يا جماعه الستات والبنات مشكلة السواقه

[Samir Elshahawy]

غالبية السيدات او البنات تقودن بحذر شديد يسبب اعاقة لحركة المرور و هذا يرجع الي طبيعة المرأة انها مترددة و شكاكة , لكن هناك علي الجانب الاخر الرجال و الشباب الذين يقودون سياراتهم بثقة زائدة و باستهتار و رعونة غير مبالين بالاخرين

الموضوع ليس رجال او نساء شباب او بنات و انما الموضوع له علاقة باخلاقيات القيادة و قواعد المرور التي يجب ان تطبق علي الجميع دون النظر الي الجنس او المنصب او اي اعتبار و الدليل علي كلامي اي دولة اخري غير مصر حيث نجد السيدات يقدن سياراتهن مثل الرجال تماما لافرق اطلاقا

لذا فانا اعترض علي الموضوع من وجهة النظر هذه و أري انه يجب ان تكون نظرتنا اشمل و موضوعية اكتر حيث ان قيادة السيارات في مصر من امثلة الفوضي و العشوائية التي نعيشها و تحكم تصرفاتنا و قراراتنا

[Ahmed_Elkhateb]

[/color]

مع أحترامى الشديد لأرائك ما شاء الله عليكى بس أنا مش معاكى فى النقطة ديه لأن المطلوب من المناقشات ديه تغيير معتقداتنا الخاطئه وده مش فى السواقة بس

Mrs.NYSMA

مشاء الله على ردك كلو كلام جميل وفعلا انتو لازم تخدو حقكو شويا فى الطريق بس والله انا بحكيه ده بيحصل معايا وفعلا حاجه بتبقى تنقط بس بصراحه اغلبية المصايب من ورا الستات الكبيرة انما البنات الصغيرين فين وفيييييين وربنا يسترها علينا كلنا يا نسمه

[R A N A]

يا جمااااااعه معلش حصل موقف ولازم احكيه حصل امبارح
وانا ماشى ورايح اشترى 2 مساعدين منرو انا من حلوان فا ماشى فى شارع صالح صبحى للناس اللى تعرف حلوان يعنى المهم الشارع ده ميعديش غير عربيه وحده علشان بتبقى فى عربيات راكنه على جنب المهم ايه احنا ماشين وعربيه سيقها وحده ست وداخله علينا يعنى احنا حوالى 6 عربيات داخلين فى الشارع والست ديه داخله من اول الشارع جايه عكسنا المهم الراجل اللى قدامى قاعد يديها كلكس علشان تستنى دخلت بردو المهم الست وقفت ومش عاوزة تتحرك من مكنها وقاعد تزعق وراحت قفلت العربيه ونزلت من العربيه ودمغها والف سيف ان ال6 عربيات يرجعو بضهرهم وهيا تعدى الأول ووالله يا جماعه كانت ممكن ترجع مسافة 3 متر بس وتعدى العربيات كلها فا شوفتو الستات عاملين فينا اييييييييييييييه واتأخرت امبارح على معادى وكانت قصه

ممكن اعرف الطريق ده كان طريقها هي ولا طريق ال 6 عربيات التانيين؟
يعني اقصد مين فيكوا اللي داخل الشارع عكسي من اتجاه مخالف.
لو الست هي اللي ماشية مضبوط وانتوا اللي جايين عكسي يبقي عندها مليون حق تعمل كده لان الطريق المفروض طريقها وانتوا اللي غلطانين وداخلين غلط يبقي ترجعوا بضهركوا غلط برده "من افسد شيئا فعليه اصلاحه" ومش عشان انتوا ست عربيات وهي عربية واحدة تبقي هي اللي ترجع، مينفعش واحد يغلط وانا يُطلب مني اني اصلحله غلطه كمان ، المفروض كل واحد مسئول عن خطأه.
(If it's my way, it is my way).

اما بقي لو هي اللي داخلة عكسي فيبقي هي اللي غلطانه مفيش كلام والمفروض ترجع بعربيتها وتعتذر كمان ومتدخلش الشارع عكسي اساسا وده يطبق على اي حد سواء راجل او ست اللي يغلط يعتذر ويتحمل نتيجة خطأه مش بلطجة والسلام .

بيتهيألي ان لو نفس الموقف بحذافيره حصل من راجل كان هايطلعله الف عذر ويتقال معلش اصله راجل كبير وخليها عليك انت المرة دي انت الصغير او يمكن المارشدير عنده فيه مشكلة او يمكن مبيعرفش يرجع بضهره او يمكن او يمكن اي بطاطس والسلام المهم هايتوجدله وقتها مليون عذر ويمكن مكنش الموضوع يتحكي اصلا وكأن شيئا لم يكن ويعدي زيه زي غيره من مواقف السواقة السخيفة اللي بتحصل لكل واحد فينا لكن عشان اللي اتسببت فيه واحدة ست يبقي لازم نسلط سبوت كبييييييييييير على الموضوع ونكبر حجمه اكتر واكتر عشان نطلع الستات مبيعرفوش يسوقوا ونقول (هـ . ط . ث)
طب ياريت جماعة المضايقين من سواقة الستات يتحدوا مع بعض كده ويشوفولنا حل بديل واحنا نعمله ونمتنع عن السواقة وفروا مواصلات ادمية بجد نركب فيها من غير مانتعرض لإهانات وبهدلة وعطلة واحنا مش هانسوق عربيات تاني لاننا مش بنسوق حبا في السواقة ولا عشقا لقرف المرور وبجاحة سواقين الميكروباص والنص نقل ولا عشان نقوي عضلات ايدينا ورجلينا بتمارين السواقة اليومية بالعكس احنا قرفانين من السواقة وانا عن نفسي اتعس لحظات حياتي هي الوقت اللي بقضيه وانا سايقة رايحة شغلي او جاية من شغلي او اي مشوار بالعربية (كداب ونصاب اللي قالك متعة القيادة) بس بنقول اهي ارحم من البهدلة وقلة القيمة بتاعة مواصلات اليومين دول :angelsad2:.

ومش عشان الناس واخدة السواقة عافية وبالدراع والبنات مبتسوقش بنفس طريقة لوي الدراع والبلطجة يبقي الستات مبتعرفش تسوق ولا فاشلين زي ماالاخ الفاضل قال ان الستات فاشلين .
وكفاية بقي نقسم الناس علي اساس النوع راجل وست ولد وبنت ياريت نتعامل انسان وانسان بقي عشان نعرف نتعايش مع بعض والا اطلبوا نقلكوا من الكوكب ده بقي وسيبوه للستات تعيش فيه لوحدهم .

[bebo_black2000]

ياباشا روح السعودية لو مش عايز تشوف البنات سايقة :d

[muslimah_dentist]

السلام عليكم و رحمة الله و بركاته

أنا متابعة الموضوع من اول مشاركة لآخر مشاركة و كل ما اقول ارد أقول مش مهم الموضع قرب يتقفل يقوم يتفتح تانى

واضح و الله أعلم ان المشكلة مش فى (سواقة الستات) زى ما انت بتقول و لكن هو صراع دائم بين الرجل و الأنثى و زى ما birdybirdy قالت لو كان راجل سايق كنت هتلاقيله ميت ألف عذر انما لو ست يبقى يتعلقلها حبل المشنقة


زى ما يكون الرجالة من أول ما اتولدت بتسوق عربيات و حريفة سواقة .

كل حاجة بالتدريج ، بص لحالك اول ما بدأت تسوق كنت بالتأكيد بتسوق غير دلوقتى ممكن تكون الأخت ديه لسة بتتعلم السواقة أو لسة بدأة تسوق، ليه مش بنحط لبعض الأعذار ليه دايماً بنهاجم بعض الرجالة مش عاجبها سواقة الستات و يقولوا سواقتهم تخنق و الستات مضايقة من غتاتة الرجالة معاهم و هم بيسوقوا ، طيب آخرة الموضوع ده ايه، هنفضل مخنوقين من بعض علطول كدة

أنا بأقول أن احنا نوسع صدرنا شوية و نستحمل بعض (ستات و لا رجالة) أهو فى الآخر احنا عايزين نوصل بيوتنا بسلام ، الموضوع مش مستاهل.

[Samir Elshahawy]

مع احترامي الشديد للعضوة birdybirdyو لكل الاعضاء لكن انا شايف ان راي سيادتك فيه تحيز كبير لبنات جنسك , و اسمحي لي ننظر للموضوع بشكل اكبر من كده زي ماسبق و قولت سابقا

- ليس عندنا في مصر اتجاه للشوارع و لا يحزنون و صدقيني لولا مركز التحكم في حركة سير القطارات كنا شفنا قطارات ماشية عكسي و كان بقي في كارثة كل 5 دقائق
- مافيش حد بيسوق في مصر يعرف اذا كان الشارع اللي هو داخله اتجاه واحد ولا اتجاهين و اذا كان هو داخل صح و لا غلط لان مافيش يافطة تقول الكلام ده
- الموضوع زي ماقلنا قبل كده مسألة اخلاق و ادب و صبر و تحكيم للعقل و المنطق قبل ماتكون التزام بقواعد موضوعة يجب ان تطبق علي الجميع (مش خيار و فاقوس)

مرة اخري انا مش ضد سيادتك او ضد اي سيدة تقود سيارة بالعكس انا قولت انظروا لحال السيدات في دول اخري غير مصر كيف يقدن سياراتهن مثل الرجال تماما و السبب ان هناك قانون الكل ملتزمون به

[R A N A]

مع احترامي الشديد للعضوة birdybirdy و لكل الاعضاء لكن انا شايف ان راي سيادتك فيه تحيز كبير لبنات جنسك , و اسمحي لي ننظر للموضوع بشكل اكبر من كده زي ماسبق و قولت سابقا

- ليس عندنا في مصر اتجاه للشوارع و لا يحزنون و صدقيني لولا مركز التحكم في حركة سير القطارات كنا شفنا قطارات ماشية عكسي و كان بقي في كارثة كل 5 دقائق
- مافيش حد بيسوق في مصر يعرف اذا كان الشارع اللي هو داخله اتجاه واحد ولا اتجاهين و اذا كان هو داخل صح و لا غلط لان مافيش يافطة تقول الكلام ده
- الموضوع زي ماقلنا قبل كده مسألة اخلاق و ادب و صبر و تحكيم للعقل و المنطق قبل ماتكون التزام بقواعد موضوعة يجب ان تطبق علي الجميع (مش خيار و فاقوس)

مرة اخري انا مش ضد سيادتك او ضد اي سيدة تقود سيارة بالعكس انا قولت انظروا لحال السيدات في دول اخري غير مصر كيف يقدن سياراتهن مثل الرجال تماما و السبب ان هناك قانون الكل ملتزمون به

بص ياسيدي الفاضل لو حضرتك شايف ان رأييي فيه تحيز لبنات جنسي فده طبيعي لاني واحدة منهم شوفت الويل وانا بتعلم السواقة ولحد دلوقتي بشوفه وانا سايقة عربيتي وبحس بيه في نظرة كل واحد يرمي عينه جوه عربيتي ويلاقي اللي سايقة بنت يإما بيتريق يإما بتصرف بشكل هجومي (وطبعا مش كل الناس في رجالة بجد اخر احترام وتشوفني وانا ماشية بعربيتي تقولي اتفضلي وتسمحلي اعدي قبيلهم كمان بالذات لو المكان ضيق وميساعناش نعدي احنا الاتنين ومش عشان خوف من سواقة الستات لكنه ذوق واحترام) مع ان سواقتي الحمد لله اتحسنت وبحاول اتحسن اكتر كمان.
وبعدين مع كامل احترامي لسيادتك انا تحيزت فين انا قلت البنت لو داخلة غلط تبقي غلطانة وتعتذر كمان لان انا عن نفسي لما بغلط بعتذر واتأسف مش عيب يعني وعشان تعرف اني مش متحيزة ولا حاجة على فكرة انا في مرة كنت في اشارة واقفين في امان الله سمعت خبطة في عربيتي نزلت لاقيت عربية ماتريكس خبطتني كسرت حتة فيبر كده عندي اسمها ضوافر (مش مهم يعني دي تمنها كلام فارغ مفرقش معايا) نزلت ببصلها لاقيتها بتشاورلي بقلة ذوق وتقولي يالا خلصي خلصي روحت انفجرت فيها وزعقتلها وقلتلها يعني كمان انتي اللي خبطاني وبتتكلمي بقلة ذوق بدل ماتعتذري يعني وزعقتلها جامد وبعدين ركبت عربيتي ومشيت (والشيطان وسوسلي اني ارجع مارشدير اخبطلها فانوس ولا اكسرلها اكصدام بس معملتش كده الحمد لله) ونفس الموقف حصلي برده وانا في اشارة الإشارة فتحت (إتأخرت ثانيتين كنت بطلع المحفظة) روحت رامية المحفظة على الكرسي بسرعة ولسة بنقل علي الأول وهاتحرك لاقيت عربية لبست في ضهر عربيتي برده والحمد لله محصلش أي اذي لعربيتي بس الموقف نرفزني فنزلت لاقيتها بنت قلتلها يعني هي دي الطريقة اللي بتحركيني بيها يعني عشان الاشارة فتحت مش تاخدي بالك وبرده ماعتذرتش ولا عملت اي شئ ورحت زعقتلها واديتها كلمتين في العضم وقلتلها قبل ماتسوقي وتركبي عربية اتعلمي لما تغلطي وتخبطي حد تعتذري.
يبقي فين التحيز ده بقي؟
طبعا كلكوا هاتقولوا دلوقتي شايفين البنات والستات حتى لما بيغلطوا مش بيعتذروا بس للمعلومة برده حصلي نفس الموقف بالتمام بس مكناش في اشارة المرة دي وراجل هو اللي كان سايق وداخل من شارع جانبي على الشارع الرئيسي والشارع اتزحم ووقف هو مستناش لحد ماعدي بضهر عربيتي ولبس في عربيتي من ورا والحمد لله برده محصليش اي شئ هو الإكصدام بتاعه القدماني اتكسر نزلت بصيتله انه حتى يشاور بأي اسف او اعتذار ولا الهوا هاعمل ايه قلتله بصراحة انا مش فاهمة حضرتك عملت كده ازاي وضربت كف على كف وركبت عربيتي ومشيت .
يعني فعلا الموضوع مش موضوع راجل وست هي في الاول والاخر اخلاقيات.

النهاردة مثلا وانا راجعة مرايتي خبطت دراع واحد ماشي وقفت العربية وكنت هانزل اتأسفله لقيته جاي ناحيتي وبيعدلي المرايا اليمين بتاعتي طبعا شكرته جدا وقلتله بجد انا متأسفة اني خبطت في دراعك غصب عني والله ومفكرتش حتى وقتها ان كنت انا اللي غلطانة ولا هو انا حسيت اني اتصرفت تصرف اذي بني ادم يبقي من حقه اعتذرله ولو هو اللي مخطئ انبهه لخطأه برده.
واهو حضرتك بنفسك قلت بره الستات بتسوق كويس زي الرجالة بالضبط يبقي العيب في مين؟
العيب في اننا معندناش اي قوانين مرورية ولا عندنا ناس بتلتزم بيها وكله بيسوق بسياسة الدراع والبقاء للأقوى ولا عندنا شوارع عدلة ولا عندنا لافتات تقول اتجاه الشارع ايه (مع اني قبل مادخل اي شارع احاول اشوف اي يافطة تقول اتجاه الشارع ده ولو مالقيتش بشوف في عربيات داخلة ولا لأ يمكن هما ادري مني وادخل وراهم مالقيتش بجرب الشارع اللي بعديه ولو حسيت اني ماشية غلط او مخالف بحاول اخرج من الشارع بأسرع مايمكن ولو حد له حق يعدي ارجلعه مفيش مشكلة لانه هو اللي صح وانا اللي غلط يبقي اتحمل نتيجة خطأي وارجع مش عيب يعني).
يبقي كفايانا بقي تقطيع في الستات وسواقتهم ونقعد نطلع فيهم كل شوية القطط الفاطسة لان ده بجد بيخليهم يفقدوا في نفسهم الثقة اكتر واكتر يإما بيبقوا عدوانين جدا ناحية الرجالة ويسوقوا بنفس طريقتهم اللي ماشية في البلد كلها واللي هي خطأ في الأصل.
فياجماعة "رفقاً بالقوارير" ارجوكم احنا مش بنسوق عندا فيكم والله الظروف هي اللي فرضت علينا كده.
وكل بني ادم (راجل او ست) اول مابيتعلم السواقة بيكون عنده مشاكل سرعان مابتتحل بالممارسة والمواقف اللي بيتحط فيها فياريت نصبر علي بعض شوية وكفاية بقي تهكم وسخرية من البنات وسواقتهم.
صلوا على النبي بقي وشيلوهم من دماغكوا وانتوا هاتستريحوا خالص والله.

[MedaSam]

خلاص يا birdy ...... صلي على النبي و ريحي أعصابك خااااااالص ........ و روحي اشتريلك keyboard جديده ........ أكيد باظت من كتر اللي كاتبتيه بغيظ ..... باهزر طبعا ;)

انا متابع الموضوع بس هقول رأي المره دي ...... بما انني من المتحولين و طبعا يا birdy انت عارفه كده كويس ....... باتخنق مووووت من اللي بيسوق عكس حالة الطريق ........ يعني تلاقي واحد أو واحده ماسك يمينه على المحور و سايق على 50KM/H........ أو تلاقي واحد أو واحده (بس معظمهم ولاد) عمال يتنطط و الطريق زحمه مووووت ...... أنا شايف المواقف دي بيعملها ولاد و بنات ...... عادي يعني

بس في حاجات ماتلاقيش غير الولاد هما اللي بيعملوها زي:
1- السواقه بسرعه جنونيه على الطرق المفتوحه زي طريق النصر ...... المحور ....... الدائري
2- تلاقي الواد سايق و فرحان بنفسه و معلي الكاسيت على الاخر
3- ولاد كتير فاكرين نفسهم في سباق ...... و أنا منهم ..... بس بجد بحاول اتعالج

و في حاجات ماتلاقيش غير البنات أو الستات عموما بيعملوها زي:
1- بتقفد السيطره على أعصابها بسهوله ...... و ده مش كويس خالص و هي سايقه
2- لما تيجي تركن ...... بتاخد وقت طويل شويه ...... و ده بيوقف الشارع لحد ما تركن ..... و ساعات تتلخبط و العربيه تبطل منها
3- تلاقيها ماشيه بتتكلم في الموبايل أو بتكلم حد قاعد جنبها في العربيه بدون الأنتباه للطريق

اللي عايز أقوله ....... ان مش بس البنات و الستات بيعملوا حاجات غريبه أثناء السواقه ....... الولاد كمان بيعملوا بلاوي و مهازل ...... الحوادث اللي بتحصل نتيجه خطأ واحده ست بصراحه غالبا مش مصيبه و أخرها خبطه جامده في العربيه ....... اتفرج بقى على حوادث الشباب اللي بتوصل و كتير جدا الى الموت .......

لو صبرت ثواني أو دقيقتين على واحده ماشيه ببطء نسبيا أو واحده بتركن ....... مش مشكله يعني الدنيا مش هطير ...... انما الولاد اللي بيسوقوا بهبل ساعات (و الله باحاول أتعالج ) هتروح منه فين ده ........ و ربنا يسترها معانا جميعا

[Samir Elshahawy]

الي birdybirdy و كل السيدات

ماتزعليش ياستي انا ماقصدتش طبعا اهاجمك او اهاجم الستات او اعترض علي اسلوب سواقتهم , و انا لسه النهاردة كنت بأشتكي من شباب الجامعة و اللي بيعملوه بعربياتهم علي الدائري و المحور , ماحدش يقدر يقطع فيكوا ابدا و الا يتقطع هو في اكياس

الموضوع زي ماقولت قبل كده سلوكيات و اخلاق فقدناها في الشارع و البيت و حتي كمان في الغيط , العيب مش في الستات بس لا في الرجال كمان و حتي انا كمان باغلط محدش معصوم من الخطأ

المشكلة ياسيدتي الفاضلة ان ده نظام بلد فسدت اخلاقيات معظم افراد شعبها , المهم يكون فيه ناس معترضة علي هذا و عايزة تغير للاحسن

و بمناسبة السير في اتجاه عكسي لسه كنت في السوق - دخول العربيات هنا اتجاه واحد في عكس عقارب الساعة من الدخول الي الخروج - المهم لاقيت واحدة ماشية عكسي :k16: و يادوب عربيتي و عربيتها يعدوا بصراحة افتكرت الموضوع بتاعنا ده و افتكرت تعليقك , المهم وسعت لها الطريق ووقفت انتظرها تمر , طبعا كانت خايفة فشاورت لها و توقفت تماما لحد ماعدت , و علي فكرة انا دايما بأعمل كده مع اي حد خصوصا لو شكيت انه مش متمكن او لسه بيتعلم

اسف للاطالة و مرة اخري بأقدم اعتذاري عن اي سوء فهم حدث :k10:

[Terrible_DaRsH]

نفسي يسحبوا ترخيص السيدات ده نهائي والله ...
انا بيحصل معايا مواقف بتخلينى اخرج عن شعورى...
مرة طالع على ميدان العباسيه وقدامى واحده راكبه ماتريكس ( 19 سنه ) تقريبا فى الحدود دى ومعاها صحابها ... وبتسوق بطريقة فظيعة !!!!
ولا كانها بتلعب GTA !! بتروح يمين وشمال زى ما هى عايزة ومعندهاش حاجه اسمها مرايات نهائي واى حد يبص لها تغلط فيه كان 900000000 مواطن لا يعلموا شيء عن القياده...
فى الاخر ادت انتظار ووقفت على شمال الطريق وليس اليمين رحت راكن قدامها لاقيتها بتعمل Make up !! هى وصحابها...
خليتها تروج جامعتها (عين شمس ) بعد ساعتين تقريبا ....
ده درس مش رخامه ويا ريت تكون اتعلمت حاجة !..

[Samir Elshahawy]

خليتها تروج جامعتها (عين شمس ) بعد ساعتين تقريبا ....
ده درس مش رخامه ويا ريت تكون اتعلمت حاجة !..

مافيش فايدة اللي زي دي مش هاتتعلم , لانها ماعندهاش استعداد للتعليم و لا لغيره دي جايبة العربية علشان تمشي مع لون الميكاب بتاعها , بس برضه بلاش نظلم الستات كلهم فيهن المحترمات اللي بيحاولن يلتزمن مثل بعض الرجال

[Amrrr]

المشكلة ان الست مش هينفع تاخد معاها اي رد فعل لكن اي صنف تاني ممكن تشتم ولا تزعق ولا حتى تزنيق بالعربيات وغتاتة لحد ماتاخد حقك منه وساعات بنات بتتغاشم والاقيها بتسوق حلو وتصد معايا لو جيت اكسر عليها بتعجبني اوي وبحب الاعبها طول الطريق غير كدة الهروب اسلم حل وبعدين تقول حسبي الله ونعم الوكيل وانا شخصيا عملت كدة النهاردة مرتين في مشوار واحد خد ساعة من اتنين ستات ربنا يسامحهم
ولا حظت تقريبا اكتر حركة بيعملوها وهما طالعين على شارع من زاوية عمودية او هتطلع من حارتها لازم تتأكد وتشوف الطريق لحد مايبقى فاضي وتيص تاني وحريصة اوييييي واول ماتقرب منها تقوم طالعة قدامك وبالراحة خالص مالهاش دعوة بأي سرعات ولا مسافات - والله واحدة نزلتني من سرعة ستين لحد ماجبت أول عشان اتحرك تاني بالعربية وفي نص الشارع (الحارة الوسطانية) وانا ندمت لأني خليتها تعدي واتا فضلت من غير كلاكس ولا نور لحد ما حسيت انها تقريبا مش واخدة بالها مني او من الشارع وطبعا لما قلت ازمر وأقلب نور والله استخسرت الكلاكس والنور مش بخل بس ماكانشي ليهم اي لزمة !!طب اشتم ؟ ازعق بس ؟ اشوح بس بايدي ؟ ولا نور ولا كلاكس ولا الافلام دي عملت اي تأثير ورحت مشغل الانتظار وكل دة عشان البرنسيسة تطلع بعربيتها ! انا والله ماقيش اي مشاكل من اي موقف مع اي واحدة غير الوقوف فجأة دا فعلا اللي ممكن يسبب حادثة وراها ساعتها هتتخض وتدوس بنزين
واكيد البنات اللي هنا طالما دماغهم عربيات وكدة وبيدخلوا على السايت دا اكيد بيقهموا في السواقة كويس وقاهمين كدة كويس وانا ماشفتش واحدة حريفة سواقة الا عمالة تتخانق مع البنات اللي سايقة حواليها وهي ماشية بعربيتها وببقى فرحان اوي ساعتها عشان اللي اكيد البنات مش هتفوت لبعضيها وكمان ببقى عمال اهدي الأمور

[engineer_bondok]

بصراحه تجاربي مع السواقه الحريمي تجارب منيله كانت منها تجربتين كانوا هيموتوني
اولهم نازل من على كوبري الجلاء اللي عند الكلية الحربيه فطبيعي اني نازل من على الكوبري على 90 واول لما انزل من على الكوبري اقلاقي بنت جايه من تحت الكوبري سايقه لادا وبتاخد الطريق من اقصى اليمين لاقصى الشمال ولا هممها انها هاطخبط في نص العربيه عندي ولا اي حاجه بصراحه اللي وقفها حاجه واحده ان واحد صحبي كان راكب ورا خبطلها على الازاز ففقات شوفوا المسافه اد ايه تخيله كان ايه ممكن يحصل ان صاحبي يخبط على ازازها ودي نزلة كوبري.
التجربه التانية بلاش علشان بجد كل ما افتكرها يخصلي حاجه.
مع كل الاحترام للبنات مفروض تتمنعوا من السواقه خالص

[OlaOsman]

الصبر ياااااااااااااااااااااااااااااااا رب

[mohamed_kta]

السلام عليكم

انا حسيت ان كل الحوادث اللى فى مصر سببها الستات من الموضوع ده !!!

انا بصراحه مش معاكم ان الستات مش لازم تسوق و انا ناس كتير قالو لى بلاش تعلم زوجتك اللسواقه اتعلم انتا بس لكن بصراحه انا ليه وجهة نظر " أن الست اللى بتسوق معايا مركب الحياة أكيد تقدر تسوق عربية " مع مراعاة ان الواحد لازم ينبه عليها تاخد بالها و تتحكم فى أعصبها أكتر طبعاً بحكم أنها ست و أظن أن مراتك أو أختك أو أمك تسوق أفضل من سائق التاكسى أو الميكروباص.


و أخيراً " رفقاً بالقوارير" أو كما قال صلى الله عليه و سلم