السيارات الصينيه سيارات فاشله

[MEDO1986]

السلام عليكم انا اخوكم ميدو احب اقولكم ان العربيه الصينى مهما زاد جمالها خساره يدفع فيها جنيه واحد لانها سياره فاشله مش اصيله مش بنت ناس مالهاش اى سمعه حلوه اسبيرانزا شيرى بريليانس كل دا كلام فاضى ما تسمعوش كلام حد اللى هيدفع فلوس فى عربيه وعاوز يركب يبعد عن الصينى دى مش عربيات دى اله ليها مدة صلاحيه قريبه قوى ما يعنمدش عليها كعربيه مش زى اليابانى عربيه ليها اسم وفرو فلوسكم عشان انا جربت الصينى دا انا محبب عليا اركب موتسيكل ومركبش صينى بجد حرام عليكم الفلوس دى ولو دورت هتلاقى قطع الغيار بتاعت الصينى اغلى من اليابانى عاوزين تركبو اركبو ماركه اصيله ان شاء الله بالقسط بس ما تدفعش فلو سك فى عربيه اقسم بالله كنت بركبها وانا خايف ومش انا بس اللى بقول كدا ارجوكم شاورو عقولكم واللى معاه صينى يقول الحقيقه للناس عشان محدش يدبس فى عربيه زى دى وياريت محدش يزعل انا جربت وركبتها وحاولت ابيعها معرفتش كنت بدلل بيها فى البلاد والاخر خسرت 25 الف وانا ببيعها ووديتها للى اشتراها قدام بيته دى لو يابانى كنت بعتها وانا قاعد حاطط رجل على رجل يارب تكونو فهمتو قصدى وشكرا

[Rsarabia]

يا ريت تقولنا تجربتك اللى خلتك تكتب الكلام الجامد دا و رغم انى مش من محبين الصينى عموما و عمرى ما هشترى عربية صينى بس عرف الناس جايز تكسب ثواب فى واحد بيفكر انه يجيب صينى

[ahmedsrs]

ياريت توضح اكثر عشان نعرف نحكم

[ggggggggg]

هذا الكلام لا يجب الأخذ به لأنه يعتبر كلام مرسل .. نعم كلام مرسل أنا لست مع أو ضد الصيني لأني لم اجربه في حياتي و لا أعرف شخص له تجربة معه لذلك لا يجب الأخذ بهذا الكلام المسترسل إلا إذا دُعم بتجربة مقنعة تدفع صاحب الموضوع لقول مثل هذا الكلام..
انا شخص أفكر في شراء سيارة قريبا وأضع الصيني من ضمن خياراتي لذلك أهتم كثيراً لسماع ومعرفة تجربة هذا الشخص كي أضعها في حسباني وتكون عوناً لي في تحديد اختياري ولكن لا أخذ بكلام شخص يقول ((ابعد عن الصيني دي عربيات فاشلة)) هل المفروض علي أن أقول آمين أنت صادق فعلا أم أنتظر منه مبرراً لقول مثل هذا الكلام.....

[Hacker5]

طب حضرتك قولنا نوع العربية و المشاكل اللى حصلت مهاك عشان محدش يشتريها
فى انتظار الرد على نار

[x_gomgom]

يا جماعه بلاش الهجوم الوحشي علي اي سيارهبدون اسباب منطقيه!!!!!!!
حالات كتير بتكون مشاكل فرديه.... و ميمنعش ان ساعات كتير بتكون فعلا في مشاكل......
يا ريت تحكيلنا ايه اللي حصل عشان كلنا عايزين حضرتك تفيدنا و تنبهنا و يا ريت ذكر الماركه و الموديل و عامله كام كيلو....
ربنا يستر من كلامك و يكون خيير (انا حاسس انها ولعت اول ما جيت تستلمها..... حصلت و حقيقه)
برجاء التكرم و الافاده.....
و ربنا يعوض عليك و يديك اللي احسن منها

[khaledazizeg]

ياريت حضرتك تحكيلنا عن تجربتك (نوع السيارة-الوكيل-المشاكل)
انا بالنسبالى مش مقتنع بكلام حضرتك وطبعا ديه اراء
بس انا الحمد لله ربنا كرمنى بالبريلينس frv 1600 ولما عجبتنى جبت ال1300 بتاعتها وربنا يكرمنى ويكرم جميع مالكيها
وانا شايف انها عربية عملية وبعمل فى اليوم مش اقل من 300-400كم يوميا يبقى ازاى مش اعتمادية والعربية بعد المشاوير ديه زى الفل
مع العلم ان كان معايا لانوس 2005 زكانت عاملة 20000كم وكنت لما امشى مشوار فى حدود200كم الاقى العربية تقلت وبقت زفت

[Mostafa Hessen]

شوف الحمد لله معايا frv العربية زى الفل 15000 كم ماشاء الله
بنكون جوه العربية 5 وشنط وسفر طويل وتكيف وما شاء الله زى الفل جر وسحب وتحمل
مش عاوز اٌولك مشيت بيها فى طرق مكسرة جدا والله زى الفل قوية وحمالة اسيه
فعلا بدون تحيز عربية كويسة جدا على فلوسها

وياريت تجربتك وربنا معاك

[MEDO1986]

اولا شكرا ليكم على المتابعه بس ارجوكم قبل ما تردوا على موضوع ماتتسرعوش فى الرد لان كلامى دا مش هيضرنى انا بحاجه لانى خلاص مش راكب صينى انا قولت الكلام دا ليكم انتم اللى راكبين صينى واللى لسه بيفكرو يركبو صينىواحكيلكم على تجربتى كامله والله المستعان
انا اشتريت فى الاول سبيرانزا 20/2/2008 عند مرحلة ال 3000ك العربيه شخللت قولت اتصل واعرف مكان الضمان والصيانه دلونى على ابو الفتوح روحت هناك بصراحه معامله زباله زباله زباله المهم عند 10000ك لقيت العربيه لو داست على حصوايه فى الارض الدريكسيون يخبط روحت الضمان قالو دا عمود دريكسيون وصلايب دريكسيون المهم ربطو وظبطو بعدها ب1000ك رجعت تانى روحت الضمان قالو هيتغير وفعلا بداو يصرفو لى عمود جديد وقالو لى بعد 20 يوم هنكلمك ونقولك تعالى ركب العمود فعلا كلمونى ورحت كل دا مشاوير من الفيوم لطريق اسكندريه الصحراوى 200ك رايح جاى المهم روحت قالو العمود ناقص روح انت ولما نجيب عمو د كامل هنكلمك وكلمونى وروحت كان فى رمضان اللى فات سلمت العربيه انا وواحد صحبى وروحنا ندور على مكان ننام فيه دا جو صيام وتعب المهم فوجئت بيهم بيصحونى وبيقولو العربيه مش هنركب لها عمود عشان لسه هنفك ونعمل وهياخد وقت وهيا اصلا مش طالبه عمود دا كلام رئيس المهندسين قولتلو اللى صرف لى العمود مهندس قالى دا حمار قولتلو طيب هوا حمار ليه مشغلينو يبوظ حاجة الناس المهم معرفناش نعمل حاجه وغير كدا كتير بس انا هتعب من الكتابه لغاية ما قولت انا هبيعها وفعلا لقيت زبون بالعافيه والحمد لله ربنا كرمنى وبعتها وركبت نيسان اللهم صلى ع النبى مش عاوز اروح بيها صيانه او ضمان ليه لانها يابانى دى مراية الاسبيرانزا اتكسرت غيرتها 440ج فى التوكيل ليه مراية تويوتا ولا نيسان ولا لانسر ....
اما البيرليانس الاموره اللى انتو طالعين بيها السما حد فيكم يعرف موتورها اسمو ايه بلده ايه زى ما بيقولو فى مصر دى حلاوة روح موتورها المانى لا دى موتورها لانسر لا دا اتحاد اوروبى لا عفشتها رياضيه سعرها كام اللى هيا بريليانس اخر حاجه 100 الف 110/120/130 فيه كماليات بالمنظر دا والحلاوه دى ولسه ما لحقتش التويوتا يا جماعه اقسم بالله انا مقولتش كدا من الهوا والله دى تجربه للعربيتين اسبيرانزا وشيرى ايه رايكم فى سخونة الموتور اللى ممكن تولع فى الكابينه ايه رايكم فى الدريكسيون بعد سرعة 120ك ايه رايكم فى تقفيل العربيه ايه رايكم فى اسعار قطع الغيار والحمد لله بعد معاناه انا وابن عمى فى اسبيرانزا وبيرليانس ركبنا نيسان قطع غيار ارخص يابانى فعلا يعتمد عليها وانا عارف ان كل واحد منكم راكب صينى عارف وملاحظ عيوب مفيش حد غيره يقدر يلاحظها حتى مهندسين التوكيل ليه لانك انت اللى بتركب وانت اللى عارف بس ياريت محدش يخبى انا قولت كل دا مع انى مش مطالب انى اقول العيوب دى انا خلاص بقيت يابانى مش صينى بس والله تعبت من العربيات دى وخسرت كتير وشوف تمنها كام وتمن اليابانانى كام هتلاقى نفسك اعلى من اليابانى بس اعلى ليه لانك بتدفع تمن الكماليات مش الموتور والغفشه لو شوفت تويوتا ونيسان هتلاقى نص كماليات البريليانس بس موتور ايه وحش شوف الفرق موتور 1600 هواهوا تمام خش بقى على الكماليات هتلاقى الصينى معدى واكل اليابانى فى المظهر بس مش اهم حاجه المظهر انت بقى بتدفع تمن المظهر بس ياريت المظهر ينفعك وابقو طمنونى وقولولى سعر الكاتينه كام فى الصينى وسعرها كام فى اليابانى وشوف الفرق وشوف انت هتغير كاتينه على كام الف كيلو وشوف اليابانى هيغيرها على كام فى اليابانى ملها وقت محدد مفتوح عندك انت فى الصينى 30000ك وتتقطع الكاتينه وروخ بقى غيرها 2500ج يا جماعه انا تعبيت بجد كفايه كدا وانتو قررو براحتكم بس خليكم عارفين انكم بتدفعو تمن المظهر وبس مع ان فلوسك اللى هتدفعها فى الصينى تركبك يابانى تكسر بيه الاسفلت وارجو ان ردودكم تكون رحيمه عليا دى مجرد ارااء عشان محدش يدبس فى صينى شكرا

[MOSHAKS]

الصين بتعمل منتج استهلاكى وليس معمر

لان ليه صيدق كان اشترى عربيه شيرى a11 العربيه كان بينزل بيها القاهرة وهو فى العاشر من رمضان كل يوم
مره واحده بس رايح جاى
وكان الشكمان بيقطم لوحده من كذا مكان لوحده كده من غير مقدمات ويروح يلحمه و يرجع تانى ولماسئل الراجل اللى بيلحم هو بيقطم ليه كده قاله يا بيه االشكمان بتاع العربيات ديه اى كلام وبيقطم لوحده من السخونيه
ومحدش يئول ده بيمشى فى طريق مكسر او وحش لان الطريق من الف مسكن لحد العاشر مفهوش شئ
ده غير بئا حكايته مع الفرامل وكل شويه يغير تيل وبرجلش والعربيه بردوا بتصفر لما تدوس وفضيحه وراح بيها التوكيل وخلاهم يركبوا تيل فرامل ويظبطوها
ومئعدتش 3 ايام ورجعت تصفر تانى واللحمد لله بعها وخلص منها ده مكنش مكفيها مصاريف مع انها مكنتش بتمشى كتير
من الاخر العربيه ديه كرهته فى العربيات كلها والحمد لله ربنا وفقه وباعها

[x_gomgom]

اولا و قبل كل شئ ان شاء الله هيكرمك و يعوضك خير ...
اي ان كان العربيه وحشه او حلوه دي بقى ارزاق والله. انا عرف ناس والله ركباها و بتشكر فيها جدا.. و ناس بتشتم و تسب و تقول حسبي الله و نعم الوكيل.....
و اكيد مفيش حد هنا بيكدب على حد احنا كلنا هنا عشان نفيد بعض. بس ساعات و محدش يقدر ينكر بتكون في مأسي و معظمها فردي....
انا اصلا بفكر ابيع عربيتي و اجيب a113 الاسبرانزا ليا صديق والله بيحلف بيها (عامله 52,000 كيلو!!!) و كان معاه فرنا قبليها و بيقول انها برقبتها والله (دا علي كلامه انا ما سقتش الاسبرانزا دي لا 20 كيلو بس)....
اولا و اخيرا قدر الله ما شاء فعل و الحمد لله

[som3aa]

كان معاه فرنا قبليها و بيقول انها برقبتها والله

طيب ممكن اسال سؤال ازاى برقبة الفرنا؟؟
المقارنة فى ايه , الموتور طبعا موتور الفرنا اقوى بكتير , الثبات : اكيد الفرنا مع عيبها المعروف اللى هو ضعف الثبات احسن 100 مرة بالعقل كدا من ال113 , من ناحية ايه بالظبط قولى حاجة واحدة بس احسن , انا مش مقتنع اساسا ان ال113 دى عربية ممكن واحد يشتريها خالص , طيب ال620 و قولنا ماشى , 516 و قولنا نعديها بالعافية انما ال113 دى زيادة اوى , عربية تحسها لو واحد طخين شوية دخل جواها هتقع بيه على الارض و مع انها نزلت فى مشروع تاكسى الجديد مشفتهاش و لا مرة فى الشارع مع انى شفت جميع العربيات من اول اللادا للبيجو البارس , و كان فى واحد هنا عامل عنها تقرير بيقول زبالة و تحس انك قاعد على الارض و فعلا تخاف على نفسك جواها , طيب طالما العربيات الصينى ممتازة كدا ليه مبتنزلش دول محترمة و تبيع هناك؟؟ مع ان الفرنا فيها عيوب تقفيل بسبب غبور الا انها نزلت و التباعت فى العالم كله و كميات ضخمة لانها عربية جيدة و بعدها الاكسنت انما ايه اللى يخلى شخص يدفع 70-90-150-170 الف جنيه فى عربية صينى؟؟ مجهولة المصدر و العربيات البريليانس الجالينا اللى اتباعت فى مصر زبالة مخدتش نجمة واحدة فى اختبار الامان الاوروبى فى 2007 , بعد كدا طورها و خدوا اختبار اخف شوية و خدت 3 نجوم , طيب معنى كدا ان كل اللى اشترى القديم معاه عربية لو دخل بيها فى اى حادثة هيروح فى داهية و السقف هيطبق عليه!!! تخيلوا دا اللى احنا نعرفه , ليه الواحد يجازف و يشترى الFrv اذا كانت الكبيرة اللى ب 170 الف كدا!!!!
ليه طالما فى بدايل محترمة يابانى و كورى زى الدايهاتسو السيريون و الاكسنت و الياريس و لو وصلت ل 90 فى الاوبترا و الالنترا و اللانسر و فى حاجات كتير اوى , اذا كان الجالينا اللى هى ب 170 الف تحسها صينى من جوه و العربية كلها بلاستك رخيص ردىء الصناعة و الجودة من مجرد اللمس و كدا , الواحد يقوم يشترى الصغيرة منها ب 80 الف!!!!

و الله اللى يشترى العربيات الصينىدى مش مفروض يشتكى خالص و لا يتكلم و يقول العربية سيئة لانه هو اللى جابه لنفسه (مش بتكلم على صاحب الموضوع , ربنا يعوضك خير ان شاء الله) , انا بتكلم على الناس اللى قاعدة تدافع دلوقتى و تقول العربة معايا اهى زى الفل عامل بيها 10 كيلو و لسه مستلمها من التوكيل و مباظتش , بتريق طبعا بالذمة ا كلام , العربية ممكن نبدا نتكلم بعد 30-40 الف كيلو نشوف العروب المبدئية بعد كدا بعد 3-4 سنين نشوف العربية لسه عربية و لا بتتجر دلوقتى كدا يعنى!!!
اذا كانت الاسبرنزا اللى هى من اقدم العربيات الصينى فى مصر اول دفعة اخر 2006 هى و البريليانس يعنى معنى كدا معداش عليهم 3سنيتين و نص يبقى ازاى الناس بتتدعى انها تقدر تحكم
العربية مش شكل و خلاص و لو سمحتوا متقولوش عيب فردى و الكلام الاهبل دا لان لو العربية كانت كويسة كانت اتباعت فى الدول المحترمة الاوروبية او امريكا (سواء الشمالية و لا الجنوبية ) و لا استراليا و لا دولة اسوية محترمة.

[ggggggggg]

أخ som3aa أسلوبك لم يعجبني فيه نبرة غل داخلي غير طبيعية وتجريح في كلام الناس بقول كلمة ((كلام أهبل)) تحس كده انو في تار بينك وبين العربيات الصيني وكل الي بيشتروا عربيات صيني وكل الي بيفكروا يشتروها

[x_gomgom]

اولا انا لا متحيز للصيني و لا واقع في حبه و كمان انا من اشد المعارضين للفرنا (انا 2 من عائلتي ماتوا فيها هي عباره عن علبه سردين ولا امان ولا يحزنون فين الامان اللي بتقول عليه دا!!!!!!!!!)
و كل الناس بتقول علي متورها العفريت في علبه الكبريت.... و انها فرامل مفيش بعد ال 100 و كلام ملاك مش بجيبه من بره...
لو سعادتك مش عاجبك اراء الناس دا براحتك لكن النبره اللي ببتكلم بيها اولا لا تليق بمنتدي بنطلب فيه النصح و لا دا كلام واحد بينصح اصلا.....
و يا ريت زي با بنحترم ردك تحترم رد الناس...
و شكراً في كلا الحالات على مشاركتك

[x_gomgom]

كمان هل سبق لك انك جربت ال السبرانزا 113؟؟؟؟؟؟؟؟؟
............
و ياريت لو تحكيلنا تجربتك
شاكر جدا!!!!