يا جماعه الستات والبنات مشكلة السواقه

[haneena]

طب برده هاحيكلك على تجربتي في اول يوم سواقة لوحدي بالعربية بعد ماتعملت في مركز تعليم قيادة سيارات وكمان خليت اخوات صاحبتي يعلموني علي عربيتي عشان احاول اتمكن اكتر من السواقة.
في اليوم ده قررت الف شوية لوحدي في مكان فاضي وسوقت كويس والحمد لله بس كنت بخاف ازود سرعتي بصراحة المهم قلت اجرب اروح بيها عند مقر شغلي وهو في مصر الجديدة .
الطريق من عندي لمصر الجديدة حوالي 10 أو 12 كيلو بس مع الأسف الطريق معظمه زحمة بالذات باليل (ودي معلومة مكنتش اعرفها كويس بس عرفتها في اليوم ده)
عملت بنصايح الناس ومسكت يمين طول الطريق كل مامشي خطوة الاقي ميكروباص نط قدامي ينزل زباين اقف استناه لحد مايمشي (طبعا لاني كنت بخاف اطلع من الناس اللي وقفت قدامي خصوصا ان الشارع حارتين فقط) المهم فضلت طول الطريق على الحال ده وبقيت ماشية بسرعة السلحفاة (مش بمزاجي ده من الزحمة ووقوف الميكروباصات والأتوبيسات على اليمين) واخرة المتمة كمان الاقي الميكروباص وقف ومش راضي يتحكر استنيت قلت يمكن هايتحرك دلوقتي لاقيت الناس بتقولي لا ده مش هايتحرك دول بيقفوا يحملوا هنا (مع العلم ان المكان مش مبين انه موقف خالص لإنه فعلا لايصلح انه يكون موقف ميكروباصات) وطبعا لكي ان تتخيلي واحدة مبتدئة سواقة بتحاول تطلع من ميكروباص في شارع زحمة يدوب حارتين بس طلعت وكملت طريق بس اليوم ده انا مش قادرة انساه واخدت الطريق في حوالي اكتر من ساعتين او 3 ساعات كمان وكل ده ماسكة يمين عشان معطلش حد.
وطبعا مفكرتش ارجع بالعربية تاني لحد البيت وقلت هاسيبها هنا واركنها عند الشغل عشان كنت تعبت من السواقة في اليوم ده وبذلت مجهود مضني وروحت يومها مواصلات .

وقلت اركنها عند الشغل عشان كل يوم اتمشي بيها شوية لحد ماتمكن من السواقة وابقي اروح شغلي واجي بيها بعد كده وفعلا فضلت راكناها اكتر من اسبوعين واروح مواصلات من خوفي من الناس اللي سايقة حواليا عشان محدش هايصبر على حد بيتعلم خصوصا لو كانت بننننننننننننننننننت
(مع العلم اني كنت بعرف اسوق بس كنت علي قدي في السواقة يعني لسة مش متمكنة بقي ولا بجري ولا بغرز ولا بطلع من حد ولا الكلام ده).

بس الحمد لله الدنيا اتزبطت وجرأت نفسي وجمدت قلبي وسوقت وعرفت الشارع ماشي ازاي بعد كده وايه هيا القواعد المرورية اللي ماشية في البلد وطبعا هي عكس كل اللي اتعلمناه خالص

بس بحاول برده التزم ومضايقش حد بسواقتي.
ولما باجي اركن لازم اتأكد اني مش معطلة حد لاورايا ولا قدامي واسيبه هو يعدي الأول وبعدين اركن انا براحتي بقي

معاكى حق والله يا بيردى فعلا مشكلة الركن المفاجئ دى مشكلة مقرفة انا باتخنق قوى من الميكروباصات والتاكسيات اللى بدون سابق انذار بيقفوا ويكسروا كمان عشان يركب زبون ومايكلفش خاطره كمان يدى اشارة ومش مهم اللى وراه بقى انشالله يولع حتى دى مش مشكلته والمهم انك لما تحاولى تقولى كده مايصحش يقعد يجعر بكل بجاحة وكانك انتى اللى غلطانة انت ليه ماشية وراه حاجة تزهق والله

[Ahmed_Elkhateb]

يا birdy لازم تعرفى ان السواقه ديه قلب يعنى طول ما انتى قلبك جامد هتعدى من اى حته وبالذات ال 128 ديه متتوصاش ديه بتروح فى اى زنقه وتعدى واهم حاجه انك جمدى قلبك

[R A N A]

يا birdy لازم تعرفى ان السواقه ديه قلب يعنى طول ما انتى قلبك جامد هتعدى من اى حته وبالذات ال 128 ديه متتوصاش ديه بتروح فى اى زنقه وتعدى واهم حاجه انك جمدى قلبك

ماخلاص جمدته واللي كان كان
دانا بقيت بعمل حاجات انا نفسي مش مصدقاه لحد دلوقتي

[نور القمر]

هههههههههههههههه كل ده شيله في قلبك توتي
هاتوصى بيك اسئلة في حوار القلب

فعلا مشكلة البنات والستات هي الخوف من الناس اللي سايقه حواليها والحكاية دي بتكون في الاول وبعدين بتروح مع الوقت
يعني يا جماعه خليكوا صابورين علينا شوية وكله بثوابه
كمان في حاجة مهمه ودي من طبيعه الانثى اللي ربنا خلقها بيها
انها بتتوتر بسرعه وتفقد اعصابها لما يحصل معاها موقف مربك زي واحد يكسر عليها واحد ايده لزقت في الكلكس واحد مش هاين عليه يعدي من غير ما يطلع مواهبه المدفونة في الشتايم واحد بيعاكس بطريه سخيفة
انا معترفه ان معظم البنات ومش كلهم طبعا واحترامي للجميع سواقتهم اقل كفائة من الشباب بس خلاص ده واقع لازم تعيشوه وتتعايشو معاه ما هو انتم في الاخر مش هاتمنعونا من السواقه باي حال من الاحوال

وانا عن نفسي بعرف اللي قدامي بنت ولا شاب من طريقة السواقه ههههههههههه من غير ما تعلق ايشاب على الاريل
تحياتي للجميع

[R A N A]

يادى النيلة على الفتيس اللى فاضحنا فى كل حتة ده، وربنا انا زهقتلك منه سلف

متزعليش ده مجرد هزار ، بس انا ليا تعليق تانى على المشكلة، انا احيانا كتير جدا بشوف عربية سايقاها واحدة والعربية عطلت، ونتيجة لتجارب سابقه كتير جدا بخاف اتدخل لحسن يصيبنى ما لا تحمد عقباه لأن اكتر من مرة احاول اتطوع لمساعدة حد والاقى نفسى تحولت بقدرة قادر الى "واد رزل بيعاكس" وانا اصلا مش بمشى جنب الحيطة لكن جواها ، فبشترى كرامتى من المهانة ومبحاولش اساعد غير راجل كبير او ست كبيرة ويكون لوحده او لو حد اعرفه

وده رابط لقصة انا كنت حكيتها عن امثلة للغباء من النوع ده
http://nilemotors.net/Nile/showthread.php?t=21395

شوفت يابمشهندس عملتها معايا في حتة مالهاش حل.
اعمل ايه بس يابشمهندس الناس مبقاش عندها ضمير البيه الميكانيكي حطلي مسمار مختلف عن المسمار بتاع معلقة الفتيس فطبعا مربطش كويس وحصل اللي حصل ولما رحتله قالي المسمار الأصلي لو حطيته بيقع تاني ده انسب مسمار ليها وأرطلي عليه كويس والحمد لله اتحلت.

بس ياجماعة والله انا عمر ماحصلي موقف مع العربية ووقفت مني او الكاوتش نام مثلا وراجل او ولد نزل يساعدني وافتكرته بيعاكسني خالص بالعكس والله انا بشكره جدا حتى لو وقف بس يدورلي على حد يساعدني ومعملش هو بإيده اي حاجة بقوله كتر خيرك انك ساعدتني اساسا لإني فعلا ببقي في امس الحاجة وقتها لحد يساعدني في مشكلتي وطبعا مفيش ست هاتساعد ست يعني لاننا ببساطة مالناش في صيانة العربيات اصلا

البنت اللي تسئ الظن بواحد نزل يساعدها وتفتكر انه بيعاكسها تبقي عندها عقدة نقص اصلا وضيقة الأفق اساساً
امال هي مستنية مين يساعدها يعني مش احسن من وقفتها في الشارع والبهدلة؟

بس ياجماعة بجد والله اعملوا اللي عليكوا وساعدوا البنت اللي عربيتها تعطل وصدقوني حتى لو طلعت من النوعية اللي ذكروتها دي فأنتوا كده برده اخدتوا الثواب واحتسبوا الأجر عند الله وافتكر انك بتعمل الثواب ده ومش مستني اي حاجة من البني ادم انت بتعمله خالص لوجه الله تعالى.

[ziours]

انا مش شايف اي موضوع فيه شخصنة و لانفسنة كما تفضلت الاداره انه مجرد راي لااكثر
وانا مش داخل هنا عشان اعلق على شخص ولاشيئ انه مجرد و جهة نظر ومش مستهلة الدنيا تقوم اوي كده
شكرا

[Islam_galal]

يا باشا هدي نفسك ، الموضوع نام و اتنسي
و الدنيا ماقامتش و لا حاجة، لان مفيش حاجة تستاهل اصلا

[amirhamed]

بصراحه فيه منهم سواقين 10/10 بس الغالبيه ربنا يتولاهم ويتولانا برحمته

[Ahmed_Elkhateb]

هههههههههههههههه كل ده شيله في قلبك توتي

هاتوصى بيك اسئلة في حوار القلب

انا شكل الموضوع ده هيطلع عليا فى موضوعك يا نور القمر ونبى خفى عليا فى الأسئله شويييييا وياريت لما يجى دورى ابقى نبهينى برساله على الخاص بعد ازنك طبعا ده انا انا هجاوب اجابات نموذجيه هههههههههههه لا تقلقى

[Ahmed_Elkhateb]

يا جمااااااعه معلش حصل موقف ولازم احكيه حصل امبارح
وانا ماشى ورايح اشترى 2 مساعدين منرو انا من حلوان فا ماشى فى شارع صالح صبحى للناس اللى تعرف حلوان يعنى المهم الشارع ده ميعديش غير عربيه وحده علشان بتبقى فى عربيات راكنه على جنب المهم ايه احنا ماشين وعربيه سيقها وحده ست وداخله علينا يعنى احنا حوالى 6 عربيات داخلين فى الشارع والست ديه داخله من اول الشارع جايه عكسنا المهم الراجل اللى قدامى قاعد يديها كلكس علشان تستنى دخلت بردو المهم الست وقفت ومش عاوزة تتحرك من مكنها وقاعد تزعق وراحت قفلت العربيه ونزلت من العربيه ودمغها والف سيف ان ال6 عربيات يرجعو بضهرهم وهيا تعدى الأول ووالله يا جماعه كانت ممكن ترجع مسافة 3 متر بس وتعدى العربيات كلها فا شوفتو الستات عاملين فينا اييييييييييييييه واتأخرت امبارح على معادى وكانت قصه

[shankosi]

فعلا مبحبش سواقة الستات لانهم لما بضربوا لخمة بيوقفوا الشارع كله، مع احترامي طبعا لهم في اي مجال اخر بس في السواقة فاشلين

بس لكل قاعده شواذ ..

[Osama_soliman]

انا شخصياً
ببعد عن اى عربية راكبة واحدة ست

خصوصاً لو كانت فاكرة نفسها راجل وبتعرف تسوق

[ziours]

انا بردوا لما بشوف ست سايقة بابعد عنها عالطول حت وانا ماشي على رجلي ببعد عالطول احس واحده ظريفة كانت هتدوسني ودخلت علي بالعربيه انا اتشهدت عالطول فعلا فاشلين في السواقة

[OlaOsman]

ياخوانا فضوها سيرة بأه الله يكرمكوا!!

[D . a .\ AYMAN]

فعلاً سواقة الستات مشكلة ... عارفين ليه ؟ لأنهم بيحاولوا يمشوا صح فى وسط بشر واخدين الدنيا فهلوة

لو حضراتكم شايفين أن الستات بتعرف تسوق يبقى تحترموهم وتعطوا للطريق حقه ولو شايفين أنهم مبيعرفوش يسوقوا وأعصابهم خفيفه( وديه حقيقة لا احد ينكرها) يبقى تساعدوهم وتدوهم الأمان فى الطريق

صعب إنكار الموضوع ده
بس بصراحه هن الخطر منهن بسيط وليس جسيم كقيادة الشباب الأرعن

أنا معاك تماماً وبشوف فعلاً حماقات شباب فى الطريق لا تحتمل بس أحنا أتعودنا نبص على أخطاء السييدات

الستات سواقتهم وحشة ........... معاك
و الرجالة سواقتهم أوحش
الستات سواقتهم سواقة غشامة و حذر زائد
الرجالة سواقتهم قلة أدب و أستهبال و استعباط و رزالة و غتاتة و غلاسة ( و دي ألفاظ منتقاه علشان أحنا في مكان عام )

و أحب أسجل تعليقي على كلام حضرتك

أولا في وسط الزحام
لو الكل التزم بدوره و مكانه في الشارع
الطريق هايمشي أسرع من اللي بيحصل

مفيش كلام موضوعى أكثر من ده كل واحد يبص لعيوبه وبعدين ويمشى صح من غير ما يقول ست ولا راجل

************
1- رغم أعترافي الكامل بأن المشكلة مش ستات ولا رجالة
2- المشكلة ثقافة شعب تتغير من سيئ لأسوء
بس بصراحة أنا نفسي قلت منك لله يا قاسم يا أمين مرتين النهاردة بسبب الستات اللي معايا ف الشغل
عموماً كان نصف العمي ولا العمي كلة

فعلاً المشكلة ثقافة شعب ... وعلى فكرة أنا كمان بقول منك لله يا قاسم يا أمين بس مش عشان السواقة لكن عشان الستات مبقتش عارفة صلاحياتها

عندي إقتراح.. ليه مثلا ما تتحذفش المواضيع اللي من النوعية دي أول بأول و السبب هو موضوع مكرر؟ يعني الموضوع ده قتل بحثا (هو الصراحة مش بحثا عشان هو مش مطروح عشان صاحب الموضوع عايز يلاقي حل.. هو قتل خناقا) و يعتبر مستفذ لأي واحدة بتسوق و بتقرا الكلام ده.. فليه يا جماعة نحرق في دم بعض و نعكر جو المنتدى؟ يعني احنا بنحاول نلم الشمل.. مش ناقصين المواضيع اللي زي دي تنغص علينا تجمعنا و تفسد علاقتنا ببعض.

.

مع أحترامى الشديد لأرائك ما شاء الله عليكى بس أنا مش معاكى فى النقطة ديه لأن المطلوب من المناقشات ديه تغيير معتقداتنا الخاطئه وده مش فى السواقة بس

Mrs.NYSMA