تقييم الm11 من الاول للاخر

[towfeq]

ايه يا جدعان..هو مفيش حد بيرد ليه..يا هيما الله يسترك يا شيخ شوف الحوار ده..انا كنت بعته قبل كده..

سلام عليكم
ازيكم يا جدعان..ازيك يا هيما
الله يباركلكم فيه مشكله بسيطه كده بقالها اسبوع او اكتر شويه
الصبح بدري لما اجي ادور العربيه احسها بتترج على خفيف كده..و لو الجو برد قوي..تترج جامد شويه لمده نص دقيقه او اقل و بعدين قشطه..و لو العربيه سخنه اصلا او الجو زي اليويمن دول مثلا..مفيش لا رجرجه ولا بتاع..

ايه الاحتمالات بقى..قواعد موتور..لو لو هي..اعمل ايه عشان اتاكد قبل ما اتعامل.
ايه تاني ممكن يكون عمل المشكله..

جزاكم الله خير و ربنا يبعد عنكم و عن عربياتكم الرجرجه و المرجحة و الزغزغه

حاجتين تانيين بالمرة
انا عايز على دخله الصيف اغير القربه و انظف الريداتير و الكلام ده..السؤال بقى..القربه النظيفه منين و هل ممكن القربه الاستيراد افضل من اللي اشتريها من المحل ولا ايه..

حاجة تانيه غربيه جدا بقى..لاحظت اني لما اركن العربيه في مستوي غير افقي و اجي ادور العربيه..مش بتدور علطول..اه والله يا جدعان..
ده يطلع ايه ده يا جدعان..فلتر بنزين مثلا و لا طرمبه ضعيفه ولا ايه

بارك الله فيكم و في دوابكم

[hemaa_82]

بص يا سيدي ....

اولا رجة ازاي يعني ؟؟؟ المتور متلت مثلا ولا المتور مظبوط و بتحس بهزة او ذبذبة في الجسم العربية ؟؟؟

لو قصدك ذبذبة بس و المتو مظبوط يبقي القواعد نشفت او في قاعدة مقطوعة ...
الام 11 و 12 فيها قاعدة فوق الفتيس .. قاعدة تحت قربة المياة .. قاعدة من عند القنطرة ...

لو بتحس ان المتور هوه اللي مشمظبوط يبقي ان اوان السرفسة .... فلتر بنزين و طقم بوجيهات .... وقتها تشوف بقي اي حوار الدوران علي وضع مش مستوي .... متبدأش بالطرمبة و يطلع في الاخر مثلا فلتر البنزين هوه اللي مسدود ....

كل ما هتقول معلومات اكتر هنوصل للحل اسرع ان شاء الله

[hemaa_82]

بالنسبة للقرب .... كله زي بعضه ... احسنها هيقعد سنة و كام شهر .... مش فارقة ...اهم حاجة خلي بالك ان في قرب موجودة اصلي بعلامة شيري مطبب فيها مخرج .... فبدل ما تفضل رايح جاي اتأكد من كل المخارج القربة ....

[towfeq]

سلام عليكم
ازيك يا هيما

بص يا حج..هي مش متلته ولا مربعه..يمكن دلوقتي مش بحس باي حاجة خالص..الفكرة ان في الايام البرد قوي اللي فاتت.لما كنت باجي ادور العربيه..تلاقيها و لمدة 10 ثواني كده بتترج و بعدين تبقى تمام خالص..حاليا مثلا اكمن الجو كويس..بقيت مش بحس خالص بالحوار ده..و يمكن غالبا ده زيت موتور يمكن لان لو مشكله سرفسه كانت المشكله دي هتفضل موجوده ايا كانت حرارة الجو...لكن عموما انا هعمل حوار السرفسه ده عشان ده وقته..العربيه عامله 35 الف دلوقتي ..و بردو هشوف قواعد الموتور احتياطي عشان اطمن.

موضوع انها ساعات مش بتدور علطول..هشوف البطاريه الاول و بعدين هشوف الامور هتمشي ازاي..

المهم دلوقتي بقى: قربه المياه عشان انا كده بقيت رسمي من ملاك الام 11..القربه شرخت على خفيف و عايز انزل الاميريه بكرة اظبط الحوار ده...نصيحتك بقى..قربه استيراد ولا قربه جديدة من عند زكي جرجس..مين الاحسن..و هل ممكن قربه ال 516 تشتغل عادي ولا لازم بتاعتها..عشان بس يبقى فيه قدامي بدائل.

ظبطني انهارده عشان الحق اشوف انا هعمل ايه..تسلم يا كبير

[hemaa_82]

لازم بتاعتها ...مينفعش ال 516
وهات جديد لان الاستيراد ممكن تبقي يادوب و متستحملش ... و كده كده الاصلي بيضرب ... اي الجديد في الاستيراد :)

في ناس ركبت بتاع الانوس بس وقتها مش هتركب حساس المية و مش هتقولك لو المية قلت

[towfeq]

تسلم يا هيما
ربنا يباركلك يا معلم
هبقى اظبط و اروح لابنانوب عشان حوار السرفيس ده

متعرفش حد في الاميريه عشان موضوع غسيل دورة المياه و تركيب القربه و الجو ده ؟

[towfeq]

سلام عليكم
ازيك يا هيما

كنت عايز اعمل شغل في العفشه عشان انا بقالي فترة كبيرة قوي منفض لها
ايه اخبار الرجل العفشجي اللي في عين شمس اللي انت عملت شغل عنده...و اوصفلي فين بالظبط لو هو كويس بجد.

تسلم يا كبير

[hemaa_82]

اتعلمت درس ب بتاع 2000 جنيه في موضوع اخرة 40 جنيه

افوق بس و احكيلكم ان شاء الله

[hemaa_82]

السلام عليكم يا ناس يا عسل ...

الحدوتة بدأت بخرم في العجل.... رحت بعد الجمعة اللي فاتت اصلحه ...تمام؟؟؟
ركب العجلة ... المسامير فوتت......3 مسامير...
قلت هوا انا هفضل ساكت و مكسل لحد ما الجنط يفك مني...مبهاش بقي...
رجعت عند ميكانيكي معرفة .... بص يا فريد عايز افك الصرتين اوديهم للخراط يرجلش الاخرام و يركب مسامير محترمة .... مش استرخاص علشان نرتاح من وجع الدماغ ...
ماشي يا استاذ محمد عينيا .. ما تيجي يا استاذ محمد نخليها مسامير ثابتة و تبقي صامولة و اهو عصب الصامولة اقوي و احسن ...
عادي يا فريد مش فارقة اي حاجة ...تمام؟؟؟؟؟

[hemaa_82]

كلمني فريد العربية خلصت و الحساب فك و تركيب و مسامير و خراطة + صليبة جديدة علشان مقاس الصواميل مختلف 330 جنيه ..

نزلت دورت و مشيت .... و مع اول فرملة الاقي التابلوه منور ABS... ليه بس كده ..
رجعت .... يا فريد بص كده ... اه يا باشا تلاقي الحساس مشحم ولا حاجة ...
فك و نظف و ركب ...مفيش
تاني ...مفيش

خلاص يا فريد هروح انا اشوف علي الكمبيوتر ...

رحت كشفت في الحرفيين .... اللمبة طفت بس الABS شغال علي طول ..و الفرامل زفت طبعا ...طب ايه قالك كده ميكانيكا ...
جي الميكانيكي يجرب ...اول ما طلعنا الطريق نور تاني الABS و بقت فرامل فلة بس مفيش ABS....

طب ايه ؟؟؟؟ لا يا باشا الكهربائي يجرب و يحدد.....

طب يا كهربا .... قالك طالاما نورت تاني يبقي كنترول...
اسأل حج صلاح علي الكنترول يقولي ليه ده ب 3000 او 3500 جنيه هوه انت عندك ايه ؟؟؟.. حكيتله الحكاية قالي لا ان شاء الله هتطلع كهربا بس بس انت تعالي الصبح و الكهربائي لسة فاضي و نشوف ....

دفعت الكشف بس 50 جنيه و رجعت لقبت فريد الميكانيكي مستنيني .... سالني حكيتله ... قالي طالاما لسه هيكشف اديني فرصة الصبح ابص بصة اخيرة .....
سبت المفتاح و نزلتلوا تاني يوم كان حل و ركب تاني و برضه مفيش ....

رجعت تاني ل علي الكهربائي نادي كريم بالجهاز ... و صله و خد العربية لفة في التانية و رجع .... كلم الكهربائي و رجعلي ...

بص يا باشا هوة في حاجة غلطط و حساس العجلة الشمال قاري غلط فقبل ما نقول كنترول احنا نجيب حساسين من التوكيل نجرب ...
لو ماظبتطش نجيب كوبلنين... لو مكنش يبقي لازم ولابد بقي كنترول .....

انا طبعا سمعت الكلمتين الدنيا اكفهرت جوايا ..... مشيت و خدت المدام و العيال و روحت و قلت مبدهاش .....
...ابانوب يقول رايه ايه و بعدها لو مفيش يبقي التوكيل و راحت فلوسك يا صابر

المهم وانا ماشي لمبة الفرامل الرئيسية نورت علشان تونس الABS و وانا داخل الاميرية الcheck بتاعت المتور نورت ....

انا قلت خلاص العربية هتتشقلب ... الاول و التاني بيقطعوا و الغيارات بترزع و حاجة نيلة .....

[hemaa_82]

ابانوب شافني ... ايه يا باشا خير ....قلتله كان خرم عجلة ابن تيت .... و حكيتله ....
قالي طالاما التابلوه منور نروح لمحمد علي الجهاز و نشوف....رحنا وصلناها..... المتور مدي غلط من غير سنسور فمسح الغلط و طفت اللمبة .... اما بقي الabs مش راضي يدخل اساسا.....
ابانوب قال خلاص يا باشا يوم الاتنين نروح لكهربائي تاني و نشوف .. و بالمرة نديها فرصة ... احنا ننظف دلوقت و لو مطفتش تعالي الاتنين نشوف ....

صادق نضف الحساس و ظبط و ركب و مشيت بيها منورة اجرب ...

كيلو كده و لمبة التور رجعت و العربية اهبلت تاني .... بقي اخر المتور بيفصل علي 5500 بدل 6500..

المهم الحد اجازتهم فرحت الشغل و بقت لما تقرفني اشيل البطارية واحطها تاني ...
المهم يوم الاتنين رجعت من الشغل علي ابانوب رحت اشوف الكهربائي التاني ...الجهاز بؤة في شغل و جاي ... و اطلتعت لاخر اليوم لحد ما جن مكالمة ملخصها ان الجهاز للاسف اتبل من الامطار بتاعت الساعة 11 بالليل و اتحرق..
رجعت عند ابانوب .... يا نبيل ابانوب فين ... جايجاي ... ليه يا باشا... حكيتله الملخص وان كده مفيش اجهزة .... قالي طب استني ... و نزل تحت العربية و طلع ....و جاب ابانوب و نزله و طلعه ...
يا باشا القاعدة اللي بيقرا عليها الحساس مش موجودة ... مهو كده مش هيشتغل .... انت تيجي باح الثلاثاء و نشوف قاعدة نوصل عليها ....

تمام؟؟؟؟

[hemaa_82]

رجعت التلات الصبح فك فك ...... الجنبين .... مفيش تروس .... طب عايزين .... طب ايه ؟؟؟؟؟ قالك بتيجي مع الكبالن الجديدة ....
خلاص ... هشتري طقم كبالن و ناخد تروسه و يبقي معايا جديد اركبه وقت ما احتاجه ... مش هيخسر ...

نزلت لزكي جرجس ... عندك الكبالن ...اه اهيه ... طب التروس فين ؟؟؟ تروس ايه ؟؟؟ قاعدة الabs... لا يا باشا هيه كده ... طب و الabs يقرا ايه .... مفيش رد ...

كلمت نبيل حكيتله ... طب نشوف في الصرة ... مفيش ... طب في البلية ... مفيش اي تروس خالص ....

المهم لقيت البلية فيها جنب حديد و جنب اسود .... بتكلم مع الشباب عند زكي جرجس بقيتهم بيقولوا ان لو ركبت بالشقلوب تنور abs....
نورت لمبة في دماغي و خدت واحدة و رجعت لنبيل .... مسكنا البلية طلع جنبها مغناطيس.... و البلي اللي في العربية واحدة مكسورة و واحدة مقلوبة و مكسورة ...

طلع abs بيقرا علي مغناطيس .....

جبت بلية كمان و كان فتحي الخراط الله باركلوا موجود خد الشمعدانين و البليتين كبسهم صح و اكد علي المعلومة و زود ان كمان السيفيك 2013 نفس النظام و قال ان المغناصيس رقيق و بيتكسر من الخراط الغشيم...

راح فتحي و جه .... قفل يا بلبل.... شغل .... لسة منورة ....طب نجرب علشان تقرا الحساس ... مشي كيلو ... كل اللمبات طفت والعربية بقت حرير.....

طلع ان كمان السنسور بتاع ال abs بيشتغل حساس سرعة ... و علشان ال2 الامامي مش قاريين .. العربية مش قارية الارض غير من الخلفي و علشان كدة مبرجلة ....

تمام؟؟؟؟ لسة لسة :)

[borio1704]

اخ هيما
الصراحة مشاركاتك قيمة جدا و انا عربيتى بتبرجل فعلا و مافهمتش غير لما قريت توضيحك
ربنا يجازيك خيراً
انا عاوز بس اقول ان انا قريت وظيفة pcv اللى هو بلف السايكون و عاوز اوضح ان وظيفته مش تحكم بالغازات او تقليل انبعاثات دا مصيبة اكبر

فيه غازات بتتسرب من ورا شنابر الضغط اللى حوالين البساتم و بتنزل تحت -برة غرفة الاحتراق-و تروح محبوسة فى الكايسينج بتاع الكرنك (crankcase )
طبعا بتتحبس و بتعمل ضغط على العمواد اللى بيدور و لازم تتصرف برة المكان دا فورا لانها بتعوق الدوران--مصيبة سودا- البلف دا بقة بيصرفها .. دا وظيفته اساسية للغاية

للى ما يعرفش : غازات العادم و الاحتراق او حتى ابخرة البنزين المفروض انها تخرج من صمام العادم فى قمة غرفة الاحتراق و تروح فى مجمع العادم و منه للشكمان
لكن فى حالة التسرب هى بتنزل تحت البستم و منه للغرفة الكبيرة اللى فيها عمود الكرنك اللى بيدور

مش عارف بقة الموضوع دا ليه موجود فى الاسبيرانزا بس
هل بقية العربيات مبيحصلش فيها تسريب من النوع دا
ولا بيحصل فى كل العربيات و البلف دا صلاحيته مدى الحياة و مش بيحتاج تغيير ابداً

بلف السايكون أو الPCV موجود في كل المواتير بلا استثناء.. وماهواش حاجة مرتبطة بماركة دون أخرى.

فعلا .. مهمته إنه "يهوي" البلوك من الضغط الزايد... ﻹن الضغط الزايد بيأثر على حركة البساتم ( مش عمود الكرنك )... خاصة لما يكون البستم نازل في شوط الPOWER أو في شوط السحب.

المعلومة الأهم... إن تسريب الغازات بيحصل في كل المواتير بردو بلا استثناء... حتى لو كانت زيرو... بس كمية التسريب هي اللي بتفرق حسب حالة الموتور.



على فكرة.. وجود البلف ده سبب أساسي في نقص الزيت في المواتير... ودي حاجة مش هنقدر نمنعها بردو... وبردو كمية النقص معتمدة على عدة اسباب..

الموضوع ده فيه معلومات أكتر عن بلف السايكون وأسباب نقص الزيت

http://www.nilemotors.net/Nile/418186-a.html


...

[hemaa_82]

المهم ....
مشيت بقي و الحمد لله مبسوط .... مرة واحدة الاقي صوت ولا كانها رصاصة ... قلت جايز دست علي ازازة ولا حاجة ..... كملت عادي.....
اجي اهدي ؟؟؟مفيش فرامل... كاركت و وقفت ... ابص القي ولا في طاسة الجنط ولا صامولة الكوبلن ...

كلمت نبيل و كانت 12 و نص بعد نص الليل ....الحق يا بلبل حصل كذا كذا ... طب ماشي يا باشا هستناك ....

رجعت بص قالك ده مش الصامولة يا باشا ده قلاوظ الكوبلن كله اتكسر .....

[hemaa_82]

طبعا ركنت عنده بعد ما رجعت لانها كانت ماشية والعجلة بتفك من مكانها واللي ماسكها يا دوب كاليبر الفراملو البلية .....

تاني يوم بنبص الخساير ايه ...
كوبلن
بلية من اللي لسة راكبين مغناطيسها اتدشمل

رجعت اشتريت و كلمت فتحي الخراط جه تاني خد البلية كبسها .......

ركب يا بلبل .... ركبنا ...ز قفل تمام ... نجرب ....؟؟؟؟؟ الabs منور ......

الحساس اتلط للاسف ........ ادور يمين شمال ... دمشق .. حرفيين ... جسر السويس.... مفيش

تاني يوم رحت الكويت والبلاد العربية ... مفيش شمال ...موجود يمين بس....
رحت ابورواش ... اجازة
دخلت علي الكيلو 32 ..... الحمد لله لقيته بمعجزة
رجعت رجعت بعد الشغل... ركب
جرب
كله تمام ......

و بكده قفلنا اسبوع درامي فقري نحس و لله الحمد