تجارب "ملاك" الدايهاتسو مع مراكز الخدمة

[معاذ الشرباصى]

صيــــانة الألف كم

يوم الاحد خلصت بدرى, فقررت اروح اعمل صيانة الالف, حتى محجزتش قبلها

وصلت على الساعة 12 و ربع كده, دخلت العربية

ده كان وقت الراحة و الصلاه هناك, يعنى لو حد ناوى يروح يروح قبل كده احسن

بدأوا الشغل تانى على الساعة 1 و نص تقريبا, و عربيتى دخلت فى الاول علشان دى مجرد صيانة الالف

العربية رفعها, ربط العفشة , و شاف ضغط الاطارات, و بعدين قعد يشوف كل حاجة فى العربية, شاف الزيت و المياه, و زود مياه المساحات

بعد كده العربية اتغسلت , و خرجت على الساعة 2

----------------------------------------------------------

ملاحظاتى على مركز الصيانة عموما:

1- المركز طبعا صغير, بالنسبة للنمو الكبير اللى حصل فى مبيعات دايهاتسو, و لازم طبعا يعجلوا بفتح مراز تانية علشان الموضوع ده ميبقاش نقطة سلبية فى صالحهم

2- فى شوية حاجات مش موجودة للعربية, يعنى كنت عاوز اركب انذار + ريموت, قالت لى بعد اسبوع, و الفوجات ميعرفوش عنها حاجة او هتيجى امتى

3- صالة انتظار العملاء بتبص على الورشة, و دى فى حد ذاتها حاجة جميلة, و كمان فى Wi-Fi علشان الناس اللى هتطول هناك, ده غير فى منطقة لعب اطفال, و منطقة بالخارج للمدخنين

4- كان فى عامل كنت عاوز اشتكيه لهم هناك, هو كان شغال فى عربية تانية, لكن لاحظت انه بيتعافى على العربية, و بينقل الفتيس الاتوماتيك و العربية مش واقفة تماما, ده غير طرقة سواقة مستفزة للعربيات, بس كنت مستعجل و لازم امشى

5- اهم حاجة , و دى خليتنى قلقان حبتين: عربية سريون سماوى غير مرخصة, بورق الفابريقة لسه, و بيترش لها اكصدام خلفى. طبعا انا قلقت جدا, ان دى ممكن تكون عربية جديدة و هتتباع لحد و هى مرشوشة, لكن قالوا لى بتاعت عميل, بس صراحة مش مطمئن برضه (العربية كأنها لم تلمس على الاطلاق)

6- فضلت اقول لمهندس الاستقبال على موضوع ازالة اثار ورق الفابريقة (الابيض الملزوق على السقف و الكبوت), فضل يقولى دى حاجة بسيطة, اغسلها فى بنزينة, و دى مش مستاهلة. المهم فضل يتهرب علشان ميعملهاش

7- نظامهم مختلف عن توكيلات كتير: بتدخل بالعربية, الامن هناك يدي الورق اللى مهندس الاستقبال هيملاه, بعد كده بيخرق معاك المهندس يعاين العربية. مفيش حد مثلا بيشيل الحاجات اللى انت سايبها فى العربية ( فى توكيل فولكس الحاجات دى كانت بتتشال فى الامانات)

8- تغيير الزيوت : بيبقى حسب رغبة العميل, سواء موبيل 1 او xhp. دى مش مشكلة, لكن التغيير بينهم ده غلط, و لكن محدش من المهندسين هناك بيعلق على الموضوع ده, بيسأل العميل عاوز ده و لا ده و خلاص. المفروض بيحط زيت يثبت عليه , او على الاقل عدم الارتقاء من زيت معدنى لزيت تخليقى.

----------------------------------------------------------

دى كانت اهم الملاحظات, و لو افتكرت حاجة تانية هضيفها ان شاء الله

http://www.nilemotors.net/Nile/showthread.php?t=19748

[معاذ الشرباصى]

تجارب "ملاك" الدايهاتسو مع مراكز الخدمة

صيـــانة الــ 5 الاف

يوم الخميس اللى فات عملت صيانة ال 5 الاف للعربية

الصيانة تضمنت الاتى:

1- تغيير زيت موبيل 1 + تغيير فلتر زيت

2- تربيط العفشة

3- الكشف على السوائل فى العربية + تزويدها

4- تزويد العجل, لو محتاج

5- كشف عام على العربية

تكلفت 376.5

---------------------------------------------------------

ملاحظاتى على مركز الصيانة:

1- طبعا هناك فى زحام, غير ان يوم الخميس ده نص يوم بيخلصوا الساعة 3 و نصف تقريبا, فده اقل يوم شغل, الحاجة اللى تساعد على الزحام ده ان فى عدد 2 موظفى استقبال فقط و صغر حجم مركز الصيانة عموما

2- الاستراحة فوق جميلة فعلا, و اهم نقطة فيها انك شايف كل اللى بيحصل فى الورشة, غير وجود ال wireless علشان الناس متزهقش و التليفزيون. المشروبات كمان مجانا

3- بالنسبة لنقطة الكشف على السوائل, انا لاحظت انهم بيزودوا مياه عادية من الحنفية, مش مياه خضراء او حمراء. الكلام ده لاحظته فى صيانة الالف, لكن قلت ممكن انا مش واخد بالى. نزلت كلمت مهندس احمد عبدالوهاب على الموضوع ده, و كان رده كالاتى " مياه الفابريقة الموجودة فى العربية تركيزها 50%, و التركيز المطلوب بين 25-30%, اذا لن يحدث اى ضرر من تزويد مياه عادية, علشان حتى تقلل من تركيز المياه الموجودة"

4- لو حد منكم حاطط نيتروجن فى العجل, يبقى يقول لمهندس الاستقبال, علشان ميزودوش العجل, او يكشفوا عليه فى الورشة

5- كان عندى صوت مضايقنى جدا فى الناحية الشمال الامامية مع المطبات و الحفر اللى فى الشارع. بعد تربيط العفشة, خرح معايا مهندس احمد عبدالوهاب, جربنا العربية فى ظروف شاقة جدا, إن العربية تعمل الصوت ده, مفيش فايدة , ساكتة خالص و مفيش اى صوت. بعد لما مشيت, بلف من تحت الكوبرى اللى عند مدخل الحرفيين, الصوت ظهر تانى.
كلمت مهندس احمد بعدها بيوم, و قالى تعالى مرة تانية, و هخلى مدير الورشة يخرج معاك و تجربوها تانى.

6- العربية عموما بعد الصيانة : صوت الموتور اكثر هدوءا, خاصة لما يبقى لسه بارد, العفشة ادائها تحسن, سحب العربية كمان اتحسن, و ان كان لسه مش حاسس انها عربية 1500. يعنى قبل الصيانة جبت بيها 160 بالعفاية, بعد الصيانة, و انا راجع من مقابلة يوم الجمعة كنت مستحلف للعربية, و جبت بيها 180 و كان ممكن تزود لسه, بس الطريق وحش, و ده رفع معنوياتى :) (انا بقالى فترة مبطل جرى بسرعات عالية, لكن الحكمة من الموضوع, انى لو احتجت لأى سبب ان العربية تجرى, تبقى جاهزة لكده)

7- اللى عاوز يروح مركز الصيانة, يحاول يحجز بدرى, هينجز بسرعة , غير لكا يكزن رايح الساعة 11 او 12. ده غير لو حد راح من غير ميعاد مش هيستقبلوا العربية, انا شفت كده بعينى. و ده حقهم لأن النظام نظام, و يطبق على الكل.

----------------------------------------------------------------

اخر حاجة, مهندس احمد عبدالوهاب مدير الاستقبال هناك, هو شخصية جميلة جدا و متعاونة لأبعد حد. هو عارف ابوعبدالله كويس, علشان كده لما عرف انى من نايل موتورز, قعدنا نتكلم مع بعض, و الراجل عرض ان اى حد من الموقع عندنا, عنده اى استفسار او اى حاجة, لما يروح هناك يكلمه بس و يقول له انه من نايل موتورز و هو هيقوم بالواجب.

انا تحت امركم فى اى استفسار

http://www.nilemotors.net/Nile/showthread.php?t=24432

[ara]

صيـــانة الـ5 الاف و تغيير الكارتيرة

صباح الخير
انا دلوقتى فى العبور من الساعة 10.20 ميعادى كان 10.15 لعمل الصيانة و تركيب الكارتيرة.
العربية دخلت على طول وقعدت فى الإستراحة انا و زوجى نراقب السريون. نزلنا قابلنا المهندس أحمد عبد الوهاب, الراجل زوق جدا.. ياسر زوجى قال للمهندس أحمد إن إحنا من طرف معاذ (ألف شكر على التوصية يا معاذ.. و الدعوات شغالة بالنجاح) الراجل رحب جدا و دخلنا الورشة نطمن على العربية وقال لو كانت الحاجة اللى خبطناها اجمد كانت ممكن تكسر كارتيرة الزيت .. ووصى العامل على العربية وإنه يشيك على كل حاجة كويس إلخ.

المهم قاعدين نتفرج عليهم من فوق ولقينا الفنى ماسك الكارتيرة وعمال يلف على العربية .. يبص على مكانها يمين وشمال وشكلة مش عارف يركبها!!
طلعلنا أستاذ من الإستقبال وقال غالبا ديه مش الكارتيرة بتاعتها!!! يعنى إيه أنا شارياها من إحمد عرابى من الأستاذ أحمد مسئول قطع الغيار و كلمتهم أكتر من مرة وحجزتها وبعدين إستلمتها إلخ ومعاهم كل المعلومات سيريون 2008 Glx !!!
الراجل نزل الورشة تانى وبقلنا حوالى 40 دقيقة شايفنهم اكتر من واحد عمالين يمسكو الكارتيرة ويقارنوها جنب عربية ماتريا وتريوس زى ميكونو بيدورو هيا بتاعت انهى عربية!!

المهم.. بعد صلاة الظهر طلع مهندس الإستقبال وقالى إن الكارتيرة مش هاتتركب و الموضوع دلوقتى مع المهندس عبد الوهاب!
نزلنا قابلناه الراجل قعد يتأسف كتير جدا وقال ديه غلطة من الأستاذ أحمد لانه المفروض يشيك على الكارتيرة حسب رقم الشاسيه مش حسب الموديل بس! وطلعت الكارتيرة اللى أخدناها موديل سريون 2007, ومتركبش على 2008.
فيه كمان مهندس قابلنا هو مدير الصيانة و هو كمان قعد يتأسف وكانو ذوق جدا.. بس المشوار والغلطة هما اللى يفقعوا!
المهندس أحمد كلم فرع عرابى وطلب مننا نروح نرجع الكارتيرة وناخد الفلوس..
مهندس عبد الوهاب وعدنا يجيبو الكارتيرة الصح ونروح نركبها فى العبور خلال الإسبوع إن شاء الله.


انا روحت إمبارح بعد الصيانة رجعت الكارتيرة و أخدت الفلوس.. الأستاذ أحمد بيقولى أصل فيه أكتر من موديل 1500 CC! انا قلتله إن اللى أعرفه إنها موديل واحد GLX 2008 1.5 وانا شاريه العربية من عندكم!! واضح إن الراجل حب يبرر ويعتذر وخلاص.

http://www.nilemotors.net/Nile/showthread.php?t=29600

[MoToRiZeR]

تجارب "ملاك" الدايهاتسو مع مراكز الخدمة

تركيب سماعات فى التوكيل

انا اشتريت سماعتين و ركبتهم مشتتغلوش الراجل قاللي لازم الفيشة مش متوصلة .. هنفك التابلوه قلتله لأ سيب السماعات متركبة و انا هروح التوكيل اشوف موضوع التابلوه ده .

انا كتبت الموضوع الساعة 1 و نمت .. قلقت الساعة 6 قلت اخطف رجلي للتوكيل مش هخسر حاجة انا موراييش حاجة انهاردة فرصة .. نزلت وصلت هناك 8 و نص .

سبت العربية في الباركنج بتاع التوكيل و دخلت جوة قابلت المهندس حكيتله بإختصار قاللي طب اتفضل .. بعديها جه قاللي حضرتك السماعات دي راكبة برة مينفعش نشتغل فيها .. قلتله انا مش جي عشان السماعات .. انا فيه توصيلة مش متوصلة في الكاسيت عايز اوصلها و لازم افك التابلوه فا عشان كدة جيت .. السماعات ملهاش دعوة انا عايز توصيلة الكاسيت .. قاللي طب ثواني .. و راح و رجع تاني .. كتب البيانات و قاللي هتتكلف 90 جنيه .. قلتله ليه مش المفروض دي في الضمان ؟ المفروض انها راكبة .. قاللي لأ حضرتك احنا عاملين الوصلة بس مش شرط نركبها في الكاسيت ! قلت اوكي .. مع اني مش بالعها .. طلعت فوق .. و شفتهم بيفكوا التابلوه من الازاز .. لقيت المهندس جي يقولي الكهربائي اللي فكلك التابلوه بوظ ضفيرة الكاسيت و كلها متوصلة عكس بعضها مينفعش تشغل الا السماعتين اللي قدام بس .. عشان تشغل ورة محتاجة شغل ساعتين و هنزود مية و خمسين جنيه !

قلتله ايه !؟ انا اصلا مفكتش التابلوه !! امال انا جيت ليه .. قاللي اصل بص حضرتك انت اشتغلت في العربية برة و احنا ملناش دعوة .. قلتله انا قلتلك ان انا جاي أصلا لأن مرضتش الكهربائي يفك التابلوه .. انا كل اللي عملته فكيت الباب .. وصلت فيشة السماعة في السماعة و قفلت !! فين بقي الضفيرة دي ؟! و فجأة لقيت الأسلوب كأن انا النصاب اللي بوظ العربية برة و جي يرمي بلاه عالتوكيل .. قلتلهم يا جماعة و الله العظيم انا مستلم العربية كدة و دي أول مرة أفتح التابلوه .. طبعا محدش اشتري كلامي .. المهم اما لاقاني مصمم وداني لمهندس تاني .. قعد يقنعني ان الكهربائي عملها و انا مش واخد بالي .. قلتله يا عم انا كنت واقف علي ايده .. و بعدين انا مركب انذار عندكوا عشان الكهربا .. و جيلكوا اهوه عشان برده ملعبش برة في العربية .. ليه بقي المعاملة دي ؟

و وروني العامل و قاللي لأ الضفيرة ملعوب فيها الأسلاك مش متوصلة صح .. قلتلهم انا مش هدفع في الكلام ده .. ودوني للمهندس أحمد عبد الوهاب ( مكنتش اعرف ان هوا ) .. برضه مكنش مقتنع .. و قلتله ممكن يكون اتوصل غلط و هوا بيتركب ما ده مش كاسيت العربية .. و انا بصراحة كنت بدأت اتخنق و حاسس ان خلاص هاخد العربية و امشي .. فا اما لقيت مفيش فايدة .. قلتله انا عايز اقابل مهندس احمد عبد الوهاب .. قاللي احمد عبد الوهاب معاك .. قلتله انا ميمبر فيه نايل موتورز و ابو عبد الله و معاذ كانوا قالولي اسأل علي حضرتك .. قاللي يا راجل .. مش تقول كدة .. و ليه اشتغلت في العربية برة .. قلتله يا سيدي و الله ما حصل امال انا جي ليه !! انا كل اللي عملته شبكت السماعات لقيتها مشتغلتش جيت !!! قاللي بس بأمانة ربنا الضفيرة دي ملعوب فيها .. بس عموما اطلع استريح فوق و سيبلي العربية خلاص .. انت قلتلي كلمة السر .. ساعة الا ربع كدة (مش ساعتين زي ما المهندس التاني قال) و لقيت العربية مغسولة و مستنية برة .. طلعت شغلت الكاسيت .. لقيت السماعات ورة شغالة .. فا رحتله و شكرته و قلتله علي فكرة لو دخلت نايل موتورز هتلاقي توبيك بتاريخ امبارح فيه قصة اللي حصل في السماعات و انب مفكتش التابلوه .. مصدقنيش برده و مصمم ان التابلوه اتلعب فيه و لكن كتر خيره الراجل خدمني جامد و مدفعتش غير تمن الكشف عالعربية .. اخدت العربية و مشيت بعديها بساعة الا ربع لأن الكاشير مكنش موجود كان في البنك (!!!!!!!!!!!) و ده سبب تكدس جامد جوة التوكيل لأن العربيات اللي خلصت كانت بتفضل قاعدة برده لأن مستنية تدفع .

محبتش المعاملة المرة دي خالص و حسيت التوكيل غير منظم بالمرة .. يعلم الله وحده اني و الله ملمستش التابلوه ولا الكاسيت ولا سبت حد يلمسه و قلت هعمله في التوكيل و انا كتبت الموضوع امبارح و شارح فيه اني مفتحتوش و اكيد مكنش عندي اي فكرة عن اللي كان هيحصل انهاردة .. و كانت النتيجة غير مرضية ولولا نايل موتورز كان زماني متعكنن أخر عكننة .. يحصل ايه لو اكتشفت ان فيه حاجة في العربية متوصلة غلط ؟ اتعامل كالنصاب برده زي المرة دي !؟ و بعدين ايه موضوع ان الكاسيت متركب غلط أصلا !؟ المفروض انا اللي صاحب حق !! الخلاصة انا اتضايقت انهاردة و لكن مهندس احمد زبطني في أخر اليوم ولو انه لسة مصدقنيش .

نصيحة .. محدش بقي يركب اي حاجة برة عشان ميديش فرصة لحد يتلككلوا عشان التوكيلات مش سايبانا في حالنا .
حتي لو حاجة في قمة الهيافة و التفاهة زي السماعات اللي أصلا ليها مكان المفروض متوصل ( امال التوصيلة معمولة ليه ! )

http://www.nilemotors.net/Nile/showthread.php?t=32029

[ows212]

تجارب "ملاك" الدايهاتسو مع مراكز الخدمة

صيانة الــ 5 الاف

السلام عليكم حبيت احكى عن تجربتى مع توكيل ديهاتسو وصيانة ال 5000
...حجزت بالتليفون قبلها بحوالى 10 ايام على يوم 12/7 الساعة 1.45
... اتصلوا بيا يوم 10/7 يأكدوا عليا الميعاد وانى اكون موجود قبلها بربع ساعة
... طلعت بالعربية يوم 12/7 الساعة الواحدة صباحا....ايوة صباحا ... علشان انا من سوهاج .. يعنى ماتزعلش يا على على ال 75 كيلو بتوعك ..
عديت على اخويا فى المنيا ريحنا ساعتين وبعدين كملنا سكتنا
... وصلنا القاهرة وأخدنا الدايرى ... وبعد كام سؤال واستفسار وصلنا التوكيل
... مهندس ماجد كان ماسك العربية بتاعتى ..
طلبت تركيب دلاية كانت وقعت .. وتركيب انذار ... وتغيير مكان مراية الصالون
وتضبيط العفشة ....وتغييير زيت موبيل ون ... والكشف عن التكييف .. واضافة سائل المساحات الأزرق
.................................................. ..........................
كل حاجة اتعملت ما عدا المراية لأنها ثابتة فى البربريز ..التكييف اتزود فيريون من غير ما ادفع فلوس
.................................................. ..........................
سائل المساحات اتكلف 20 جنيه مش هاعملها تانى .. هاحط جلانس
اجمالى الحساب 890 جنيه
طبعا الجزء الأكبر راح للأنذار
.................................................. ..........................
قبل ما يبدأ الشغل بيكون فى قعدة مع المهندس بيسألك على كل حاجة انت عايزها واى ملاحظات عن العربية .. وبيحسب التكاليف كلها علشان تكون على علم باللى هاتدفعه ... بصراجة انا عاجبنى النظام بتاعهم ...
العربية خلصت فى ساعتين والأنذار بس هو اللى عطلنا حوالى ساعة ونص كمان
.................................................. .........................
شكر خاص جدا جدا جدا لمعاذ اللى وصى عليا مهندس أحمد عبد الوهاب وكان متابع معايا بالتليفون
(ملحوظة) جميع العاملين فى التوكيل من مهندسين وفنيين وعمال وخلافه من صغار السن الغالبية لا تتعدى 30 سنة وده حسسنى انى كبرت شوية
(ملحوظة تانية) كان في 2 ماتيريا فى التوكيل ..بعد ما شفتهم مرت عليا لحظة ندم انى ما جبتش ماتيريا .. بالرغم من حبى للسيريون

http://www.nilemotors.net/Nile/showthread.php?t=32229

[M.Mosaad]

تجارب "ملاك" الدايهاتسو مع مراكز الخدمة

تأخيـر قطع الغيــار

الحمد لله انا اشتريت سيريون اتوماتيك 2008 و استلمتها في 23-6-2008 و الحمد لله علي كل حال اتخبطت تاني يوم من الناحيه اليمين و المفروض اني اغير اكصدام امامي و كارتيرة و الفانوس اليمين و الرفرف لسه هيشوفوا هيتغير و لا التامين هيرخم و يحاولوا يردوة المهم انا النهاردة يوم 23-7-2008 و لحد دلوقتي الاكصدام الامامي لسة مش موجود و انا ماشي بالعربيه كدة بقالي شهر يعني عربيه جديدة و مخبوطة الحمد لله

انا لاحظت ان في كذا موضوع عن قطع غيار ناقصة ( زجاج امامي - و وحدات رفع ) ان كنت فاكر ان المشكله في الاكصدام بس من الواضح ان في حاجات كتير ناقصة و لا انا فاهم غلط يعني انا اشتريتها علشان التوكيل محترم لكن من الواضح كدة ان القطع بتتاخر اوي و لا انا اللي حظي وحش

http://www.nilemotors.net/Nile/showthread.php?t=32776

[AhmedElsayed]

تجارب "ملاك" الدايهاتسو مع مراكز الخدمة

تأخير حجز الصيــانة

معايا شاريد وبروح اعمل الصيانة واغير زيت كل 5 الاف فى التوكيل
وعادة بتصل قبليها باسبوع علشان ببقى عايز يوم السبت لكن لو فى وسط الاسبوع تقريبا ممكن تحجز قبليها بحاجة بسيطة

دلوقتى بتصل لقيت البنت بتقولى اول ميعاد 23 اغسطس!!!!!!!!!!!!!!!!
ليه يا ستى؟ تقولى عندنا ضغط صيانة جامد
طيب انا فى خلال الشهر ده حكون عديت ال 30 الف ب بشوية حلوين وخاصة لو سافرت اى حتة
بصراحة اتنرفزت وقلت للبنت اننا مش ذنبنا انكم عندكم مكان صيانة واحد بس لغاية دلوقتى والعربيات عمالة تكتر
بصراحة حاجة مستفزة هو مفيش حاجة بتلزم التوكيل خالص ان يبقى عنده عدد فروع معينة قبل ميتوسع فى النشاط

http://www.nilemotors.net/Nile/showthread.php?t=33292

[ara]

تأخير حجز الصيانة

انا كلمت الصيانة الخميس اللى فات قالو مافيش حجز قبل 3 أسابيع بداية من 14/8!!
و اللى ردت عليا إقترحت إنى اغير الزيت برده التوكيل و طبعا مش هاعمل كده... انا كلمت الرقم الأرضى إمبارح اشتكى من موضوع الحجز ده و قلتلهم إن حد نصحنى من 16168 إنى اغير زيت بره قالولى لا طبعا و إحنا هنراجعهم فى الموضوع ده!
و طبعا برضه قالولى إن شاء الله أبو رواش يفتح قريب!!

http://www.nilemotors.net/Nile/showthread.php?t=33292

[معاذ الشرباصى]

تجارب "ملاك" الدايهاتسو مع مراكز الخدمة

صيـــانة الـ 10 الاف

السلام عليكم و رحمة الله و بركاته

يوم السبت 9 اغسطس, عملت صيانة ال 10 الاف للعربية

الصيانة تضمنت الاتى:

1- تربيط العفشة
2- رجلشة الفرامل الخلفية + تنظيف التيل الامامى و الديسكات
3- الكشف على السوائل و الزيوت
4- عمل ال rotation الخاص بالعجل

بالنسبة لى كان ملاحظاتى على العربية كالاتى:

1- مكنة الزجاج الامامى, ساعات قليلة تعمل صوت و الزجاج بينزل, و كعادة العربية معايا, رفضت تماما انها تعمل الصوت هناك

2- سألنا على موضوع الباور بتاعى و بتاع على, و مهندس احمد جرب العربيتين لكن مكنش فى فرق بالنسبة له. زيادة عندى لما سافرت, الباور عندى متقلش مع السرعة, قلت لهم على الملاحظة دى, و المفروض لما اجربه اشوف اتحل و لا لأ

3- التكييف كان اداءه اقل, تم الكشف على الفريون, و لم تحتاج الى اى زيادة و تم تنظيف فلتر التكييف و خلافه (خلافه دى لأنى مش فاكر ايه تانى نضفوه صراحة). الاداء احسن نوعا ما.

انا كنت موجود هناك على الساعة 9 و نص تقريبا, و العربية خلصت على الساعة 11 و نص زى الاتفاق

نيجى للتكلفة, كانت عبارة عن:

175 جنيه مصنعيات
10 جنيه شحومات و مستهلكات
18.5 شريبة مبيعات
الاجنالى = 203.5 جنيه

طبعا الرقم انا شايفه كتير جدا, خاصة ان قبل اما اروح كنت سألت حد هى عبارة عن ايه, قال لى انها تربيط عفشة بس.

علشان كده كنت كتبت فى الموضوع دهhttp://www.nilemotors.net/Nile/showthread.php?t=33164 انها حاجة بسيط و التكلفة حوالى 88 جنيه, فبعتذر عن المعلومة الغلط دى

حتى بالحاجات اللى معمولة فوق دى, شايفه رقم كبير

-------------------------------------------------

الملاحظات على مركز الصيانة:

1- مفيش زحمة خالص, يعنى بالرغم ان الناس بتتصل و يحجزوا شهر قدام, الا ان مفيش زحمة. ممكن هما يكونوا مقللين العدد, لكن فى المقابل العربية خلصت اسرع , و خرجت متنضفة من جوا و برة

2- اعداد الماتريا بقت مش قليلة و كانت اغلبية فى اليوم ده, منها اللى لسه مرخص و منها القديم

3- طبعا ما زال ميعاد ابو رواش مبهم, و م/محمد عبدالصمد مدير المركز بيتوقع انه يخلص على مارس 2009

-------------------------------------------------

طبعا موضوع الساعة بتاع الخبط اللى فى العربية

هكتب تفاصيله, و تفاصيل الحوار مع م/احمد عبدالوهاب و م/محمد عبدالصمد

طبعا م/احمد عبدالوهاب قام بالواجب و زيادة فعلا و الراجل فعلا بيكن للناس اللى من نايل موتورز كل احترام و تقدير و انا فعلا كسبت معرفة شخصية زيه

http://www.nilemotors.net/Nile/showthread.php?t=34817

[معاذ الشرباصى]

تأخير قطع غيار

الحمد لله على كل شىء

انا عندى المراية اليمين اتكسرت

اتصلت بيهم علشان اسأل عليها, مش موجودة

و علشان تبقى موجودة لازم اروح احمد عرابى علشان احجزها و يبعت يجيبها فى خلال 15 يوم. طب ازاى هى مش متوفرة, يقول اصل هى خلصت.

طيب مش المفروض خلصت يبعتوا يجيبوا من نفسهم, و لا لازم واحد يجيلهم ميلاقيش الحاجة

بقول للراجل ده تهريج, زعل منى

على العموم انا عملت شكوى على الرقم بتاعهم (16168) و قالوا انه هيجيلى رد فى خلال 48 ساعة

انا فعلا مش عارف اسوق من غيرها, خاصة ان مراية الصالون مداها صغير

و لما تقول لهم اى حاجة فى التليفون هى جملة بيفضل يرددها مستفزة جدا " اصل حضرتك قطع الغيار يابانية اصلية معمرة"

ده غير واحد تانى قالى حاجة تجيب شلل رباعى " اصل بيجيلنا قطع غيار مش مطابقة للمواصفات بنضطر نرجعها و نطلب من جديد"

http://www.nilemotors.net/Nile/showthread.php?t=32776&highlight=%E3%DA%C7%D0+%C7%E1%D4%D1%C8%C7%D5%EC&page=5

[MoToRiZeR]

تجارب "ملاك" الدايهاتسو مع مراكز الخدمة

صيــانة الـ 10 الاف

إنهاردة كان معاد الحجز بتاعي لصيانة العشر الاف .. العداد كان عامل بالزبط 10800 كيلو إنهاردة .. نزلت الساعة 10 كدة و رحت قعدت في نادي الرواد في العاشر من رمضان و وصلت التوكيل الساعة 12 و ربع في معادي بالزبط اللي قالهولي الكول سنتر

لقيت الدنيا زحمة أوي مش عارف ليه بس تقريباَ كان فيه حاجة غلط ساعتها و الزحمة خفت بعد كدة علي بال ما دخلت و طلعت فوق

كان كلامي مع مهندس ماجد :) شفت باشمهندس أحمد من الشباك بس كان مشغول و معاه ناس فا مرضتش أبرشط عليه شكل ضغط الشغل جامد في رمضان

الورق خلص الساعة 1 تقريباَ عشان كانت الدنيا زحمة .. العربية دخلت الساعة 2 إلا ربع تقريباَ .. إترفعت و نضف تحت الكبوت و زود مياة الردياتير ثم تم تزبيط الفرامل و تربيط العفشة و الدلاية كان وقعت إتركبت و الكارتيرات قدام وقع منها مسامير إتركبت و كان عندي طرف الزجاج الأمامي بارز عن الرف اللي تحتيه فا إتزبطت برضه .. الساعة 3 إلا تلت تقريباَ العربية كانت زي الفل و مغسولة و مستنية برة و فيها كل الملاحظات اللي قلتها لباشمهندس ماجد إتعملت و نضفوها جوة كمان خاصة منافذ التكييف .

مشيت بالعربية حسيتها مسكت نفسها بعد تربيط العفشة لأن انا كنت قاسي عليها قوي الخمس الاف دول و عارف إن العفشة محتاجة تربيط .. الهاند بريك تقلت شوية .. و الفرامل اداءها بقي أحسن كتير و الإستجابة أسرع (جربتها مباشرة علي الدائري سواق نقل ظريف وقف أدامي فجأة لسبب ما فا ضربت فرامل من اللي بتعلم في الأسفلت ) .. و انا مبسوط بالعربية كان فيها حاجات صغيرة عايزة تتزبط الحمد لله إتعملت

الكارتيرة و كلبسات الإكصدام باشمهندس ماجد شاف الوضع و قاللي إني محتاج أغير حامل الإكصدام (92 جنيه) و الكارتيرة لأنها متنفعش تاني (205 جنيه) .. انا كنت هعملهم إنهاردة بس الكارتيرة مكانتش موجودة فا قاللي نعملهم مع بعض في يوم واحد أحسن عشان تتعمل مزبوط و مش لازم أحجز قاللي أول ما تيجي أو تشتريها من فرع المهندسين هاتها و تعالي .

و بكدة إنتهت صيانة العشرة الاف علي خير

بس و انا راجع الطريق كان .. و الله ما عارف أقول إيه .. أخدت 3 ساعات إلا ربع في طريق العودة منهم ربع ساعة واقف في مكاني علي مطلع الدائري .. هوا في إيه يا جدعان .. و أول ما الطريق مشي .. أكروبات .. و الله انا بقول الحمد لله إني وصلت سليم

شكراَ دايهاتسو و في إنتظار مركز أبو رواش اللي هيفرق معايا كتير

أه الصيانة كانت سعرها 264 جنيه .. هي المفروض أرخص من كدة بس عشان العربية إحتاجت شوية كلبسات و بتاع في التزبيط

http://www.nilemotors.net/Nile/showthread.php?t=39310

[ragea Abdoo]

تجارب "ملاك" الدايهاتسو مع مراكز الخدمة

إصلاح هزة فى الدريكسيون

احب ان تعرف الناس جميعا شكري الخاص لديهتسو مصر وللمهندس محمد عبد المقصود والمهندس احمد عبد الوهاب وذلك للاهتمام الغير متوقع لتقديم افضل خدمة لعملاء ديهتسو ............

وكل ذلك لآني كنت اعاني من مشكلة في سيارتي التريوس ٢*٢ ........وقد عرضت هذة المشكة من قبل فى نيل موترز .............وهي انه يوجد هزة فى الدركسيون عند سرعة المائة وتلك المشكلة ظهرت عندما غيرت الجنوط العادية بواحدة اسبور واستمرت هذة المشكلة حتي اني كنت سابيع هذة العربية واستبدلها بواحدة ثانية لاني خلال هذة المشكلة عملت ترصيص خمس مرات في التوكيل ومرتين برة التوكيل وما زالت المشكلة موجودة ثم غيرت الجنوط مرتين حتي ظننت ان العيب فى السيارة نفسها او فى العفشة.......

طبعا هذا من الطبيعي ان يقوم التوكيل بصيانة السيارة او قطع الغيار او اكماليات التي نقوم بشرئها من التوكيل وهذا شيء طبيعي ولكن شكرى الخاص لهم هو تقديم هذة الخدمة باحسن من العادي وافضل مما كنت اتوقع ............................

فقد تم تغير الجنوط بجنوط جديدة جمدة جدااااااااا واغلي من التي كنت اشتريتها واثقل واكثر ثباتا وعايز كمان اقول لكم ان هذة الجنوط الجديدة اعطت ثبات اعلي للعربية لم يكن موجود من قبل مع الجنوط الاصلية للسيارة ولذلك اكرر شكري للقائمين علي الخدمة فى ديهتسو مصر (م/محمد عبد المقصود المدير الاقليمي لديهتسو مصر - م/ احمد عبد الوهاب مدير الصيانة بالمركز)...................................

http://www.nilemotors.net/Nile/showthread.php?t=45284&highlight=ragea+Abdoo

[AhmedElsayed]

تجارب "ملاك" الدايهاتسو مع مراكز الخدمة

حجز الصيـــانة

انا خلاص قرفت
كل الناس بتشكر فى دايهاتسو وتوكيل محترم
لكن انى اتصل احجز صيانة يقولى بعد شهر ونص !!!!!!!!!!!ده بقى كلام غير مقبول
فى الصيف كان الحجز بعد 3 اسابيع وقالولنا علشان ضغط الصيف والسفر
طيب ايه المشكلة دلوقتى، ودى صيانة دورية، طيب لاقدر الله لو واحد عنده مشكلة جامدة فى العربية يقعد بيها شهرين؟!!!!!!!!

ياريت ياريت محدش يجبلى سيرة ابو رواش وانه خلاص حيتفتح لان دى سورى بقت اسطوانة مشروخة ملهاش اى قيمة عندى


انا لو مسئول فى البلد دى اوقف استيرادهم لاى عربية لغاية لما يقدروا يعملوا صيانة للى موجود عندهم
ساعتها ابوراوش ده حيخلص هوا، لكن دلوقتى هما معندهومش مشكلة وعادى فى ساعة بريك فى النص واجازة جمعة مفيش مشكلة

لو انا توكيل فعلا مهتم بالناس كنت زودت ساعات العمل ولغيت اجازة الجمعة لان الضغط يبقى على الموظفين مش على العملا اللى ملهمش ذنب


انا كلمت جهاز المستهلك النهاردة وقالولى ممكن يتحركوا فيها لان فيها ضرر على المستهلكين وحبعتلهم كل الورق علشان تبقى شكوى رسمية

ياريت ياجماعة نتحرك وتقدموا اكتر من شكوى لحماية المستهلك علشان متبقاش شكوى وحيدة

ومنبقاش متعاطفين مع التوكيل اوى كده لان ده بقى استهبال زيادة عن اللزوم

http://www.nilemotors.net/Nile/showthread.php?t=46477

[Ahmed-Moustafa]

تجارب "ملاك" الدايهاتسو مع مراكز الخدمة

صيــانة الــ 10 الاف

السلام عليكم و رحمة الله و بركاته

يوم السبت اللى فات الحمد لله عملت صيانة الـ 10,000 كم و طبعاً كنت حاجز قبلها بحوالى 6 أسابيع
الصيانة كلها إتكلفت حوالى 420 جنيه :K14:

المصنعية 189 جنيه
الزيت 5000 كم 120 تقريباً ( مش فاكر)
فلتر 45 جنيه
متفرقات 10 جنيه
غسيل الموتور 35 جنيه

كان فى الصيانة دى ضبط سوائل العربية و ضغط الهوا و تدوير للعجل و تنظيف تيل الفرمل و رجلشة الفرامل الخلفية و تربيط العفشة و تغير الزيت (طبعاً كل دا مايكلفش 40 جنيه مصنعية برة التوكيل)

العربية بعد الصيانة بقت أحسن من ناحية صوت الموتور و الفرامل و خصوصاً فرامل اليد بس حسيت إن العفشة بقت ناشفة قوى شكيت فى ضغط الهوا داخل العجل بس لقيته مظبوط (مش عارف المشكلة فى إية باظبط) بس حسيت إن العربية بعد تربيط العفشة بقت ماسكة نفسها قوى ( يمكن تخيلات الله أعلم)
كان عندى الدلاية الشمال مش راكبة لسة بقله عايز أركبها إكشفت إن الدلاية اليميين مش موجود شكلها و قعت من غير ما أحس قلت الحمد لله و مش مهم دلايات خالص

بس كان فيه حاجات كويسة و جديدة فى التوكيل المرة دى
لاحظت إن الصيانة خلصت فى حوالى ربع ساعة ولما سألت قالولى إن دى حاجة جديدة عملتها إسمها 2man operation يعنى إتنين بيشتغلوا فى العربية فى نفس الوقت بدون ما حد يعترض شغل التانى وديهاتسو اليابان بعتت خبراء علشان يدربوهم عليها و دى حاجة مش سهلة إنها تتم بدون مشاكل. التوكيل جرب الطريقة دى فى صيانة ال 40,000 ودى بتاخد حوالى 4 ساعات ونص بس بالإسلوب الجديد خلصت فى 35 دقيقة بس

الحاجة التانية : التوكيل بيدرب صف تانى علشان يشغل ورديات مسائية و يوم الجمعة لمواجهة الضغط على التوكيل

الحاجة التالتة ودى مهمة إن التوكيل مهتم جداً بالمقابلة اللى عملناها و واعد بمفاجأت فى المقابلة التانية و نفسهم المقابلات دى تستمر و المكان يتثبت

المفاجأة الكبيرة الفوج لايت وصل التوكيل أخيراً بس لسة مش عارفين تمنه بس هيبقى بين 800 و 900 جنيه و إن شاء الله بعد الفصال هنخده بـ 300 جنيه , طبعاً دى حاجة كويسة إن الفوج يبقى فى التوكيل مش مهم نشتيريه

http://www.nilemotors.net/Nile/showthread.php?t=46353

[معاذ الشرباصى]

تجارب "ملاك" الدايهاتسو مع مراكز الخدمة

صيــانة الـ 20 الف

السلام عليكم و رحمة الله و بركاته

يوم الاثنين 10 نوفمبر عملت الحمد لله صيانة ال 20 الف للعربية

تكاليف الصيانة كالاتى:

262.5 عمالة
165.32 فلتر هواء
10 تشحيمات
ضريبة 43.78

الجمالى: 481.5 جنيه

العربية اتعمل فيها تقريبا نفس اللى اتعمل فى صيانة ال 10 الاف:

عمل rotation للعجل
ظبط الفرامل سواء الامامية و الخلفية
check على الزيوت و المياه, زيت المحرك و زيت الفتيس
تربيط العفشة

كان فى عندى كذا ملاحظة على العربية:
1- فى صوت تزييق من الناحية اليمين
2- لما ركبت المراية اليمين, كان فى صوت فى الباب كأن اللى ركبها نسى حاجة مش متركبة صح, او ملخلخة, فكانت فى بعض الاحايان بتعمل صوت

موضوع الصوت اللى فى الباب اتعمل, لكن صوت التزييق من الناحية اليمين للأسف مازال موجود, مع ان اللى جرب العربية قبل التسليم أكد انه اتعمل

خليت م/تامر فى الاستقبال يجربها معايا و فعلا سمع الوصت, لكن للأسف كانت الناس مشيت, بكده هتتأجل للمرة الجاية

---------------------------------------------------

بالنسبة للاخبار هناك:

1- م/محمد عبدالصمد قالى ان المكونات الخاصة بالتعديل متوقع توصل اول اسبوع من ديسمبر, لأنها اتشحنت من هناك خلاص

2- الموضوع اللى ذكره م/احمد (amfci106) فعلا فارق فى الوقت, و العربيات بتخلص بسرعة

3- بالنسبة لموضوع الفترة المسائية لسه الرؤية مش واضحة اوى, يعنى هما عاوزين يطبقوها, بس علشان تتطبق صح هتاخد وقت, و بكده الفترة الزمنية ما بين تطبيقها و افتتاح ابور وراش هتقى قليلة جدا

4- لازال فى تأكيد ان ابو رواش هيتم افتتاحه فى شهر مارس 2008

5- ال Call Center قريب اوى هيتلغى معاهم العقد, لأنهم بيفتوا كتير على العملاء, و بيتسببوا فى مشاكل.
يعنى على الاقل معايا كانوا مأكدين عليا ان الصيانة 422 بالضريبة و كل حاجة, و ده طلغ غلط, بس الحمد لله كنت عامل حسابى

---------------------------------------------------------

كنت عاوز كمان اصلح معلومة سابقى كنت كتبتها فى الموضوع ده:
سؤال عن صيانة ال 10 الاف

الانسة فى ال call center الخاصة بقطع الغيار افتت لى و قالت ان البوجيهات الاربعة تمنهم 104 جنيه تقريبا

اتضح ان ده تمن البوجيه الواحد, لأن التوكيل بيغير البوجيهات , بالبوجيهات الايريديوم و دول فعلا تمنهم 400+ جنيه (مش فاكر الرقم بالظبط)

انا اتكلمت مع م/احمد ان البوجيهات دى المفروض بتتغير كل 100 الف كم, قالى احنا بننصح تتغير كل 40 الف, بسبب رداءة نوع البنزين فى مصر, و بالنسبة للموضوع ده, مفيش اجبار, يعنى لو العميل عاوز يقعدهم اكتر مفيش مشاكل, بس ساعتها بيبقى الفيصل حالة البوجيهات

بالنسبة لموضوع السماعات الخاصة ب" askoda" : قالى ان السماعات الخلفية لها فيشة تتركب فيها سماعات مباشرة, فلو السماعات دى بتركب فى الفيشة مباشرة, يبقى ساعتها مفهاش مشكلة. على العموم ممكن تاخدهم معاك المرة الجاية و تشوف

http://www.nilemotors.net/Nile/showthread.php?t=46477