نرجو مساعدة من المتخصصين كابرس 94

[lonedoctor]

والله ياباش مهندس هو ده العيب الذى ظهر فى الاسكانر electric spark generator module ويمكن انا ا غلطت فى الاول نظرا لاتى ما كنت واخد بالى فى المرة الاولى بس المرة دى اخدت بالى كويس وكمان خليت الميكانيكى يورينى كل اجزاء دائرة الاشعال فوجدت جزء اسمه الكويل بجانبه مشط وكتاوت وهو ده الشئ الباقى الذى لم يتم تغييره فى هذه الدائرة وبالمناسبة انا لما قلت لك ان السيارة لا يوجد بها مشط كان بناء على كلام الميكانيكى وبالمناسبة انا طبيب ولست متخصص فى الميكانيكا ومعلوماتى اما تكون بالقراءة او سؤال االمختصين
وجزاك الله خير على تعبك معايا

[lonedoctor]

بس انا اعتقد من الناحية اللغوية وليست التقنية طبعا انه module معاناها تقريبا system or unit

[samirayad]

والله ياباش مهندس هو ده العيب الذى ظهر فى الاسكانر

يا أخى ....بارك الله فيك ....تمام كده أتضحت الأمور ....وحنفكر مع حضرتك على المعنى المقصود وكلمة موديول module من خلال معجم المصطلحات الهندسيه ( بتعنى تركيبه عياريه جاهزه لتجميع المعدات ) ده طبعا معناها فى هندسة الكهرباء......يعنى كارته مثلا لتجميع مكونات كهربيه (زى وحدة ألكترونيه )

فوجدت جزء اسمه الكويل بجانبه مشط وكتاوت وهو ده

لو تسمحلى ....عاوز أقولك على حاجه ......لما العربيه بتعمل الحركات دى .....بتلاقى البوبينا سخنه ومولعه من شدة السخونه .....أصلنا حنجرب العلاج على 3 مراحل (أختبار سخونه للبوبينا _ الأتجاه نحو المشط بعد كده - ولو ده مجبش نتيجه ) يبقى كمبيوتر العربيه (دايرته الألكترونيه المصممه جواه لمتابعة شرارة البوجيهات ) هى اللى مريضه للأسف .......ودى حنخليها آخر مرحله للعلاج بمناسبة أن حضرتك أخ وطبيب مصرى وأخونا المقيم بالسعوديه ...........

[samirayad]

على فكره كلمة كويل يعنى ملف .....يعنى ملف الأشعال ignition coil ............وده اللى بنسميه البوبينا عندنا ( يعنى الكويل ده هو البوبينا المقصوده )

[lonedoctor]

ساعات عملية الفصل بتحصل فى البداية تماما بعد الدوارة بشئ بسيط وبالتالى انا لا اعتقد ان البوبينة بتكون اترفعت حرارتها لهذه المرحلة ان تؤدى لانقطاع عملها ولو العيب فى الكمبيوتر هتبقى كارثة لان الحل الوحيد انى ارمى هذه العربية بجانب صندوق القمامة وربنا يعوض على

[samirayad]

ساعات عملية الفصل بتحصل فى البداية تماما بعد الدوارة بشئ بسيط وبالتالى انا لا اعتقد ان البوبينة

فعلا كده يبقى البوبينا مستبعده من التشخيص......طيب أيه موضوع المشط ....هل متاح أمامك ............قبل موضوع الصندوق ده ( ههههههههههه ) ولازم يادكتور ......الواحد لايفقد الأمل فى علاج أى حاله .....زى الطب بالضبط ...........بيبقى الواحد بيطلع فى الروح ولكن هناك أراده من الله فى أطالة عمره ( وكل شىء بقدر طبعا ) فشوف جزئية المشط دى الأول ...........وأيه موضوع الكتاوت ده برضه ........متحاول تغيره .........أو طلعه من على قاعدته ونظف القاعده كويس بمنظف الكترونيات ....وركبه تانى فى مكانه بأحكام ( يمكن يكون ليه دور فى دايرة الأشعال وعامل تلامس ردىء bad contact وبيعلق ساعات )

[samirayad]

برضه فيه ملحوظه كده جات على بالى بخصوص الكارته ......متخللى كهربائى كويس يشيك على كل توصيلاتها ويراجع على جميع الكابلات الخارجه منها الى مختلف الدواير الألكترونيه بالسياره ............يمكن كابلات دايرة الأشعال .....مش محكمه على الكارته .....لأنها لو مش محكمه ........حتعمل نفس الأعراض

[lonedoctor]

في قطعة الكترونية بجانب الكويل والتى كنت معتقد انها المشط المهم بحثت عنها فى النت طلعت هى نفس الاسم اللى بيطلع فى الكمبيوتر الاسكانرelectric spark generator module يعنى هى دى الموديول فى موقع شركة gm المهم رحت غيرتها دلوقت حالا ب 250 ريال ب الفصال ومافى فايدة الوضع كما هو والله انا خلاص حاسس انى وصلت لطريق مسدود
فى شئ جديد ظهر وهو ان الدوارة فى الاول ساعات بتتاخر والماكينة بتتهز جامد لغاية ما احاول فيها كام مرة تدور
ممكن يكون عيب بخاخات ومحتاجة تنظيف او تغيير؟

[samirayad]

ومافى فايدة الوضع كما هو

يعنى أيه كما هو ......طيب ماحضرتك ....أفصل البطاريه ....وأنتظر قليلا .....ووصلها تانى ....وأعمل أيدل ليرننج مثلا لو كان متاح طريقته معاك بالنسبه للموديل بتاع العربيه دى وجرب تانى الدواره ...

فى شئ جديد ظهر وهو ان الدوارة فى الاول ساعات بتتاخر والماكينة بتتهز جامد لغاية ما احاول فيها كام مرة تدور
ممكن يكون عيب بخاخات ومحتاجة تنظيف او تغيير؟

طبعا تأخير الدواره ....ممكن يكون عيب رشاشات (عاوزه تتنظف - الرشاشات نفسها وحشه - فيش الرشاشات عاوزه تتنظف بمنظف ألكترونيات وتتقفل تانى - الضفيره بتاعة الرشاشات مش كويسه - الأتصال الكهربى بين الرشاشات ووحدة التحكم مش جيد وهكذا ).....والمفروض تجرب جزئية فصل البطاريه وتوصيلها وتانى .....ونظف الفيش بتاعة الرشاشات وتجرب الوضع الجديد .....ونشوف الأداء شكله أيه (علشان ندى فرصه لوحدة التحكم للتعرف على القطعه الجديده )......ولو الأداء معجبناش ....نعمل أسكانر تانى ونشوف الأسكانر حيقولنا أيه تانى ...........والصراحه الواحد مدايق علشان حضرتك ..........بس أنا شخصيا ....لا أفقد الأمل فى أى شىء .....مهما حاولت معاه .....أصل مفيش حاجه ملهاش حل ......الحاجه الوحيده اللى ملهاش حل .............هى الموت ........وياريت يادكتور تطلع على الموضوع ده ..http://www.nilemotors.net/Nile/showthread.php?t=75775....وتقوللى مظاهر الشكوى الجديده (غير موضوع صعوبة الدواره الجديد ده )......وهل سعادتك جربت بعد العربيه مادارت ...بعد الصعوبه ....ومشيت بيها وطفت منك تانى .....يعنى حاول تستفيض ....وتعرفنا أبعاد كل حاجه ......وسيادتك عارف أن كل ماالمريض (أفاض على طبيبه بالمعلومات ......ربنا بييسر للطبيب بألتقاط معلومات بتفيده فى تشخيص الحاله ) ........كما وارد بالموضوع المحول لحضرتك .............أرجو من الله التوفيق ....فى المتابعه القادمه بيننا وبينك ............المقصود بالرشاشات فى كلامى طبعا البخاخات باللغه السعودى

[samirayad]

ياريت بعد أذنك يادكتور .....تدينا البيانات اللى مطلوبه فى الموضوع المحول لحضرتك من 1 الى 13 بقدر الأمكان مع مظاهر الشكوى بالضبط بعد تجربة السياره .....وحتى بعد ماتدور بصعوبه ......يمكن نلاقى ثغره تانيه برضه ....نلقط منها معلومه تفيدنا فى التشخيص ........وعزرا على كثرة الأسئله من طرفى ...............

[lonedoctor]

والله انا حاسس انه هو ده سبب المشكلة وكلام سعادتك منطقى جدا ويوم السبت ان شاء الله هاروح للميكانيكى ونبدا رحلة فحص واصلاح البخاخات يمكن هى السبب بس يا ترى في طريقة نعرف منها اذا كانت خربانة تماما ولا بس تحتاج تنظيف؟

[ahmed1981]

ساعات عملية الفصل بتحصل فى البداية تماما بعد الدوارة بشئ بسيط وبالتالى انا لا اعتقد ان البوبينة بتكون اترفعت حرارتها لهذه المرحلة ان تؤدى لانقطاع عملها

أخبار مفتاح الكونتاكت (السويتش) إيه ؟؟؟
لو بايظ ممكن يكون هو السبب في كل هذه المشاكل
عن طريق أنه يفصل من الإهتزاز ويعمل مرة أخرى بعد هزه وتدويره

[samirayad]

بس يا ترى في طريقة نعرف منها اذا كانت خربانة تماما ولا بس تحتاج تنظيف؟

عملية التنظيف لأى حاجه معروفه .....وهى أزالة كل الملوثات اللى فى الحاجه دى ......فمثلا

- وسيادتك أستاذنا فى الجزئيه دى .....فى المجال الطبى .....التنظيف للجروح بيكون بهدف أزالة أى ملوثات ناتجه من سبب ما ......زى تلوث الجروح مثلا......نرجع بقه للرشاشات .....والمكن وخلافه ....

- تنظيف الرشاشات ...الهدف منه أزالة كل الرواسب ....اللى متحوشه جوه الرشاش......رواسب من بنزين مش كويس أو مغشوش مثلا .......

_ أما لو الرشاشات (البخاخات ) خربانه .....فده ليه نظام تانى .....وبيتم التعرف على كفاءة الرشاش الخربان .....أما من خلال...........

_ أختبار تسييل للرشاش ......بتكون أبرة بلف الرشاش ....مش قاعده كويس على قاعدة الأبره مثلا ......وعملية التنظيف مبتديش نتيجه للحاله دى ( وبالتالى بنضطر لتغيير الرشاش ).................

- أو بتكون مقاومة كويل الرشاش تلفت وأتغيرت قيمتها ....ومبتقدرش تسحب مكونات الرشاش كويس ....لما بيجيلها كهرباء .....بيكون قلب الرشاش بيلعب جوه الرشاش مثلا ....وعملية ضخ البنزين مش مظبوطه ...............

[ahmed1981]

ولا تنسى التأكد من أن فلتر البنزين سليم
أو قم بتغييره

[lonedoctor]

السويتش سليم وانا غيرته من فترة ليست طويلة واختبرته اكتر من مرة فلم يكن له علاقة بهذا الموضوع وجزى الله الجميع خيرا على تفاعلهم معايا وان شاء الله يكون خير وتتزال الغمة ونعرف سبب المشكلة
والله ياجماعة انتم لا تتخيلوا الحياة فى الخليج بدون سيارة لاتطاق والحمد لله على كل حال كان المفروض اشترى سيارة زيرو من الاول واريح نفسى لكن العجز والكيس بقدر