حامل لواء التصدي لحملة خلوها تصدي

[مصراوي جدا]

حامل لواء التصدي لحملة خلوها تصدي

معلش العنوان جامد شوية .. التصدي للحملة ؟؟!! .. يعني مش مع الحملة ؟؟!! .. يعني ضدها ؟؟!! .. أيوة ضدها .. والاختلاف في الرأي لا يفسد للود قضية ..

انا شايف ان الحملة اخدت ابعاد تانية خالص .. واصبح فيه حماس شديد لها والظاهر احداث غزة وشعور المصريين انهم مش قادرين يعملوا حاجه هناك خلا معظمهم الظاهر يعتقد ان محاربة وكلاء السيارات في مصر جزء لا يتجزأ من محاربة اليهود والاسرائيليين في غزة

واليكم وجهة النظر المخالفة :

بهدوء شديد .. نسترجع الأمور مشيت ازاي ..

لسنوات طويلة الوضع الاقتصادي في العالم كله ماشي عادي مستقر .. وفجأة بدأت انهيارات البورصات العالمية وطبعا مصر اتأثرت بيها .. ثم تلاها الأزمة المالية العالمية اللي بدأت في أمريكا من خلال مشكلة الرهن العقاري اللي ملخصها ان ملايين الأمريكان اشتروا عقارات ومقدروش يسددوا القروض والبنوك اخدت منهم العقارات وطردتهم .. أصبح فيه ناس كتير في الشارع .. اصبح فيه ركود وكساد عام في أمريكا .. وطبعا أول السلع اللي الناس بتستغنى عنها في حالات الركود هي السيارات فكانت اول الشركات المتأثرة بالأزمة المالية هي شركات السيارات الثلاثة جنرال موتورز وفورد وكرايزلار وطلبوا 37 مليار دولار علشان ميقفلوش ويسرحوا الموظفين وتنهار صناعة السيارات في أمريكا وبعد مداولات بين بوش والكونجرس وخلافه تم الموافقة على حدود 15 مليار او اقل شوية
بالطبع السيارات لم تكن هي الصناعة الوحيدة اللي اتأثرت بالأزمة المالية لكنه كانت اسرع صناعة ظهرت المشكلة فيها

طيب لما يعلن بعض المعارض أو المصانع في أمريكا عن خصومات عالية أو اشتري عربية تاخد واحدة مجانا هل ده لأن أرباحهم خرافية وبالتالي لما البيع قل او وقف قالوا لما نخفف شوية من أرباحنا علشان نبيع .. بالتأكيد لأ .. هو لما بيعمل كده بيخسر بالتأكيد انما هو عايز يسيل فلوس بدل من مخزون العربيات اللي عنده.

طيب نيجي لمصر ..

الازمة المالية طبعا رمت بظلالها على العالم كله .. بيع العربيات في مصر كان بيعتمد بشكل كبير جدا جدا على البنوك في بيع التقسيط وليس الكاش وبالتالي مع الازمة المالية بدأت شركات كتير تقلل عدد موظفينها أو تقلل الرواتب او المكافآت والحوافز اللي كان الموظف عامل حسابه عليها في سداد أقساط العربية الجديدة بتاعته والنتيجة .. ناس كتير مش بتسدد للبنوك الاقساط المستحقة عليها .. بعض البنوك توقفت تماما عن التقسيط واتجهت للتحصيل ومتابعة المتعثرين او المتوقفين عن السداد..

ده طبعا اثر على السوق بشكل عام وبالطبع على سوق السيارات بشكل خاص ان المبيعات قلت جدا لأنها كانت معتمدة على البنوك في البيع بالتقسيط .. وبدأ المخزون يرتفع لدى الوكلاء ..
تزامن الكلام ده مع تغيرات في أسعار العملات .. اليورو انخفض فأعلن وكلاء السيارات الأوروبية انخفاض الأسعار .. لكن الين ارتفع وبعض وكلاء السيارات الياباني رفعوا الاسعار والبعض اكتفى بعدم زيادتها..

بالتأكيد كل الوكلاء طالبوا الشركات الأم بتخفيض سعر السيارات لامكانية مواجهة السوق انما ده على الانتاج الجديد اللي هيوصل في الشهور الأولى من 2009 أما المخزون اللي عندهم واللي هو من اواخر 2008 (سواء موديلات 2008 أو 2009) فده بالأسعار العادية القديمة

فيه مصانع سيارات تجميع محلي عندها خطوط انتاج شغالة وعمال شغالين والبيع ضعيف يعني الخطوط معرضة للتوقف والعمالة معرضة للتسريح ان ما كانش بدأ فعلا تخفيض العمالة بالذات في شركات التجميع المحلي لأن دي خطوط انتاج شغالة مش معارض بيع فقط

طيب بعيدا عن السيارات ايه الموقف تاني
طبعا البنوك كان معظمها شغال على تقسيط السيارات وبالتالي اتأثرت بالأزمة وبدأت في الاستغناء عن موظفين.

أحد شركات الأجهزة المنزلية منزل اعلان صفحة كاملة في الأهرام انه بيبيع بالتكلفة مشاركة منه للشعب المصري في مواجهة الأزمة المالية وطبعا هو تصرف ذكي منه لارجاع المبيعات المفقودة بالتأكيد

شركة أجهزة تلفزيون مشهورة منزله في الاهرام والأخبار عدة صفحات عن منتجاتها وبأسعار مخفضة .. يعني قطاع الأجهزة المنزلية هو كمان اتأثر كتير بالحالة الاقتصادية والمبيعات قلت بشكل عام

حالة ركود عام بدأت بالفعل في كل المجالات .. سياحة .. صناعة .. تجارة.. وده معناه تسريح للموظفين خاصة في شركات التصنيع اللي فيها خطوط انتاج لازم تشتغل..

يبقى في ظل الظروف دي نيجي نقول هنقاطع شراء السيارات ومش هنشتري الا لو الوكلاء نزلوا الأسعار من 30 % الى 50 % ليه هي أرباحهم كانت كام مع احترامي للحسابات الطويلة العريضة اللي فيه ناس عاملينها مطلع العربية ربحها 40% و 50% للوكيل طبعا كلام غير صحيح على الاطلاق

ده ببساطة انا باعتبره استغلال للموقف وكأننا بنقول لهم لو مش هتبيعوا بخسارة يبقى خلوها تصدي.. وبالفعل البعض قالها : الوكلاء كسبوا كتير ، يعني عايز يقول لازم نخسرهم ولازم نجبرهم يبيعوا بخسارة ونستغل الموقف.

لكن لو الموضوع كده . أرجو تعديل شعار الحملة من (خلوها تصدي) وتكون موجهة للسيارات فقط الى حملة (خلوها تخرب) وتتوجه لكل التجار والمنتجين في مصر
يعني نرفع شعار خلوها تخرب ونتوقف عن شراء أي أجهزة منزلية لمدة عدة أشهر علشان تجار ومصنعي الأجهزة المنزلية يضطروا لبيعها بالخسارة بخصم 50 و لا 60 %

وكمان نتجه للهايبر ماركت (زي كارفور وهايبر وسبينس وغيرهم) ونرفع شعار خلوها تخرب ونتوقف عن الشراء منها شهر ولا اتنين ونجيب بقالتنا من البقالين جنب البيت لحد ما يعملوا خصم 50 % على كل البقالة والمنتجات في الهايبر ماركت ويبيعوا لنا بالخسارة وكفاية اوي المكاسب اللي كسبوها.

هو ده المنطق اللي انا شايفه في حملة خلوها تصدي – وعلشان كده لو مصرين على الحملة دي يبقى حولوها الى حملة (خلوها تخرب) وتوجه لكل السوق المصري في شتى المجالات ونخرب اقتصاد البلد بايدينا بدل ما نحاول نصلحه ونلاقي اخواتنا واهلنا في الشارع وكل يوم واحد جديد نعرفه نسمع ان شركته قفلت وتم تسريحه علشان احنا بنحارب الشركات دي وكأنها شركات يهودية هي اللي بتحارب وتدمر في غزة أو كأنها شركات دانماركية لازم نقاطعها لنشرها رسوم مسيئة للرسول.

أرجو كل واحد يراجع نفسه ويعرف مسئوليته عن اللي بيقوله وبيروج له من أفكار لأنه هيتحاسب عليه مصداقا لآية قوله تعالى (ما يلفظ من قول إلا لديه رقيب عتيد)


دي وجهة نظري وارحب بالرأي الآخر والمعارضين

مصراوي جدا .. مصري محب لبلده يتمنى أن يراها في أحسن صورة وأن يرى المصريين يحبوا بعضهم ويساندوا بعضهم في المحن وليس أي شيء آخر

[ahmed_su]

هى وجهة نظر ياباشمهندس

بس اتوقع ان الموضوع ده هيشتعل قريب ..ربنا يستر

[Samir Elshahawy]

سيدي الفاضل أنت بنفسك قولتها

ده طبعا اثر على السوق بشكل عام وبالطبع على سوق السيارات بشكل خاص ان المبيعات قلت جدا لأنها كانت معتمدة على البنوك في البيع بالتقسيط .. وبدأ المخزون يرتفع لدى الوكلاء ..
تزامن الكلام ده مع تغيرات في أسعار العملات .. اليورو انخفض فأعلن وكلاء السيارات الأوروبية انخفاض الأسعار .. لكن الين ارتفع وبعض وكلاء السيارات الياباني رفعوا الاسعار والبعض اكتفى بعدم زيادتها

أذا مامعني أن تظل الاسعار في مصر علي حالها أذا كان الوكلاء قد أشتروا من الخارج في ظل هبوط الاسعار بالخارج ليبيعوا بنفس الاسعار بل ووصل الامر ببعضهم أن يعلن زيادة الاسعار 10000 جنيه

هذا هو الجشع بعينه ثم اليست دول الخليج و السعودية بقريبة منا ام نحن نعيش في كوكب تاني

كيف تنخفض الاسعار بكل هذه الدول و هنا في مصر و لا كأن شئ يحدث

كما أن حكومتنا الرشيدة تتبع منذ سنوات سياسة السوق و تشجع رجال الاعمال الذين طالما غنوا علينا أغنية العرض و الطلب

أذا هذا هو مبدأ السوق عرض و طلب و نحن لا نستطيع الشراء بهذه الاسعار و لا نحتاج لهذه السلعة بهذا السعر , يأما تنخفض الاسعار يأما يخلوا بضاعتهم عندهم و بين البائع و الشاري أيه ؟؟

و صدقني عندما تنجح هذه الحملة في مجال السيارات ستنفتح الابواب لحملات أخري لسلع أخري لان الجشع و الاستغلال قد أستشروا في هذه البلد فلا تستعجل عزيزي المصري فالمقاطعة قادمة و الخراب قادم لا محالة سواء قاطعنا أم لم نقاطع

[mohamed_karara]

يعنى نفضل ساكتين على القرف دة الموضوع مش موضوع ازمة اقتصادية الموضوع موضع ان العربيات اصلا كلها فهلوة لما عربية زى الافيوا تيجى من كوريا 80 الف لما تتجمع محلى على خط انتاج مصرى و تتباع ب 78 الف دة اسمها اة موضوع الازمة دة جة شرارة علشان تولع و تفوق الناس من الى بيحصل مش اكتر علشان كدا هتلاقى 90% من الناس هيكونوا مع الحملة حضرتك طبعا متحمس لان حضرتك شغال فى مجال السيارات الى هوا مهدد بالانهيار يعنى قطع عيش فشىء طبيعى تكون ضدد الحملة

[pharonicking]

كلامك جميل ولكن ليه الاسعار هنا مش زى السعودية ودول الخليج ؟ حتقولى الضرايب والكلام دة؟ هو احنا حنفضل كدة نشترى بالاسعار المفترية دى لحد امتى؟ حرااااااام بقى؟

[mk20022002]

حررررررررررررررررررررام

[mk20022002]

يعنى نفضل ساكتين على القرف دة الموضوع مش موضوع ازمة اقتصادية الموضوع موضع ان العربيات اصلا كلها فهلوة لما عربية زى الافيوا تيجى من كوريا 80 الف لما تتجمع محلى على خط انتاج مصرى و تتباع ب 78 الف دة اسمها اة موضوع الازمة دة جة شرارة علشان تولع و تفوق الناس من الى بيحصل مش اكتر علشان كدا هتلاقى 90% من الناس هيكونوا مع الحملة حضرتك طبعا متحمس لان حضرتك شغال فى مجال السيارات الى هوا مهدد بالانهيار يعنى قطع عيش فشىء طبيعى تكون ضدد الحملة

معااااااال يا باشاااااااااااا قلبا و قالباااااااا 10000000

[mk20022002]

قال الاقتصادي السعودي فضل البوعينين إن وكلاء وموزعي السيارات في الولايات المتحدة باتوا يقدمون عروضاً تسويقية كبيرة مثل "اشتر سيارة وخذ الثانية مجاناً" على عكس منطقة الخليج والشرق الأوسط.

وأضاف البوعينين : "أنهم (الولايات المتحدة) تعاملوا مع الواقع لمعالجة مشكلة تكدس السيارات في المخازن بعكس وكلاء السيارات عندنا فهم يتعاملون مع الواقع بتعالٍ، فكلنا شاهد أزمة السيارات تصل إلى دبي ومن الطبيعي أن تنتقل إلينا وبالنهاية ستنخفض قيمة السيارات لدينا لعدة أسباب".وذلك حسبما ذكرت صحيفة "الجزيرة" السعودية.

وأوضح الخبير السعودي الأسباب قائلا : "المنتج في بلده الأصلي انخفضت قيمته كما أن تكدس السيارات في المخازن يشكل ضغطاً نفسياً على وكلاء السيارات، خاصة أننا في نهاية العام وأي تأخير في خفض الأسعار سيسبب مشكلة، وأخيرا القوة الشرائية في الوقت الحالي أضعف مما كانت عليه، لذلك الطلب سيقل على السيارات، فإذا لم يخفضوا الأسعار ونظروا إلى أن هذه الأزمة غير مؤثرة فسيتضررون كثيرا وسينكشفون".

وتوقع البوعينين انخفاض أسعار السيارات يف السعودية 30%، "وإلا فالمستهلك السعودي سيتجه إلى الأسواق المجاورة بحثاً عن أسعار أقل أو أفضل



اشمعنة دوووووووووووووووووول بيفهموا و احنا لا....ادى السعودية اللى اصلا اللاسعااااااااار عندهم اقل مننا يبقى اللى بيحصل فينا دة اسمة اييييييييييييييييييية خليك حقانى يا باش مهندس

[nanash]

سيدي الفاضل أنت بنفسك قولتها


أذا مامعني أن تظل الاسعار في مصر علي حالها أذا كان الوكلاء قد أشتروا من الخارج في ظل هبوط الاسعار بالخارج ليبيعوا بنفس الاسعار بل ووصل الامر ببعضهم أن يعلن زيادة الاسعار 10000 جنيه

هذا هو الجشع بعينه ثم اليست دول الخليج و السعودية بقريبة منا ام نحن نعيش في كوكب تاني

كيف تنخفض الاسعار بكل هذه الدول و هنا في مصر و لا كأن شئ يحدث

كما أن حكومتنا الرشيدة تتبع منذ سنوات سياسة السوق و تشجع رجال الاعمال الذين طالما غنوا علينا أغنية العرض و الطلب

أذا هذا هو مبدأ السوق عرض و طلب و نحن لا نستطيع الشراء بهذه الاسعار و لا نحتاج لهذه السلعة بهذا السعر , يأما تنخفض الاسعار يأما يخلوا بضاعتهم عندهم و بين البائع و الشاري أيه ؟؟

و صدقني عندما تنجح هذه الحملة في مجال السيارات ستنفتح الابواب لحملات أخري لسلع أخري لان الجشع و الاستغلال قد أستشروا في هذه البلد فلا تستعجل عزيزي المصري فالمقاطعة قادمة و الخراب قادم لا محالة سواء قاطعنا أم لم نقاطع

100000000+

[sa3dawy]

ياباشاا ما الوكلاء بيجيبوا مثلا من امريكا (الاسعار الى نزلت جدا ) وبيبعوهالنا بنفس السعر او بيغلوا كمان .. انت فاهم قصدى ؟
طبعا محدش قصدوو هنا خسارة الموزع او الوكيل او المعرض ... لمن على الاقل يقللوا هامش الربح شوية زى العالم كلة
لمن لو حملة خلوها تصدى عايزا الناس تخسر يبقى انا مش معاها على الاطلاق وباى شكل من الاشكال

[sherifahmed]

reply

حضرتك بتقول "ده ببساطة انا باعتبره استغلال للموقف "
هو مش باردو الوكلا استغلو الموقف لما الين زاد فى دفعات كانت بالسعر الاديم
هو مش باردو توكيل متسوبيشى منزل لسا اللانسر الاديمه استغلالا للموقف
الحكايه كولها مصلحتى فين
ولا هو حلال للوكلا و حرام علينا

[amelsahn]

حبه من هنا و حبه من هنا

هى حضرتك طبعاً وجهه نظر تستحق الدراسه... أعتقد المشكله ان احنا اتعودنا على ان التجار أو رجال الأعمال أو الباعه بصفه عامه بيخطفونا "مقص حرامية" و يحاولو يشيلو الواحد البيعه بأسعار مغالى فيها و يجرى و علشان كده الناس دلوقتي بتحاول ترد للتجار القلم بس هيا فعلاً ممكن جداً أخرتها تبقى خراب على الكل لأن فى الأخر ما هو اللى واقف فى المعرض أو اللى شغال فى المصنع ده أخويا و أخوك.

لكن....

بعد أما اتفقت معاك على احتمالية النهايه التعيسه على الكل اسمح لى أقول ان فعلاً التجار بيفترو، مش بس فى السعر، كمان فى الأسلوب و بيتعاملو مع المشترى على أنه غصب عنه حيشترى... هنا بقى نيجى للمهم... لازم التاجر يفهم انه لازم يبزل مجهود علشان يرضى الزبون لازم يقبل انه زى ما بيكسب كثير (طبعاً مش 30 أو 40%... يمكن بالكثير 10%) لازم يكسب الزبون برده... الناس بره فى موسم التخفيضات بتنزل فعلاً الحاجه بالـ50 و الـ75% مش زى عندنا يكتبلك على الفترينا "تخفيضات حتى 80%" و تخش تسأل تلاقيها على جوز شربات و غلباً بيكونو خلصو!!! لازم التاجر يعرف ان الزبون هو الأساس، مش التاجر ولا السلعه... الزبوووون!

نهايةً... أعتقد ان - على رأى جدى الله يرحمه - خير الأمور الوسط... حبه من هنا على حبه من هنا و الدنيا تمشى... أكيد مافيش حد عايز يوقف حال البلد بس فعلاً على رأى الحج سيد... "خلى شويه عليه و شويه عليك"

[Dr_Smart]

طبعا مع احترامنا لوجهة نظر حضرتك

الناس مش عايزه حد يخسر ولا عايزين نخرب بيوت

لكن عايزين سوق السيارات في مصر يكون حاله زي حال اسواق السيارات في العالم كله

من ناحية :
1- الربح يكون معقول مايكونش فيه جشع ويتناسب مع حال المواطن المصري والحالة الاقتصاديه السيئة اللي عايشينها قبل العالم
2- لازم يكون فيه عروض وهدايا وإغراءات للشراء ... روح شوف الخليج ... تامين وترخيص مجاني ... صيانات مجانية ... كوبونات بنزين ... هدايا ... خصومات خاصه جدا للكاش ... اشتريها النهارده وادفع اول قسط السنة الجاية ... الخ
3- الاوبشنز اللي بتتشال من العربية وتعتبر اساسيات في كل دول العالم !!!
4- تحسين خدمات مابعد البيع .. من صيانة وتوفير قطع الغيار ...مش بيع واجري !

يعني من الاخر التاجر الشاطر هو اللي هيقدر يكمل ... واللي بيضحك عالناس ويستغلهم يبقى يقفل احسن .

اسف عالاطالة

[Samir Elshahawy]

و بعدين سيادتك بتتكلم عن الاسعار بس ليه , ليه مافيش حد بيتكلم عن مواصفات و نوعية السيارات الزبالة اللي هنا في مصر عربيات منزوعة من كل حاجة

يعني الدايو او الهيونداي اللي هما أكتر حاجة في شوارعنا هنا زي اللي بيمشوا في الخليج و لا أوروبا

أقسم بالله أنا لسه الاسبوع ده شايف لانوس فيها اللي بيقولوا عليه هنا كماليات ( ايرباج - اي بي اس - ملتي فانكشن - فتحة سقف - موتور 1600 سي سي - أوتوماتيك ) و سعرها اقل من هنا بكتيييييييير و ده مثل مش هاأقولك بقي فيرنا و لا النترا و لا لانسر

يعني لما العربيات اللي عندنا منزوعة من كل الحاجات دي و تبقي أغلي يبقي ده أسمه ايه ؟؟؟

يا راجل عيب ... ده أحنا مش بس نعمل مقاطعة ده أحنا من حقنا نعمل ثورة و نولع لهم في التوكيلات بتاعتهم

بس هاأقولك أيه , حسبي الله و نعم الوكيل في اللي بيظلمونا و بينهبونا

[Imhotep]

مع كامل تقديرى لوجهة نظر صاحب الموضوع، الا ان المسألة لها بعد اعمق كثيرا من مجرد حملة لمقاطعة الجشع فى بيع السيارات من قبل الوكلاء. ما يراه صاحب الموضوع من مشكلة امتداد الموضوع الى اشياء اخرى غير السيارات، اراه انا يقظة متأخرة جدا للوعى الجمعى فى المجتمع المصرى وللمستهلك خاصة بحقوقه. لنتفق اولا اننا كمستهلكين يتم معاملتنا كأسوأ ما يكون، ويكفى شعار لا وجود له الا فى مصر وهو (البضاعة المباعة لا ترد ولا تستبدل) اى (البس) ما تشتريه. ثانيا لا وجود حقيقى لخدمات ما بعد البيع، لاى سلعة مشتراة. ثالثا لا وجود حقيقى لرقابة من اى نوع على الاسعار و جشع التجار هو المتحكم فى السعر، والنتيجة المنطقية هى ان من يتذوق المكسب العالى المبالغ فيه بدون مساءلة من اى احد، فلماذا يقوم بنفسه بتخفيض مكسبه؟ لن يحدث الا بضغط غير طبيعى مثل الذى نمارسه الان من خلال الحملة. رابعا، ومنذ عصر ما قبل الانترنت، يوجد فى المجتمعات الواعية والناضجة اجتماعيا ثقافة وعى الانسان بحقوقه وواجباته، لذلك تتقدم هذه المجتمعات الى الامام لان المحصلة لهذا الوعى تدفع للامام. و ابسط مثال على ذلك هو اننا يوم عطلة عيد العمال نفرح كثيرا لكونه عطلة نستريح فيها من الذهاب للعمل و فرصة (للانتخة)، بينما فى مجتمعات اخرى، يتم تنظيم المظاهرات السلمية للمطالبة بزيادة الاجور.
يا سيدى الفاضل لولا التقدم فى عالم الاتصالات و الانترنت ما بدأنا نضع اقدامنا على اول الطريق الذى بدأه غيرنا قبلنا بعشرات، ان لم يكن مئات السنين.
وانت، يا عزيزى، لا تستطيع ادارة عقارب الساعة الى الوراء، فالمد هذه المرة، يحمل من قوة الدفع الكثير و الكثيرمن مخزون ظلم المستهلك و هضم حقوقه، والتعامل معه كأسوأ ما يكون.