نرجو مساعدة من المتخصصين كابرس 94

[samirayad]

- عاوزك بقه تخللى الميكانيكى يحل البلف ده (الأيدل كنترولر من على البوابه ) ويروقه تمام بأى مزيل صدأ وزيوت عندك فى السعوديه .....ويروقه الترويقه اللى هى بالهواء على خفيف .....لأن ممكن تلاقيه مليس من الزيت والرمل والأتربه .......وركبه تانى مكانه وجرب ......لأنه لو مكتوم .....حيعمل الأعراض بتاعة المكنه الحاليه ..........

[lonedoctor]

انا حاسس انه بلف الايدل ده هو سبب المصايب وحقيقة انا اليوم عملت تجربة وهى انه انا وقفت على جنب وبالمناسبة كنت رايح الحرم املأ ماء زمزم علشان اخده معايا مصر لانى مسافر بكرة ان شاء الله وشديت فيش الحساس ده او ما يطلق\ عليه بلف الايدل وبمجرد ما فعلت ذلك فوجئت بان صوت العربية اصبح عالى جدا كأنى دايس بنزين بعد كدة وصلت الفيشة تانى فلم يهدأ صوت الموتور طفيت السويتش وبعدين فتحته تانى اشتغلت الماكينة بصوت هادى زى الاول المهم انا مشيت عليها كذا مشوار ولم تنطفأ الحمد لله ولا ادرى هل كان هو السبب وكان معلق او كان محتاج توليف تانى مع كمبيوتر السيارة بس بشكل عام سلانسيه السيارة موش حلو والماكينة بتعلى وتوطى
هل هذا الحساس ممكن يتنظف زى بتاه الماف على الاقل اتاكد انه السبب قبل ما اشترى واحد جديد وما هى طريقة تنظيفه
ولك جزيل الشكر ياباشمهندس سمير
معلهش انا كتبت المشاركة دى قبل ما اقرا مشاركتك الاخيرة

وبشكل عام انا ناوى لما ارجع من مصر اغير حساس الهواء والايدل كنترول لو سعرهم فى المعقول او على الاقل اشتريهم مستعمل

[samirayad]

دى صورة بلف الأيدل ....أبو موتور كهربى ......حله من على المكنه ....ورش على الأماكن الموضحه الأسبراى بتاع أزالة الصدأ والشحومات ....وروقه كويس جدا .....وبعد كده ركبه .....وأعمل أيدل ليرن بالطريقه اللى قولتلك عليها وجرب .....وأنا حاسس أن فرجه خلاص قرب أن شاء الله .....ويمكن متحتاجش تشترى حاجه ......بس أبقى أدعيلنا معاك عند الحرم ....على ماربنا يكرمنا ونطلع نحج أن شاء الله....أعمل كليك على الشريط الأسود تحت الصوره علشان تكبر الصوره وتشوف أماكن الأسبراى كويس

[lonedoctor]

النهاردة تركت السيارة للميكانيكى لاصلاحها خلال فترة سفرى وبلغته بخصوص الايدل كونترول فقال ان هذا الشئ الموجود جنب tps خاص بعملية التسخين وليس له علاقة بالسلانسيه وانه هناك حساس تانى راكب جنب التلاجة وهو نظفه من قبل بس حقيقة انا موش مقتنع بالكلام ده
عموما هو هيحاول فيها والله المستعان

[lonedoctor]

امس رجعت من مصر وذهبت للميكانيكى اليوم اشوفه عمل ايه فى السيارة والحقيقة الوضع يزداد سوءا (الحمد لله على كل حال)ولم يستطع اكتشاف المشكلة بحال من الاحوال وعلى حسب كلامه انه فتح الهواء شوية علشان يلغى عمل بلف السلانسيه والمشكلة ان الماكينة اتلخبطت اكتر واصبحت بترعش ومافيش سحب وحاتها حالة وبتطفى اكتر من الاول المهم اتفقنا انه بعد بكرة هيشوف اسلاك الطلمبة بتاعة البنزين ربما يكون فيها شورت او تهريب والله المستعان

[samirayad]

النهاردة تركت السيارة للميكانيكى لاصلاحها خلال فترة سفرى وبلغته بخصوص الايدل كونترول فقال ان هذا الشئ الموجود جنب tps خاص بعملية التسخين وليس له علاقة بالسلانسيه وانه هناك حساس تانى راكب جنب التلاجة وهو نظفه من قبل بس حقيقة انا موش مقتنع بالكلام ده
عموما هو هيحاول فيها والله المستعان

الميكانيكى ده أى كلام .....وواضح أنه مش عارف حاجه
ومعروف أن القطعه اللى بتبقى جنب الtps فى الحقن الألكترونى الكامل .....هى الأيدل كنترولر
وياريت لو ترفعلنا صوره واضحه عن شكل المكنه ....والمنطقه اللى حول بكرة الأكسراتير وبوابة الهواء (اللى راكب عليها حساس ال Tps )

[lonedoctor]

امس رحت لكهربائى تانى واختبر السيارة ورايه انه هناك شورت كت (قفلة)فى مكان ما فى الاسلاك الخاصة بالضفيرة وطلب منى انه احضر له السيارة اليوم من اول النهار ومازلت فى مرحلة التفكير
حصل شئ غريب ياريت يكون له تفسير يا باشمهندس سمير وهى انه انا كنت ركبت مروحة اضافية وكانت راكبة مباشرة على البطارية بدون كتاوت وموضوع انطفاء الماكينة بدا يحصل عللى خفيف بعد الموضوع ده مباشرة وصراحة انا كنت نسيت الموضوع ده او لم اربط بين هذا وذاك المهم فصلت المروحة ولاحظت انه الموضوع شبه انتهى تقريبا ولكن ليس بشكل نهائى والسحب فى السيارة اتحسن كتير
فهل هناك ارتباط؟
السؤال الثانى ما هو المقصود بتنظيف دورة البنزين؟

[samirayad]

1- وجود مروحه أضافيه فى دورة التبريد وبدون كتاوت وحنقول شغاله على طول .....يفيد فى زيادة ورفع كفاءة تبريد المحرك
وتبريد المحرك زياده عن الازم بيقلل السحب والتسارع ويزيد أستهلاك البنزين .....ولكن لايجعل المحرك ينطفىء كما يحدث عندك
ومن أجل الأققناع المنطقى .....
المروحه شغاله على طول ......والعيب بيعتبر عيب طارىء .....
أذا سبب العيب سبب طارىء أيضا ( حته فلسفه دى يادكتور ) ههههههههههه
2- نظافة دورة البنزين
بتعنى نظافة التنك - الخراطيم - تغيير فلتر البنزين وهكذا
سؤال بقه مهم عاوز أسأله ولسه مراودنى حالا
عيب أنطفاء المكنه ده فى أى وقت ( بارده أو ساخنه ) وأنت واقف أو وأنت ماشى
السؤال
هل بيحصل معاك وأنت شايل رجلك من على دواسة البنزين ....دايما لما بتكون ماشى بالعربيه وبتستعمل الفرامل علشان تهدىء وحتوقف العربيه مثلا.......
ولا بتروح عاملاها كده بمزاجها وأنت دايس بنزين برضه وماشى بسرعه .......مهمه برضه الجزئيه اللى فاتت دى
لتحديد العيب من دورة السلانسيه (ساخن أو بارد ) أو مع أى حمل عادى ....علشان نشوف موضوع هواء السلانسيه ده

[lonedoctor]

العيب موجود فى كل الاحوال سواء كان فى السلانسيه او فى المشى الطوالى وبعد كل الحاجات الكتير التى قمت بتغييرها اصبح العيب تقريبا اثناء المشى بالسيارة يعنى وانا دايس بنزين وفى الغالب اشعر وانا ماشى فى الطوالى ان السيارة طفت ماكينة لمدة ثانية او ثاتيتين وبعدين تلقط ويتكرر هذا الموضوع 3--5 مرات وفى اثناء هذه اللحظات احاول ادوس بنزين جامد اكتر من مرة علشان السيارة تقضل شغالة وهنا فى ملحوظة مهمة انه لما ادوس بنزين لا تستجيب السيارة اطلاقا وده بيخليينى ااشعر انه حدث شئ معين فى دورة البنزين بيخليه ينقطع وتوقف ضخه الى الماكينة وفى هذه الحالة افكر فى الطلمبة (انا غيرتها بالمناسبة) او البخاخات او دورة كهرباء البخاخات اللللللللللللللللخ
ثم فى الغالب السيارة تنطفئ
هذا هو الوضع الحالى لكن بداية العيب بدا من 6 شهور بالتوقف المفاجئ بدون سابق انذار كل فترة قد تزيد عن اسبوع مثلا ثم تقلص الوقت بالتدريج حتى اصبح يوميا ثم عدة مرات فى اليوم الى ان وصلنا الى ما نحن فيه الان؟
والله المستعان

[ahmed1981]

المشكلة بدأت تأخذ شكل إنقطاع كهربائي
ممكن الدينامو فيه مشكطلة أو البطارية بتودع أو فيه قفلة في التوصيلات أو تشعيرة سيلك بتقطع وتوصل

[samirayad]

وفى الغالب اشعر وانا ماشى فى الطوالى ان السيارة طفت ماكينة لمدة ثانية او ثاتيتين وبعدين تلقط ويتكرر هذا الموضوع 3--5 مرات وفى اثناء هذه اللحظات احاول ادوس بنزين جامد اكتر من مرة علشان السيارة تقضل شغالة

يعنى مابتبطلش فعلا ......يعنى الكهرباء شغاله ....والبنزين شغال
ده اللى فهمته من كلامك الآن ......
أذا فيه حاجه بتبوظ الحريق ......زى منظومة egr بايظه مثلا ......
عندك فكره عن موضوع أعادة تدوير غازات العادم دى .........
ده بيبقى بلف وليه مكونات ....وبياخد خط تخلخل من بوابة المكنه ....
علشان يدخل شوية عادم لمجمع الهواء......

والله المستعان

نعم .....فلن نصل للحل ألا بعون الله وتوفيقه

[lonedoctor]

الميكانيكى التانى اتصل بى الان وقال لى ان راس الماكينة بايظة كلها وبوابات الهواء كلها خربانة وبالتالى الحساسات لا تعمل اصلا ويجب تغييرها بكرة افوت عليه واشوف الموضوع ده

[lonedoctor]

امسس تم تغيير التلاجة كاملة بحساستها والوضع للاسف كما هو واصبت باكتئاب شديد والميكانيكى الثانى رايه انه ان لم تظبط بعد التلاجة اصبح الشئ الوحيد الباقى هو تغيير الكمبيوتر نفسه وانه هو سبب المشكلة
ياترى يا با شمهندس سمير ايه رايك ؟
انا خلاص بافكر اولع فى العربية دى واخلص منها

[samirayad]

امسس تم تغيير التلاجة كاملة بحساستها والوضع للاسف كما هو واصبت باكتئاب شديد والميكانيكى الثانى رايه انه ان لم تظبط بعد التلاجة اصبح الشئ الوحيد الباقى هو تغيير الكمبيوتر نفسه وانه هو سبب المشكلة

لا حول ولا قوة الا بالله....

ياترى يا با شمهندس سمير ايه رايك ؟

حقول أيه ....مفيش قدامنا حل غير قبول هذا الحل ألاوهو تغيير الكمبيوتر
وسؤال كده على السريع .......
هو بيعمل كام الكمبيوتر بتاعها عندك
والعربيه تمنها كام أجمالا بالنسبه للأسعار عندك ( أتوقع أن العربيه فى حدود 6 الأف ريال مثلا أو يزيد قليلا )

انا خلاص بافكر اولع فى العربية دى واخلص منها

هههههههههههههههه ......
العربيه دى جماد ومتخليهاش تدايقك مهما كانت تكاليف الأصلاح
لأن أعصاب ونفسية الأنسان لا تقارن بأموال العالم كله
وتذكر دائما بيت الشعر التالى
وقد يجمع الله الشتيتين بعدما ......يظنا كل الظن أن لا تلاقيا ......
يعنى ماتفقدش الأمل .......
وعندنا مثل مصرى ....أكيد أنت عارفه ......
بيقولك 99 .......قول ميه
يمكن تكون دى آخر مرحله ....بعدها تنجلى وتتضح كل الأمور ......
وطبعا مش معقول الواحد حيرمى 7 آلاف ......علشان 1000 مثلا
عن نفسى ممكن أصرف مائة ألف فى سبيل أحياء ال7 دول .....بس أموت وأعرف أيه السبب
طبيعه فيا للأسف .....ودايما بأكون مقاتل شرس من أجل الوقوف على سبب أو أسباب الخلل فى الحاجه دى ......
وأهو درس .....والحياه دروس ....وحنستمر فى التعلم الا ماشاء الله ...............

[samirayad]

ياريت برضه تخليه يراجع على كل التوصيلات الكهربيه ......اللى رايحه وجايه ...بين الحساسات ووحدة التحكم ....ويأكد على أتصال كل الفيش بوحدة التحكم.....
جايز يكون الكمبيوتر سليم وفيه فيشه مهزوزه
ونفس الوضع بالنسبه لكل مكونات علب الفيوزات (تكون راكبه تمام على قواعدها بعلب الفيوزات ) سواء كتاوتات أو فيوزات
قبل مرحلة تغيير الكمبيوتر ( وحدة التحكم )