاءه ممكن تعطل وهاتضطر تستنى لغايه مايشغلوها او يشيلوها او هاتنزل تزق يا عسل لو مستعجل.
-مسافه الامان بتديك فرصه انك تشوف الارض اللي تحت العربيه اللي قدامك يعني اللي قدامك بيبقى شايف المطبات والحجاره والبلاعات وبيقدر يتفاداها ،،ولو انت لازق فيه هاتلاقي نفسك لابس في حجر او واقع في بلاعه او طاير من فوق مطب اوعجله من عجل العربيه نزلت في حفره .

هى فكرة مسافة الامان دى فكرة ممتازة
لكن حضرتك تفتكر انه صعب شوية على سائق مبتدأ انه دائما مطلوب منه يتحرك جهة الحارة اليسار عشان يتفادى سيارة متوقفة امامه ثم العودة الى الحارة اليمين مرة ثانية
وممكن الموضوع ده يتكرر كثيير قوى

انا عن نفسى احيانا كثيير افضل التوقف لحد ما السيارة المتوقفة تتحرك مرة ثانية واستمر بالمشى خوفا من تغيير اتجاهى ويظهر لى حد فى المنطقة العمياء او يكون جاى من جانبى بسرعة او موش عايز ينتظر ويعطى لى فرصة بالتجاوز

بصراحة عملية مزعجة اذا مشيت يمين الاقى ناس كثيير متوقفة وتقاطعات ومشاة وابواب سيارات بتتفتح وخلافه
واذا مشيت شمال اواجه يو تيرن ... "عمال على بطال" ... خصوصا اليومين دول كل شارع لازم تلاقى فيه "يو تيرن" .... طبعا المشكلة دى حضرتك حددتها بدقة وتظهراكثر لو كان الشارع "حارتين" فقط

اما لو انت ماشي في شارع ثلاث حارات خليك ماشي في الحاره اللي في الوسط وريح بالك يعني اللي عايز يقف لزبون عنده الحاره اليمين واللي عايز يتجاوز عنده الحاره الشمال .
بالنسبه للصينيه زي ماقلت حضرتك لو انت ماشي علطول خليك في الحاره اليمين او في الحاره اللي في الوسط ولو عايز تلف الصينيه يو تيرن او تدخل شمال الزم الحاره الشمال ......


احلى ختام للدرس النهارده ... هو موضوع الشارع اللى ثلاث حارات ... ده اعتقد انه مافيش فيه اى مشاكل "إن شاء الله" ... إلا إذا مرت سيارة من على يمينى بالرغم انى تارك اليسار عشان يمر منه ...
لكن اعتقد ان المشى فى الحارة الوسطى حل كويس جدا خصوصا لو الشارع 3 حارات "دى مقدور عليها إن شاء الله"


فيه ناس بتنصح بالسير فى الشمال بجوار الرصيف عشان تركز فى اللى ماشى بجوارك من جهة اليمين فقط
يوقول لك: انا عارف ان كده خطأ وهاتسمع كلاكسات وناس بتشتم هههههههههههههههههه ... لكن ده افضل لك كامبتدأ فى القيادة ... انك تركز على اليمين فقط وتبعد عن التقاطعات والتوقف المستمر والمشاة والابواب المفتوحة فجأة وخلافه ... ايه راى حضرتك فى الكلام ده


وربنا يستر طريقك

ويسعدك دنيا وأخرة انت واصدقائك واسرتك واولادك

فى انتظار المزيد
اخوكم حسين غزالة

[aboharf]

بسم الله الرحمن الرحيم
لكن حضرتك تفتكر انه صعب شوية على سائق مبتدأ انه دائما مطلوب منه يتحرك جهة الحارة اليسار عشان يتفادى سيارة متوقفة امامه ثم العودة الى الحارة اليمين مرة ثانية
وممكن الموضوع ده يتكرر كثيير قوى

انا عن نفسى احيانا كثيير افضل التوقف لحد ما السيارة المتوقفة تتحرك مرة ثانية واستمر بالمشى خوفا من تغيير اتجاهى ويظهر لى حد فى المنطقة العمياء او يكون جاى من جانبى بسرعة او موش عايز ينتظر ويعطى لى فرصة بالتجاوز
انا اسف على التاخر في الرد
بالنسبه لموضوع التجاوز حضرتك بسيط جدا وحله سهل وهايفيدك في كل وقت :
الحل هو وانت ماشي لازم تنظر في المراه الوسط كل ثلاث ثواني يعني تحرك بس عينك ناحيه المرايه الوسط بلمحه صغيره كل ثلاث ثواني وعشان تحسب العمليه دي لازم تعد بالطريقه التاليه يعني تقول
(1001-1002-1003) وبعد كده نظره سريعه وخاطفه للمراه الوسط وهكذا وومكن تلحقها بنظره على المرايه الشمال بس دا بعد ماتتمكن شويه.....
دي هاتفيدك في انك اولا هاتبقى عارف اخبار الشارع وراك أول بأول
يعني لو حد ميل عليك فجأه هاتبقى انت عرف مين اللي وراك وعدد العربيات برده وبالاضافه هاتعرف برضه مكان العربيات اللي وراك فين،،، يعني هل العربيه اللي وراك في الحاره الاولى ولا التانيه ولا التالته وبالتالي تقدر تتحرك للشمال لو الحاره اللي جنبك فاضيه او تهدي عربيتك او تقف شويه لو فيه حد جنبك او كان جاي بسرعه ومش مديلك فرصه .....وكله بالممارسه هايجي

[aboharf]

بسم الله الرحمن الرحيم
نكمل الدروس
تشغيل السياره
احنا وصلنا الى كيفيه الجلوس الصحيح في السياره والمرايات وحزام الامان . طيب كيفيه تشغيل السياره ؟؟؟؟
اولا لازم نعرف ايه هو الفتيس او ناقل الحركه وهو بكل بساطه جهازيربط بين المحرك وعجلات السياره ذو تروس كثيره متصله ببعضها تقوم بتحويل القوه الصادره من المحرك الى العجلات لتحريك السياره سواء الى العجلات الاماميه وذلك اذا كانت السياره دفع امامي او الخلفيه اذا كانت السياره دفع خلفي ... المهم ان احنا بنستخدم ناقل الحركه او الفتيس لتحريك السياره الى الامام او الخلف......
طيب الكلام ده ليه ؟؟؟؟ عشان انا محتاج قبل ما اشغل العربيه اني افصل مابين العجلات والمحرك عشان العربيه ماتتحركش لما اشغل المحرك طيب اعمل ايه؟؟؟؟؟
بنظره على عصا الفتيس هنلاقي عليها ارقام 1 وتحتها رقم 2 ورقم 3 فوق جنب رقم 1 ورقم 4 تحت جنب رقم 2 ورقم خمسه فوق جنب رقم 3 وتحت رقم خمسه هانشوف حرف r جنب رقم 4__يعني 1و3و5 فوق وتحت هنلاقي 2و4وr .....طيب ايه الارقام دي ؟؟؟دي النقلات الخاصه بسرعات ناقل الحركه او الفتيس وهانتكلم عليهم في وقتهم نقله نقله.
المهم اللي انا عايز اقوله اني قبل ما اشغل العربيه لازم تكون عصايه الفتيس موجوده في الوسط تماما مابين هذه الارقام يعني لما احركها بايدي لازم العصايه تتحرك من اقصى اليمين الى اقصى الشمال وده احنا بنسميه المور او بنمور العربيه عشان نضمن انها ماتتحركش الى الامام في حاله اذا كانت العصايا موجوده في موضع الرقم 1 مثلا لان ده ممكن يسبب مشاكل......
طيب يعني لازم احرك عصايه الفتيس اقصى اليمين والشمال عشان اتاكد اني فصلت الحركه ولزياده التاكيد في حاجه كويسه ممكن اعملها اني بعد ما اعمل الحركه السابقه اني كمان اضغط على دواسه الدبرياش على اخرها وبكده ابقى ضمنت ان العربيه هاتدور من غير مشاكل لان الضغط على الدبرياش بيفصل مابين المحرك والفتيس....
طيب نتوكل على الله بعد مانمور الفتيس او نتاكد من فصل الحركه نجيب المفتاح وندخل المفتاح في الكونتك واللي هوا ورا الدركسيون ونحرك المفتاح بحركه دائريه الى الامام الى ان نسمع صوت المحرك اشتغل ودار وبمجرد ماتسمع المحرك دار ارفع ايدك من على المفتاح يعني بلاش تفضل ضاغط على المفتاح لفتره طويله يعني بعد ماتشغل المحرك وتتاكد انه اشتغل ارفع ايدك لانك لو طولت هاتسمع صوت خروشه جامده وده بيكون صوت المارش وممكن يتحرق منك فعشان كده وبكل بساطه مجرد مايدور المحرك ارفع ايدك من على المفتاح....
طيب عشان تطفى المحرك تعمل ايه بكل بساطه رجع المفتاح لورا وبكده انت وقفت المحرك عن العمل ....
نشرح حاجه بسيطه كده وهيا خاصه بالكونتاك او مفتاح العربيه ..........لما تحاول تشغل العربيه وتحرك المفتاح للامام هتلاقي ان فيه ثلاث حركات وانت بتدور المفتاح ::اول حركه بالمفتاح وهي بتوصل كهربا لكاسيت العربيه وومكن لو انت مستنى حد انك تطفى المحرك وتسمع بس للكاسيت اهو منها توفر بنزين برضه ههههههههههههه.......
تاني حركه للمفتاح وهيا حركه توصيل الكهرباء الى جميع الاكسسوارات في العربيه زي زجاج العربيه الكهربا والمرايات الكهربا ومروحه المكيف بس مش المكيف لان المكيف بيشتغل مع المحرك بالاضافه اذا كان فيه فتحه سقف يعني ممكن تشغلها على الحركه التانيه وهتلاقي المفتاح لو بصيت عليه موجود على موضع acc يعني تشغيل الاكسسوارات وكمان لما تدور المفتاح على الموضع ده هتلاقي شويه لمبات لونهم احمرنوروا في تابلوه العدادات منها لمبه الزيت وهيا شبه مصباح علاء الدين ههههههه ولمبه البطاريه وشكلها معروف ولمبه فرامل اليد ولمبه حزام الامان وفيه لمبه صغيره شكلها عامل زي المحرك ولونها اصفر ودي خاصه باعطال المحرك ..
طيب فايده الموضع ده او الحركه التانيه ايه ؟ فايدتها اني ممكن انسى اقفل الشباك مثلا بعد ماتطفي المحرك فامفيش داعي انك نشغل المحرك بس حط المفتاح على ال acc واقفل الشباك وبعد كده رجع المفتاح للخلف واسحبه لبره ...بس مافيش داعي ان احنا نطول على الحركه دي لان ممكن ان استخدامها لفتره اكتر من عشره دقائق انك تحرق الابلاتين او الكوندانسر وده بالنسبه للعربيات القديمه يعني....
تحريك السيـــــــــــــــاره
بعد مانعمل الخطوات السابقه من تظبيط الكرسي والمرايات وتركيب حزام الامان ونشغل العربيه ونتاكد ان لمبه الزيت اختفت ولمبه المحرك الصفرا ولمبه حزام الامان اختفوا ندخل بقى على التقيل
اعذروني نسيت اوقول حاجه (لازم تتعلم بالعربيه في مكان وااااااسع وبعيد عن العربيات والناس والاطفال خصوصا)
لماا نقعد على الكرسي لازم نعرف حاجه ان رجلينا اليمين هانخصصها بس للبنزين والفرامل والرجل الشمال للدبرياش فقط يعني هاتكون مهمتها فقط الضغط على الدبرياش عند تغيير وتحريك عصا الفتيس...
نضغط على دواسه الدبرياش الى ان تلتصق بارضيه السياره ...
(اضغط على الدواسه بالمنطقه الموجوده تحت مشط اصابع قدمك اليسار يعني -لاتضغط -على الدبرياش ببطن القدم بل اضغط بالمنطقه اللي بين اصابع قدمك وبين باطن القدم ،،، لاتضع كعب رجلك على الارض بل ارفعه قليله بمسافه خمس سنتيمترات ولا تضغط على الدبرياش وانت واضع كعب رجلك على الارض والا تسبب ذلك في شد عضلي في العضله الاماميه لقصبه الرجل يعني لما تضغط على الدبرياش اضغط بمقدمه القدم وارفع كعب رجلك ولما ترفع رجلك من على الدبرياش ارفعها بشكل كامل يعني حرك رجلك كلها بما فيهم مشط القدم وكعب الرجل ببطء ومش بسرعه)
دلوقت من تاني اضغط على الدبرياش كما ذكر سابقا الى اقصى مدى
نمسك عصا الفتيس وذلك بانك تضم اصابعك الاربعه وتلفهم حول العصا ويكون ابهامك من اعلى العصا على مكان الارقام وحرك عصا الفتيس ناحيتك الى اقصى اليسار ثم ادفعها الى الاعلى ناحيه الرقم 1 او الغيار الاول .... الان بعد التاكد من وضع الغيار الاول انظر امامك ضع يدك الاثنين على الدركسيون ثم ارفع قدمك الى الاعلى من على الدبرياش ببط ء (ومتنساش تكون رافع كعب رجلك شويه)الى ان تحس بان السياره اخذت بالتحرك الى الامام ...لما تحس بان السياره اتحركت ثبت قدمك على الدبرياش بهذه الوضعيه يعني ماترفعش رجلك من على الدبرياش اكتر من كده (وامشي لمسافه 20 متر)يعني هتلاقي ان الدبرياش مرفوع للنص بس ..دلوقت بعد ماحركت العربيه ووصلت لغايه نص رفعه للدبرياش اضغط دبرياش تاني وبرجلك اليمين اضغط ضغطه خفيفه جدا على الفرامل عشان نوقف العربيه:::ها قلبك بيدق والعرق يتصبب منك:::: عادي هههههه....خليك دايس دبرياش وامسك عصايه الفتيس وانت قالب وضعيه ايدك يعني خلي ابهامك الى الاسفل واصابع ايدك تروح للناحيه التانيه عكس وضعيه مسك الفتيس واحنا بنحط النقله الاولى .. انزل بعصايه الفتيس من الوضع1 الى وضعيه المور وروح ناحيه اقصى اليمين ثم انزل الى الاسفل باتجاه حرف r ومعناه هنا الريفيرس او المارشيدير او الرجوع للخلف ،،، بص على المرايات الثلاثه كويس ولف رقبتك للخلف عشان تشوف مين اللي وراك وارفع رجلك اليمين من على الفرامل ثم ووبطء ارفع قدمك اليسار من على الدبرياش كمان زي ماقلنا الاول لغايه ماتحس ان العربيه اتحركت وخلي الدبرياش على النص تقريبا ،، برضه ارجع لمسافه عشرين متر ودوس دبرياش وبعدين فرامل ووقف العربيه ،،، رجع عصايه الفتيس الى وضعيه المور وارفع رجلك من على الفرامل والدبرياش وريح نفسك ثواني وابتدي من اول وجديد نفس الحركات قدام وورا وفي كل مره حاول انك ترفع رجلك اكثر من على الدبرياش ولكن ببطء حتى تصل الى مرحله انك ترفع رجلك بشكل كامل من على الدبرياش ولما تحاول الوقوف في كل مره اضغط دبرياش ومن ثم الفرامل الى ان تتوقف العربيه واوعى في المرحله دي تستخدم بنزين ابدااااااااااااا :::: خليها للدرس القادم::::......
من خلال اللي فات عرفنا ايه ؟؟؟؟؟
-عرفنا ازاي نضغط على الدبرياش ووضع رجلينا بيكون ازاي
-لاحظنا ان الانطلاقه كانت من غير مانستخدم بنزين يعني ممكن نحرك العربيه على السلانسيه يعني البنزين اللي بيشغل المحرك فقط
-وصلنا الى نقطه الاحتكااااااااااااك
يعني ايه نقطه احتكاك يعني احتكاك اسطوانه الدبرياش وتلامسها مع اسطوانه المحرك (ترس الفلام)اوسطوانه الدبرياش دي موجوده في الفتيس ومجرد تلامسها مع اسطوانه المحرك اللي دائما بتكون شغاله وبتدور بتاخد القوه الصادره من المحرك وبتنقلها الى الفتيس اللي بدوره بينقل الحركه دي الى العجل يعني احنا مجرد ما وضعنا الفتيس على النقله 1 ورفعنا رجلينا ببطء من على الدبرياش لغايه النص خلينا اسطوانه الدبرياش تروح لعند اسطوانه المحرك وتلتحم بيها وبالتالي تتحرك العربيه
- النقله الاولى : ليه لما تحركنا استخدمنا الغيار الاول ؟؟؟؟لانه اقوى نقله او اقوى غيار واللي بيحرك العربيه بكامل حمولتها وبركابها من حاله الثبات الى حاله الحركه وبالتالي ماينفعش لما ابتدي حركه العربيه ان ابتدي مثلا على الغيار التالت او التاني مثلا لان النقلات دي ضعيفه ووممكن ان العربيه تطفي منك او تكون انطلاقتها بطيئه جدا لغايه ماتتحرك او تنطلق للسرعه المناسبه.
اخيرا سامحوني على الاطاله والاخطاء الاملائيه ونكمل في وقت لاحق ان شاء الله

[aboharf]

شوفتوا نسيت اهم حاجه (فرامل اليد)هههههههههههههههههههههههههههههههههههههههههههه
طبعا فرامل اليد دي موجوده ورا الفتيس وهيا تعتبر في المقام الاول فرامل امان وبنستخدمها يدويا واهم عمل ليها انها بتعمل فرامل على العجل الخلفي فقط وزي ماقلنا هيا للامان فقط يعني بعد ماتوقف العربيه تماما في الباركن او في الجراج لازم ترفعها
وعشان تنزلها او تعرف هيا شغاله ولا لاء
هيا ذراع موجود خلف عصا الفتيس واذا كانت مرفوعه للاعلى معنى كده انها شغاله وبالتالي العربيه مش هاتتحرك وكمان بص على تابلوه العدادات هتلاقي لميه حمرا عباره عن دايره داخلها علامه تعجب والدايره بين قوسين لو اللمبه دي باينه معناها ان اليد مرفوعه
- عشان تنزلها اولا امسكها من الامام ارفعها الى الاعلى قليلا جدا ثم اضغط بابهامك على الزر الامامي ثم نزلها الى الاسفل
يعين لما تبتدي الحركه بالعربيه ابدا كالتالي بالترتيب:
:- اضغط دبرياش
:-ضع ناقل الحركه على الوضع 1
:-نزل فرامل اليد
:- ارفع قدمك من على الدبرياش ببطء ثم تحرك
(جل من لا يسهو)