نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[aboharf]

بسم الله الرحمن الرحيم

السلام عليكم ورحمه الله وبركاته
بعد السلامات والتحيات الطيبات ارجو من الله ان يكون الجميع في اتم صحه وعافيه .
اسئله استاذ حسين شيقه وجميله ،وجهدك مشكور واحسنت في عمل الرسم التوضيحي بس انا ليا تعليق بسيط يا استاذي
-ياحبذا لو حضرتك كنت وضعت كل سياره في حاره منفصله عشان الشرح يكون اوضح شويه لان حضرتك وضعت كل سيارتين في حاره وده ممكن يصعب الامور خاصه على المبتدئين.الا اذا كان الشارع مش مخطط فعند حضرتك كل الحق....
-حضرتك بس وضحلنا عدد الحارات في الشارع (حارتان ام ثلاث حارات).
-كمان ياريت حضرتك تذكر المسافات تقريبا او تقديريا يعني المسافه من نهايه منزل الكوبري الى بدايه الييوتيرن كانت كام تقريبا.
-انا اسف لحضرتك وبقدر جدا مجهودك بس عشان نقدر نوضح الصوره صح .(نرجع لاسئله حضرتك).
1- افرتض ان السيارة الخضراء ترغب فى الاتجاه على طول وهى نازلة اصلا من على كوبرى
ايه اللى المفروض يعمله السائق ويراعيه فى الموقف ده
-سبق واتكلمنا عن النظر في المرايه الوسط كل ثلاثه ثواني وبرضه المرايه الشمال كل ثلاثه ثواني دا في حاله اذا كنا ماشيين في الحاره اليمين وبما ان حضرتك كنت ماشي في الحاره الشمال فبالتالي حضرتك هتعمل العمليه دي على المرايه الوسط واليمين لان مافيش حد هايطلع لحضرتك من الرصيف الشمال..
-طيب لما نواجه موقف زي ده ان سياره قدامنا بطأت سرعتها لدخول اليوتيرن ،فكل اللي عليا اعمله ان اهدي سرعتي باستخدام فرامل بسيطه وابص في المرايات الوسط واليمين بلمحات سريعه بالاضافه الى نظره خاطفه على الكتف الايمن فإذا مكانش فيه سيارات بجانبي الايمن ادي اشاره يمين وبسرعه انقل على الحاره اليمين (طبعا الكلام ده عايز شويه سرعه يعني مش لازم افكر وافكر وافكر ، هيا خطوه واحده ...سياره بتهدي قدامي ،ابص في مراياتي والكتف ،مافيش سيارات ادي اشاره واغير الحاره فورا).
طيب لو بصيت في المرايات والكتف ولقيت الحاره اليمين فيها سيارات ،، بكل هدوء اهدي السرعه واغير نقله الفتيس من الرابع للتالت مثلا او من التالت للتاني(واعمل غيار عكسي للعربيه) وافضل اهدي سرعه السياره حتى وان اضطريت اني اتوقف تماما وانا ببص قدامي وبلمح المرايات برضه لغايه ما الاقي فرصه واول ما الاقي الفرصه وان مافيش سيارات في الحاره اليمين او ان السيارات القادمه في الحاره اليمين بقت بعيده مباشره ادي اشاره يمين وادوس بنزين واروح الحاره اليمين...
بس لازم اخلي بالي من حاجه الاوهي اني ماالزقش في العربيه اللي قدامي او اللي بتعمل يوتيرن يعني اخلي مسافه امان كبيره بيني وبين السياره اللي امامي بحيث اني اقدر اتجاوزها بكل سهوله لما الاقي فرصه للتجاوز او عند التاكد من خلو الحاره اليمين وبالتالي الانتقال اليها.....

2- افترض ان السيارة الخضراء ترغب فى الدخول على اليوتيرن
- اولا:تذكر انك نازل من منزل كوبري يعني سرعتك عاليه وبرضه سرعه السيارات اللي وراك عاليه فلازم برضه تكون مقرر اولا:انك عايز تعمل يوتيرن ،
ثانيا :لازم تبص في المرايه الوسط وتشوف السيارات اللي وراك وتقدر سرعتهم اقد ايه،
ثالثا:تنبه اللي وراك انك ناوي تعمل يوتيرن او انك هاتهدي سرعتك عشان يهدي سرعته ومايخبطش فيك من الخلف
رابعا:ازاي ننبه اللي ورانا وذلك بأمرين :
1_انك تدوس على الفرامل مبكرا شويه وبشكل هادي وبسيط وبالتالي نور الفرامل الاحمر اللي ورا في سيارتك هايضيئ وهاينبه اللي وراك وكمان ادي اشاره شمال فبالتالي هايفهم انك هاتعمل يوتيرن فهايهدي سرعته ، وبرضه باللي هاتعمله حضرتك ده هاتدي فرصه للي وراك انه يبص في مراياته ويتجاوزك اذا كان مستعجل ومش بعيد بعد التصرف السليم اللي عملته حضرتك انه ينزل يدعيلك وياخدك بالاحضان لانك لم تتصرف بطريقه عشوائيه ونبهته وابعدت عنه خطر الاصطدام بك من الخلف...
2_ لو قررت انك تعمل يوتيرن فجاءه وبدون مقدمات استخدم اشارات الانتظار الاربعه اول حاجه و استخدم فرامل (وانت ونصيبك)،،،
خامسا : هدئ سرعه السياره باستخدام الغيار العكسي(هاشرحه لاحقا).

3- افترض ان السيارة الصفراء ترغب فى الدخول على اليوتيرن
-برضه مرايات وسط ويسار ونظره كتف يسار سريعه ولومافيش سيارات ،، اشاره يسار ويتم تغير الحاره من اليمين الى اليسار بكل سلاسه.
-اما اذا كانت هناك سيارات بعد اتخاذ الاحتياطات الازمه يتم تهدئه السرعه ونقل الغيار الى سرعه اقل مع المحافظه على مسافه الامان بين السيارات وعند وجود فرصه يمكن تبديل الحاره و تغير الاتجاه.
4- افترض ان السيارة الصفراء ترغب فى السير على طول
زي ماهو طريقه طوالي اخضر زي لون السؤال بدون اي حاجه...هههههههه
5- افترض ان السيارة الحمراء ترغب فى الاتجاه الى اليمين طوالى
طبعا بما ان الحاره اليمين مشغوله او الناصيه فيها سيارات واقفه فعلى السياره الحمراء بكل بساطه انه يطلع الى الامام قليلا حتى يكشف الشارع او حتى يرى القادم من اليسار ويستخدم الاشاره اليمين ولما يلاقي الحاره التانيه خاليه يدخل بس لازم يتاكد من خلو الحاره التانيه او اللي هيا في اقصى الشمال(انا بتكلم على حسب الرسم ) وبعد ما يدخل(وربنا يسترها معاه)عليه انه يزيد سرعته قليلا ويحاول انه يرجع للحاره اليمين بعد ما يتجاوز كل السيارات اللي واقفه....ليه ؟؟؟؟؟؟؟؟ ....لان ممكن تكون هناك سيارات نازله من على الكوبري بسرعه شديده فلازم انه يفضي الحاره او الشارع بسرعه وخاصه اذا كان فيه واحد نازل وماعندوش فرامل!!!!
6- افترض ان السيارة الحمراء ترغب فى الاتجاه الى اليمين ثم الى اليوتيرن
هو طبعا بما ان اليمين مش فاضي (ده طبعا على حسب الرسم)
فبالتالي مش هايقدر يروح يمين من الحاره الاولى او الحاره اللي في اقصى اليمين ....
طيب هاعمل ايه ؟؟؟؟؟؟؟؟
اولا : عشان السياره الحمراء تروح لليوتيرن مع عدم خلو الحاره الاولى او اليمين فبالتالي يجب على السياره الحمرا ء انه تطلع للامام قليلا مع استخدام اشاره يسار ثم عند التاكد من خلو الحاره اليسار او اقصى اليسار من السيارات يتم قطع الشارع بالعرض ثم الالتفاف الى اليمين باتجاه اليوتيرن مع عدم نسيان الاشاره اليسار (بالرغم من اننا هانتوجه لليمين) انا عارف انه كلام غريب شويه بس هو ده اللي بيطبق في الدول الاوروبيه وخاصه السويد،،، وخاصه اذا كان اليوتيرن قريب من فتحه الخروج من اليمين....
كمان مره :::ادي اشاره يسار ، وتاكد من خلو الحاره اللي اقصى اليسارثم لف السياره يمين وروح ناحيه اليوتيرن وبكده هاننبه الناس وهانعرفهم اتجاهنا فين ورغبتنا ...
طبعا ده بره اما عندنا فارجوكم اسمعوا كلام الاستاذ اسعد ربنا يباركله جاب من الاخر وريحنا......
- افترض ان السيارة الحمراء ترغب فى الاتجاه الى اليمين ثم الانتقال الى الحارة اليسار

حسب الرسم قلنا مافيش يمين فاضي فبالتالي يعمل اللي قلناه في السؤال السابق يستخدم الاشاره اليسار ويقطع الشارع بالعرض ويروح للحاره اليسار مباشره ويلف يمين وياخد طريقه (طبعا بعد التاكد من خلو الحاره اليسار)
اتمنى اني اكون اجبت على اسئله حضرتك بشكل مفهوم واعذرني على تطويل الشرح والكلام
وانا مع حضرتك جدا في موضوع الرسومات لان حضرتك كده وفرت علينا مجهود كبير جدا في الشرح ... وشكرا

[aboharf]

بسم الله الرحمن الرحيم

استاذي الاستاذ حسين انا رجعت مخصوص علشان ارد على حاجه صغيره لفتت انتباهي كنت حضرتك ذكرتها
لكن النهارده زودت الرايديتير مياه عادية من الحنفية
وقلت كفاية مياه خضراء عمال على بطال ممكن "تاكل" الراديتير
يعنى اعتقد ان المياه الخضراء موش لازم كل مرة تزود منها على طول
شوية كده وشويه كده
ولا ايه رايكم ؟
هاطلب من حضرتك حاجه بسيطه ان حضرتك تروح لواحد بتاع رداتيرات يعمل للعربيه غسيل كامل لدوره التبريد وذلك بانه يعمل التالي:
1- يفك الريداتير ويفك العلبه اللي من فوق ويسلك الرييداتير ماسوره ماسوره عشان يشيل الصدا والتكلسات اللي داخل مواسير الميه.
2-بعد مايخلص وينضف الريداتير بميه النار ويسلكه يقفل العلبه اللي فوق بالقصدير ويتاكد انه مافي اي ثقب في العلب اللي فوق واللي تحت وخليه يلحم اي ثقب يظهر من خلال تسرب الميه وايضا يوضب او يغير غطا الريداتير اذا كان بيسرب ميه
3-خليه يغسل المجاري الداخليه لمحرك السياره بالمياه المندفعه الشديده من الخرطوم مع تشغيل محرك السياره في نفس الوقت عشان المحرك يطلع اللي في قلبه
4-يفك دبه الميه اللي نحط فيها الميه وينضفه بميه النار والتايد كويس ويتاكد ان مافيهاش شرخ وبرضه يتاكد ان خراطيم الميه كلها سليمه مش ناشفه ومشققه عشان مايكونش فيه تسريب
5-بعد ماتغسل المحرك وتسلك الريداتير وتركبهم وتركب الدبه وتتاكد من الخراطيم ابعت هات ميه خضرا وخليه يحطهالك في الريداتير والمحرك واملا الدبه لحد علامه MAX وماتزودش عنها يعني ماتملاش الدبه على الاخر لان الميه في المحرك لما بتغلي بينتج عنها ضغط وبخار ميه وبالتالي هتلاقي ان الدبه ممكن تنفجر او ان غطاها يسرب ميه او تلاقي الحراره بتاعه العربيه مرتفعه جدا بالرغم من انك مالي الدبه على الاخر ودي الغلطه اللي بيقع فيها معظمنا نملا ميه للاخر وخلاص معتقدين ان ده هايبرد العربيه
دايما املاها لحد علامه MAX وبعد ماتعمل العمليه دي انسى الحراره بس كل يوم بص على الدبه اتاكد ان الميه عند العلامه المناسبه وخلاص وامشي مطمن .... العمليه دي اعملها كل 6 شهور وبالتالي هاتضمن سلامه دوره التبريد بشكل دائم
::::::تحذيري لحضرتك اياك ثم اياك ثم اياك تستعمل ميه حنفيه للعربيه لان الميه دي هيا اللي هتاكلك المحرك من جوا واللي هتبوظلك الريداتير عشان نسبه الكلور اللي فيها وهاتسبب صدا للمحرك وللريداتير والمشكله انه بمرور الوقت ميه الحنفيه هتاكل في المجاري المائيه في المحرك واللي ممكن تطلب منك انك تفك المحرك عشان تظبط الحاجات اللي تاكلت من الداخل ودي حاجات صعبه وموالها طويل
كمان هاتسبب انسداد المواسير في الريداتير وكل مره محتاج تفك الريداتير وتسلك وميه وفيلم مالهوش داعي
اما الميه الخضر فيها ميه معالجه كميائيا واهم خصائصا
- لاتسبب الصداء
-تحافظ على نظافه المحرك
-تحافظ على انخفاض حراره المحرك بشكل دائم
بس اهم حاجه لما تشتري علبه الميه الخضراء انك تتاكد من تاريخ الانتاج والانتهاء
ممكن حضرتك تدخل على القسم الخاص بالصيانه في المنتدى وتدور على المواضيع الخاصه بدوره التبريد وتعرف عنها بشكل اكبر.....
.أولا أنا من المبتدئين اللى انت بتفيدهم بالدوره الجامده دى
ثانيا لو تعرف مقدار إمتنانى ليك وإحساسى إنك هيبقى ليك فضل جامد جدا فى تعليمى السواقه باللى كتبته فى الصفحات السابقه مش هتصدق أنا لسه داخله النهارده على الموضوع وبجد إنت كاتب كل حاجه بالثانيه واللحظه أنا لسه مجربتش الكلام ده عملى ومن بكره إن شاء الله هنسى كل اللى إتعلمته فى مدرسة السواقه (هو كده كده إتنسى لأنهم بيعلموك تدوس إزاى وخلاص مش بيوصلو المعلومه زى ماانت عامل كده) وكإنى أول مره هاسوق عربيه وأنفذ اللى بتقوله ومن أهم المشاكل اللى انت حليتها بسلاسه جدا حكاية الدبرياج وأتعود عليه إزاى وأخفف قد إيه .
بجد مش عارفه أقولك إيه ربنا يحقق لك كل اللى تتمناه
ثالثا أحلى حاجه فى اللى بتكتبه برضه بتعلم فى النص الحركات الروشه الجريئه زى حكاية تنطيط العربيه مثلا
رابعا أنا لى عندك رجاء نفسى على ايديك الواحد يوصل لدرجة الإحتراف - السواقه المجنونه (طبعا بالمقرده على التحكم ) الغرز فى الطرق بس ده طبعا مش دلوقت فياريت ماتسيبش الموضوع ده خالص
خامسا وده أهم حاجه أنا جيبت الprenter (الطابعه) وطبعت الموضوع علشان أخلى الورق فى العربيه وأنا باتدرب ولما أحتاج لحاجه أبص على الورق
ومستنيين جديدك ومتشكره جدا ليك وطبعا ميرسى جدا لصاحب الموضوع الأصلى اللى أتاح لنا الفرصه للتعرف بيك وللإستفاده من معلوماتك الدقيقه والقيمه

وانا اذا كنت كسلت شويه عن الدوره لان كان عندي شغل فانا حابب اقول لحضرتك ان عندي اصرار شديد ان اكملها حتى لو ده اخد من وقتي لان كلمات شكرك الرقيقه والجميله اخجلتني جدا وجعلتني احمد الله على ان الموضوع هايفيد حضرتك
طبعا ماننساش نرجع الفضل للاستاذ حسين صاحب الموضوع اللي مشجعنا دايما
وانتظروا البقيه قريبا جدا
فيه حاجه قراتها في المشاركات بصراحه ومن غير زعل معجبتنيش وده رايي يا ريت مايزعلش صاحبها وهيا دي
1: المرايات و خصوصا المرايا اليمين ، لازم تبص فى المراية اليمين قبل ما تروح يمين و الشمال قبل ما تروح شمال ، و لو حبيت تهدي عشان مطب لازم تبص فى مراية الصالون قبل الفرملة عشان محدش يخبطك من ورا و لو لقيت مطب كبير و انت على سرعة استعمل فرملة اليد مع الفرملة العادية لو المسافة مش كفاية و نزلها بعد ما العربية تهدا سرعتها قبل ما تنزل من المطب يعني لا يفضل انك تاخد المطب و انت مفرمل عشان الصدمة و العفشة.
لو على سرعة عالية فوق ال 120 و لا قدر لقيت مطب أو فى حاجة مش هينفع تفاديها أو مفيش وقت و هتفرمل استخدم الفرامل العادية على الآخر لغاية ما العربية سرعتها تقل شويةو بعدها مباشرة شد فرامل اليد و نفس الكلام لو هتخبط عربية لا قدر الله ما تنساش الهاند بريك مهم جدا جدا .
فيه نوعين من الفرامل في السياره
فرامل تعمل بنظام هيدروليكي وهيا فرامل القدم وفكرتها انك لما تضغط على فرامل القدم يعمل ماستر الفرامل على توزيع ضغط زيت الفرامل من خلال مواسير دقيقه الى الاربع عجلات لتهدئه سرعتها وتوقيفها0
النظام التاني فرامل يدويه وهيا فرامل اليد وكل عملها انه تعمل عل تامين السياره عند التوقف التام وذلك بعمل فرمله على العجل الخلفي فقط من خلال سلك يشد يدويا من خلال ماسكه الفرامل الموجوده بي الكرسيين الاماميين0
من خلال اللي ذكرناه سابقا نعرف ان احنا لما نهدي السرعه لازم بس نستخدم فرامل القدم وهيا الاقدر على ايقاف السياره بشكل تام من خلال ايقاف الاربع عجلات 0
لو احنا بقى وخاصه كمبتدئين حبينا نوقف العربيه عن طريق فرامل اليد مع فرامل القدم ممكن ده يخلي العربيه تلف حول نفسها او بمعنى اخر هاتعمل خمسه وممكن تتقلب 0
يعني احنا لو ماشيين بسرعه وفوجئت بان فيه مطب قدامي ورحت نسيت ورفعت فرامل اليد بايدي اليمين وايدي الشمال لسه على الدركسيون كده انا بثبت العجل الخلفي وممكن ايدي الشمال تتحرك بالدركسيون فالسياره هاتلف حول نفسها لاني ثبت العجل الخلفي والعجل الامامي كان حر وبالتالي العربيه لفت حوالين نفسها وده خطر على المبتدئين
طيب فايدتها ايه بقى فرامل اليد في التهدئه؟؟؟؟؟؟
ولا حاجه لان اساسا انا لما بضغط فرامل القدم التيل بتاع العجلات الاربعه بيضغط على الطنابير وبيوقف العجل
طيب فرامل اليد بتعمل ايه ؟؟؟ انا لما برفع فرامل اليد بشد على التيل الخلفي اللي انا اساسا ضاغط عليه يعني ولا ليها اي تاثير بل على العكس ممكن انسى وانا ماشي وارفعها الاول وبالتالي تسبب مشاكل.
عايزين تعرفوا ازاي ده ممكن يحصل ؟؟
في بعض الاحيان ممكن يكون مساتر زيت الفرامل بتاع العجلات الاماميه مش شغال او فيه عطل وانت ماشي ورحت ضاغط فرامل القدم فجاه تعرفوا ايه اللي هايحصل؟؟؟؟؟؟؟
هتلاقوا شنطه العربيه لفت بيكوا من ورا والعربيه وقفت بشكل اعوج مش مستقيم هيا نفس فكره رفع فرامل اليد وانت بتهدي والتي ليست لها اي فائده غير انها بتأمن توقف العربيه في الباركن او لو واقف على مطلع او في منزل كوبري0
ارجو ان المعلومه تكون وصلت بشكل مبسط

[lobna_yaseen]

اشتريت كمان علبة اسبراى wd 40
رشيت بيها الكاولين بتاعت العربية ... والزجاج ... اصبح بينزل ويطلع فى منتهى السهولة
والمفاتيح بتفتح وتقفل بشكل ممتاز
وكمان رشيته على كام استيكر وحليات كانت ملزوقة على العربية وانا ماكنتش عايزها شكلها "فلح" هههههههههههههههههههههه وكان ممتاز بصراحة فكها على طول
العلبة دى فى منها بـ 12 تقريبا الحجم الصغير
وفيه حجم بـ 14
وفيه حجم بـ 20
والحجم الكبير بـ 25
العلبة دى ضرورية جدا وبتنفع فى حاجات كثيير ... تزيل الصدأ وتزيت المكان كمان
ممكن ترشه على الكوالين والمفصلات وإزالة الاتساخات وخلافه

إزيك ياأستاذ حسين عامل إيه فى السواقه أنا حالفه إنى مش هتمكن من السواقه إلا لما تعلمنا إنت على المنتدى من خبرتك هههههههه فشد حيلك علشان تبقى من المحترفين وتنورنا بتعليقاتك ولوانك برضه جزاك الله خير كل ماتعرف حاجه من صحابك بتقولها لنا على طول ربنا يكرمك بجد ,
بص ياسيدى أنا كنت عايزه أسألك على السبراى اللى انت اشتريته هو ده إشتريته منين بالضبط وكمان سؤال مهم جدا هو ينفع أزيت بيه متاح الكونتاكت ؟ علشان النهارده لاقيت المفتاح معووج شويه هو الحقيقه علق من يومين وأنا بشيله من الكونتاكت فعملت مفتاح تانى وعدلت إعوجاج المفتاح الأصلى بس الراجل بتاع المفاتيح قال لإبنى (هو اللى راح يعمله) بلاش تستعملوه تانى علشان هيتعوج تانى وممكن يتكسر جوه (صح كده ولا لأ) فأنا كنت عايزه أزيت المفتاح الجديد علشان مايعلقش إيه رأيك ؟؟ أو رأى الإخوه الأعضاء اللى بيفيدونا دايما بكل خير وشكرا ليك على معلوماتك المفيده جدا

[lobna_yaseen]

وانا اذا كنت كسلت شويه عن الدوره لان كان عندي شغل فانا حابب اقول لحضرتك ان عندي اصرار شديد ان اكملها حتى لو ده اخد من وقتي لان كلمات شكرك الرقيقه والجميله اخجلتني جدا وجعلتني احمد الله على ان الموضوع هايفيد حضرتك
طبعا ماننساش نرجع الفضل للاستاذ حسين صاحب الموضوع اللي مشجعنا دايما
وانتظروا البقيه قريبا جدا


ياريت ياأستاذ aboharf (بما إنك الأستاذ بتاعنا ) ف إحنا مش هنحرمك من الثواب وهنغلس عليك ونسألك أسئلتنا اللى محتاجنها هههههه ربنا يكرمك

ممكن حضرتك تقول فى الدرس اللى جاى أو اللى بعده مش مشكله بس ماتنساش تدخل فى الموضوع ده لأنى محتاجاه جدا وهو الطلوع على الكبارى إزاى بالبنزين وإزاى بالغيار المناسب من غير ماتقف العربيه منى ولو الطريق وقف فى الطلعه على الكوبرى أعمل فرامل يد ولا الفرامل العاديه بس الفرامل العاديه لو سبتها علشان أكمل الطريق لما يفتح وأدوس بنزين هترجع لورا واكمل مشى إزاى أدوس زياده بنزين وأغير على المطلع للغيار اللى بعده ولا إيه (أنا عارفه إنى أسألتى تفصيليه وطويله بس اللى مطمنى إنك أجوبتك تفصيليه أكر ووافيه ثانيه بثانيه)
وفيه موضوع تانى الله يخليك هو الرجوع للخلف يعنى أنا لما أرجع لورا عايزه أرجع يمين تلاقينى راجعه شمال والعكس راجعه شمال أرجع يمين مهما قالولى عليها لأنها بتكون لحظه يقولوها وبنساها بس انت طبعا حاجه مختلفه فتعليقاتك بالنسبه لى مرجع مهم جدا زى الكتب كده
وآخر حاجه بقى (معلش تقلت عليك) نفسى تعمل درس كامل عن سواقة الستات وإيه العيوب اللى بتخلى أى واحد راكب ورا عربية ست يعرف إن اللى سايق ست من غير مايشوف وإزاى نتلاشاها كستات ونبقى محترفين زى الرحاله
طبعا هتضحك على بس لو عملت كده هتستريحوا مننا أوى يارجاله من سواقتنا اللى مضايقاكم ولا إيه؟؟ ومتشكره جدا ليك على اللى فات واللى جاى إن شاء الله

[A.Saad]

وانا اذا كنت كسلت شويه عن الدوره لان كان عندي شغل فانا حابب اقول لحضرتك ان عندي اصرار شديد ان اكملها حتى لو ده اخد من وقتي لان كلمات شكرك الرقيقه والجميله اخجلتني جدا وجعلتني احمد الله على ان الموضوع هايفيد حضرتك
طبعا ماننساش نرجع الفضل للاستاذ حسين صاحب الموضوع اللي مشجعنا دايما
وانتظروا البقيه قريبا جدا


ياريت ياأستاذ aboharf (بما إنك الأستاذ بتاعنا ) ف إحنا مش هنحرمك من الثواب وهنغلس عليك ونسألك أسئلتنا اللى محتاجنها هههههه ربنا يكرمك

ممكن حضرتك تقول فى الدرس اللى جاى أو اللى بعده مش مشكله بس ماتنساش تدخل فى الموضوع ده لأنى محتاجاه جدا وهو الطلوع على الكبارى إزاى بالبنزين وإزاى بالغيار المناسب من غير ماتقف العربيه منى ولو الطريق وقف فى الطلعه على الكوبرى أعمل فرامل يد ولا الفرامل العاديه بس الفرامل العاديه لو سبتها علشان أكمل الطريق لما يفتح وأدوس بنزين هترجع لورا واكمل مشى إزاى أدوس زياده بنزين وأغير على المطلع للغيار اللى بعده ولا إيه (أنا عارفه إنى أسألتى تفصيليه وطويله بس اللى مطمنى إنك أجوبتك تفصيليه أكر ووافيه ثانيه بثانيه)
وفيه موضوع تانى الله يخليك هو الرجوع للخلف يعنى أنا لما أرجع لورا عايزه أرجع يمين تلاقينى راجعه شمال والعكس راجعه شمال أرجع يمين مهما قالولى عليها لأنها بتكون لحظه يقولوها وبنساها بس انت طبعا حاجه مختلفه فتعليقاتك بالنسبه لى مرجع مهم جدا زى الكتب كده
وآخر حاجه بقى (معلش تقلت عليك) نفسى تعمل درس كامل عن سواقة الستات وإيه العيوب اللى بتخلى أى واحد راكب ورا عربية ست يعرف إن اللى سايق ست من غير مايشوف وإزاى نتلاشاها كستات ونبقى محترفين زى الرحاله
طبعا هتضحك على بس لو عملت كده هتستريحوا مننا أوى يارجاله من سواقتنا اللى مضايقاكم ولا إيه؟؟ ومتشكره جدا ليك على اللى فات واللى جاى إن شاء الله

على ما استاذنا الكبير يرد
اسمحوا لى ادخل

لطلوع على الكبارى إزاى بالبنزين وإزاى بالغيار المناسب من غير ماتقف العربيه منى ولو الطريق وقف فى الطلعه على الكوبرى أعمل فرامل يد ولا الفرامل العاديه بس الفرامل العاديه لو سبتها علشان أكمل الطريق لما يفتح وأدوس بنزين هترجع لورا واكمل مشى إزاى أدوس زياده بنزين وأغير على المطلع للغيار اللى بعده ولا إيه

اولا لو سرعتك بطئت على المطلع لازم تجيبى الغيار اللى بعده لان الموتور هيكون عزمه ضايع
الكلام ده لو لسه ماشية
ثانيا كل ما يكون المطلع عالى او سرعتك بطيئة خدى المطلع على غيار قليل وكذلك لو العربية محملة علشان يكون فيها عزم
انتى بتطلعى المطلع بالبنزين عادى
لازم تلتزمى حارتك وبلاش تخطى
لو فيه ملف فى المطلع
ياما تفرملى او تشيلى رجلك من البنزين قبلها - حسب سرعتك - بس بلاش الفرملة فى الملف نفسه

لو الطريق واقف على المطلع
فيه طريقتين
الاولى
دبرياج وفرامل وبنزين
دى بتمشى على الاول غالبا مادام المطلع واقف ، اما تقفى هتدوسى فرامل ودبرياج
وتفضللى ماسكة الاتنين طول مانتى واقفة
اما الطريق يتحرك
تخفى رجلك من الدبرياج ولازم الدبرياج الاول لحد اما تحسى ان صوت العربية اتغير او الار بى ام اتغير لو عندك او ان العربية عايزة تتحرك ، تقومى ناقلة رجلك من الفرامل للبنزين وترفعى الدبرياج سنة وتدوسى بنزين وتطلعى عادى
النظرية هنا ان النقطة اللى شلتى فيها رجلك من الفرامل بتكون نقطة ابتدا الموتور يتوصل فيها بالعجل عن طريق التروس والقوة اللى رايحة للعجل كافى انه ما يحركش العربية لا قدام ولا لورا

مقدار السنة اللى بتشيلها من الدبرياج دى بتتعرف من خبرتك فى عربيتك وممكن تكون متغيرة عن نفس النقطة اللى فى الارض المستوية
عيب الطريقة دى انها حمل على الدبرياج بتهلك مكوناته على المدى البعيد
الموضوع مش سهل وعايز تمرين علشان ما ترجعش منك

الطريقة التانية
نفس الطريقة بس بدل الفرامل فرامل اليد ودى افضل للمبتدئين
بتمشى ةتقفى بالفرامل والدبرياج وتقومى شادة فرامل اليد وبعدين تشيلى رجلك من الفرامل العادية وممكن تمورى العربية وتشيلى رجلك من الدبرياج
اما تعوزى تتحركى
تدوسى دبرياج
تاخدى غيار
ترفعى سنة دبرياج زى ما قلنا فوق
تحطى رجلك على البنزين تدوسى البنزين و
طبعا نزلى الفرامل اليد بعد ما تدوسى سنة البنزين

[lobna_yaseen]

على ما استاذنا الكبير يرد
اسمحوا لى ادخل

ياسلام ياسيدى ياريت ربنا يجعله فى ميزان حسناتك وفى الآخر إحنا (المبتدئين) المستفيدين

اولا لو سرعتك بطئت على المطلع لازم تجيبى الغيار اللى بعده لان الموتور هيكون عزمه ضايع

لو سمحت انت قصدك اللى بعده زياده ولا أقل ؟

الكلام ده لو لسه ماشية
ثانيا كل ما يكون المطلع عالى او سرعتك بطيئة خدى المطلع على غيار قليل وكذلك لو العربية محملة علشان يكون فيها عزم
انتى بتطلعى المطلع بالبنزين عادى
لازم تلتزمى حارتك وبلاش تخطى
لو فيه ملف فى المطلع
ياما تفرملى او تشيلى رجلك من البنزين قبلها - حسب سرعتك - بس بلاش الفرملة فى الملف نفسه

لو الطريق واقف على المطلع
فيه طريقتين
الاولى
دبرياج وفرامل وبنزين
دى بتمشى على الاول غالبا مادام المطلع واقف ، اما تقفى هتدوسى فرامل ودبرياج
وتفضللى ماسكة الاتنين طول مانتى واقفة
اما الطريق يتحرك
تخفى رجلك من الدبرياج ولازم الدبرياج الاول لحد اما تحسى ان صوت العربية اتغير او الار بى ام اتغير لو عندك او ان العربية عايزة تتحرك ، تقومى ناقلة رجلك من الفرامل للبنزين وترفعى الدبرياج سنة وتدوسى بنزين وتطلعى عادى
النظرية هنا ان النقطة اللى شلتى فيها رجلك من الفرامل بتكون نقطة ابتدا الموتور يتوصل فيها بالعجل عن طريق التروس والقوة اللى رايحة للعجل كافى انه ما يحركش العربية لا قدام ولا لورا

مقدار السنة اللى بتشيلها من الدبرياج دى بتتعرف من خبرتك فى عربيتك وممكن تكون متغيرة عن نفس النقطة اللى فى الارض المستوية

ماهى دى مشكلتى
ياراجل """ ده المطلع العادى اللى بيبقى فى الشارع لو وقفت كده وابتديت أتحرك بلاقى العربيه ريحت لورا بس لغاية دلوقت الحمدلله مابيبقاش فيه عربيات ورايا بس طبعا فى الزحمه اللى أنا لسه خايفه أدخل فيها هتبقى كارثه لو حصلت معايا
عيب الطريقة دى انها حمل على الدبرياج بتهلك مكوناته على المدى البعيد
الموضوع مش سهل وعايز تمرين علشان ما ترجعش منك

الطريقة التانية
نفس الطريقة بس بدل الفرامل فرامل اليد ودى افضل للمبتدئين
بتمشى ةتقفى بالفرامل والدبرياج وتقومى شادة فرامل اليد وبعدين تشيلى رجلك من الفرامل العادية وممكن تمورى العربية وتشيلى رجلك من الدبرياج
اما تعوزى تتحركى
تدوسى دبرياج
تاخدى غيار
ترفعى سنة دبرياج زى ما قلنا فوق
تحطى رجلك على البنزين تدوسى البنزين و
طبعا نزلى الفرامل اليد بعد ما تدوسى سنة البنزين


[/color]

فاهمه طبعا خلينا فى الطريقه التانيه أحسن
أصل المشكله وأنا الحقيقه شايفه إنها جرأه بس عبيطه شويه إنى بتعلم لوحدى أخدت خمس حصص فى مدرسه ولما لاقيت انها مالهاش لازمه قلت والله لازم أسوق لوحدى (أصل أنا كنت بسوق أتوماتيك فى الأول) بس المشكله نقل الغيار والدبرياج اللى بيخلوا العربيه تنط منى على الفاضى والمليان ودلوقت الحمدلله بقت النطه أخف من الأول لما اتمرنت على تمرين الدبرياج بس برضه بتنط بعد ماأدوس البنزين بعد الدبرياج مع انى مش شايله رجلى أوى من على الدبرياج
متشكره جدا ليك على ردك وياريت ماتحرمناش من مشاركاتك

[A.Saad]

فاهمه طبعا خلينا فى الطريقه التانيه أحسن
أصل المشكله وأنا الحقيقه شايفه إنها جرأه بس عبيطه شويه إنى بتعلم لوحدى أخدت خمس حصص فى مدرسه ولما لاقيت انها مالهاش لازمه قلت والله لازم أسوق لوحدى (أصل أنا كنت بسوق أتوماتيك فى الأول) بس المشكله نقل الغيار والدبرياج اللى بيخلوا العربيه تنط منى على الفاضى والمليان ودلوقت الحمدلله بقت النطه أخف من الأول لما اتمرنت على تمرين الدبرياج بس برضه بتنط بعد ماأدوس البنزين بعد الدبرياج مع انى مش شايله رجلى أوى من على الدبرياج :_alshmokh08[1]:
متشكره جدا ليك على ردك وياريت ماتحرمناش من مشاركاتك

هل بتنط ولا بتعمل امريكانى
وقصدك بالنط
انها تقفز ولا بتطلع مرة واحدة
وصوت الموتور ساعتها عامل ايه

[husseinoo]

استاذة لبنى بالنسبة لصورة الـ WD 40


وده موقع بأهم منتجاته واستخداماته
Learn More About the WD-40 Product Family Including Smart Straw and No-Mess Pen

مع اطيب التمنيات
اخوكم حسين غزالة

[husseinoo]

اللهم صل على محمد وعلى آله وصحبه أجمعين

استاذ سعد
ربنا يكرمك يارب ويسعدك زى ما حضرتك بتسعدنا بمشاركاتك القيمة

على فكرة فى وسط الكلام عجبنى قوى
كلامك عن رفع الرجل عن الدبرياج الأول
ثم الضغط على البنزين عند الاحساس بصوت العربية او الار بى ام او برجة العربية

انا كنت بعمل الموضوع ده بالتجربة والخطأ
هههههههههههههههه

يعنى ارفع رجلى عن الفرامل "واكبس بنزين"
وارفع رجلى عن الدبرياج كله فى نفس الوقت

هههههههههههههه

وطبعا احيانا صوت العربية بيكون عالى قوى بشكل يضحك الناس حواليه


شوف يا اخى
فعلا بتأكد للواحد ان اللى بيسوق عربية لازم يكون فاهم موش حافظ
هههههههههههههه

ربنا يسهل وافتكر الكلام ده وما يحصلش ربكة
هو الواحد اسهل له موضوع فرامل اليد

لكن بيصعب عليه كل شوية يرفع فرامل اليد وينزلها وشغلانه


لكن بعض ما عرفت وفهمت الموضوع ده من حضرتك


اشكرك جدا جدا
وفى انتظار المزيد من حضرتك

مع اطيب التمنيات
اخوكم حسين غزالة

[husseinoo]

استاذ محمد فوزى
والله يا استاذ انا ادعو لك وللاستاذ سعد
على مجهودكم معانا

بالنسبة لموضوع المرايات
النظر فى المرايه كل ثلاثة ثوانى
كلام ممتاز

وفعلا من ساعة ما اتعودت انى انظر فى المرايه
انقذنى من مواقف كثيير
اسط حاجة واحد عايز يعدى وجاى من ورايا بسرعة

على طول افضل ملتزم بالحارة اللى انا فيها
والراجل يعدى فى منتهى الهدوء وبدون اى ازعاج وكمان من غير كلاكسات
ويشعر ان اللى ماشى امامه فاهم وشايف وموش نايم

ده غير عند التخطى من سيارة متوقفة
او عند الانتقال من حارة الى حارة

اللى متعب شوية هو العربيات اللى فى المنطقة العمياء
بحاول انظر فوق كتفى قبل تغيير اتجاه السيارة
نظر سريعة

واحيان اسرح فى النظر
واقول لنفسى ايه اللى انا بعمله ده
موش معقولة اسرح فى النظر فوق كتفى للدرجة دى
وافضل كل الوقت ده من غير ما انظر امامى
عملية خطيرة جدا
وربنا اللى بيستر خصوصا فى الزحام وفى كل وقت والله


وعجبنى كمان
عبارة اضغط فرامل بسيطة
عشان نور الفرامل الاحمر هايشوفه اللى جاى ورايا
يعنى موش لازم اضغط الفرامل قبل ما اقف بمسافة قصيرة
يعنى ممكن اضغط على الفرامل خفيف قوى بحيث نور الفرامل ينور ويحذر اللى جاى ورايا
معلومة جميلة قوى قوى قوى ... الله يكرمك يا شيخ ويبارك فى صحتك

وموضوع مسافة الأمان
ده موضوع مهم جدا جدا جدا
من اهم اساسيات القيادة للناس اللى فاهمة وموش حافظة
الف باء القيادة لازم تترك مسافة بينك وبين اللى امامك

لكن فيه مشكلة
فى المشى البطىء
اللى ورايا موش عايزك تترك اى مسافة بينك وبين اللى امامك
واخويا الكبير يحذرنى: لو تركت مسافة كبيرة بينك وبين اللى امامك خصوصا فى الزحام
هايشجع اللى وراك انه يدخل دائما امامك ويسبب لك ربكة ويلخبطك
ايه راى حضرتك فى الكلام ده ؟

بالنسبة لمعلومة الرايدتير وغسيل دورة المياه
هههههههههههههههه
موش دورة مياه الحمام
ههههههههههه
قصدى دورة مياه السيارة

موضوع وافى وجميل جدا جدا
بس فيه ناس بتحذر انه لو الراديتير قديم شوية مافيش داعى تعمله تسليك بماء النار احسن يظهر فيه خروم جديدة
لكن الصح هو كلامك اولا واخيرا
على الاقل الموضوع ده يتعمل مرة كل 6 شهور ولا ايه راى حضرتك

وكمان معلومة ان القربة يتم ملئها عند علامة max
ده كلام ممتاز
لان مرة اخويا ملئها للآخر
والنتيجة ان كل المياه الخضراء الزياد خرجت على الارض فى الشارع من خرطوم الفايز

على فكرة النهاردة اخويا سأل بتاع الكاوتش عن "الخروم اللى فى كاوتش التيوبلس"
واكد له ان الكاوتش التيوبلس اذا تم نفخه اكثر من اللازم بتظهر فيه اخرام
وحذر من الناس اللى بتلحم الكاوتش فى البنزينة
وانهم بينفخوا الكاوتش زيادة
وبعدين يحط مياه بصابون على الكاوتش وتظهر "فقاقيع" هواء
ويقول لك: شايف يا بيه فيه كام خرم فى فردة الكاوتش
واكد كمان : ان بمجرد ما العجلة يرجع ضغط الهواء فيها الى معدله الطبيعى تختفى كل "فقاقيع الهواء" وكل الاخرام الوهمية دى تختفى هى كمان
وان حركة نفخ العجلة بزيادة الغرض منها انه يحاسب الزبون على اكثر من خرم
وموش مهم انه يبوظ فرده كاوتش ثمنها يبدأ من 250 جنيه
المهم أنه يكسب 20 ولا حتى 30 جنيه زيادة
ده بافتراض انه وجد فى العجلة 4 اخرام على الاقل
شغل نصب
لازم الواحد يتعامل مع محل كاوتش امين
وكمان لو فعلا العجلة كان فيها اكثر من خرم
يبقى الافضل انك تركب جوانى احسن من عمل خوابير والعجلة تبوظ بعد كده من كثر الخوابير
والله اعلم





هاقول ايه ولا ايه كل كلامكم جميل جدا جدا
وياريت لو فيه اى اصدقاء فى المنتدى عندهم اى اضافة للموضوع
نتشرف اننا نعرفها


مع اطيب التمنيات
اخوكم حسين غزالة

[SunSet]

النصيحة التالية
لو هاتعدى مطب صناعى
لازم تكون ضاغط على الدبرياش والفرامل
وعن طريق الفرامل تتحكم فى سرعة العربية
واول ما عجل العربية الامامى يكون فوق المطب وهايبدأ ينزل
تكون اخترت الغيار المناسب "الغيار الاول او الغيار الثانى" حسب سرعة العربية
وطبعا ما دمت انت دايس على الدبرياج اساسا
خلاص هاتختار الغيار المناسب وهاتمشى على طول
لدرجة ان العربيات اللى خلف موش هاتحس انك مبتدأ
لازم تتدرب على الموضوع ده كثيير وتختار شارع يكون فيه مطب صناعى



النقطة دى غلط
ما تطلعش مطب بالفرامل خالص
اطلعه دبرياج بس
تفرمل قبله
واول ما العربية هتلمس المطب تشيل رجلك من الفرامل

فعلا انا اعتقد قالولي كدة

[sara2001]

انا مش عارفه اشكركم ازاي والله على الموضوع المفيد ده بكل مشاركاته جزاكم الله كل خير
انا لسه مخلصاه دلوقتي ومنه عرفت حاجات كتيره للأسف مفيش حد من السواقين اللي علموني قال عليها
انا كمان لسه مبتدئه في السواقه وعرفت من الموضوع ده ازاي اضبط المرايات بطريقه افقيه بحيث يظهر نصف سماء ونصف اسفلت بس لسه مش عارفه المفروض اضبط المرايات الجانبيه رأسيا ازاي يعني لو خليتها قريبه للعربيه بحس انها مش مبينه غير جزء بسيط من الشارع مش عارفه ايه الصح؟
المرايه اللي في النصف السواق كان قاللي اخليها بزاوية ميل ناحية السائق علشان تسهل الرؤيه بس كده طبعا بتجيب اللي وراء في الشمال اكتر مش عارفه ده صح ولا لأ
الحاجه التانيه اللي عرفتها موضوع انه ممنوع التخطي على الكوبري وانا كنت حتسبب في حادثه فظيعه على الكوبري بسبب الموضوع ده والسواق كان جنبي وماذكرش حاجه عن الموضوع ده
في حاجه تاني خوفتني قريتها في الموضوع وهي خطورة استخدام فرامل اليد وانا لسه ماشيه لأن السواق اللي بيعلمني ايده على طول على فرامل اليد علشان لو ملحقتش اتصرف بسرعه مع الفرامل والنهارده حكت جدا مع الأسفلت بصوت عالي بسبب الوقوف المفاجيء
في سؤال كمان بخصوص الفتيس الأوتوماتيك انا بدوس فرامل في كل النقلات ده صح ولا لأ
يعني انا تقريبا باستخدم الفرامل اكتر من البنزين وكتير لما ببتدي ادوس بنزين بحس العربيه كأنها اتشدت فجأه
نسيت اسألكم هو ينفع اكتب ورقه عليه (السائق في التعليم )احطها في العربيه من وراء علشان الناس ما تضايقنيش وتتبعد عني وانا سايقه ولا ده ممكن يسبب مشكله مع بتوع المرور
وشكرا جزيلا لكم وآسفه على الإطاله

[aboharf]

بسم الله الرحمن الرحيم

السلام عليكم ورحمه الله وبركاته.
بعد السلامات والتحيات الطيبات لكل اعضاء المنتدى الكرام،
معلش بسرعه كده هارد على اسئلتكم الشيقه وربنا يوفقني في الردود السليمه.....
الطلوع على الكبارى إزاى بالبنزين وإزاى بالغيار المناسب من غير ماتقف العربيه منى ولو الطريق وقف فى الطلعه على الكوبرى أعمل فرامل يد ولا الفرامل العاديه بس الفرامل العاديه لو سبتها علشان أكمل الطريق لما يفتح وأدوس بنزين هترجع لورا واكمل مشى إزاى أدوس زياده بنزين وأغير على المطلع للغيار اللى بعده ولا إيه
من خلال الردود اعتقد ان الاستاذ سعد تكلم بشكل كافي بس لو سمحلي ان اشرح الكلام ده بشئ من التفصيل شويه.
طبعا ذكرنا من قبل ان غيارات ناقل الحركه او الفتيس فيها من الابطء الى الاسرع ومن الاقوى الى الاضعف وقولنا ان:
:: الغيار رقم واحد هو اقوى نقله او غيار في السياره نظرا لانه يقوم بتحريك السياره من حاله الثبات الى حاله الحركه بالاضافه الى انه لو كانت هناك حموله كبيره في السياره مش هاتتحرك الا على الغيار الاول ونظرا لذلك هنلاقي ان ترس اول نقله في الفتيس او ترس الغيار الاول هو اكبر ترس موجود في علبه تروس الفتيس ،
وكل ماكان الترس كبيرا كان عزمه اكبر واشد....
بس الغيار رقم واحد هو ابطأ غيار في السياره لان دورانه حول نفسه ياخذ فتره طويله ولذلك لا نستطيع ان نمشي عليه لاكثر من سرعه 20 كم مثلا ولو زدنا السرعه لوجدنا ارتفاعا كبيرا في صوت المحرك.
::الغيار الثاني او النقله التانيه وهو الغيار الاضعف قليلا من النقله الاولى وترس الغيار الثاني اصغر قليلا من ترس النقله الاولى وعزمه اقل شده من الغيار الاول وفي بعض الاحيان يمكن الانطلاق بالسياره باستخدام الغيار الثاني من حاله الثبات الى حاله الحركه وطبعا ده محتاج شويه حرفنه في استخدام الدبرياش.
بس الغيار الثاني اسرع قليلا من الغيار الاول لانه دورانه حول نفسه اسرع شويه نظرا لصغر حجمه وبالتالي ممكن نمشي عليه لغايه سرعه 40 او لو قرصنا شويه لغايه 60 (ده في حالات معينه لما نكون بنشد مثلا).
::الغيار الثالث او النقله الثالثه اضعف من الغيارالاول و الثاني على الترتيب وترسها اصغر من ترس الغيار الثاني او النقله التانيه وعزمه ضعيف نظرا لصغر حجمه وبالتالي لا نستطيع الانطلاق به من حاله الثبات
بس الغيار الثالث اسرع من الغيار الاول والثاني على الترتيب نظرا لصغر حجمه ودورانه السريع نسبيا حول نفسه وممكن نمشي عليه لسرعه 60 كم وممكن اكتر شويه.
::الغيار الرابع اضعف ترس موجود في علبه تروس الفتيس نظرا لصغر حجمه عن ترس الغيار الاول والثاني والثالث بالترتيب ولذلك عزمه ضعيف جدا ولا يمكن الانطلاق به من حاله الثبات
بس الغيار الرابع اسرع غيار موجود في عليه التروس ايضا وذلك لصغر حجمه ودورانه السريع جدا حول نفسه وممكن نمشي عليه من سرعه 60 او 80 فما فوق....
طبعا لو فيه غيار خامس هايبقى اضعف غيار واسرع نقله ونطبق عليه ماسبق وقلناه...
-احنا لما نبتدي نتحرك بنبدأ بالغيار الاول نظرا لحاجتنا للعزم الشديد لتحريك السياره من حاله الثبات الى حاله الحركه ثم ننقل للغيار الثاني عند السرعه 20 لحاجتنا الى السرعه ثم للنقله الثالثه عند سرعه 40 لحاجتنا لسرعه اكبر ثم للنقله الرابعه عند سرعه 60 لسرعه اكبر واكبر ....
-طيب انا بقول الكلام ده ليه؟؟؟؟؟
هاقول مثال بسيط
هانفترض مثلا ان احنا ماشيين بسرعه عاليه على الغيار الرابع وسرعتنا 80 كم وكانت قدامنا من بعيد اشاره مرور حمرا طبعا هانهدي السرعه بس ازاي؟؟
:::هانضغط فرامل تدريجيه الاول لغايه ماسرعتنا توصل ل 60 كم ،ثم نضغط دبرياش وننقل على الغيار الثالث ثم نرفع رجلينا من على الدبرياش بشكل تدريجي هنلاقي العربيه هدت سرعتها اكتر بس باستخدام المحرك والفتيس.
:::نواصل الضغط على الفرامل بشكل تدريجي لغايه ما سرعتنا توصل ل40 كم ثم نضغط دبرياش وننقل على الغيار الثاني ثم نرفع دبرياش بشكل تدريجي وبرضه هنلاقي العربيه خفضت سرعتها اكتر وبرضه باستخدام الفتيس والمحرك استعدادا للتوقف عشان الاشاره حمرا بالطبع ،،،،
فجأه والعربيه ماشيه على سرعه 20 كم وعلى الغيار التاني الاشاره الحمرا فتحت وبقت خضرا، هعمل ايه؟؟؟
كل اللي عليا اعمله اني اضغط بنزين وازود سرعتي من غي ما العربيه تترجرج ولا تطفي وارجع للسرعه المناسبه للزحمه او للشارع اللي قدامي ..........
طيب انا ذكرت المثل ده لاوضح حاجتين !!!!!!!

الحاجه الاولى:ان تنزيل الغيارات اللي انا عملناها او الغيارات العكسيه اللي عملناها ساعدت على تهدئه سرعه العربيه . ازاي؟؟؟؟؟
لما ضغطنا دبرياش ونقلنا من الغيار الرابع (ذو الترس الصغير والسريع والضعيف)الى الغيار الثالث (ذو الترس الاكبر حجما والابطء من الغيار الرابع والاقوى قليلا)فان عزم دوران الترس الاكبر قليلا قام بتهدئه سرعه السياره لان الغيار الثالث ابطأ من الغيار الرابع،،، ولما نقلنا من الغيار التالت الى الغيار الثاني(ذو الترس الاكبر حجما والابطء من الغيار الثالث والاقوى) فان عزم دوران ترس الغيار الثاني قام بتهدئه سرعه السياره اكثر واكثر لان سرعه الغيار الثاني ابطأ من الغيار الثالث ،،،، وبالتالي قمنا بتهدئه سرعه السياره باستخدام الفرامل والفتيس وذلك باستخدام غيارات عكسيه او بيسموها في مصر تسقيط غيارات
الحاجه التانيه:لما قمنا بتهدئه العربيه باستخدام الفرامل والغيارات العكسيه وفجاه فتحت الاشاره والعربيه ماشيه على سرعه 20 كم وكناعلى الغيار الثاني(المناسب لسرعه 20 كم) فطبعا هنحتاج ننطلق من جديد فكل اللي علينا ان احنا نضغط بنزين ،فهتنطلق السياره بكل سلاسه بدون ماتطفي وبدون ماترجرج...
يعني تخيلوا لو هدينا السرعه باستخدام الفرامل فقط واحنا على الغيار الرابع ووصلنا لغايه سرعه 30 كم او سرعه 20 كم ومازلنا على الغيار الرابع وفجاه فتحت الاشاره وحبينا نرجع لسرعتنا تاني فزودنا بنزين تعرفوا ايه اللي هايحصل ؟؟؟ العربيه هاتفقد العزم وهاتترجرج واحتمال تطفي واذا زودنا بنزين وحبينا نرجع تاني لسرعتنا هتاخد فتره طويله جدا على ما تاخد عزم الغيار الرابع الضعيف وهاتكون انطلاقتنا بطيئه جدا.
اللي عايز اقوله ان لازم ندي العربيه الغيار المناسب عندما تفقد العزم حتى نستطيع الانطلاق بسرعه ..
طيب ايه علاقه اللي انا قلته كل ده بالطلوع على الكوبري؟؟؟؟
كل الكلام السابق اللي قلته عشان نوصل للنقطه دي
لما نكون ماشيين على سرعه 60 كم وعلى الغيار الرابع مثلا،،، ولقينا قدامنا كوبري نعمل ايه؟؟
عندنا حللين
1-يانزود الضغط على دواسه البنزين عشان السياره تاخد سرعه عاليه تقاوم بيها الجاذبيه و تقدر تطلع بيها الكوبري وبسرعه من غير ماتطفي ،،، وطبعا دا في حاله اذا كان الكوبري فاضي ومافيش عليه حد والكلام ده صعب شويه في ظل زحمه مصر.
2- الحل التاني لو في حد على الكوبري من فوق وهاضطر اهدي السرعه فبالتالي لازم انزل من الغيار الرابع للتالت وارفع رجلي من على الدبرياش وادوس بنزين شويه ،،، ليه؟؟؟؟ لان احنا لما بطئنا السرعه ومع دخولنا لمطلع الكوبري حصل ان الجاذبيه الارضيه اثرت على قوه اندفاع السياره الى اعلى الكوبري وبالتالي فانا محتاج لعزم اكبر لمقاومه الجاذبيه، وبالطبع لازم انقل من الغيار السريع والضعيف واللي هوا هنا الغيار الرابع الى الغيار الابطء والاقوى قليلا لحاجتنا الى العزم للمساعده على صعود السياره الى اعلى الكوبري وهو هنا الغيار الثالث،واذا حسينا ان العربيه محتاجه عزم اكبر ننقل الى الغيار الثاني وخاصه اذا كان مطلع الكوبري مرتفع جدا.

ولو الطريق وقف فى الطلعه على الكوبرى أعمل فرامل يد ولا الفرامل العاديه بس الفرامل العاديه لو سبتها علشان أكمل الطريق لما يفتح وأدوس بنزين هترجع لورا
طبعا هانطول برضه شويه في الشرح وسامحوني...
لازم نتعلم ازاي نضغط على الدبرياش وسبق اني قلته بس اشرحه بصوره سريعه..
اولا :لما ادوس على الدبرياش لازم ادوس عليه بالمنطقه اللي تحت مشط القدم تقريبا واكون شادد قدمي ورافع كعب قدمي من على ارضيه دواسه العربيه لان معظمنا بيدوس دبرياش وهو حاطط كعب قدمه على الارض وده غلط لاني لما هارفع قدمي من على الدبرياش هايكون كعب قدمي مازال على الارض فبالتالي رجلي هاتفلت من على الدبرياش والعربيه هاتتنطط ، وكمان هايجيلي شد للعضله الاماميه للرجل.....
فلازم ارفع كعب قدمي واكون شادد قدمي واحرك رجلي بشكل كامل من على الدبرياش بدايه من مشط القدم مرورا بكعب القدم ومرورا بقصبه الرجل وصولا الى الركبه
يعني رجلي الشمال كلها بدايه من الركبه الى مشط الرجل لازم تتحرك وانا بدوس دبرياش او انا برفع رجلي من عليه وطبعا ده لازم يكون بطء شويه .
واعتقد ان دي هيا مشكله حضرتك لانك كنتي متعوده على قياده الاتوماتيك ، وكنتي بتستخدمي رجلك اليمين للبنزين والفرامل وبالتالي كنتي حاطه كعب قدمك على الارض ومشط اصابع القدم هو اللي بتنقل من البنزين الى الفرامل وبالعكس...
الدبرياش بقى مختلف لان دواسه الدبرياش مقوسه لفوق بتتجه للاعلى ناحيه تابلوه السياره مش للاسفل كدواستي البنزين والفرامل وكمان دواستي البنزين والفرامل اخف شويه من دواسه الدبرياش لانها تقيله فمحتاجه انك ترفعي كعب قدمك وتدوسي على دواسه الدبرياش بمشط القدم بالمساحه اللي هيا تحت اصابع القدم.
طيب ايه علاقه ده بالوقوف على الكوبري والانطلاق؟؟؟؟
لو رجعنا للدروس اللي انا ذكرتها سابقا كنت ذكرت تمرين للانطلاق بالدبرياش والبنزين
فاحنا واحنا واقفين على الكوبري هانرفع فرامل اليد ونديها الغيار الاول ولما نيجي ننطلق هاندوس بنزين الاول وارفع رجلي من على الدبرياش ببطء لغايه ما اوصل لنقطه الاحتكاك ،،، او لغايه ما الاقي ان مقدمه السياره ارتفعت للاعلى قليلا ،معنى كده ان السياره جاهزه للانطلاق ،اثبت رجلي على الدبرياش وما ارفعهاش بشكل كامل ثم ازود بنزين تاني وانزل فرامل اليد في نفس اللحظه هلاقي العربيه انطلقت للامام مع ملاحظه صغيره(ماترفعيش رجلك من على الدبرياش بشكل كامل )....يعني نص رفعه دبرياش
هنقول من الاول
لما اقف على مطلع
ارفع فرامل اليد ،واضع على الغيار الاول ، ادوس بنزين خفيف وارفع رجلي من على الدبرياش ببطء لغايه نص رفعه واثبت رجلي على الدبرياش بالوضع ده ، او لغايه ما احس ان مقدمه العربيه اترفعت للاعلى ، اقوم دايسه بنزين زياده وانزل فرامل اليد هلاقي العربيه طلعت من غير ما ترجع للخلف بس على شرط اني ما ارفعش دبرياش بشكل كامل ،وارفع دبرياش ببطء من غير استعجال.
لازم نتدرب على الكلام ده على المطالع لغايه ما نتقنه وبصوره تدريجيه هتلاقي الموضوع سهل جدا وهاتعمليه بسرعه وبسهوله.
- من خلال التمرين السابق هاتتعلمي حضرتك ازاي توازني بين البنزين والدبرياش ، يعني وانتي بتدربي على مطلع فاضي اعملي التمرين السابق ونزلي فرامل اليد وحاولي بس توازني بين الدبرياش والبنزين،
-يعني لما تتحركي شويه من على المطلع وببطء دوسي دبرياش بسيط وخففي بنزين شويه هتلاقي العربيه هدت سرعتها ،،، وبسرعه قبل ما تطفي او ترجع لورا دوسي بنزين تاني وارفعي دبرياش في نفس الوقت ،،،،، كرري العمليه دي هتلاقيها سهله مع التكرار
اعذريني طبعا التدريب عمليا اسهل من التدريب النظري وفي بعض الاحيان بيكون صعب على الواحد انه يوصل معلومه بالكلام وخاصه لما يكون هناك تعليم لحركات لان الواحد بنظرته للحركه وهيا بتتعمل بيقدر يكمل النواقص في التدريب،،
بس على قد مانقدر بنحاول نوصل المعلومه،،،
على فكره
مشكلتك مع الدبرياش دي ليها حل واحد واللي انا عرفته ان العربيه لسه بتتنطط معاكي
اولا : زي ماقلت لحضرتك في الاول كعب الرجل لازم يكون فوق شويه..
ثانيا: ارفعي قدمك من على الدبرياش على مرحلتين
يعني لما تغيري النقله زودي بنزين وارفعي رجلك بسهوله وببطء من على الدبرياش لغايه النص وبعد كده ارفعي قدمك بشكل كامل،،،، يعني ماترفعيش قدمك بشكل كامل ومره واحد لأ... ارفعي قدمك مرحله مرحله ، لغايه ما تحسي ان العربيه مشيت بشكل طبيعي ،، وبعد كده هاتتعودي على الدبرياش....
واعذروني بكره هاكمل باقي الردود وخاصه موضوع الرجوع يمين وشمال وايضا سواقه الستات وبرضه هارد على اسئله الاستاذ حسين واعذروني على التطويل

[lobna_yaseen]

هل بتنط ولا بتعمل امريكانى
وقصدك بالنط
انها تقفز ولا بتطلع مرة واحدة
وصوت الموتور ساعتها عامل ايه

هى مش بتعمل أمريكانى (مش يعنى بتفحت فى الأرض ؟) لأ ولا كلها بتنط حكاية النطه دى وأنا بغير للغيار الأعلى وأشيل رجلى من على الدبرياج وأكون بدوس بنزين (يعنى مش لسه هدوس)عارف كأنها بتفصل لثانيه واحده وبعدين بتكمل مشى مش بتنط بمعنى الرجرجه (مش ممكن يكون ده طبيعى؟يعنى ده مش بيحصل معاك وانت بتنقل للأعلى ؟) وصوت الماتور عادى ده بأه معناه إيه؟؟؟
ملحوظه :أنا صحيح ساعتها بشيل رجلى بسرعه من على الدبرياج أكتر من الغيار الأول ده صح ولا لأ؟ أنا عارفه إنى تعباكوا معايا بس ياسيدى أتمكن من الباقى وعلى ماأظن دى هتخف بالتدريج بس ده مايمنعش إن حضرتك تفهمنى صح كده ولا غلط (النطه دى)

[lobna_yaseen]

اعذريني طبعا التدريب عمليا اسهل من التدريب النظري وفي بعض الاحيان بيكون صعب على الواحد انه يوصل معلومه بالكلام وخاصه لما يكون هناك تعليم لحركات لان الواحد بنظرته للحركه وهيا بتتعمل بيقدر يكمل النواقص في التدريب،، [/color][/size]
بس على قد مانقدر بنحاول نوصل المعلومه،،،

بالعكس إنت كفيت ووفيت زى مابيقولوا إخواننا الخليجيين أنا بصراحه لما بشوف كلامك ده ببقى حاسه إنى بسوق بقالى 500 سنه باحس باطمئنان غريب يمكن علشان بتقوله حته حته ماشاء الله عليك كأنك قاعد جنبى فى العربيه وبتقولى أعمل إيه ثانيه بثانيه بجد جزاك الله كل خير


واعذروني بكره هاكمل باقي الردود وخاصه موضوع الرجوع يمين وشمال وايضا سواقه الستات وبرضه هارد على اسئله الاستاذ حسين واعذروني على التطويل

أنا عن نفسى بقولك طوووووووول براحتك خالص وياريت يكون ده رأى باقى الأعضاء ومنتظرين باقى مواضيعك القيمه باهتمام :verygood: