التقرير المنتظر لسيارات سوزوكي 2015 المرتقبة

[D . a .\ AYMAN]

انا ملقتش الا اختبار تصادم موديل 2010

https://www.youtube.com/watch?v=SLseyuEvWsc

فين اختبار تصادم 2015 اللي واخدة فية 5 نجوم؟

هي موديل 2010 هي الموديل اللى نازل في 2015 برضه مافيش فرق في معايير الأمان عشان كدة ما اتعملش عليه تست تاني .. هو ده الفيس ليفت اللى بقى أطول وأعرض وقاعدة عجلات أكبر

الموديل اللى قبليه اللى كان فيه فروق عنه كان 2005 اللى فضل شغال لغاية 2009

بس انت عارف عقبال ما الوديل يوصل مصر بنفتكر إنه هو لسة نازل برة

دي صفحة سوزوكي على الـ EURO NCAP ... وموضح عليها الموديلات دي

Suzuki | Euro NCAP - For safer cars crash test safety rating

[dr_samora]

الاستاز ايمن صاحب التقرير واضح انه مغرم سوزوكي

[D . a .\ AYMAN]

الاستاز ايمن صاحب التقرير واضح انه مغرم سوزوكي

عربيات محترمة يبقى ليه ما أحبهاش ... وعموما أنا بحب الهوندا أكتر منها كمان وسوزوكي أكيد وميتسوبيشي كذلك ... وبكره التويوتا جدا بدون إبداء أسباب بغض النظر عن إنها عربيات محترمة برضه ... بس الحب والغرام دي حاجة مالهاش صلة بالموضوع

المهم يكون في عربية تستوفي كل الشروط اللى أنا عايزها أو اللى حضرتك عايزها بسعر كويس ف السوق ومناسب أو تقدر توفره

وأنا شايف ده في السويفت حاليا ... لأني بدور على عربية صغيرة ...

وبرغم حبي الشديد للميتسوبيشي كماركة ... إلا إن الأتراج لما ركبتها ماعجبتنيش ... لكن ده لا يمنع إنها أكيد عربية محترمة في أساسياتها لأنها من صانع محترم ... وده كمان برأي اصحابها اللى اشتروها ...

... لكن مشكلتها مشكلة تسعير في السوق المصري بالمقام الأول ... ولا هي ولا البيكانتو يستاهلو ينزلوا بالسعر ده أبدا ... مقارنة بالسويفت

[skoda1996]

مجهود محترم و ممتاز
لو انت اللي مسكت توكيل سوزوكي هتبيع اكتر من مودرن موتورز ... توكيل سئ لعربيات محترمة

[mando_m_s]

ممكن حد يفيدني اية الاحسن سوزوكي ارتيجا ولا تويوتا افانزا

[D . a .\ AYMAN]

ممكن حد يفيدني اية الاحسن سوزوكي ارتيجا ولا تويوتا افانزا

لازم يافندم عشان تحسم حيرتك تنزل تروح تركب الإثنين وتشغلهم وتشوف بنفسك فرق التقفيل وإنت هاتكون مرتاح في أنه عربية أكثر ... لأن جزء كبير من العربيات أذواق والحاجة اللى تعجبني في عربية ممكن تكون هية أكتر حاجة حضرتك بتكرهها ... وفي النهاية تقارن فرق الأوبشنز اللى في كل واحدة وسعرها بالمقارنة بالتانية

لو هاقولك رأيي الشخصي هاقولك هات الإرتيجا لأن أنا ركبت الإثنين وشوفت الفرق بنفسي ... لكن حضرتك ماركبتش الإثنين ولا قارنت بينهم ... معقولة هاتنزل تصرف 124 ألف جنيه بمجرد إن واحد قالك هات دي وسيب دي عشان دي أحسن

أنا عرضت في الموضوع ده مميزات الإرتيجا لأني فصصتها إلى حد ما من خلال الزيارة اللى عملتها لفرع سوزوكي ... وطبعا ما أعرفش عيوبها لو فيها عيوب لأني ماركبتهاش

الأفانزا كل اللى أعرفه عنها إني ركبت الموديل القديم أول ما نزل مرة وماعجبنيش تقفيلها وما حسيتهاش بتاعة تويوتا أًصلا ... عشان كدة استحالة أقدر أديك رأي قاطع بالنسبة لها ... وممكن تكون رأيك من خلال قسم تويوتا هنا في المنتدى يكون حد عاملها تقرير هناك في مميزاتها برضه أو حد راكبها وبيقول على عيوبها

ولازم في النهاية زي ما بقول تكون رأيك بنفسك وتنزل تشوف العربيتين وتقارن بينهم على الطبيعة

[lo22a]

بسم الله الرحمن الرحيم ،،، الحمد لله رب العالمين والصلاة والسلام على أشرف المرسلين وعلى آله وأصحابه أجمعين

ده تقرير بسيط كده عن زيارة لفرع مودرن موتورز أبو رواش أول ما السيارات الجديدة بتاعة سوزوكي نزلت قلت أروح أتفرج عليها


نبدأ بإذن الله بالألتو 800 سي سي
===================

أولا من ملاحظاتي عليها إنهم للأسف خلوها أسوأ من الأول عشان يقدروا ينزلوا بسعرها لمستوى مش بعيد ... بس كان المفروض بالنسبة لي ينزل أكثر من فئة ... الأولى تبقى قليلة في المواصفات بسعر كويس والثانية تبقى بمواصفات أعلى بسعر أعلى للى عايزها ... ولكن هي دي سياسته في كل العربيات منزل فئة واحدة فقط من كل الموديلات اللى نازلة

الفئة اللى نازلة ... موتور 800 سي سي ، 12 صباب 3 سلندر ، 48 حصان (أيوة 48 حصان) ليه مش عارف مع إن موديل 2008 كان 58 حصان على ما أذكر ... إيه السبب في كدة مش عارف بصراحة لأن المفروض إنه نفس المحرك ... بس بتاع المبيعات بيقولي المحرك متغير ويمكن يكون أنا فاكر الرقم بتاع القديمة غلط لأني مش متأكد



للأسف العربية متنفضة من كل الكماليات اللى بتنزل بيها في بلدها ...

1- شال المرايات ذات التحكم الداخلي ... وحط المرايات بتاعة الماروتي - اللى عشان تضبطها لازم تفتح الشباك وتطلع إيدك بره تضبطها

2- شال الباور ستيرينج

3- شال الزجاج الكهرباء ... وبقت كلها يدوي

4- التابلوه بالنسبة لي تنظيمه أسوأ ... لأنه حط زرار الانتظار تحت شوية بعيد عن متناول اليد ... وخلى مكان أزرار التحكم في التكييف فوق مكان الكاسيت

5- شال درج الطفاية (كنت بحب أحط فيه الفلوس الفضة)

6- شال مخرج الولاعة (طبعا الاستخدام الأساسي ليه شاحن الموبايل) ومافيش مكان آخر للشاحن نهائيا في أي حتة وقعت عليها عيني

7- للأسف مكان الكاسيت لا يسمح سوى بتركيب كاسيت عادي وليس عريض بشاشة كبيرة مثلا أو جي بي إس ... لأن مكان زرار الانتظار قافل عليه من تحت

8- حامل الأكواب لا زال مكانه تحت التابلوه ويصعب الوصول إليه وكمان بدل ما كان إثنين بقى واحد فقط مع مساحة أظرف من الأول بصراحة لوضع أي حاجة صغيرة جنبيه

9- البابين اللى ورا لا زالوا مالهمش زرار لإضائة لمبة الصالون ولما يتفتحوا ما بينوروش لمبة الأبواب المفتوحة في لوحة العدادات ... يعني لو طفلك نسي الباب بتاعه اللى ورا مفتوح ولا هتاخد بالك ... وده عيب كان مضايقني قوي وعملتله تعديل عندي أول ما جبت العربية وشغلت الأبواب كلها على زرار لمبة باب السائق وركبت للبابين اللى ورا زرارين بتوع دايو لانوس تقريبا أو لانسر بوما مش فاكر بصراحة أنهي اللى ركب عندي



الإيجابيات
========

1- تصميم هوايات التكييف أفضل وتسمح بغلقها عكس الموديل القديم

2- مكان السماعات بقى في البابين اللى قدام ... الموديل القديم كان فوق في التابلوه

3- عجلة القيادة تصميمها أحلى بمراحل عن القديمة (بصراحة كانت مش عاجباني خالص)

4- وضع الفتيس وشكله أفضل بكتير من الأول بالكسوة الجلد والعصاية القصيرة ومكانه أسهل بالنسبة لإمساكه باليد بسهولة ويسر

5- درج التابلوه والجزء المفتوح اللى فوقه شكله أحلى من القديم




ودي شوية صور ليها
============



















































في النهاية سعرها .. 57900 جنيه مصري
=======================


وده لينك لمواصفات وصور أكتر للسيارة على موقع ماروتي سوزوكي

Alto 800 Features, Price ,Specs, Review, Mileage, colors and Pictures

...
...
...

يتبع

السلام عليكم
رمضان كريم
سؤال على السريع
لو قارنت بين Suzuki Alto 800 و Geely Pandino
سعرهم متقارب 61000 و 64000
بس مين الاضمن والاقوى
شكرا

[D . a .\ AYMAN]

السلام عليكم
رمضان كريم
سؤال على السريع:y_hi_3[1]:
لو قارنت بين suzuki alto 800 و geely pandino
سعرهم متقارب 61000 و 64000
بس مين الاضمن والاقوى
شكرا

بصراحة ما أعرفش حاجة عن الباندينو غير إني قعدت فيها شوية بحاول أقنع نفسي بيها بس ما قدرتش ... ماعجبتنيش من جوة نهائي

ولو كان فيها كماليات إيه بصراحة ما كنتش هاشتريها برضه ... حسيت إنها رخيصة قوي والألتو اللى كانت معايا برقبتها

عشان كدة مش هفيدك في المقارنة دي عذرا

[a_aseda]

ملحوظة
الالتو 2014 الجديدة سعرها 58 الف مش 61 الف
وكده هناك فرق 6 الالف جنية علي الاقل ؟؟؟

[D . a .\ AYMAN]

ملحوظة
الالتو 2014 الجديدة سعرها 58 الف مش 61 الف
وكده هناك فرق 6 الالف جنية علي الاقل ؟؟؟

حضرتك تقصد فرق 6 ألاف عن إيه ؟؟؟

[a_aseda]

الباندينو 64 الف
والالتوا 58 الف

[mohamedsamir13]

سؤال لحضراتكم ولمن يمتلك الالتو انا ناوي علي شراء سيارة جديدة ان شاء الله ومحتار جدا وعايز النصيحة من فضلكم اولا انا ح اشتري بالتقسيط والعربية ماتتعدش الـ 75 الف جنية وعايز حاجة تستحمل مشوار كل يوم من المعادي لشبرا والعكس وبعض المشواير البسيطة فهل الالتو كفاءة لكده ولا تقترحوا علي ايه في حدود المبلغ المذكور بس تكون عربية هاتشباك وموفرة في البنزين

[D . a .\ AYMAN]

لو دورت في المواضيع هنا عن العربية هاتلاقي إن العربية كويسة جدا وتسد مع كل اللى بتقول عليه .. أنا شخصيا كنت بسافر بيها مطروح والعريش والغردقة واسيوط بصورة مستمرة أسبوعيا للعمل غير المشاوير الداخلية في القاهرة ... وفي نفس الوقت موفرة للبنزين جوة البلد ... ولكنها مش حلوة في السفر هاتاكل بنزين زي أي عربية 1600 وأكتر لو قرصت عليها في السفر ... لكنها هاتسد في السفر مش هاتقول لأ ... هاتاكل بنزين زيادة فقط

بس هل هي هاتلبي كل متطلباتك أكتر من عربية تانية في نفس الفئة السعرية ولا لأ ... دي حاجة ما حدش يقدر يحسمها غيرك

[mohamedsamir13]

لو دورت في المواضيع هنا عن العربية هاتلاقي إن العربية كويسة جدا وتسد مع كل اللى بتقول عليه .. أنا شخصيا كنت بسافر بيها مطروح والعريش والغردقة واسيوط بصورة مستمرة أسبوعيا للعمل غير المشاوير الداخلية في القاهرة ... وفي نفس الوقت موفرة للبنزين جوة البلد ... ولكنها مش حلوة في السفر هاتاكل بنزين زي أي عربية 1600 وأكتر لو قرصت عليها في السفر ... لكنها هاتسد في السفر مش هاتقول لأ ... هاتاكل بنزين زيادة فقط

بس هل هي هاتلبي كل متطلباتك أكتر من عربية تانية في نفس الفئة السعرية ولا لأ ... دي حاجة ما حدش يقدر يحسمها غيرك

شكرا لحضراتك جدا
بس سؤال اخر ايهما افضل الالتو 2015 ولا سبارك لايت 2015 من وجهه نظرك

[star_2121]

هو ليه صور سويفت 2015 مختلفة عن الى موجودة على النت

http://vb.almastba.com/t56300.html

http://allmobilephoneprices.blogspot.com/2012/03/2013-suzuki-swift.html

https://www.youtube.com/watch?v=OHMcXXxg07M