رينو داستر الشكل الجديد - الآن في مصر

[bebo2000]

ويا ريت اللي إشترى من عند الطارق يقول لنا التفاصيل بالظبط

يعني بدفع كام أحجز بيه ؟
وهنتظر مدة حوالي قد إيه للون اللي أنا عايزه؟
وهيتعمل لي خصم حوالي كام؟
وهاخد إيه مع العربية بالظبط؟
وكل حاجة

1- عنوان الطارق:- 6 أ شارع محمد رشدى - العجوزه - القاهره - مصر
وفي فرع تاني في مول العرب 6 اكتوبر والرقم الموحد بتاعهم 19850 وديه الخريطة من yellow pages الطارق للتجارة, العجوزة, الجيزة, مصر | سيارات - تجار - سيارات جديدة | Yellow.com.eg | 6 ش محمد رشدى

2- انا حجزت بالف جنيه
موضوع تنتظر قد ايه ده حسب الالوان المتوفرة وممكن اوى ماتنتظرش خالص انا كان كل الالوان موجودة ماعدا الموكا فانتظرت اسبوعين او ازيد كام يوم على ما الشحنة الجديدة وصلت

3- الخصم فى الاغلب 1000 جنيه ما سمعتش عن حد خد خصم ازيد من كدة ( والخصم فى حد ذاته انجاز لان العربية بتتباع باوفر برايس فى 90% من المعارض ) والعربية مابيجيش معاها حاجة غير الكوريك فقط لاغير والطارق مش بيدى هدايا زى اغلب المعارض

[الصيداح]

تمام كدة وصلت ألف ألف شكر
بس هو المعرض اللي في مول العرب ده بتاع الطارق أصلي روحته بس مكنتش أعرف إنه هو الطارق
شفت هناك الداستر وإتفرجت عليها

طيب هو موزع معتمد من التوكيل؟
وبالنسبة لورق العربية باخده يوم الإستلام ولا إيه؟

[الصيداح]

ويعني إيه العربية بتتباع باوفر برايس فى 90% من المعارض؟

[Land_Cruiser]

ويعني إيه العربية بتتباع باوفر برايس فى 90% من المعارض؟

اوفر برايس هنا كمان؟ هى شوطه و لا ايه

[atefadel]

استغلال وقلة ضمير

[omskmaher]

شكرا للاخ بيبو 2000 انا فعلا متابع من زمان العربيه دى

[bebo2000]

ويعني إيه العربية بتتباع باوفر برايس فى 90% من المعارض؟

اوفر برايس يعنى العربية يبقى سعرها فى التوكيل 135000 وتاخدها من معرض تسليم فوري ( من غير حجز زى التوكيل ) ويديهالك ب 136000 او 135500 حسب المعرض

[bebo2000]

شكرا للاخ بيبو 2000 انا فعلا متابع من زمان العربيه دى

العفو يا باشا

[jackson_75]

والله أنتوا كلكم ناس زى العسل وفى قمة الأحترام والذوق , أنا والله كل ما أفتح التليفزيون وأشوف الأخبار وأشوف الناس اللى فى الشارع والأخلأق بقول عليه العوض ومنه العوض ونفسيتى وصدرى بيضيق , لكن لما بشوف التعاون والأخلأق العاليه بين أعضاء هذا المنتدى والشباب اللى زى الفل اللى تفرح بأخلأقها وأدبها ومعلوماتها القيمة فبفرح والله وبقول لسة الدنيا بخير ,, أنا والله نفسى أتشرف بمعرفتكم عن قرب واحد واحد, الله يبارك فيكم جميعاً ,, وعلى فكرة أنا معجب جداً بالعربية دى وناوى أن شاء الله أشترى واحدة وأرخصها سياحة , فأدعولى أن ربنا يكرمنى ويتمها لي على خير وأبقى دستراوي زيكم
تقبلوا تحياتى جميعاً

[bebo2000]

الشرف لينا بمعرفة شخص محترم زي حضرتك وربنا يكرمك وتبقى من ملاك الداستر في اقرب وقت
والف شكر على مرورك الكريم

[beeronasr]

ربنا يكرمك و تشترى واحدة قريب و يباركلك فيها و تبقى دستراوى

[jackson_75]

الشرف لينا بمعرفة شخص محترم زي حضرتك وربنا يكرمك وتبقى من ملاك الداستر في اقرب وقت
والف شكر على مرورك الكريم

ربنا يخليك وأن شاء الله أول ما هاجيبها هبقى أكتب وأقول لكم عشان نبقى كلنا فى مركب واحدة ونتابع مع بعض خطوة بخطوة كل حاجة تظهر فى السيارة بعد الأستخدام ,,, على فكرة أنا كنت عاوز أقولك أن أسلوبك حلو جداً فى كتابة المقالأت وانا عجبنى أوى طريقة العرض الشيقة اللى أنت بدأت بيها الموضوع ,, تقبل تحياتى وبالتوفيق أن شاء الله

[jackson_75]

ربنا يكرمك و تشترى واحدة قريب و يباركلك فيها و تبقى دستراوى

أشكرك على الدعوة الحلوة , وأن شاء الله نعمل رابطة مالكى الداستر ونتابع مع بعض خطوة بخطوة كل جديد فى السيارة بعد الأستخدام وتبقى تشرفنا حضرتك وكل ملك الداستر فى جنوب سيناء ونعمل رالى الداستر على الرمال والصحارى الواسعة هنا ,, على فكرة المناظر الطبيعية هنا تحفة ولأزم الكل يجى ويشوف بعينه , أهو منه يغير جو ومنه أنه يجرب العربية ,,
تقبل تحياتى

[beeronasr]

انا اشتغلت فى طابا 5 سنين و فى شرم 3 سنين - الطبيعة رائعة و بشكرك على دعوتك و بنا يكرم و نشوفك بالداستر قريب

[selmahgoub]

يا جماعة اخر مشاركة كانت بتاريخ يوم 7 ليه مفيش مشاركات تانى من الاخوه اللى جابو الداستر عايزين نستفيد من خبراتكم فيها علشان اقدر اخد قرار